Say Kayamanan Tayo ed Saray Gawa’d-Pitek a Baseha
“Wala so sayan kayarian tayo ed baso a pitek [“gawa’d-pitek a baseha,” NW], pian say sankatageyan ya inkabaleg na pakayari kien komon na Dios, ya agmanlapu ed sikatayo.”—2 CORINTO 4:7.
1. Panon a makapaseseg ed sikatayo so alimbawa nen Jesus?
BANGTA si Jesus et momoldien nen Jehova sanen walad dalin, naeksperiensia ton mismo iray kakapuyan na katooan. Talagan makapaseseg ed sikatayo so alimbawa to ed impanmatoor to! Oniay ibabaga ed sikatayo na apostol: “Ta saya so inkatawag yo: ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Diad impanpasakop to’d ontan a panagmoldi, tinalo nen Jesus so mundo. Pinabiskeg to met iray apostol to a magmaliw a mananalo. (Gawa 4:13, 31; 9:27, 28; 14:3; 19:8) Tan agaylan panamaseseg so inter to ed konklusyon na unor a paliwawa to’d sikara! Inyabawag to: “Sarayan bengatla sinalitak ed sikayo, pian dia ed siak nawalaan kayo na kareenan. Dia ed mundo walaan kayo na kairapan: balet manilalo kayo’d siak tinalok so mundo.”—Juan 16:33.
2. Miduma ed inkabulag na mundo, anton silew so walad sikatayo?
2 Ontan met, kayarin inkomparay inkabulag ya intarok na “dios na sayan panaon” ed samay “silew na ebanghelyo na gloria,” oniay inkuan nen apostol Pablo nipaakar ed mablin ministeryo tayo: ‘Wala so sayan kayarian tayo ed gawa’d-pitek a baseha, pian say sankatageyan ya inkabaleg na pakayari kien komon na Dios, ya agmanlapu ed sikatayo: Naeletan kami ed balang diking et agkami nairapan; manduaruwa kami, et agnaekal so panilalo mi; nausilusilan et ag-akaindan; gineba et ag-iti abagbag.’ (2 Corinto 4:4, 7-9) Anggaman lupok itayon “gawa’d-pitek a baseha,” ontanlay impanmoldi na Dios ed sikatayo ed panamegley na espiritu to pian sigpot tayon makapanbiktorya sumpad mundo nen Satanas.—Roma 8:35-39; 1 Corinto 15:57.
Panagmoldi ed Kadaanan ya Israel
3. Panon a deneskribe nen Isaias so inkamoldi na Judion nasyon?
3 Aliwa lambengat ya indibidual so momoldien nen Jehova noagta intiraminti a nasnasyon. Alimbawa, sanen say kadaanan ya Israel et nanpasakop ed panagmoldi nen Jehova, inmaligwas itan. Balet ta asabin nampaawet itan diad intunganga to. Bilang resulta, say Mananibukel na Israel so angitarok na “abagey” ed satan. (Isaias 45:9) Diad komawalon siglo K.K.P., sinaglawi nen Isaias ed si Jehova so kinabalgay kasalanan na Israel, diad impangikuan: “O Jehova, sika so Ama mi; sikami pitek kami, et sika so domadamili; et sikami ya amin so gawa na limam. . . . saray amin a makapaliket a pasen mi abagbag ira.” (Isaias 64:8-11) Say Israel so amoldi la ed basehan makanepegan lambengat na kadederal.
4. Anton ilustrasyon so inyakto nen Jeremias?
4 Sakey a siglo ed saginonor, legan a manasingger lay agew na pikuekuentaan, imbaga nen Jehova ed si Jeremias a mangala na gawa’d-pitek a saro tan ulopen toray pigaran mamasiken na Jerusalem ed Lawak na Hinnom, ya abilin: “Saman la naani betagen mo so saro ed pakanengneng na saray lalaki a miulop ed sika, et kuan mo naani ed sikara Onia so kuan nen Jehova na saray ehersito: Ontan naani so pamuyak ko ed saya a baley tan saya a syudad, unong a say sakey betagen to so agamil na domadamili, pian agla nagawa lamet.”—Jeremias 19:10, 11.
5. Panon kalaknab so panangukom nen Jehova ed Israel?
5 Nen 607 K.K.P., gineray nen Nabucodonosor so Jerusalem pati say templo to tan kinautibo iray mabilay a Judio ed Babilonia. Balet kayari 70 taon na inkadestiero, akapawil iray magbabawin Judio pian ipaalagey lamet so Jerusalem tan say templo to. (Jeremias 25:11) Balet, kasabi inmunan siglo K.P., say nasyon so angikaindan lamet ed Baleg a Domadamili, tan ginawa toy sankagrabian a krimen diad impamatey ed mismon Anak na Dios. Nen 70 K.P., inusar na Dios so Pakayari Mundo a Roma bilang manangipaakseb to diad pamagit ed Judion sistema na bengabengatla, a gineraygeray so Jerusalem tan say templo to. Aglan balot namoldi lamet so nasyon na Israel ed lima nen Jehova a magmaliw a walaay “inkasanto tan karakpan.”a
Kamomoldi na Espiritual a Nasyon
6, 7. (a) Panon so panedeskribe nen Pablo ed kamomoldi na espiritual ya Israel? (b) Antoy kompleton bilang na ‘saray baseha na panangasi,’ tan panon ya atugyop itan?
6 Saray Judion angawat ed si Jesus so amoldin pinagkapundasyon a membro na sakey a balon nasyon, say espiritual ya “Israel na Dios.” (Galacia 6:16) Matukoy sirin iray salita nen Pablo: “Ono anggapo ta so katunongan na domadamili ed pitek, dia ed apasakey a masa a manggawa ed sakey a kabiangan to na sakey a banga ya onkana ed kagalangan, tan ed sananey a kabiangan na sakey ya onkana a pakabaingan? . . . say Dios dia ed panlabay to a pangipatnag na sanok to, tan ipaamta toy pakayari to, intepel to a sankamasungdoan so saray baseha na sanok ya inggana ed kadederal: Tan pian gawaen to a sankapatnagan so kayamanan na gloria to, ed saray banga na panangasi, a nensaman inggana to ed gloria.”—Roma 9:21-23.
7 Diad saginonor et impaamta na apaolin Jesus a sarayan “banga na panangasi” et manbilang na 144,000. (Apocalipsis 7:4; 14:1) Lapud agnapawala na Israel ed laman so ontan a bilang, kinasian nen Jehova so totoo na nasyones. (Roma 11:25, 26) Say kapkapanporman Kristianon kongregasyon so mapmaples a linmaknab. Kayari 30 taon et ‘nipulong la’d amin a pinalsa ed leksab na tawen’ so maong a balita. (Colosas 1:23) Mankakaukolan iya na suston kaasikaso na dakerakel ya ataytayak a lokal a kongregasyon.
8. Siopay manugyop ed inmunan mananguley ya ulop, tan panon ya atibukel iyan ulop?
8 Imparaan la nen Jesus so 12 apostoles pian magmaliw ya unonan mananguley ya ulop, ya impasal ira pati met iray arum diad ministeryo. (Lucas 8:1; 9:1, 2; 10:1, 2) Kasabi Pentecostes 33 K.P., niletneg lay Kristianon kongregasyon, tan sinmabi panaon et say mananguley ya ulop so linmaknab diad impangilaktip ed “saray apostol tan ed saray mamasiken [ed Jerusalem].” Diad andukdukey a panaon et say agi nen Jesus ed ina a Santiago, anggaman aliwan apostol so mapatnag a nanserbi bilang tsirman. (Gawa 12:17; 15:2, 6, 13; 21:18) Unong ed historyador ya Eusebius, nagmaliw a nikaduman puntirya na panamasegsegang iray apostol tan nitaytayak ira ed nanduruman teritorya. Sirin say mangompuesto ed mananguley ya ulop so nitukoy unong ed pankaukolan.
9. Anton makapaermen a resulta so impasakbay nen Jesus a nagawa?
9 Diad pansamposampot na inmunan siglo, ‘say kabusol, say Diablo,’ so ginmapon ‘angitanem na sisañas’ ed limog na saray singa-trigon mananawir na “say panarian na tawen.” Impropesiya la nen Jesus a sayan makapaermen a resulta so niyabuloy anggad panaoy panagani diad “anggaan na mundo.” Insan, “saman la onsinag [lamet] so saray matunong a singa say banwa ed panarian nen Ama ra.” (Mateo 13:24, 25, 37-43) Kapigan kasi itan?
Panagmoldi ed Kaplesan ya Israel na Dios
10, 11. (a) Panon so inggapo na modernon-agew a kamomoldi na Israel na Dios? (b) Antoran mandumaan a bangat so naromog ed Kakristianoan tan ed limog na masimoon iran Estudyante na Biblia?
10 Nen 1870, pinorma nen Charles Taze Russell so sakey a grupo na panagaral na Biblia diad Pittsburgh, Pennsylvania, E.U.A. Nen 1879 inggapo ton ipalapag so binulan a magasin a kabkabat natan bilang Say Panag-Bantayan. Ag-abayag et atebek na sarayan Estudyante na Biblia, a singa impanawag ed sikara, a say Kakristianoan et inawat toray agmakasulatan a paganon bangat, a singa say ag-ipapatey na kamarerwa, impiernon apuy, purgatoryo, sakey a Trinitaryon dios, tan say panagbinyag na kapangiyanak.
11 Balet, lalon importanti et sarayan manangaro na katuaay Biblia so angipawil ed manunan bangabangat na Biblia a singa say karondon lapud dondon bagat nen Jesus tan say kioli ed andi-anggaan a bilay diad mareen a paraison dalin ed silong na Panariay Dios. Manuna’d amin, nidanet so paganigani lan kiyalangon nen Jehova a Dios bilang say Soberanon Katawan na uniberso. Sinisia na saray Estudyante na Biblia ya asingger lan naebatan so Pikakasi na Katawan: “Ama min wala ka ed tawen, nagalang komon so ngaran mo. Onsabi komon so panarian mo, nagawa komon so linawam, unong ed tawen, ontan met ed dalin.” (Mateo 6:9, 10) Sikaray momoldien na masanton espiritu na Dios ed sakey a sankamundoan a sosyedad na maaro ed kareenan iran Kristiano.
12. Panon ya atebek na saray Estudyante na Biblia so importantin petsa?
12 Say aralem ya impanaral ed kapitulo 4 na Daniel tan arum niran propesiya so angombinse ed saray Estudyante na Biblia a say kiwawala nen Jesus bilang Mesianikon Ari so talagan asingsingger la. Atebek dan say 1914 so petsan kasumpal “na saray agew na saray Gentiles.” (Lucas 21:24; Ezequiel 21:26, 27) Mapmaples a pinalaknab na saray Estudyante na Biblia so kimey da, ya amorma na saray klase nipaakar ed Biblia (diad saginonor et atawag a saray kongregasyon) ed intiron Estados Unidos. Kasabi sigloy 1900, say edukasyonal a kimey da nipaakar ed Biblia so linmaknab la ya anggad Europa tan Australasia. Kapilitan la’d satan so maong a panangorganisa.
13. Anton legal a pakabidbiran so agamoran na saray Estudyante na Biblia, tan anton matalonggaring a serbisyo so ginawa na inmunan presidenti na Sosyedad?
13 Pian naikdan na legal a pakabidbiran iray Estudyante na Biblia, pinagmaliw a korporasyon so Zion’s Watch Tower Tract Society nen 1884 diad Estados Unidos, a walaay hedkuarter diad Pittsburgh, Pennsylvania. Saray direktor to so nanserbi bilang pinagkasentron Mananguley ya Ulop, a mangasikaso’d sankagloboan a kipulong na Panariay Dios. Say inmunan presidenti na Sosyedad a si Charles T. Russell, so nansulat na anemiran tomo na Studies in the Scriptures tan malaknab a nampulong diad impan-tour. Indonasyon to met ed sankamundoan a kimey parad Panarian so atipon ton baleg a kayamanan sakbay na impanaral toy Biblia. Nen 1916, legan ya ompepetang so Baleg a Bakal diad Europa, say abanalan lan Brother Russell so inatey legay panagpulong a baroy to. Ginawa toy anggaay nayarian to parad kilaknab na pantasi nipaakar ed Panariay Dios.
14. Panon ‘ya akibakal ed maabig a pibabakal’ si J. F. Rutherford? (2 Timoteo 4:7)
14 Say tinmumbok a presidenti et si Joseph F. Rutherford, a temporaryon huis ed Missouri. Bilang resulta na andiay-takot a panangiyalibansa ed katuaay Biblia, akikomplot so klero na Kakristianoan ed saray politiko a ‘nansaol ed panamegley na sakey a ganggan.’ Nen Hunyo 21, 1918, si Brother Rutherford tan pitora ed saray mangidadaulon Estudyante na Biblia so nipriso, tekep na amayamay a nambabansag a sentensian 10 odino 20 taon. Nandemanda met iray Estudyante na Biblia. (Salmo 94:20; Filipos 1:7) Diad inyapela et sikaray nibulos nen Marso 26, 1919, tan diad saginonor et sigpot a naabsuelto ed say palson akusasyon a sedisyon.b Sayan eksperiensia so kinmanan manmoldi ed sikaran magmaliw a mabiskeg a manangiyalibansa na katuaan. Diad tulong nen Jehova et sinali ra so kada posiblin paraan pian manbiktorya ed espiritual a pibabakal a diad ontan et niproklama so maong a balita anggaman ed isusumpa na Babilonia a Baleg. Satan a pibabakal so mantutultuloy ni anggad sayan taon na 1999.—Ikompara so Mateo, kapitulo 23; Juan 8:38-47.
15. Akin a say taon 1931 et importanti ed awaran?
15 Kaleganan na saray dekaday 1920 tan 1930, nantultuloy ni inkamoldi na alanaan ya Israel na Dios diad silong na Baleg a Domadamili. Sinminag so mapropetikon liwawa manlapud Kasulatan, ya angigalang ed si Jehova tan angiyapasakey ed Mesianikon Panarian nen Jesus. Nanggayagaan na saray Estudyante na Biblia nen 1931 so impangawat ed balon ngaran, Tastasi nen Jehova.—Isaias 43:10-12; Mateo 6:9, 10; 24:14.
16 tan say kahon ed pahina 19. Kapigan ya akompletoy bilang na 144,000, tan antoy walan ebidensia nipaakar ed saya?
16 Diad dekada na 1930 say bilang na “atawag, tan apili, tan matoor” ya 144,000, so apatnagan ya akompleto la. (Apocalipsis 17:14; nengnengen so kahon ed pahina 19.) Agtayo amta no pigaray adagup iran alanaan a nanlapud inmunan siglo tan ed limog na saray “sisañas” kaleganay mauddiem iran siglo na baleg ya apostasya na Kakristianoan. Balet nen 1935 wala so sankamundoan a dagup na 52,465 a manangipalapag, manlapud pantok a 56,153, ya angipatnag na mangatatawen ya ilalo ra diad impibiang ed saray emblema ed Memoryal. Anto kasi ilalo na dakerakel nin nadagup?
“Nia! Sakey a Baleg ya Ulop”
17. Anton maawaran ya aligwas so agawa nen 1935?
17 Diad kombension ya agawa manlapud Mayo 30 ya anggad Hunyo 3, 1935, ed Washington, D.C., E.U.A., makatantanday impaliwawa nen Brother Rutherford ya apauloan na “The Great Multitude.”c Sayan grupo, “a sikato so agnayari a bilangen na too,” so ompatnag sano nakokompleto la so panagtatak ed 144,000 ya espiritual ya Israel. Saraya met so mangagamil na pananisia ed mananondon a pakayari na “dala na Kordero,” si Jesus, tan mangisaklang na sagradon serbisyo ed uksoyan na templo nen Jehova parad panagdayew. Bilang sakey a grupo, sikaray mabilay a “nanlapu ed baleg ya irap,” a manawir ed mangaraldalin a Paraiso ya ‘andi gapo la naani ipapatey.’ Pigaran taon sakbay na satan a kombension, sayan grupo so atawag la bilang saray Jonadab.—Apocalipsis 7:9-17; 21:4; Jeremias 35:10.
18. Diad antoran dalan a say taon 1938 et importanti?
18 Importanti so taon a 1938 lapud nipalinew so pakabidbiray duaran klase. Say Marso 15 tan Abril 1, 1938, iran paway na The Watchtower so angiparungtal ed duaran-kabiangan a panagaral ed say “His Flock” tan angipalinew ed relatibon lugar na saray alanaan a nakdaan tan saray kaiba ra, say baleg ya ulop. Insan saray paway a Hunyo 1 tan Hunyo 15 so walaan na saray aaralen ya artikulo nipaakar ed “Organization” a nibase’d Isaias 60:17. Apakabatan so amin a kongregasyon a kerewen da’d Mananguley ya Ulop a manuro na saray lokal ya aripen, ta pian napawalay uksoyan ya apaaligwas, tinuroy-Dios, tan teokratiko. Et ontan so ginawa na saray kongregasyon.
19 tan paimano’d leksab. Antoran katuaan so mamekder a say inkalapagan a tawag ed “arum a karnero” so nagagawa la natan ed loob na masulok ya 60 taon?
19 Oniay report ed 1939 Yearbook of Jehovah’s Witnesses: “Saray alanaan a patumbok nen Kristo Jesus a walad dalin natan so daiset la, tan aglan balot ondakel so bilang da. Saraya so atawag ed Kasulatan a ‘say nakdaan’ ya ilalak na Zion, organisasyon na Dios. (Apoc. 12:17) Titiponen na Katawan natan so ‘arum a karnero’ to, a manibukel ed ‘baleg a karaklan’. (Juan 10:16) Saray nadadagup natan et saramay kaulop na saray nakdaan, a kakimeyay nakdaan. Manlapu la’d saya a manpatuloy saramay manugyop ed ‘arum a karnero’ so ondakel ed bilang ya anggad kadagup na ‘baleg a karaklan.’” Say alanaan a nakdaan so amoldi la a mangasikaso ed kadagup na baleg ya ulop. Saraya met so nepeg a namoldi natan.d
20. Antoran pananguman ed organisasyon so agawa nanlapulad 1942?
20 Nen Enero 1942, sanen kapetapetangan na Guerra Mundial II, inatey si Joseph Rutherford tan sinublayan nen Nathan Knorr bilang presidenti. Say komatlon presidenti na Sosyedad so malugor a nanonodnonotan lapud impangiletneg to na teokratiko iran eskuelaan ed saray kongregasyon ontan met ed Gilead School a pakaibangatan na saray misionaryo. Diad tinaon a miting na Sosyedad nen 1944, inyanunsio to a say tsarter na Sosyedad so narebisa ta pian say inkamembro et nibase, aliwan unong ed materyal iran kontribusyon, noagta unong ed espiritualidad. Kaleganay tinmumbok a 30 taon, dinmaak so bilang na saray komikimey ed lawak manlapud 156,299 ya asabi toy 2,179,256 ed sankamundoan. Legan na 1971-75 et kaukolan so kaaruman nin pananguman ed organisasyon. Aliwa lan sakey a too a manseserbi bilang presidenti so pirmin mangasikaso ed sankadalinan a kimey nipaakar ed Panarian. Say Mananguley ya Ulop, tekep na mansusublayan a tsirman, so inaruman ya anggad nagmaliw a 18 alanaan a membro, a ngalngali kapaldua ed satan so akasumpal la’d kurso ra ed dalin.
21. Antoy akakualipikaan na saray membro na melag a pulok parad Panarian?
21 Say nakekeraan a membro na melag a pulok so namomoldi la ed loob na dakel a dekadan napnoy subok. Sikaray napapaseseg, ta maseguron naaawat day ‘panamatua na say espiritu.’ Imbaga nen Jesus ed sikara: “Sikayo so nansiansia ed siak ed saray inkatuktuksok; et manuro ak ed sikayo na sakey a panarian, a singa say Amak anuro ed siak, pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.—Roma 8:16, 17; Lucas 12:32; 22:28-30.
22, 23. Panon a namomoldi so melag a pulok tan say arum a karnero?
22 Legan ya ondadaiset so bilang na saray alanaay espiritun nakdaan ed dalin, saray matatken ed espiritual ya agagin lalaki a kabiangay baleg ya ulop so apabtangan a mangasikaso ed espiritual ed amin lawarin kongregasyon ed sankamundoan. Tan legan a say kaunoran a sankatatkenan iran alanaan a tastasi so makasumpal ed mangaraldalin a kurso ra, say maprinsipen sa·rimʹ na arum a karnero so nipasal a maong a manumpal ed saray obligasyon na panangikurang bilang pangulon klase ed dalin.—Ezequiel 44:3; Isaias 32:1.
23 Namparan say melag a pulok tan say arum a karnero so mantultuloy a namomoldi ed saray baseha parad kagalangan. (Juan 10:14-16) Balanglan say ilalo tayo et diad “saray balo a tawen” odino diad “sakey a balo a dalin,” komon ta sigpot-puso tayon onkiwas ed imbitasyon nen Jehova: “Manggayaga tan manliket kayo ed ando lan ando ed saman a palsaen ko; ta nia, palsaen ko so [mangatatawen a] Jerusalem a sakey a panliketan, tan say ombaley ed sikato a sakey a liket.” (Isaias 65:17, 18) Komon ta sikatayon lupok a totoo so lawas manlingkor a mapaabeba, a namomoldi na “say sankatageyan ya inkabaleg na pakayari”—pakayari na Dios a masanton espiritu!—2 Corinto 4:7; Juan 16:13.
[Saray paimano ed leksab]
a Pasakbayan so matungangan Kakristianoan, ya inyanino na kadaanan ya Israel, ed mipadparan pangukom nen Jehova.—1 Pedro 4:17, 18.
b Si Judge Manton, sakey a Romanon Katoliko, ya agto labay ya ibulos iray Estudyante na Biblia diad panpiansa, so diad saginonor et nipriso lapud panangawat na pasuksok.
c Say New World Translation of the Christian Greek Scriptures, a nipaway nen 1950, so manguusar ed “baleg ya ulop” bilang magmaong a patalos ed apuyanan a Griegon termino.”
d Nen 1938 say sankamundoan ya inmatendi ed Memoryal et 73,420, tekep na 39,225 a totoo so akibiang ed saray emblema—53 porsiento ed saramay wadman. Kasabi 1998 say inmatendi so dinmaak ed 13,896,312, a 8,756 so akibiang lambengat, a manpromedyo na kulang na 1 ya akibiang ed kada 10 a kongregasyon.
Kasin Natandaan Yo?
◻ Diad impanpamoldi ed Ama to, panon a Napanuliranan tayo si Jesus?
◻ Anton panagmoldi so agawa ed kadaanan ya Israel?
◻ Panon a say “Israel na Dios” et namomoldi anggad natan?
◻ Diad anton gagala a say “arum a karnero” et namomoldi?
[Kahon ed pahina 18]
Pakamomoldi Ni ed Kakristianoan
Oniay report ed sakey a balita na Associated Press a nanlapud Athens, Gresya, nipaakar ed agano nin inkaturo na ulo na Greek Orthodox Church: “Sikatoy inilaloan a magmaliw a mensahero na kareenan. Balet ompatnag a say lider na Greek Orthodox Church et singano sakey a heneral a manpaparaan ed pibakal.
“‘Sikatayoy akaparaan, no kapilitan, a mangipaagus na dala tan mansakripisyo. Sikatayo, bilang sakey ya iglesia, so manpikasi parad kareenan . . . Balet bendisionan tayoray sagradon ayura sano kakaukolanen itan na panaon,’ kuan nen Arsobispon Christodoulos ed agano nin masanton agew na Assumption of the Virgin, a seselebraan met bilang agew na saray puersay armada na Gresya.”
[Kahon ed pahina 19]
“Anggapo lay Kaaruman!”
Diad Gilead graduation nen 1970, si Frederick Franz, say bise-presidenti ed saman na Watch Tower Society, so angikuan ed saray estudyante ed posibilidad a sikara, ya amin da et kabiangay arum a karneron walaan na mangaraldalin ya ilalo, so nayarin makabautismo na sakey a mankuan a sakey ed saray alanaan a nakdaan. Kasin nagawa iya? Bueno, insalaysay to a si Juan a Bautista so sakey ed arum a karnero, tan binautismoan toy Jesus tan arum ed saray apostol. Insan intuloy ton intepet no kasin wala kasi pankaukolan ed katugyop ni na nakdaan. “Anggapo, anggapo lay kaaruman!” inkuanto. “Satan a tawag so anampot la nen 1931-35! Anggapo lay kaaruman. Siopa, sirin, iray pigaran balo nin akilimog a mibibiang ed saray emblema na Memoryal? No sikaray kabiangan ed saray nakdaan, sikaray kasalat! Aliwa iran niarum ed say rangko na saray alanaan, noagta saray kasalat na saramay nayarin naplag.”
[Litrato ed pahina 15]
Agaylan papablien tayo so kayamanan a serbisyo!
[Litrato ed pahina 16]
Say kadaanan ya Israel so nagmaliw a basehan makanepegan lambengat ed kadederal