Angkabaleg Iran Pamilya a Nankakasakey ed Serbisyo na Dios

‘Saray ugugaw sikaray tawir a nanlapud si Jehova,’ so insulat na salmista. “Say bunga na eges sikato so tumang to. Singa saray panapana ed lima na sakey mabiskeg a too, ontan so saray anak a kalangweran. Magayaga so too a wala ed sikato so pananginan na panapana a napno na panapana.”​—SALMO 127:3-5.

ON, saray anak so nayarin magmaliw a bendision manlapud si Jehova. Tan no panon a say pomapana so manliket ed pakaamta ton ipaarap iray pana diad suksokan toy pana, ontan met a manliket iray atateng sano nipapaarap day ananak da ed basbas a mangitonton ed andi-anggaan a bilay.​—Mateo 7:14.

Nensaman la, saray pamilyan say ‘pananginan day pana et napno’ na dakel ya ananak so kaslakan la ed limog na totoo na Dios. Alimbawa, nonoten pa iray taon na inkakautibo ra ed Ehipto: “Saray anak nen Israel nanparakel ira tan kinmayat ira a tuloy tan binmuna ra, et nagmaliw ira ya alablabas ed pakapanyari; et say dalin aseksek ed sikara.” (Exodo 1:7) No ikompara so bilang na Israelitas a linmoob ed Ehipto ed bilang a tinmaynan, napatnagan a saray pamilyan walaan na samploran ananak et kabkaabigan ed kabaleg!

Saginonor, binmaleg si Jesus ed sakey a pamilyan ompatnag a baleg parad dakel natan. Si Jesus so panguloan, balet akapananak nira di Jose tan Maria na apatiran anak a lalaki tan pigaran bibii. (Mateo 13:54-56) Say impakawalaan day dakel ya ananak so nayarin makasengeg no akin ya agnaimano di Maria tan Jose ya agda kaiba’d grupo si Jesus sanen binmuat laran pasempet a nanlapud Jerusalem.​—Lucas 2:42-46.

Angkabaleg Iran Pamilya Natan

Natan, dakel a Kristiano so mandedesidin limitaan so kabaleg na saray pamilya ra lapud espiritual, ekonomiya, sosyal, tan arum niran rason. Anggaman kuan, siansia nin padron so angkabaleg iran pamilya ed dakel a sosyedad. Unong ed The State of the World’s Children 1997, say rehyon a sankarakelay niyaanak et say sub-Saharan Africa. Diman, say kabanyakan a bii so mangiyaanak na anggad anemira.

Mairap parad Kristianon atateng na angkabaleg iran pamilya so panamabaleg ed ananak da pian aroen day Jehova, balet ta dakel so ontatalona ed satan. Say italona so mandedependi ed pankakasakey na pamilya parad puron panagdayew. Saray salita nen apostol Pablo ed kongregasyon na Corinto so onaplika met natan a walaan na parehon puersa ed saray Kristianon pamilya. Insulat to: “Pikasik sirin ed sikayo, agagi, . . . [a] sikayon amin salitaen yo so saksakey a bengatla, tan anggapo so pansisian ed sikayo: noag ingen ayadyari a pannononong yo ed saksakey a nonot tan saksakey ya isip.” (1 Corinto 1:10) Panon a nadampot so ontan a pankakasakey?

Nepeg a Maespiritual a Totoo Iray Atateng

Say manunan sengegan et nepeg a sigpot a debosyonado iray atateng ed Dios. Nonoten pay imbaga nen Moises ed saray Israelita: “Dengel ka, O Israel: Si Jehova a Dios tayo sikato so sakey a Jehova: Et sika aroen mo si Jehova a Dios mo ed amin a pusom tan dia ed amin a kamarerwam, tan dia ed amin a pakayarim. Et saraya a salita, ya ingganggan ko ed sika ed sayan agew, nepeg da so ontatak ed pusom; tan nepeg mo ya ibangat iraya a sankakulian ed saray anak mo, tan nepeg mo ra a tongtongen kapagno manyurong ka ed abung mo, tan kapagno manaakar ka ed dalan, tan kapagno mandukdukol ka tan kapagno ombangon ka.”​—Deuteronomio 6:4-7.

Imanoen ya impabitar nen Moises a saray ganggan na Dios so nakaukolan ya ‘ontatak ed kapusoan’ na atateng. Diad ontan labat ya onkiling so atateng a manginabang na regular ya espiritual a panamilin ed ananak da. Diad tua, sano mabiskeg ed espiritual iray atateng, sikaray magunaet a mangibangat ed ananak da diad espiritual iran pamaakaran.

Pian magmaliw ya espiritual a too tan naaro si Jehova a Dios ed intiron puso, importanti so maparanay a pambasa, pandalepdep, tan pangiyaplika ed Salitay Dios. Insulat na salmista a say sakey a manliket ed ganggan nen Jehova tan babasaen to ed “agew tan labi” et “sikato [so] mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga; tan antokaman a gawaen to ombuna.”​—Salmo 1:2, 3.

No panon a say sakey a kiew et marakep so bunga no nasasalog a naynay, ontan met a mamawala na maridios iran bunga iray natatagano ed espiritual a pamilya, parad kirayewan nen Jehova. Kaslakan la so pamilya nen Uwadiegwu, a manaayam ed Sagur ya Aprika. Anggaman waloray ananak di Uwadiegwu tan say akulaw to, regular payunir iran dua, odino sigpot-panaon a ministro na Tastasi nen Jehova. Inkuanto: “Mamantinien na pamilya mi so regular a panagaral na pamilya ed Biblia ed loob la na masulok a 20 taon. Imbangat miray ananak mi ed Salita na Dios nanlapula’d nen kapangiyanak nira, aliwa labat a no legay panagaral na pamilya noagta diad ministeryo tan diad arum ya oras. Amin ya ananak mi so manangiyabawag la na maong a balita na Panarian, tan say bulirek labat, a mantaon na anemira, so agni abautismoan.”

Mankimey Bilang Sanmuyong

“Lapu ed kakabatan say abung nipaalagey,” kuan na Biblia. (Uliran 24:3) Diad loob na pamilya, say ontan a kakabatan so mamawalay panmumuyong ed kimey. Say “kapitan” ed muyong na pamilya et say ama; sikatoy tinuroy-Dios ya ulo ed sankaabungan. (1 Corinto 11:3) Indanet nen apuyanan ya apostol Pablo so inkaseryoso na responsabilidad na inkaulo sanen insulat to: “No wala so agmanagano [namparan diad materyal tan espiritual] ed anak to, tan lalo la ed saray kakaamong to a dili, pinaandi to la so pananisia, et sikato so lalon mauges nen say agmanisia.”​—1 Timoteo 5:8.

Mitunosan ed sayan konsehon manlalapud Salitay Dios, kaukolan ya asikasoen na kaasawaan a lalaki so espiritualidad na kaasawaan da. No nabebelatan so kaasawaan a bibii ed saray trabaho ed abung, apektadoy espiritualidad da. Diad sakey a bansa ed Aprika, inreklamo na sakey a balo nin bautismadon Kristiano ed saray mamatatken ed kongregasyon to a say akulaw to et singa agmangisengansengan ed espiritual iran pamaakaran. Insuheri na mamatatken a kaukolan na akulaw to so praktikal a tulong. Kanian tinulongan na asawan laki so akulaw to ed saray trabaho ed abung. Impanaon to met a tulongan a paaligwasey panagbasa tan say pikakabat to’d Biblia. Sikatoy kinmiwas a tuloy, tan natan et say intiron pamilya so nankakasakey ed serbisyo’d Dios.

Kaukolan met a panpagaan na kaamaan so espiritualidad na ananak da. Onia so insulat nen Pablo: “Sikayo ya atateng, agyo ilagyat a pasanoken so saray anak yo: noag ingen bangatan yo’ra ed kadudusa tan panamilin na Katawan.” (Efeso 6:4) No talinengen na atateng so bilin ya agpaingongoten so ananak da, ontan met ed panangidirehin ipasal ira, nalikna na ananak a sikaray kabiangan na muyong na pamilya. Bilang resulta, maseguron mantulongan tan manpasesegan iray anak pian nadampot iray espiritual a kalat.

Say paniibaan ed kimey et sasaglawien toy pangipabtang ed ananak na espiritual iran responsabilidad sano manepeg la ra’d satan. Sakey ya ama tan Kristianon matatken a 11 so ilalak to, so masaksakbay ya ombabangon ed kabuasan tan ikokondukta toy panagaral ed pigara ed sikara sakbay ya ompikal a mantrabaho. Kayari bautismo na saray mas panguloan et mansusublayan ira ed pananulong ed saray yogtan da, a laktipen toy pibiang ed pangibangat ed sikara na Biblia. Say ama so mangaasikaso tan kokomendaan toray sagpot da. Anemira ed ananak so abautismoan la, tan say arum et itutultuloy dan pankikimeyan itan a kalat.

Maong a Komunikasyon, Nanpapaknaan Iran Kalat

Importanti ed nankakasakey iran pamilya so maaron komunikasyon tan nanpapaknaan iran espiritual a kalat. Si Gordon, sakey a Kristianon matatken a manaayam ed Nigeria, so walaay pitoran ilalak a mantaon na 11 anggad 27. Anemira ed sikara so payunir, singa saray atateng. Say bulirek, ya agano nin abautismoan, so maparanay a mibibiang ed panaggaway-babangatan a kaibay arum ed pamilya. Say duaran wala la’d edad ya anak a lalaki et ministeryal a lingkor ed kongregasyon.

Inyaralan a mismo nen Gordon na Biblia so kada sakey ed ilalak to. Likud ni, say pamilya so walaan na malaknab a programa ed edukasyon na Biblia. Kada kabuasan sikaray mandaragup pian singbaten so teksto ed Biblia insan manpaparaan parad saray miting ed kongregasyon.

Sakey ed saray kalat ya impabtang ed kada membro na pamilya et say pambasa ed amin ya artikulo ed Panag-Bantayan tan Awake! iran magasin. Agano ni, inyarum da’d rotina ra so inagew-agew a panagbasa ed Biblia. Diad pangistorya ra’d abasa ra, makapanpapasesegan iray membroy pamilya pian itultuloy so niugali la.

Say sinimban panagaral na Biblia bilang pamilya so niletneg a maong kanian anggapo lay kaukolan nin panonotan​—amin so manatalaran ed satan. Diad apalabas iran taon, say tema, sistema, tan kabayag na panagaral na pamilya so nanduruma unong ed saray edad tan pankaukolan na ananak. Apaapit so pamilya ed arum a matoor a lingkor na Dios, tan saya so walaan na makagunggunan epekto ed ananak.

Bilang sakey a pamilya, maniiba ira ed panggaway bengatla tan mangipapanaon parad panligliwaan. Maminsan ed sakey simba et panggagayagaan day “family evening,” a walaray quiz, maabig iran paelek, panagtogtog na piano, panag-istorya, tan panagrelaks. Sagpaminsan, sikaray oonla ed beach tan arum a paspasen na paka-interesan.

Isasaral ed si Jehova

Anggapo ed asalambit ed tagey so mamawas ed kairapan ed panangumponi ed angkabaleg iran pamilya. “Talagan sakey a baleg ya angat so pagmaliw a maong ya ama na waloran ananak,” inkuan na sakey a Kristiano. “Mankaukolan itan na daakan a materyal tan espiritual a tagano pian sustunien ira; nepeg a mantrabaho ak na impasya pian makalmoy magenap a kuarta a panuporta ed sikara. Saray mas panguloan ya ananak et tin-edyer lara, tan amin dan walo so maneeskuela. Amtak a say espiritual a panangipasal so importanti, ingen arum ed ananak ko et benger tan matunganga. Pinaermen da ak, balet amtak a no maminsan et makakagawa ak na bengatlan mamaermen ed si Jehova, tan peperdonaen toak. Kanian nepeg a maanos kon itultuloy so pametek ed ananak ko anggad namoria ra.

“Panggugunaetan kon tumboken so alimbawa nen Jehova a sikatoy maanos ed sikatayo lapud pilalek ton amin et makasabi ed panagbabawi. Iyaaralan koy pamilyak, tan arum ed ilalak ko et pankikimeyan day kalat a bautismo. Agak onsasaral ed dilin biskeg ko pian nadampot iray kalat; samet so nagawaan na pakayarik. Panggugunaetan koy lalon iyaapit ed si Jehova diad pikakasi tan ed pangiyaplika ed proverbio a kuanto: ‘Manmatale’ ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.’ Tulongan ak nen Jehova a gawaen so panangipasal ed ananak ko.”​—Uliran 3:5, 6.

Agbalot Onsusuko!

No maminsan et singa ag-aapresiaen a kimey so panangipasal ed ananak, balet agbalot onsusuko! Itultuloy itan! No ag-onkiwas a positibo iray ananak yo odino ag-aapresiaen iray sagpot yo natan, ompan diad saginonor et gawaen da itan. Kaukolay panaon pian say sakey ya anak et ombaleg a magmaliw a Kristiano a mamawala na saray bunga na espiritu.​—Galacia 5:22, 23.

Si Monica, a manaayam ed Kenya, so sakey ed samploran ananak. Inkuan to: “Imbangat kami na atateng ko ed katuaan na Biblia nanlapula’d inkaugaw mi. Si Daddy so mangiyaral ed sikami na saray Kristianon publikasyon kada simba. Lapud trabaho to, say panagaral so aglawas apasakey ya agew. No maminsan, no sikatoy onsasabi la a nanlapud trabaho, naimano ton manggagalaw kami ed paway tan ikuan to’d sikami a diad loob na limaran minuto et kaukolan ya onloob kami la ed abung parad panagaral na Biblia. Kayari na panagaral mi na Biblia, sikami pinaseseg a mantepet odino isingbat so antokaman a problema.

“Seseguroen ton say pililimogan mi et saray maridios ya ugugaw. Maparanay ya ombibisita si Dad ed eskuelaan pian komustaen ed saray maestra mi so kondukta mi. Aminsan et abalitaan ton akilaban so taloran kuyak ed arum a lalaki tan no maminsan et sikaray garambasal. Sikaray dinisiplina nen Dad lapud makapuy a walna ra, balet tan angipanaon met pian ipaliwawa manlapud Kasulatan no akin a kaukolan day manugali ed maridios a paraan.

“Impamoria na atateng mi iray gungguna ed iyaatendi’d saray miting diad panutulong ed sikami ed panagparaan parad saray miting. Nipasal kamin magmaliw a ministro diad panag-insayo diad abung. Manlapud inkaugaw et miuulop kami’d atateng mi ed lawak na serbisyo.

“Natan, say duaran kuyak so espisyal payunir, sakey ya agik et regular payunir, tan sakey nin atsik, a de-pamilya, et maseseg a Tasi. Say duaran yogtan kon bibii, mantaon na 18 tan 16, et bautismadon manangipalapag. Saray duaran ugugaw nin lalaki so nipapasal la. Manlilingkor ak ed sangan opisina na Tastasi nen Jehova diad Kenya ed loob la na taloy taon. Inararok tan aapresiaen koy atateng ko lapud sikaray maespiritual a totoo; mangipapanengneng ira na maabig ya alimbawa ed sikami.”

Anggan panon karakel so ananak yo, agbalot onsusuko ed panulong ed sikara ed basbas a mamaarap ed andi-anggaan a bilay. Legan a bebendisionan nen Jehova iray sagpot yo, nikelyaw yoray salita nen apostol Juan nipaakar ed espiritual ya ananak to: “Anggapo so babaleg a liket ko nen say saya, salanti say pakadngel ko a saray ana’ko manaakar ira ed katuaan.”​—3 Juan 4.