‘Iteen Mo so Pusom ed’ Templo na Dios!

“Anak na too, . . . yan [“iteen,” NW] mo so pusom ed saray amin ya ipatnag ko naani ed sika, . . . Ipaliwawam ya amin so nanengneng mo ed Israel.”​—EZEQUIEL 40:4.

1. Anton kipapasen so inkidungetan na apilin totoo na Dios nen 593 K.K.P.?

SAY taon et 593 K.K.P., say koma-14 a taon na inkadestiero na Israel. Parad saray Judion manaayam ed Babilonia, say pinablin binalegan dan dalin so talagan arawdawi. Diad unor lan impakanengneng na maslak ed sikara ed Jerusalem, satan so mandarlang, ageray lay malet a bakor to tan, agaygay iray ataragey a paalagey to. Say templo nen Jehova​—a datin karlangan na syudad, a pinagkasentro na puron panagdayew ed amin a dalin​—so nagba la. Natan et manbayag ni so kadestiero na baleg a kabiangan na Israel. Wala ni 56 taon sakbay ya onsabi so insipan a kililiktar.​—Jeremias 29:10.

2. Akin a nanermenan nen Ezequiel iray pakanodnonotan ed templo na Dios diad Jerusalem?

² Talagan amaermen itan ed matoor a propetan Ezequiel no isipen toy impakagaygay lay templo na Dios a nilasus kilometro ed kaarawi, a mankibalatar a panteyengteyengan na atap ya ayayep. (Jeremias 9:11) Say dilin ama to, si Buzi, so nanlingkor diman bilang saserdote. (Ezequiel 1:3) Panliketan met komon nen Ezequiel itan a pribilihyo, balet ta sikatoy adestiero a kaiba iray dederlengen ed Jerusalem nen 617 K.K.P., sanen kaugawan to ni. Natan ta ngalngali la 50 años, posiblin kabat nen Ezequiel ya agto lan balot nanengneng lamet so Jerusalem nisay makapitulongan ed kipaalagey-lamet na templo. Sirin, isipen pa no kaunongay kaimportanti ed si Ezequiel so pakaawat ed pasingawey nipaakar ed maglorian templo!

3. (a) Anto so gagala na pasingawey nen Ezequiel nipaakar ed templo? (b) Anto so apatiran manunan kabiangan na pasingawey?

³ Sayan malaknab a pasingawey, a lugan na siameran kapitulo na libroy Ezequiel, so angiter na makapabiskeg-pananisian sipan ed saray adestieron taga-Judea. Nipawil so puron panagdayew! Diad pigaran siglo nanlapulad saman, anggad panaon tayo, sayan pasingawey so lapuan lay panamaseseg parad saray manangaro ed si Jehova. Panon ey? Usisaen tayo pan unona no antoy kabaliksan na sayan mapropetikon pasingawey parad saramay adestieron Israelita. Walaan itan na apatiran manunan kabiangan: say templo, say inkasaserdote, say pangulo, tan say dalin.

Say Nipawil a Templo

4. Iner dia so nitarokan nen Ezequiel kagapo na pasingawey to, anto so anengneng to diman, tan siopa so angipasyar ed sikato?

⁴ Unona, nitarok si Ezequiel diad “sakey a sankatagyan a palandey.” Diad palandey a walad banda’d abalaten et wadman so abalbaleg a templo, a singa abakoran a syudad. Sakey ya anghel a say “nengneng [to] so singa nengneng na gansa,” so angipaspasyar ed propeta diad intiron sular. (Ezequiel 40:2, 3) Leleg na pasingawey, anengneng nen Ezequiel so anghel a maasasigtan manusukat ed manpadparan taloran paris a wangalan na templo a walaan na saray silir na guardia, akinpaway a saban, akindalem a saban, saray pananganan, sakey ya altar, tan say santuaryo na templo a wadtan so Masanto tan Sankasantosan iran dibisyon.

5. (a) Anton panamaseguro so inter nen Jehova ed si Ezequiel? (b) Anto iramay “bangkay na saray ari ra” a kaukolan ya ekalen ed templo, tan akin ya importanti iya?

⁵ Insan, inmapireng a mismo si Jehova ed pasingawey. Sikatoy linmoob ed templo tan pinaseguroan toy Ezequiel a Sikatoy manayam diman. Balet papalinisan toy abung To, a kuanto: “Natan ekalen da komon so inkadamag da, tan saray bangkay na saray ari ra, ed arawi ed siak; et manayam ak naani ed pegley da ed ando lan ando.” (Ezequiel 43:2-4, 7, 9) Sarayan “bangkay na saray ari ra” so mapatnag a manutukoy ed saray talintao. Dinutak na saray rebelyoson manuley tan totoo ed Jerusalem so templo na Dios panamegley na saray talintao, tan bilang resulta et nanggawa iray dilin arari ra. (Ikompara so Amos 5:26.) Maseguron aliwan mabilay a dirios odino arari iraya, saraya so inatey, marutak a bengabengatla ed imaton nen Jehova. Nepeg iran ekalen.​—Levitico 26:30; Jeremias 16:18.

6. Anto so kabaliksan na impanukat ed templo?

⁶ Antoy punto na sayan kabiangay pasingawey? Pinaseguroan toray adestiero ed kompleton kipawil na puron panagdayew diad templo na Dios. Niarum ni, say impanukat ed templo so angitarya na madibinon garantiya a say pasingawey so segseguradon nasumpal. (Ikompara so Jeremias 31:39, 40; Zacarias 2:2-8.) Amin a klase na panagtalintao so ekalen. Bendisionan lamet nen Jehova so abung to.

Say Inkasaserdote tan say Pangulo

7. Anton impormasyon so niiter nipaakar ed saray Levita tan saserdote?

⁷ Say inkasaserdote so nisilong met ed proseso na panaglinis, odino panaggogol. Kaukolan a nabaat iray Levita lapud impantalintao, bangta saray makasaserdoten anak nen Zadok so nakomendaan tan natumangan lapud impansiansia ran malinis.a Siansia, sayan duaran grupo so nipueston manlingkor ed nipawil ya abung na Dios​—ya andi-duaruwan mandependi ed inkamatoor da bilang indibidual. Niarum ni, oniay ingganggan nen Jehova: “Ibangat da naani so baley ko ed nandumaan na masanto tan karaklan, tan paibiig da naani ed sikara so marutak tan malinis.” (Ezequiel 44:10-16, 23) Kanian kaukolan a nipawil so inkasaserdote, tan say matoor a panagsungdo na saray saserdote so natumangan.

8. (a) Sioparay pangulo na kadaanan ya Israel? (b) Diad antoran paraan ya aktibo so pangulo ed pasingawey nen Ezequiel diad puron panagdayew?

⁸ Sasaglawien met na pasingawey so sakey ya atawag a pangulo. Nanlapulad saray agew nen Moises, say nasyon so awalaan na saray pangulo. Say salitan Hebreo parad “pangulo,” et na·si’ʹ, a nayarin ontukoy ed sakey ya ulo na abung na ama, tribu, odino anggan sakey a nasyon. Diad pasingawey nen Ezequiel, abaat iray manuley ed Israel bilang grupo lapud panaglames ed totoo tan asimbawa iran magmaliw ya agmanaglabi tan maptek. Anggaman agkabiangan na makasaserdoten klase, aktibo so pangulo ed prominentin dalan diad puron panagdayew. Sikatoy onloob tan ompaway ed akinpaway a saban a kaibay aliwan makasaserdote iran tribu, manyurong ed balkon na Bukig a Wangalan, tan mangitarya na arum ed saray bagat pian iyapay na totoo. (Ezequiel 44:2, 3; 45:8-12, 17) Kanian say pasingawey so amaseguro’d totoo ed panaon nen Ezequiel a say nipawil a nasyon so nabendisionan na napanuliranan a papangulo, lalakin manuporta ed inkasaserdote diad pangorganisa ed totoo na Dios tan magmaliw a maabig iran alimbawa nipaakar ed espiritual.

Say Dalin

9. (a) Panon ya apagen so dalin, balet siopa so agnapatawiran? (b) Anto so masanton kontribusyon, tan anto so walad satan?

⁹ Diad kaunoran, lalaktipen na pasingawey nen Ezequiel so inkalapagan a surbi ed dalin na Israel. Apag-apagen itan a walaan na apag so balang tribu. Say pangulo so walaan met na tawir. Balet, saray saserdote so andiay tawir, ta inkuan nen Jehova, “Siak so tawir da.” (Ezequiel 44:10, 28; Numeros 18:20) Impanengneng na pasingawey a say apag na pangulo ed dalin so nipasen ed anggan iner a pagpag na espisyal a lugar a tatawagen a masanton kontribusyon. Saya so kuadradon lote a naapag ed taloran gisgis​—say tagey so parad nagbabawi iran Levita, say pegley so parad saray saserdote, tan say leksab so parad syudad tan say mabungan dalin ed anggan iner a pagpag. Nipasen so templo nen Jehova diad gisgis a dalin na saray saserdote, diad sentro na kuadradon kontribusyon.​—Ezequiel 45:1-7.

10. Anto so kabaliksan na propesiyan nipaakar ed panapag ed dalin parad saray matoor a taga-Judea ya adestiero?

¹⁰ Agaylan amaseseg iyan amin ed saramay adestiero! Kada pamilya so apaseguroan a nawalaay tawir diad dalin. (Ikompara so Miqueas 4:4.) Saknapan na puron panagdayew so sakey a nipaatagey tan sentro a pasen diman. Tan imanoen ed pasingawey nen Ezequiel a say pangulo, singa saray saserdote, so manayam ed dalin ya inter na totoo. (Ezequiel 45:16) Kanian diad nipawil a dalin, kaukolan a mitulongan so totoo ed kimey na saramay tinuro nen Jehova a mangidaulo, a matulok tan mapasakop a suportaan iratan. Diad intiraminti et sayan dalin so mangilitrato ed inkaorganisa, kooperasyon, tan kaligenan.

11, 12. (a) Panon so mapropetikon pamapaseguro nen Jehova ed totoo to a bendisionan toy nipawil lan binalegan dan dalin? (b) Anto so inlitrato na kakiewan a walad saray pangdel na ilog?

¹¹ Bendisionan kasi nen Jehova so dalin da? Ebatan na propesiya iyan tepet tekep na makapaligsay-puson deskripsion. Onaagus so kulos a manlapud templo, a manggamgam leleg ya onaagus, insan magmamaliw ya ilog kasabi to ed Inatey a Dayat. Ditan et pabilayen toy inatey iran danum, tan onaadilanta so panagnegosyo na sira ed laknab na baybay. Naromog ed saray pangdel na ilog so dakel a kiew a manbubunga ed intiron-taon, a mantatagano tan mamapaabig.​—Ezequiel 47:1-12.

¹² Parad saray adestiero, naulit iyan sipan tan amekder ed akadkauna iran propesiyan nipaakar ed panangipawil a pinabpabli ra. Aminpigan deneskribe na saray apuyanan a propeta nen Jehova so nipawil tan apanayaman lamet ya Israel diad terminon nipaakar ed paraiso. Saray mankibalatar a rehyon ya ombubuna so paulit-ulit lan mapropetikon tema. (Isaias 35:1, 6, 7; 51:3; Ezequiel 36:35; 37:1-14) Kanian, makapanilalo so totoo a say manangiter-bilay iran bendision nen Jehova so onagus a singa ilog manlapud nipawil a templo. Sirin, say inatey ed espiritual a nasyon so nabilay. Nabendisionan so nipawil a totoo na saray matalonggaring ya espiritual a lalaki​—lalakin matunong tan putel a singa saray kiew a walad saramay nipasingawey a pangdel na ilog, lalakin mangidaulo diad pamarakep lamet ed aderal a dalin. Insulat met nen Isaias so nipaakar ed ‘angkabaleg iran kiew na inkatunong’ a sikara et “ipaalagey da naani so saray daan ya abagbag.”​—Isaias 61:3, 4.

Kapigan so Inkasumpal na Pasingawey?

13. (a) Diad anton pantalos a benendisionan nen Jehova so nipawil a totoo to tekep na ‘angkabaleg iran kiew na inkatunong’? (b) Panon ya asumpal so propesiyan nipaakar ed Inatey a Dayat?

¹³ Kasin adismaya iray ompapawil ya adestiero? Andin balot! Say nipawil a nakdaan so pinmawil ed pinabpablin binalegan dan dalin nen 537 K.K.P. Asabi panaon, diad silong na panangigiya na sarayan ‘angkabaleg iran kiew na inkatunong’​—singa say eskriban Esdras, saray propetan di Aggeo tan Zacarias, tan say Atagey a Saserdoten Josue​—say abayag lan nankibalatar iran pasen so nipaalagey lamet. Alimbawa, saray pangulon di Nehemias tan Zerubabel so nanuley ed dalin ya anggapoy lalabien tan maptek. Nipawil so templo nen Jehova, tan saray probisyon to parad bilay​—saray bendision ed pambilay unong ed impisipanan to​—so onagus lamet. (Deuteronomio 30:19; Isaias 48:17-20) Say sakey a bendision et say pikakabat. Say inkasaserdote et nipawil ed serbisyo, tan binangatan na saray saserdote so totoo nipaakar ed Ganggan. (Malaquias 2:7) Bilang resulta, apabilay ed espiritual so totoo tan nagmaliw lamet a mabunga iran lingkor nen Jehova, a singa inlitrato na Inatey a Dayat a napapaabig tan mamapawala na onaadilantan panagnegosyo na sira.

14. Akin a napalumbasay kasumpalan na propesiya nen Ezequiel so agawa kayari na inkipawil na saray Judio manlapud inkadestiero ed Babilonia?

¹⁴ Kasin sarayan ebento so kasumpalan lambengat na pasingawey nen Ezequiel? Andi; wala ni bengatlan lalon babaleg. Imanoen pa: Say templo ya anengneng nen Ezequiel so agtalagan nayarin ipaalagey unong ed inkadeskribe to. Tua, seryoson minoria na saray Judio itan a pasingawey tan literal dan inyaplika ni ingen so pigaran detalyi.b Balet, ag-onduga so intiramintin nipasingawey a templo diad Palandey Moria, say lugar na datin templo. Niarum ni, say templo nen Ezequiel et anggapo’d syudad noagta niarawi diad sananey a sular, bangta say komaduan templo so nipaalagey ed akaalageyan na tinumbokan to, diad syudad na Jerusalem. (Esdras 1:1, 2) Sakey ni, anggapoy literal ya ilog a linmesa ed kapiganman diad templo ed Jerusalem. Kanian anengneng lambengat na kadaanan ya Israel so melag a kasumpalan na propesiya nen Ezequiel. Kabaliksan na saya a walay babaleg ni tan espiritual a kasumpalan na sayan pasingawey.

15. (a) Kapigan kinmurang so espiritual a templo nen Jehova? (b) Anto so mangipabitar ya ag-asumpal so pasingawey nen Ezequiel legan na impanbilay nen Kristo diad dalin?

¹⁵ Malinew, nepeg itayon manilalo ed kasumpalan na pasingawey nen Ezequiel diad baleg ya espiritual a templo nen Jehova, ya andukey a siningbat nen apostol Pablo diad libro na Hebreos. Kinmurang itan a templo sanen alanaan si Jesu-Kristo bilang say Atagey a Saserdote to nen 29 K.P. Balet kasin asumpal so pasingawey nen Ezequiel ed agew nen Jesus? Mapatnag ya andi ni. Si Jesus, bilang Atagey a Saserdote, so anumpal ed mapropetikon kabaliksan na Agew na Pananakbong panamegley na inkabautismo to, say masakripisyon impatey to, tan say inloob to ed Sankasantosan, diad tawen mismo. (Hebreos 9:24) Balet, makapainteres ta agbalot asaglawi ed pasingawey nen Ezequiel so atagey a saserdote odino say Agew na Pananakbong. Kanian mapatnag ya ag-ituturo na sayan pasingawey so panaoy inmunan siglo K.P. Sirin, diad anton peryodo na panaon so kiyaplikaan to?

16. Anto nin propesiya so ipapanonot ed sikatayo na eksena na pasingawey nen Ezequiel, tan panon iyan makatulong ed sikatayo ta pian natebek so panaon na manunan kasumpalan na pasingawey nen Ezequiel?

¹⁶ Parad ebat, ompawil ti pa ed mismon pasingawey. Insulat nen Ezequiel: “Dia ed saray pasingawey na Dios inyakar to ak ed dalin na Israel, tan inggaton to ak ed sakey a sankatageyan a palandey, a sikato so kawalaan nensaman na sakey a singa kapadpara na sakey a syudad ed abalaten.” (Ezequiel 40:2) Say eksena na sayan pasingayew, say “sankatageyan a palandey, so mangipapanonot ed sikatayo ed Miqueas 4:1, a kuanto: “Dia ed saray kaunoran ya agew nagawa naani, a say palandey na abung nen Jehova niletneg naani ed toktok na saray palandey, tan sikato naani nipaatagey ed tagey na saray pukdol; et saray baley onagus ira naani ed sikato.” Kapigan so pakasumpal na sayan propesiya? Ipapanengneng na Miqueas 4:5 a saya so onggapo leleg a mandadayew niray nasyon ed palson dirios. Diad tua, nagagawa la itan ed mismon panaon tayo, ‘say kaunoran a kabiangan na saray agew,’ a nipaatagey lay puron panagdayew, nipawil la ed manepeg a pasen to diad bilay na saray lingkor na Dios.

17. Panon a makatulong ed sikatayo so propesiya ed Malaquias 3:1-5 pian nadetermina tayo no kapigan so pakalinisan na templo ed pasingawey nen Ezequiel?

¹⁷ Panon ya agawan posibli iyan panangipawil? Nonoten, diad makatantandan tuloy ya ebento ed pasingawey nen Ezequiel, onsabi si Jehova ed templo tan ipilit ton say abung to et nalinisan ed panagtalintao. Kapigay inkalinisan na espiritual a templo na Dios? Diad Malaquias 3:1-5, impasakbay nen Jehova so panaon sano sikatoy ‘onsabi ed templo To,’ ya ulopen na ‘mensahero na sipanan’ to, si Jesu-Kristo. Say gagala? “Sikato so singa say apuy na manggogol, tan singa sabon na managpakapal na abel.” Ginmapo iyan panaggogol legan na panaoy inmunan guerra mundial. Say resulta? Nanayam si Jehova ed abung to tan benendisionan toy espiritual a dalin na totoo to nanlapulad 1919 a manpatuloy. (Isaias 66:8) Nibaga tayo sirin a nabidbiran so importantin kasumpalan na propesiya nen Ezequiel nipaakar ed templo legan na kaunoran iran agew.

18. Kapigan so unor a kasumpalan na templo ed pasingawey?

¹⁸ Singa ed arum niran propesiya a nipaakar ed panangipawil, wala ni kaaruman a kasumpalan na pasingawey nen Ezequiel, say kaunoran a kasumpalan, diad Paraiso. Diad satan lambengat a panaon so pakaawat na maptek-impanpuson katooan na nagnap iran gungguna ed uksoyan na Dios nipaakar ed templo. Usaren la’d satan nen Kristo so balor na dondon bagat to, a kaiba toy mangatatawen ya inkasaserdote a tugyopey 144,000. Amin a matulok a totoon sakop na uley nen Kristo so niyagwat ya anggad inkayadyari. (Apocalipsis 20:5, 6) Anggaman ontan, aliwan diad Paraiso so manunan panaon na kasumpalay pasingawey nen Ezequiel. Akin ya andi?

Nisesentro so Pasingawey ed Mismon Panaon Tayo

19, 20. Akin a nagawa natan so manunan kasumpalan na pasingawey ya aliwan diad Paraiso?

¹⁹ Anengneng nen Ezequiel so sakey a templo a nakaukolan a nalinisan ed panagtalintao tan espiritual a pilalawanan. (Ezequiel 43:7-9) Peteg ya ag-onaplika iya ed panagdayew ed si Jehova diad Paraiso. Sakey ni, ililitrato na saray saserdote ed pasingawey so alanaan a makasaserdoten klase leleg a wala nira’d dalin, aliwan kayari na mangatatawen a kioli ra odino leleg na Milenyo. Akin? Imanoen a saray saserdote so nilitraton manlilingkor ed akindalem a saban. Ipapanengneng na saray akadkaunan paway na Say Panag-Bantayan a sayan saban so mangililitrato ed nikadkaduman espiritual a talindeg na katangbayan iran saserdote nen Kristo leleg a wadia nira’d dalin.c Imanoen met ya idadanet na pasingawey so ag-inkayadyari na saray saserdote. Niganggan iran mangiyapay na saray bagat parad dilin kaskasalanan da. Apasakbayan ira ed kapeligroay pagmaliw a marutak ed espiritual tan moral. Kanian agda ililitrato so apaoli iran alanaan, a nipaakar ed saratan et oniay insulat nen apostol Pablo: “Say trumpeta ontanol, tan saray inatey onoli ra ed bilay ya agnaderal.” (1 Corinto 15:52; Ezequiel 44:21, 22, 25, 27) Saray saserdote ed pasingawey nen Ezequiel so akimogelmogel tan direktan nanlingkor ed totoo. Aliwan ontan ed Paraiso, sano say makasaserdoten klase so wala ed tawen. Sirin, itatarya na pasingawey so ekselentin panangilitrato ed maapit a pikikimeyan na saray alanaan ed “baleg ya ulop” diad dalin natan.​—Apocalipsis 7:9; Ezequiel 42:14.

²⁰ Kanian, ipapatnag na pasingawey nen Ezequiel a nipaakar ed templo so maabig iran epekto na espiritual a panaglinis a nasusumpal natan. Balet antoy kabaliksan na satan ed sika? Aliwa iyan basta makakewkew a teolohikon pannonotan. Sayan pasingawey so misiglaotan a tuloy ed mismon agew-agew a panagdayew mo ed alenleneg a tuan Dios, si Jehova. Diad ontumbok ya artikulo tayo et nanengneng tayo no panon.

[Saray paimano ed leksab]

Kasin Nanonotan Yo?

◻ Anto so pilimeron kasumpalan na pasingawey nen Ezequiel nipaakar ed templo tan say inkasaserdoten walad satan?

◻ Panon so asakbay a kasumpalan na pasingawey nen Ezequiel ed kaapag na dalin?

◻ Diad inkipawil na kadaanan ya Israel, siopa so inmakto bilang matoor a papangulo tan siopa so inmakto bilang “angkabaleg iran kiew na inkatunong”?

◻ Akin a say manunan kasumpalan na templo ed pasingawey nen Ezequiel et legan na kaunoran iran agew?