Ginawa Ra so Linawa nen Jehova
Sinumpal na Sankatalonggaringan a Too so Mapaabeban Serbisyo
AMTA nen Jesus a say kaunoran iran oras ed piulop to’d apostoles to so importantin tuloy. Magano la et sikato lay naerel, insan nasubok ed satan so pananisia to a nidumaduma ed kapiganman. Balet kabat met nen Jesus a walad arap to laray dakel a bendision. Agmanbayag et sikatoy nitandoro ed nikawanan na Dios tan naikdan na “ngaran ya analonggaring ed amiamin a ngaran; a dia ed ngaran a Jesus so talimukoran na amin a pueg, na saray wala ed tawen, tan wala ed dalin tan wala ed dalem na dalin.”—Filipos 2:9, 10.
Ingen, say kapagaan ed paganigani lan ipatey to nisay inkagunaet to’d nisipan ed sikaton tumang so ag-angamper ed si Jesus ed saray pankaukolan na apostoles to. Ta “inaro tora anggad kasampotan,” a singa inrekord ed saginonor nen Juan diad Ebanghelyo to. (Juan 13:1) Tan diad sarayan makabaliksan a kaunoran ya oras na bilay to bilang ayadyarin too, binangatan nen Jesus iray apostol to na makanakanan leksion.
Sakey a Leksion na Inkamapaabeba
Kaiba nen Jesus iray apostol ed sakey ya atatagey a silir ed Jerusalem pian selebraay Paskua. Diad apalabas et nadngel la nen Jesus so pansasangsangan da no siopay sankatalonggaringan ed limog da. (Mateo 18:1; Marcos 9:33, 34) Nisalaysay to la iyan pamaakaran ed sikara tan nambanikelan ton ipetek so punto de bista ra. (Lucas 9:46) Balet, natan et indanet nen Jesus iraman a leksion diad impangusar to na duman paraan. Agto labat denesidin mansalita nipaakar ed inkamapaabeba noagta impanengneng to itan.
Insulat nen Juan a si Jesus et ‘inmalagey ed panamangdeman ya impireg toray kawes to; et inala to so sakey a tobatas, tan imbalkes to. Insan angikalboy danum ed palanggana, tan ginmapo a manguras na salisali ray babangatan, tan punasan to ra ed tobatas ya imbalkes to.’—Juan 13:4, 5.
Diad panaon ya ampetang ed kadaanan a Pegley Bukig, gendagendat ya akasandalya iray totoo a manakar ed marabok a dalan. Diad iloob ed sakey ya abung na kabanyakan a too, sikaray abrasaen na akan-abung, a mangitarok na saray baseha tan danum ta pian naurasan day kasalian da. Diad saray walaan da, sakey ya aripen so manggawa ed pananguras na sali.—Uko-ukom 19:21; 1 Samuel 25:40-42.
Diad atatagey a silir, si Jesus tan saray apostol to so aliwan bisita. Anggapo so manangkailin mangitarok na saray baseha, tan anggaporay aripen a manguras na kasalian da. Sanen inggapo nen Jesus ya urasay kasalian da, niiyan ed mabanday a kipapasen iray apostol. Nia say Sakey a sankatalonggaringan ed limog da so nanggawa ed sankaabebaan a kimey!
Diad inmuna et aglabay nen Pedro a paurasay sali to ed si Jesus, Balet imbaga ed sikato nen Jesus: “No agta ka urasan, anggapo so piapagan mo ed siak.” Kayari nen Jesus ya inurasay kasalian na amin ya apostol, inkuanto: “Amta yo no anto so ginawak ed sikayo? Sikayo tawagen yo ak na, Managbangat, tan, Katawan, et maong so kuan yo, ta ontan ak. No siak sirin so Katawan tan Managbangat, et inurasan ko so saray sali yo, sikayo met nepeg yo so manuurasan na sali sakey tan sakey. Ta initdan takayo na sakey a pangaligan, pian sikayo gawaen yo met so singa ginawak ed sikayo.”—Juan 13:6-15.
Ag-angiletneg si Jesus na sakey a ritual a panag-uras na sali. Imbes, tutulongan toray apostol to a nawalaan na balon awawey—bengatlan nipaakar ed inkamapaabeba tan inkamabulos a manggawa na sankaabebaan a kimey nisesengeg ed agagi ra. Diad kaunoran et nala ray punto. Nonoten pay agawa pigaran taon ed saginonor sanen linmesay isyu nipaakar ed panaggalsim. Anggaman “agaway baleg a sangsangan,” apansiansia na saramay wadman so maong ya uksoy tan tinalineng da tekep na respetoy panmoria na balang sinansakey. Niarum ni, mapatnag a samay angidaulo ed saman a miting et si babangatan a Santiago—aliwan apostol, a singa nailaloan tayo komon, ta sikaray wadman met. Ipapanengneng na sayan detalyi ed salaysay na Saray Gawa a baleg so inyaligwas na saray apostol ed panangipatnag na inkamapaabeba.—Gawa 15:6-29.
Leksion Parad Sikatayo
Diad impanguras to’d kasalian na babangatan to, angiter si Jesus na mapuersan leksion na inkamapaabeba. On, agkaukolan ya isipen na Kristianos a sikaray ontanlan importanti a kaukolan a lawas panlingkoran ira na arum, nisay panpirawatan daray posisyon a pakawalaay galang tan dayew. Imbes, nepeg dan tumboken so padron ya impanengneng nen Jesus, ya “agdia linma a panlingkoran, noag say manlingkor, tan iter toy bilay to a panondon ed amayamay.” (Mateo 20:28) On, kaukolan a mabulos a sumpalen na saray patumbok nen Jesus iray sankaabebaan a serbisyo ed balang sinansakey.
Walay rason ed impangisulat nen Pedro: “Balkesan yoy inkasikayo na panagpaabeba, a manlilingkoran so sinansakey: ta say Dios kaingli’to so saray atatagey a linawa, et itdan to na grasya so saray mapaabeba.” (1 Pedro 5:5) Say salitan Griego parad “balkesan” so inaon ed lamot a salitan mankabaliksay “tapis na aripen,” ya imbalkes ed malakob ya aysing. Kasin tutukoyen dia nen Pedro so kiwas nen Jesus ya angibalkes na tuwalya bangta inurasan toray kasalian na apostoles to? Agnapiho iya. Anggaman kuan, say abeban serbisyo nen Jesus so nipasepsep ed puso nen Pedro, a nepeg met ya ontan komon ed kapusoan na amin a magmaliw a patumbok nen Kristo.—Colosas 3:12-14.