Agpatatalonaan ed Kapagaan

“KANIAN agkayo sirin mapaga nipaakar ed agew ya onsabi; ta say agew ya onsabi manpaga nipaakar ed sikaton dili. Masarag la ed agew so uges a walad sikato.” (Mateo 6:34) Talagan praktikal itan ya insimbawa nen Jesu-Kristo ed amin tayon manbibilay ed sayan apuraan tan makapadetdet a sosyedad.

Balet, diad realistikon paraan kasin posibli ed sikatayon agmanpaga nipaakar ed saray problema, desisyon, obligasyon, tan responsabilidad tayo? Minilyon a totoo so manliknan pirmin nagogonigon, naaburido, tan nabebelatan. Satan no akin a saray tranquilizer tan sedative et negosyon pakakalmoay minilmilyon a dolyares.

No Iner so Pangigetaran

Kaukolan itayon manplano tan manparaan parad saray obligasyon, asainmin, desisyon, tan problema tayo​—balanglan maganat iratan odino andi. Papasesegen itayo na Biblia ya ‘onyurong ya unona tan bilangen so bili’ antis a mangigapo na antokaman a baleg a proyekto. (Lucas 14:28-30) Laktipen na saya so panimbang ed walaran panpilian, panganalisa ed posibli iran epekto na pansumpalan, tan panantiya ed gastos no nipaakar ed panaon, biskeg, tan kuarta.

Bangta kaukolan a maalwar a nonoten na sakey no antoy nayarin nagawa, aliwan posibli odino makapaalagey so panalin panisip ed kada pansumpalan. Alimbawa, parad pankaabigan na kaligenay pamilya, nonoten mo no antoy gawaen no bilbilang ta napopoolay abung mo. Nayarin manaliw ka tan mangipeket ka na saray detektor na asewek tan fire extinguisher. Nayarin iplanom tan iyinsayo so pawayan diad nanduruman kabiangan na abung. Antoy pandumaan na malikas, praktikal a panagplano tan alablabas, agmakatunongan a kapagaan? Say ontan a kapagaan so onggapo sano panirapen moy inkasikan mannonot na dakerakel a padesir labat a situasyon, a dakel ed saratan so resulta na alablabas ya imahinasyon. Nayarin talonaan ka na pakakaaburido, a mangombinse ed sikan walay nibabaliwalam odino agmo panpepelengan a protektaay pamilyam. Sayan dilin-panagpairap so makapabelat ed kanonotan mo a mansumpal ed agmo pakaugip.

Si Moises ed Arap nen Faraon

Inikdan nen Jehova a Dios si propeta ton Moises na mairap ya asainmin. Unona, kaukolan ya onarap si Moises ed saray Israelita tan kombinsien ira a sikatoy tinuro nen Jehova a mangipaway ed sikara ed Ehipto. Insan, kaukolan nen Moises so onarap ed si Faraon tan kerewen ya abuloyan ton ontaynan iray Israelita. Kaunoran, kaukolan nen Moises ya idaulo so dakel a totoo a manbilang na minilyon diad kalawakan a mamaarap ed dalin a kawalaan na maruksan totoo. (Exodo 3:1-10) Amin na saya so alay irap komon, balet kasin inabuloyan nen Moises iyan responsabilidad a mamaaburido ed sikato?

Mapatnag, mapaga si Moises ed dakel ya isyu. Intepet to ed si Jehova: “Nia, sano onsabi ak ed saray anak na Israel, tan kuan ko ed sikara so saya, Say Dios na saray atateng yo imbaki toak ed sikayo, et no tepeten da naani ed siak, Siopa so ngaran to? Anto so yebat ko ed sikara?” Sikatoy inebatan nen Jehova. (Exodo 3:13, 14) Mapaga met si Moises nipaakar ed nayarin nagawa no sikatoy agpanisiaan nen Faraon. Lamet, inebatan nen Jehova so propeta. Say unor a problema​—inaksobi nen Moises a sikatoy ‘mabanayat a mansalita.’ Panon iyan naremedyoan? Intarya nen Jehova si Aaron a mansalita ed biang nen Moises.​—Exodo 4:1-5, 10-16.

Lapud akataryan mangebat ed saray tepet to tan lapud walaan na pananisia ed Dios, ginawa nen Moises so unong ya ingganggan nen Jehova. Imbes a pairapen toy inkasikato na makapatalaw iran kanonotan nipaakar ed nayarin nagawa sano nakaarap toy Faraon, “onman so ginawa” nen Moises. (Exodo 7:6) No inabuloyan toray kapagaan a manalona ed sikato, saraya komon so amakapuy ed pananisia tan inkakpel a nakaukolan pian nagawaan toy asainmin to.

Say inkabalansi nen Moises ed panumpal na asainmin to so alimbawa ed singa impanawag nen apostol Pablo a “limpion kanonotan.” (2 Timoteo 1:7, NW; Tito 2:2-6) No ag-inagamil nen Moises so limpion kanonotan, magmainomay komon a tinalonaan na inkabelat na asainmin to a nayarin agto komon inawat itan.

Panangontrol ed Kanonotan Mo

Panoy ikiwas mo no diad inagew-agew a kabibilay mo et nipaarap ka’d saray subok na pananisiam odino ed saray pakasalsalian? Kasin nataranta ka ed pannonot labat ed saray babeng tan angat a walad arapen? Odino moriaen mo iratan ed asimbang a paraan? Singa ikuan na arum, ‘Agmo ni babaliwen so taytay anggad agmo ni asabi itan.’ Ompan agla kaukolan a baliwen itan ya imahinasyon labat a taytay! Kanian akin a pairapey sarili ed bengatlan agbalot nagawa? Ibabaga na Biblia: “Say kabelatan ed puso na too mamatuek ed sikato.” (Uliran 12:25) Say mabetbet a resulta et say pangipaleen na sakey ed panagdesisyon, ya ipireg niray bengatla anggad atrasado lan tuloy.

Say mas nin seryoso et say kaapektoan ed espiritual a resulta na agnakakaukolan a panagpaga. Impanengneng nen Jesu-Kristo a say apresasyon ed “salita na panarian” so nayarin sigpot a talonaan na mapalikdon pakayari na kayamanan tan “say kapagaan ed mundo.” (Mateo 13:19, 22) No panon a saray sabsabitan so mangamper ed saray malangwer nin tanaman ed itakken tan pambunga, ontan met a say agnakontrol a kapagaan so mangamper ed sikatayo diad iyaligwas ed espiritual tan ed pambungay kirayewan na Dios. Say dilin-panagpairap, makaderal ya alablabas a kapagaan so angamper ni ingen ed pigara ed pangidedika ray inkasikara ed si Jehova. Panpapagaan da, ‘Panon to no agak makapanbilay unong ed dedikasyon ko?’

Inkuan nen apostol Pablo ed sikatayo a diad espiritual a pibabakal tayo, pambanikelan tayoy pangitarok ed ‘balang kanonotan ed katutulok ed Kristo.’ (2 Corinto 10:5) Say baleg a kabusol tayo, si Satanas a Diablo, so naliketan a tuloy a manganamot ed saray kapagaan tayo ta pian dismayaen tan pakapuyen itayo ed pisikal, emosyonal, tan espiritual a paraan. Sikatoy eksperto’d panangusar ed panduaruwa pian kalotan so agmalikas. Satan no akin a pinasakbayan met nen Pablo iray Kristiano ya ‘agpapalongkitan so Diablo.’ (Efeso 4:27) Bilang “[say] dios na sayan panaon,” si Satanas so matalonan ‘mamubulag ed kaisipan na saray agmananisia.’ (2 Corinto 4:4) Komon ta sikatoy agtayon balot abuloyan a mangontrol ed kanonotan tayo!

Walay Tulong

Sano nipaarap ed saray problema, say sakey ya ugaw so makaasingger ed maaron ama tan makaawat na panangidirehi tan ligliwa. Mipadpara, makaasingger itayo ed mangatatawen ya Ama tayo, si Jehova, lapud saray problema tayo. Diad tua, iimbitaan itayo nen Jehova ya ibuntok tayoray pakabelatan tan kapagaan tayo ed sikato. (Salmo 55:22) Singa sakey ya anak ya agto la panaaburidoan iray problema to kayarin akaawat na saray panamaseguro nen ama to, agtayo labat nibuntok iray pakabelatan tayo ed si Jehova noagta nipalima tayo iratan ed sikato.​—Santiago 1:6.

Panon tayon ibuntok iray kapagaan tayo ed si Jehova? Oneebat so Filipos 4:6, 7: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” On, bilang ebat ed tuloytuloy iran pikakasi tan ey-ey tayo, ikdan itayo nen Jehova na akindalem a kareenan a manalimbeng ed saray kanonotan tayo manlapud pakagonigon lapud agnakakaukolan iran kapagaan.​—Jeremias 17:7, 8; Mateo 6:25-34.

Balet, pian mitunosan itayo ed saray pikakasi tayo, kaukolan ya agtayo isian so inkasikatayo balanglan diad pisikal odino mental a paraan. (Uliran 18:1) Imbes, maabig no nonoten tayoray prinsipyo na Biblia tan panangiwanwan a manasaglawi ed problema tayo, diad ontan et napaliisan tayoy isaral ed dili tayon pakatalos. (Uliran 3:5, 6) Saray kalangweran tan maedad la so makatupleg ed Biblia tan ed saray publikasyon na Watch Tower parad dakel ya impormasyon nipaakar ed panagdesisyon tan pangasikaso ed saray problema. Niarum ni, diad loob na Kristianon kongregasyon, nabebendisionan itayo ta walaan tayoy makabat tan eksperiensiadon mamatatken tan arum a matatken ed espiritual iran Kristiano a lawas mabulos a mitongtong ed sikatayo. (Uliran 11:14; 15:22) Saramay ag-apektado ed emosyon ed saray problema tayo tan walaan na kanonotan na Dios nipaakar ed pamaakaran so mabetbet a makatulong ed sikatayo a mangimano ed saray problema tayo ed duman punto de bista. Tan bangta agda itayo idesisyonan, sikaray panlapuan na baleg a panamaseseg tan suporta.

‘Manilalo ed Dios’

Anggapoy makapangiburi a walay detdet ed pangarap ed saray peteg a problema tayo ed kada agew ya ag-aaruman iratan diad panpaga ed saray imahinasyon labat. No say kapagaan a nayarin nagawa et sengeg na katatakotan tan agtayo pakaligen, diad ontan ontupleg itayo ed si Jehova diad pikakasi tan pikekerew. Manilalo ed Salita tan organisasyon to parad panangidirehi, kakabatan, tan limpion kanonotan. Naromogan tayon antokaman iray sirkumstansian onlesa, walay tulong pian arapen itan.

Onia so inkanta na salmista a nabebelatan tan naaaburido: “Akin et nilukbob ka, O kamarerwak? Tan akin et agka makareen ed loob ko? Manilalo ka ed Dios; ta idayew ko ni, so tulong na lupak, tan Dios ko.” (Salmo 42:11) Komon ta ontan iray liknaan tayo.

On, manplano parad makatunongan ya ilaloan, tan ipudir so ag-iilaloan ed si Jehova. “Imatalek yo ya amin ed sikato so kapagaan yo; ta sikato asikasoen to kayo.”​—1 Pedro 5:7.

[Litrato ed pahina 23]

Singa si David, kasin ibubuntok moray pakabelatan tan kapagaan mo ed si Jehova?