Panaanap na Paraiso

UNONG ED SALAYSAY NEN PASCAL STISI

Lablabi la, tan anggapoy onkitakitaw ed saray kalye na baley a Béziers, diad abalaten na Pransya. Diad impakanengneng ed kapkapanpintan pader na bookstore a nipaakar ed relihyon, insulat mi ditan na kaarok ed angkabaleg tan andeket a letra so balikas na pilosopon Aleman a si Nietzsche: ‘Inatey laray dirios. Magnayon si Superman!’ Anto ta’y akasengeg no akin a ginawak iya?

NIANAK ak ed Pransya nen 1951 ed sakey a pamilyan Katoliko na polin Italyano. Sanen ugaw ak ni, manbabakasyon kami ed abalaten na Italya. Kada baryo diman et walay imahen nen Birhen Maria. Kaibak si lakik ed andukey a libot ed saray palandey na sarayan angkabaleg tan akawesan a taltalintao​—balet ta anggapo ed pusok. Nansumpal ak na haiskul ed relihyoson eskuelaan ya ipapakurang na saray Jesuit. Balet ta anggapo labat lay nadngel kon amabiskeg na pananisiak ed Dios.

Nanumamengan koy gagala na bilay sanen wala ak la’d unibersidad ed Montpellier ed kurson medisina. Abaldado si amak legan na bakal tan naynay a walay doktor ed abay to. Agta magmaong no patundaey bakal imbes a mangusar na baleg a panaon tan sagpot a tambaley totoo lapud epekto to? Balet ta kapetapetangan ni na Vietnam War. Parad say siak, say makatunongan labat a paraan a natambal so kanser ed bala, alimbawa, et diad pamagit ed manunan sengegan to​—tabako. Panon to balet iray sakit a resultay malnutrasyon ed saray onaaligwas a bansa tan ed saramay resultay alabas a panangan ed mayaman a daldalin? Agta mas marakep no ekalen iray sengegan imbes a salien a remedyoay makapasinagem iran pansumpalan? Akin ya ontanlay paniirap ed sayan dalin? Liknaen kon walan talagay mauges ed sayan patapon lan sosyedad, tan saray gobierno so natetel.

Labalabay ko imay libron insulat na sakey ya anarkista, tan mangopya ak ditan insan ko isulat ed saray pader. Kalkalna et nagmaliw ak met lan sakey ya anarkista, andian na pananisia odino saray ganggan nipaakar ed moralidad, ya agto labay so nawalaay Dios odino katawan. Parad siak et say Dios tan relihyon so gawagawa labat na saray mayaman tan walay pakayari ta pian nadomina tan nalames daray arum ed sikatayo. ‘Ikimeyan mo kamin impasya ed dalin, tan say tumang mo et baleg diad paraiso ed tawen,’ so singano ibabaga ra. Balet ta angganga lay panaon na dirios. Kaukolan a nipakabat itan ed totoo. Say graffiti odino panagsulat na diparan ed pader so sakey a paraan pian nipaamta ed sikara.

Lapud satan et onkokomadua labat lay panag-aral ko. Ambegya nanaral ak na geograpiya tan ekolohiya ed sananey ya unibersidad ed Montpellier a walay nagagawan rebelyon. Diad lalon panaaral koy ekolohiya, lalon nagegeget ak ed kadudutak na marakep a planeta tayo.

Kada taon legan na panbakasyon ed tiagew, akilugan-lugan ak, a kokobrian so nilibon kilometro ed Europa. Legan na panbiabiahek tan pitotongtong ko ed nilasus a drayber, anengneng kon mismo so inkauges tan inkabulok a manederal ed sosyedad na too. Aminsan diad panaanap ko’d paraiso et anengneng koray marakdakep a baybay ed masansanting ya isla na Creta balet magakgrasa. Naermenan ak a tuloy, wala ta ni sukong ed dalin a paraiso?

Pinmawil ed Panagtanem

Diad Pransya iyaalibansa na saray ekolohista so ipapawil ed panagtanem bilang solusyon ed saray pandadageyeman na sosyedad. Labay koy mankimey diad panamegley na limalimak. Kanian analiw ak na sakey a daan ya abung a gawa’d bato ed melag a baryo na alosadsar na Cévennes Mountains diad abalaten na Pransya. Diad puerta et insulat ko “Paraiso la Natan,” say diparan na saray hippy a taga-Amerika. Sakey a marikit ya Aleman a manbiabiahe ed lugar mi so nagmaliw a kaamong ko. Agak onabuloy a kasalen na mayor, sakey a manangilaman na say gobierno. Say pankasal balet ed simbaan? Andi bale la!

Naynay kamin manakar ya akasali-sali, tan andukey so buek ko tan asaganet so balbas ko. Nanliketan koy pantanem na prutas tan pisipising. No tiagew et malinak so tawen tan manuni iray piyaes. Saray bolaklak na tantanaman so ambalbalingit, tan saray prutas na Mediterranean ya intatanem mi​—ubas tan igos​—so makmakbol! Singa no aromog mi lay pasen mi ed paraiso.

Aliing so Panisia ed Dios

Diad unibersidad, nanaral ak na cellular biology, embryology, tan anatomy, tan nandinayewan kon tuloy so inkakomplikado tan pantutunosan na amin na sarayan mekanismo. Natan ta sarag ko lan namolimoli tan naobserbaan a mismo ya inagew-agew so palsa, nandinayewan kon tuloy so karakpan tan kapasidad to. Kada agew et nipaparungtal ed siak so libro na palsa. Sakey ya agew diad andukey ya impanakar ed kapukdolan tan kayari impanumameng a maong nipaakar ed bilay, nikuan kon kaukolan a walay Manamalsa. Pinekderan ko’d pusok so panisia ed Dios. Dati et liknaen kon say pusok so begtebegtew tan maer-ermen. Diad samay agew ya anisia ak la ed Dios, inkuanko ed inkasiak, ‘Pascal, natan et agmo la bukbukor.’ Nidumaduma iman ya aliknak.

Ag-abayag, siak tan say kaamong ko et awalaan na anak a bii, si Amandine. Sikatoy pinabpablik. Lapud manisia ak la’d Dios, nirespetok laray pigaran amtak a ganggan ed moral. Tinundaan ko lay mantakew tan mantila, tan amoriak a tampol a lapud saya et apaliisan koray dakel a probleman naromog ed saramay walad kaliberliber ko. On, walaray problema mi met, tan say paraisok so aliwan singa samay iilaloan ko. Saramay taga diman a say tanem da et parad alak so manguusar na saray insecticide tan herbicide a manasamal met ed saray tanem ko. Siansian agni naebatay tepet ko ed no antoy sengegay karelmengan. Niarum ni, anggaman dakel lay abasak nipaakar ed bilay na pamilya, ag-angamper iya ed pirmin sangsangan min sanamong. Daiset so kaaro mi, tan sikaray agmatoor; sinagyat na arum ni ingen ed sikara so kaamong ko a mikalugoran. Nepeg labat a walay marakdakep a paraiso.

Say Ebat ed Saray Pikakasik

Diad dilin paraan ko, mabetbet ak a nampikasi ed Dios ya iwanwan toy bilay ko. Diad sakey a Simba na kabuasan linma ed sikami so makaaron biin manngaran na Irène Lopez a kaiba toy melag ya anak ton laki. Sikatoy sakey ed Tastasi nen Jehova. Dinengel koy kaukolan ton ibaga tan inmabobon ak ed ibisita to lamet. Insan ak dinalaw na duaran lalaki. Duaran bengatlay atandaan ko’d impantotongtong mi​—Paraiso tan Panariay Dios. Impapusok iraman a nibaga’d siak, tan diad ilalabas na bulabulan et amoriak ya onsabi agew a kaukolan kon itunos so bilay ko’d saray estandarte na Dios no labay kon nawalaan ak na malinis a konsiensia tan naromog so peteg a liket.

Ta pian nitunos so bilay mi ed Salitay Dios, diad inmuna et labay na kaamong kon mankasal kami. Balet ta asabin akilimog ed mauges a kakaulop a nanleglemew ed Dios tan saray ganggan to. Aminsan a labi na primabera, diad insempet ko et abigbigla ak a tuloy. Anggapoy wala’d abung. Tinaynan ak na kaamong ko ya inawit toy taloy-taon ya anak min bii. Pigay agew kon pitalaran so ipawil da​—balet ta ag-agawa iman. Imbes a teteley Dios, nampikasi ak a tulongan toak.

Kayarin tuloy na satan, inalak so Biblia, inmirong ed silong na kiew ya igos, tan binasak. Diad tua et talagan minotektek koray salita to. Anggaman abasak laray nambabangil a libro na saray psychoanalyst tan sikolohista, agak nin balot akabasa na ontanlan kakabatan. Seguradon sayan libro so impuyan na Dios. Nandinayewan koy bangat tan pakatalos nen Jesus nipaakar ed inkatoo. Aligliwa ak ed saray Salmo tan nikelawan ed praktikal a kakabatan na Uliran. Amoriak a tampol a bangta say panagaral ed palsa et maabig diad pakapiapit na sakey ed Dios, niparungtal to lambengat iray “kabiangan a mapaway na saray dalan to.”​—Job 26:14.

Intilakan ak met na Tastasi na saray libron Say Katuaan a Mangitonton ed Andi-anggaan a Bilay tan Making Your Family Life Happy.a Diad impanbasa ed saratan et alukasay pakatalos ko. Atulongan ak na libron Katuaan a natalosan no akin a say too et nipapaarap ed malaknab a polusyon, bakabakal, ompapalalon karawalan, tan say pamapagyaw na pakapalanit lapud nuklear. Tan no panon a say balangaan a tawen ya anengneng ko ed harden ko et angipatnag na marakep a klima ed kaimbuasan, paneknekan na sarayan ebento ya asingsingger lay Panariay Dios. Balet no nipaakar ed libron Family Life, pirawat kon nipanengneng ko komon itan ed kaamong ko tan ibaga’d sikaton nayarian min magmaliw a maliket no agamilen mi isisimbawa na Biblia. Balet ta agla posibli.

Iyaaligwas ed Espiritual

Dakel ni labay kon amtaen, kanian kinerew ko’d Robert, sakey a Tasi a bisitaen toak. Abigla ta imbagak a labay ko lay manpabautismo, diad ontan et nigapoy panangiyaral na Biblia. Intongtong kon tampol ed arum so nakakabatan ko, tan angibunog ak met la na saray palapagan a naaalak ed Kingdom Hall.

Ta pian walay pambilay ko, nanaral ak ed kurson panagmason. Lapud sinononot ak ed maabig a nagawaan na Salitay Dios ed sakey a too, inanamot ko so amin a pankanawnawan pulongan iray kaklasek tan saray titser ko ed impormal a paraan. Sakey a labi, nabet ko si Serge ed pasilyo. Sankabembenan toy pigaran magasin. “Amtak a labalabay moy manbasa,” kuanko ed sikato. “On, balet ta onsasawaak la’d oniaran babasaen.” “Talaga ta’n labay moy marakerakep a basaen?” intepet ko’d sikato. Marakep so impantongtong mi nipaakar ed Panariay Dios, kayari to et inawat toy pigaran literatura nipaakar ed Biblia. Diad tinmumbok a simba et akila’d siak diad Kingdom Hall, tan nigapoy panangiyaral na Biblia.

Sakey ya agew et tinepetan koy Robert no nayari ak lan mankabkaabungan. Linma ed closet to ya angalay amerikanan onduga’d siak. Diad sinmublay a Simba, ginawak lay inmuna iran kundang ed panagministro a kaiba to. Kaunoran, nen Marso 7, 1981, mapublikon insimbolok so dedikasyon ko ed si Jehova a Dios diad bautismo.

Tulong Anggaman ed Gonigon

Ambegya naamtaan kon wala la manaya’d biek taew si Amandine tan say ina to. Agay met la, sinebelan ak nen ina to​—diad impangusar ed ley na bansan panaayaman to a minengnengan ed marikit ko. Anggapoy nagawaan ko. Akiasawa lay ina nen Amandine, tan asabi lalon nanermenan ko sanen naawat koy opisyal ya abiso a tinagibi la na masiken toy anak ko​—ya agak labat la inalaay permiso. Andian ak la na antokaman a kanepegan ed anak ko. Anggaman ed impandemanda, agak balot naikdan na kanepegan ya ombisita. Singak sankasakbat so 50 kilo, agaylay sakit.

Balet ta tinambayo ak na Salita nen Jehova ed pigaran dalan. Sakey ya agew sanen nagogonigon ak a tuloy, inulit-ulit koray salita ed Uliran 24:10: “No onkapuy ka ed agew na kasegsegangan, say kasil mo sikato so melag.” Sayan bersikulo so tinmulong ed siak pian ag-onkapuy. Diad sakey ya inkagawa, lapud insaew ed panasalin napinengnengan so marikit ko, linma ak a nampulong ya inegnaan a maong so bag ko. Diad saratan a bektan alay irap, naeksperiensiak so katuaan na Salmo 126:6, a kuanto: “Say onla tan mannangis a sankatarok to so mabli a bukel, ya itatanem, andi-duaruwa ya onsempet lamet naani a magaygayaga, a sankatarok to so pinungopungo to.” Say importantin leksion a naaralan ko et sano grabe kasusubok mo, bektan agawaan mo lay nayarian mo pian resolbien iray problemam, kaukolan mon ipereg iratan tan mantultuloy ed determinasyon a manserbi ed si Jehova. Diad onian paraan labat a napansiansiam so gayagam.

Pandampot ed Bengatlan Magmaong

Lapud impakaimano na pinablin atateng ko’d impanguman ko, labay da ak a tulongan pian nituloy koy pankolehyok. Akisalamatan kora, balet ta sananey lay kalat ko natan. Imbulos ak na katuaan manlapud pilosopiya, mistisimo, tan astrolohiya na too. Walaan ak la natan na peteg a kakaaro ya agbalot manpapateyan ed bakal. Tan diad kaunoran et amtak laray ebat ed panuumamengan ko no akin ya ontanlay kairapan ed dalin. Lapud otang a linawa et labay koy manserbi ed Dios ed amin a biskeg ko. Sigpot ya intalaga nen Jesus so inkasikato ed ministeryo to, tan labay kon tumboken so alimbawa to.

Nen 1983, intundak so negosyok a panagmason pian magmaliw a sigpot panaon a ministro. Bilang ebat ed saray pikakasik, akaromog ak na part-time a trabaho ed sakey a parke ta pian nalegpet koy inkasiak. Alay gayaga ed pakaatendi ed pioneer school a kaibay Serge, say balolakin apulongan ko ed masonry school! Kayari taloy taon bilang regular pioneer, inisip kon baleg ni nagawaan ko ed serbisyo ed si Jehova. Kanian, nen 1986, aturo ak bilang sakey ya special pioneer ed marakerakep a baley na Provins, ya asingger ed Paris. Mabetbet, diad kasesempet ed labi, ontalimukor ak a manpikasi ed si Jehova a pisalamatan lapud maabig ya agew kon impitongtong ed arum nipaakar ed sikato. Diad tua, say duaran sankabalgan a panliliketan ko ed bilay et say pitongtong ed Dios tan say pangitongtong nipaakar ed sikato.

Sakey nin nanggayagaan ko et say impanbautismo na 68 taon a nanay kon manaayam ed Cébazan, melag a purok ed abalaten na Pransya. Sanen binasa la nen nanay koy Biblia, impawitan ko na subskripsion a Say Panag-Bantayan tan Awake! Sikatoy manonot a too, tan atalosan ton tampol so katuaan ed abasa to.

Bethel​—Makatantandan Espiritual a Paraiso

Sanen denisidi na Watch Tower Society a bawasay bilang na saray special pioneer, nan-aplay ak parad Ministerial Training School tan ed Bethel, say sangan opisina na Tastasi nen Jehova diad Pransya. Parad say siak et makauley lay Jehova no panon kon sankaabigan a napanserbian. Pigaran bulan ed saginonor, nen Disyembre 1989, naimbitaan ak ed Bethel diad Louviers, amianen-sagur a Pransya. Apaneknekan ya ekselenti iyan nansumpalan, lapud makapitulongan ak ed agik tan ayrok ed pangasikaso’d atateng mi sano sikara lay mansakit. Agko nagawaan iya no nilibon kilometroy kaarawik ed sikara lapud panagmisionaryo.

Aminpigan dinalaw ak nen nanay ko ed Bethel. Anggaman sakripisyo ed biang to so panayam ya arawi ed siak, mabetbet ton ibabaga ed siak: “Mansiansia ka ed Bethel, Anak. Panliketan ko ta manlilingkor ka ed si Jehova ed onian dalan.” Makapaermen ta namparan naandi la’d bilay iray ateng ko. Talagan panpirawatan kon napinengnengan ira ed dalin ya apagmaliw lan literal a paraiso!

Talagan panisiaan ko a no walay abung a makanepegan ed deskripsion a “Paraiso la Natan,” satan et say Bethel​—say “Abung na Dios”​—say peteg a paraiso so manuna’d amin et espiritual, tan matalonggaring so espiritualidad ed Bethel. Walaan kami na pankanawnawan nabayuboan so bunga na espiritu. (Galacia 5:22, 23) Say mayaman ya espiritual a tagano a naawat legan na inagew-agew a diskusyon ed teksto ed Biblia tan say panagaral na pamilya ed Say Panag-Bantayan so mamapabiskeg ed siak ed serbisyo’d Bethel. Sakey ni, diad pakapililimog ed sinononot ed espiritual ya agagi a manlilingkor ed si Jehova a sitotoor ed loob na saray siglo et pagmaliwen toy Bethel a nikadkaduman pasen a pakabulaslasan ed espiritual. Anggaman siak so niarawi ed anak kon bii ed loob la na 17 taon natan, dakel so aromog kon maseseg a tobonbalo ed Bethel, a nipasen kon ananak ko, tan panliliketan koy iyaaligwas da ed espiritual. Diad apalabas a waloran taon et pitoran nanduruman asainmin so nanserbian ko. Bangta say impansasalat na asainmin so aliwan lawas mainomay, say ontan ya inkipasal so walaan na magnayon a gungguna.

Datin siak so mantatanem na sakey a klase na agayep a manbubunga na tunggal lasus. Mipadpara, naeeksperiensiak a no say intanem mo et mauges, manani kay nilasus nin mauges​—tan aliwa labat lan saksakey a panagani. Say eksperiensia et sakey ya eskuelaan a saray leksion to et sengegay baleg a pansakripisyoan. Mas labay koy agbalot impanpalista komon ed ontan ya eskuelaan, noagta binmaleg ak la komon ed saray dalan nen Jehova. Agaylan pribilihyo parad saramay tobonbalon pinabaleg na Kristianon atateng! Anggapoy duaruwan, magmaong so pantanem na maabig diad serbisyo’d si Jehova tan panani na nilasus nin kareenan tan inkapenek.​—Galacia 6:7, 8.

Sanen payunir ak ni, no maminsan et nadadalanan koy bookstore nipaakar ed relihyon a sinulatan mi so pader to na diparay anarkista. Linmoob ak ni ingen tan akitongtongay akankien nipaakar ed mabilay a Dios tan ed gagala to. On, say Dios so mabilay! Nagkalalo ni et si Jehova, say mogmon tuan Dios, so sakey a matoor ya Ama, ya agbalot mangikakaindan ed ananak to. (Apocalipsis 15:4) Komon ta dakerakel ni manlapud amin a nasyon so makaromog na espiritual a paraiso la natan​—tan say nipawil a Paraiso ya onsabi​—diad panamegley na panserbi tan pangidayew ed mabilay a Dios, si Jehova!

[Paimano ed leksab]

[Saray litrato ed pahina 26]

Diad impakatenyeg lapud saray pankelawan ed palsa, pinekderan ko’d pusok so panisia ed Dios. (Nikawanan) Panseserbi natan ed Bethel