Kasin Ipapatnag Mon Misalsalamat Ka?

Diad ayaman na saray misionaryo ed Sagur ya Aprika, walay datin nanayam diman ya aso ya inngaran na Teddy. No walay mangibuntok ed si Teddy na sankategteg a karne, akmonen to itan a tampol, ya agto la timtiman tan gatgaten. Maneng-engas ed kapetapetangay agew, alagaren toy ontumbok a nibuntok ed sikato. no anggapo lay karne insan sikatoy onalis la.

Agbalot anggan akisalamat si Teddy ed naawat to. Anggapoy makapanilalon gawaen to itan. Siempre ta sikato et sakey lambengat ya aso.

NO NIPAAKAR ed pisasalamat, mabetbet tayon ilaloan a nagkalalo ni so gawaen na kaparan totoo nen say ayayep. Balet ta nadidismaya itayo. Ta dakel a totoo so manganamot na labay da ed bilay tan mananap ni. Aliwa met iyan makapakelaw. Impasakbay na Biblia a diad kaunoran iran agew, say totoo et andiay pisasalamat.​—2 Timoteo 3:1, 2.

Balet, miduma so awawey na saray lingkor na Dios. Tatalinengen da so simbawa nen apostol Pablo, ya animbawa ed saray kapananisiaan: “Sikayo komon so misalsalamat.”​—Colosas 3:15.

Ipapatnag nen Jehova a Sikatoy Misalsalamat

Impanengneng nen Jehova a Dios so naspot ya alimbawa na apresasyon. Konsideraen pa no panoy panmoria to ed saray matoor a lingkor to. Diad inkipuyan, sinulat nen Pablo iray Hebreon Kristiano: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—Hebreos 6:10.

Dakerakel so alimbaway impangapresia nen Jehova ed saray matoor a lingkor to. Benendisionan toy Abraham diad impamarakel ed ilalak to, kanian nagmaliw iran “singa saray bitewen ed katawenan, tan singa saray buer a wala ed gilig na dayat.” (Genesis 22:17) Diad impangapresia ed inkamatoor nen Job ed silong na subok, aglambengat impawil nen Jehova so dakel a kayamanan nen Job noagta inikdan to met na “mamidua [a karakel].” (Job 42:10) Pinaneknekan na saray impideneng nen Jehova ed saray totoo ed inlabas la na saray milenyo so inkamatua na say balikas a: “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.”​—2 Awaran 16:9.

Say panangapresia tan say pananumang na Dios ed saramay manggugunaet a manggaway linawa to so manuna iran kabiangan na personalidad to. Say pamidbir ed saya et importanti ed Kristianon pananisia. Oniay insulat nen Pablo: “No anggapo so pananisia [sikatoy] agnayarin paliketen; ta say ondago ed Dios nakaukolan a sisiaen to . . . tan sikato so niiyan a mananumang ed saray mananap ed sikato.”​—Hebreos 11:6.

No bilang ta say impatnag nen Jehova et maruksa tan makritikon awawey, amin tayo so nakondena. Abayaglan impabitar na salmista iyan punto: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) Maapresia si Jehova tan aliwan makritiko. Papablien to iramay manlilingkor ed sikato. Ipapatnag toy inkasikaton misalsalamat.

Si Jesus​—Maapresian Tuloy a Persona

Diad naspot a pangipapatnag ed saray kualidad na mangatatawen ya Ama to, impatnag nen Jesu-Kristo a sikato so misalsalamat ed ginawa na arum nisesengeg ed pananisia. Konsideraen pay aminsan ya agawa ed templo na Jerusalem: “Nen linmingaw [si Jesus], tan anengneng to so saray mamayaman ya ipepelag da so saray tukdol da dia ed panangyatolan na tukdol. Et anengneng to so sakey a dukan balo a bii ya impelag to’d man so duaran marabilis. Et inkuan to, Tua kuan ko ed sikayo, sayan duka a balon bii angipelag na dakdakel nen sikara ya amin. Ta amin so saraya dia ed masulok ed sikara so angalaan da na ipelag da ed saray tukdol: ingen sikato dia ed kakulangan to impelag to so amin a pantagano a wala ed sikato”​—Lucas 21:1-4.

No moriaen unong ed kantidad na kuarta, melag itan a kontribusyon, nagkalalo la sano ikompara ed samay impepelag na mayayaman. Maslak ed saramay wadman so ag-akaimano ed sikato. Ingen ta naimano nen Jesus iman a balo. Atebek toray sirkumstansia na balo. Sikatoy anengneng nen Jesus tan inapresia to.

Diad sananey ya inkagawa et asaglawi so sakey a mayaman a bii, si Maria. Legan ya akarungo si Jesus, inkalbo nen Maria so mabmablin pabalingit diad saray sali tan ulo nen Jesus. Sinita na arum so ginawa to, ya inkatunongan dan inlako la komon so larak pian nausar so kuarta ya itulong ed duruka. Panon a kinmiwas si Jesus? Inkuanto: “Paulyan yon bukor: Akin et sikatoy gonigonen yo? Sikatoy nanggawa na maong a gawa ed siak. Tua kuan ko ed sikayo, Anggan iner a kipulongan na ebanghelyo ed lapag a mundo, satan met so ginawa na sayan bii nasalita naani ya onkanan pakanodnonotan ed sikato.”​—Marcos 14:3-6, 9; Juan 12:3.

Agmakritikon kinawanan nen Jesus ya inusar la komon so ankablin larak ed arum a gagala. Inapresia to so mabunlok a panangipatnag na aro tan pananisia nen Maria. Nirekord iyan agawa ed Biblia bilang pakanodnonotan ed maong a ginawa to. Ipanengneng na sarayan salaysay tan arum ni a si Jesus et maapresian tuloy a too.

No sakey kan lingkor na Dios, makaseguro kan aapresiaen a maong nen Jehova a Dios tan si Jesu-Kristo iray sagpot mon mangiyalibansa ed puron panagdayew. Lapud satan a pikakabat, onapit itayo ed sikara tan mamakiwas itan ed sikatayon mangalig ed sikara diad pamaneknek tayon mismo a misalsalamat itayo.

Makritikon Awawey nen Satanas

Natan et konsideraen tayo pay alimbawa na sakey ya agmangipapatnag na pisasalamat​—si Satanas a Diablo. Lapud kakulangay apresasyon to, inggaulo nen Satanas so makadesyang ya impanrebeldi ed Dios.

Diad impanem-em ton mismo ed makritikon awawey ya agto pankontento, inkayat itan nen Satanas ed arum. Konsideraen iray agawa ed harden na Eden. Pinalsa nen Jehova so inmunan laki tan bii, inyan tora ed paraison harden, tan oniay ingganggan to ed sikara: “Nayarian mo so mangan na labay mo ed amin a kiew na tanamanan.” Saksakey labat so nisebel. Inkuan na Dios: “Say kiew na pakaamtaan mo na maong tan mauges, agmo nepeg a panganan: ta dia ed agew a pangan mo ed satan ompatey ka.”​—Genesis 2:16, 17.

Balet, agnambayag inangat nen Satanas so kredibilidad nen Jehova. Diad sakey a dapag, kinaliktan ton pagmaliwen si Eva ya andiay otang a linawa ed si Jehova ta pian si Eva so nadagdag a manrebeldi ed Dios, a singa ginawa la nen Satanas. “Peteg kasin imbaga na Dios ya agkayo nepeg a mangan ed kada kiew ed tanamanan?” so intepet nen Satanas. (Genesis 3:1, NW) Say mapatnag a labay ton pabitaren et walay ankablin bengatla ya ikikibot na Dios ed si Eva, bengatlan mangilukas ed mata to tan manpagmaliw ed sikaton singa Dios a mismo. Imbes a misalsalamat ed dakerakel a bendision ya impalabo la nen Jehova ed sikato, nanpirawatan to so insebel.​—Genesis 3:5, 6.

Kabkabat so makadesyang iran nansumpalan. Anggaman naikdan na ngaran ya Eva “nisengeg [ta] sikato so ina na amin a mabilay,” diad arum a pantalos et sikatoy nagmaliw ya ina na amin ya ompapatey. Nanlapud si Adan so impakatawir na amin a totoo ed kasalanan a mansumpal ed ipapatey.​—Genesis 3:20; Roma 5:12.

Aligen so Dios tan si Kristo

Isipen so pandumaan nen Satanas tan si Jesus. Adeskribe si Satanas bilang “manangidalem na saray agagi tayo . . . , a sikato so manangidalem ed sikara ed arap na Dios tayo ed agew tan labi.” (Apocalipsis 12:10) Si Jesus et “nayarian to met ya ilaban angga ed kasumpalan so saray onasingger ed Dios dia ed panamegley to, ta manbilay lawas a mangyesel ed sikara.”​—Hebreos 7:25.

Piakusa nen Satanas iray lingkor na Dios. Aapresiaen ira nen Jesus tan tutulongan tora. Bilang umaalig ed Kristo, kaukolan a pambanikelan na saray Kristiano a nengnengen so kamaongan na balang sakey, a manaapresiaan ira tan manpapablian ed sinansakey. Diad panggawa’d satan, ipapatnag day inkasikaran dili a misalsalamat ed samay mangipapanengneng na sankatalonggaringan ya alimbawa na panangapresia, si Jehova a Dios.​—1 Corinto 11:1.

[Litrato ed pahina 17]

Inapresia nen Jesus so maabig a ginawa nen Maria