‘Langkap a Totoo’ a Mangiyansakit ed Saray Karnero nen Jehova

“Sanen sinmegep ed tagey, inawi’to a dinakep so inkadakep, tan angiter na langkap ed saray totoo.”​—EFESO 4:8.

1. Antoy imbalikas na sakey a Kristianon bii nipaakar ed mamatatken ed kongregasyon to?

“SALAMAT ed pangiyaansakit yon maong ed sikami. Saray imis, pililikna, tan panagpaga yo so masimoon a tuloy. Wadtan kayo lawas ya ontalineng tan manginabang na saray teksto ed Biblia a mamapaligsa ed espiritu mi. Ipipikasik ya agtakayon balot leglemewen.” Ontan so insulat na sakey a Kristianon agin bii ed mamatatken ed kongregasyon to. Mapatnag a say aron impanengneng na manangiyansakit a Kristianon papastol so anenyeg ed puso to.​—1 Pedro 5:2, 3.

2, 3. (a) Unong ed Isaias 32:1, 2, panon ya iyaansakit na saray maabagey a mamatatken iray karnero nen Jehova? (b) Kapigan a nikonsideran sakey a langkap so sakey a matatken?

² Saray mamatatken so sakey a probisyon nen Jehova pian mangasikaso ed saray karnero to. (Lucas 12:32; Juan 10:16) Pinabli nen Jehova iray karnero to​—pinabpabli ton maong, a diad tua et sikaray sinaliw to ed mablin dala nen Jesus. Agpankelawan sirin a naliliketan si Jehova no tratoen na mamatatken iray karnero to tekep na inkatamoy. (Gawa 20:28, 29) Imanoen pay mapropetikon impaneskribe ed sarayan mamatatken, odino ‘priprinsipe’: “Sakey a too so magmaliw naani a singa sakey ya amotan ed dagem, tan sakey a siruman ed bagyo, singa saray agus na saray danum ed pasen ya amaga, singa anino na sakey a baleg a baton-dampay ed sakey a dalin ya apagaan.” (Isaias 32:1, 2) On, sikaray manalimbeng, mamaligsa, tan manligliwa ed saray karnero to. Kanian saray mamatatken a maabagey a mamapastol ed pulok so manggugunaet ya onkiwas unong ed iilaloan na Dios ed sikara.

³ Saratan a mamatatken so atukoy ed Biblia bilang ‘langkap a totoo.’ (Efeso 4:8) Sano isipen moy sakey a langkap, naisip moy sakey a bengatlan niiter pian mamano ed pankaukolan odino mamaliket ed sakey a mangawat ed satan. Say sakey a matatken so nikonsideran sakey a langkap no uusaren toray abilidad to a mangitarya na nakakaukolan a tulong tan makatulong ed liket ed pulok. Panon ton nagawaan iya? Say ebat, a naromog ed saray salita nen Pablo diad Efeso 4:7-16, so mangipabitar ed maaron panagpaga nen Jehova ed saray karnero to.

‘Langkap a Totoo’​—Iner so Panlapuan?

4. Bilang kasumpalan na Salmo 68:18, diad anton paraan a ‘tinmokotok ed tagey’ si Jehova, tan sioparay “langkap ed nengneng na totoo”?

⁴ Sanen inusar nen Pablo so balikas a ‘langkap a totoo,’ inaon toy imbaga nen Arin David nipaakar ed si Jehova: “Sika tinmokotok ka ed tagey, imbasbas mo so saray arakep; sika inawat mo so saray panangaro ed leet na saray totoo [“langkap ed nengneng na totoo,” NW].” (Salmo 68:18) Kayari pigaran taon lan impanayam na saray Israelita ed Insipan a Dalin, piguratibon “tinmokotok” si Jehova ed Palandey Sion tan pinagmaliw toy Jerusalem a kabisera na panariay Israel a si David so ari. Balet sioparay “langkap ed nengneng na totoo”? Sikaray totoon akautibo legan na impanakop ed dalin. Diad saginonor et pigara ed sarayan kautibo so niganan ontulong ed saray Levita ed kimey diad tabernakulo.​—Esdras 8:20.

5. (a) Panon ya ipapanengneng nen Pablo a say Salmo 68:18 so walaan na kasumpalan ed Kristianon kongregasyon? (b) Diad anton dalan a ‘sinmegep ed tagey’ si Jesus?

⁵ Diad sulat to ed saray taga-Efeso, impanengneng nen Pablo a saray salita na salmista so walaan na babaleg a kasumpalan diad Kristianon kongregasyon. Diad pangipapaliwawa ed Salmo 68:18, insulat nen Pablo: “Balet say balang sakey ed sikatayo sikato so naikdan na grasya unong ed sukat na pamalangkap nen Kristo. Kanian kuanto, sanen sinmegep ed tagey, inawi’to a dinakep so inkadakep, tan angiter na langkap ed saray totoo.” (Efeso 4:7, 8) Dia et inyaplika nen Pablo iyan salmo ed si Jesus bilang manangilaman na Dios. “Tinalo [nen Jesus] so mundo” diad panamegley na matoor a kurang to. (Juan 16:33) Tinalo to met so ipapatey tan si Satanas diad impamaoli na Dios ed sikato manlapud saray inaatey. (Gawa 2:24; Hebreos 2:14) Nen 33 K.P., say apaolin Jesus so tinmokotok “ed katagtageyan na amin a katawenan”​—atagtagey nen say amin ya arum nin pinalsa ed tawen. (Efeso 4:9, 10; Filipos 2:9-11) Bilang mananalo, sinamsam nen Jesus ‘iray adakep’ manlapud kabusol. Panon ya ontan?

6. Manlapud Pentecostes 33 K.P., panon a say tinmokotok a Jesus so ginmapon amagbag ed abung nen Satanas, tan antoy ginawa to ed “saray dinakep”?

⁶ Sanen wadiad dalin, impanengneng nen Jesus so pakayari to sumpad si Satanas diad impangibulos to’d saramay aaripenen na saray demonyo. Singano nilooban nen Jesus so abung nen Satanas, binalor to, tan sinamsam toray kayarian to. (Mateo 12:22-29) Isipen pa labat, diad bektan apaoli tan nimatalekan na ‘amin a pakauley ed tawen tan ed dalin,’ agaylan pananamsam so nagawaan la nen Jesus! (Mateo 28:18) Manlapud Pentecostes 33 K.P., say tinmokotok a Jesus, bilang manangilaman na Dios, so ginmapon amagbag ed abung nen Satanas diad ‘impangawit to’d saray adakep’​—totoon abayag lan naaripen ed kasalanan tan ipapatey diad silong na panangontrol nen Satanas. Sarayan “dinakep” so mabulbulos a nagmaliw ya ‘ariripen nen Kristo, ya impapuson manggagaway kaliktan na Dios.’ (Efeso 6:6) Bilang resulta, imbulos ira nen Jesus manlapud panangontrol nen Satanas tan, diad biang nen Jehova, inter tora ed kongregasyon bilang ‘langkap a totoo.’ Nonoten pay pansyodsyodot nen Satanas legan iran nasasamsam ed mismon imaton to!

7. (a) Diad antoran kapasidad so panlilingkoran na ‘langkap a totoo’ diad saray kongregasyon? (b) Anton pankanawnawa so inter nen Jehova ed kada lakin manlilingkor bilang sakey a matatken?

⁷ Wala tay naromog tayon ‘langkap a totoo’ ed kongregasyon natan? On, wala! Naromog tayoran manlilingkor bilang mamatatken, impasyan mankikimey bilang ‘ebanghelisador, pastol, tan managbangat’ diad masulok ya 87,000 a kongregasyon na totooy Dios ed sankadalinan. (Efeso 4:11) Naliketan a tuloy si Satanas no maltratoen na mamatatken so pulok. Balet aliwan satan so rason no akin a say Dios diad panamegley nen Kristo et inter tora ed kongregasyon. Imbes, intarya nen Jehova irayan totoo parad pankaabigan na kongregasyon, tan sikaray mikuentaan ed sikato lapud saray karneron nimatalek ed sikara. (Hebreos 13:17) No manlilingkor ka bilang sakey a matatken, inikdan ka nen Jehova na alay abig a pankanawnawa pian paneknekan moy inkasika bilang sakey a langkap, odino bendision, ed agagim. Nagawaan mo itan diad panumpal mo’d apatiran importantin responsabilidad.

Sano Walay Pankaukolan Parad “Kipetek Lamet”

8. Diad antoran dalan a no maminsan et nakaukolan tayon amin so nipetek lamet?

⁸ Unona, saray ‘langkap a totoo’ so nitatarya “ya onkana a pakayadyarian [“kipetek lamet,” NW] na saray sasantos,” kuan nen Pablo. (Efeso 4:12) Say Griegon noun a nipatalos a “kipetek lamet” so manutukoy ed pangiyan ed sakey a bengatla “ed suston kilira.” Bilang ag-ayadyarin totoo, kaukolan tayon amin so nipetek lamet a panapanaon​—ta pian say panag-isip, saray ugali, odino kondukta tayo so ‘suston nilira’ ed panag-isip tan linawa na Dios. Simamaaron intarya nen Jehova iray ‘langkap a totoo’ pian ontulong ed sikatayon manggawa na nakakaukolan iran pananguman. Panon dan gagawaen iya?

9. Panon a makatulong so sakey a matatken ed pangipetek lamet ed sakey a karnero a nankasalanan?

⁹ No maminsan, nayarin nakerew ed sakey a matatken ya ontulong ed sakey a karnero a nankasalanan, ya anganko et ‘akagaway antokaman a lingon kundang sakbay ton amoria itan.’ Panon a makatulong so sakey a matatken? “Sikato komon so ipawil yo ed espiritu na tayadno,” kuan na Galacia 6:1. Kanian, sano manisimbawa, say sakey a matatken et agto pantatamian so nankasalanan, diad panlabir toy ansasakit a salita. Kaukolan a makapaseseg so simbawa, aliwan ‘mantaktakot,’ ed sakey a sisimbawaen. (2 Corinto 10:9; ikompara so Job 33:7.) Ompan nababaingan la so indibidual, kanian ag-imemedmer na maaron pastol so ontan a nalilikna na sakey. No say simbawa, anggan say mapekder a panamaat, et talagan pinakiwas tan niiter ed maaron dalan, maseguron mangilira’d panag-isip odino kondukta na nankasalanan, diad ontan et sikatoy nipawil.​—2 Timoteo 4:2.

10. Antoy sasaglawien na pangipetek lamet ed arum?

¹⁰ Diad pangitatarya ed ‘langkap a totoo’ parad kipetek tayo lamet, gagala nen Jehova a saray mamatatken et kaukolan a makapaligsa ed espiritual tan makanan aligen na totoo to. (1 Corinto 16:17, 18; Filipos 3:17) Say pangipetek lamet ed arum et saglawien toy aliwa labat lan pangipetek ed saramay mamapaarap la’d makapuy a kurang, noagta panulong met ed saray matoor a mansiansia ed dugan kurang.a Natan, lapud kinarakel na problema a pakadismayaan, dakel so mankaukolan na panamaseseg pian mantultuloy. Arum so mankaukolay matamoy a tulong pian nitunos so panag-isip da ed panag-isip na Dios. Alimbawa, arum a matoor a Kristianos so mipupuligesgesan ed pirmin liknaan na inkamakulang odino agmakanepegan. Nayarin isipen na saratan ya “apunaw a puso” ya aglaran balot aroen nen Jehova tan anggan saray pangibubunek dan manlingkor ed Dios so aglan balot makapaliket ed sikato. (1 Tesalonica 5:14) Balet sayan paraan na panag-isip so agmitunosan ed no anton talaga so panmoria na Dios ed saray mandadayew ed sikato.

11. Antoy nagawaan na mamatatken pian tulongan iramay mipupuligesgesan ed liknaan ya agmakanepegan?

¹¹ Mamatatken, antoy nagawaan yo pian natulongan iratan? Sipapangasin inabang ed sikara so Makasulatan a paneknek ya iyaansakit nen Jehova so balang lingkor to tan paseguroan ira a sarayan teksto na Biblia so personal ya onaplika ed sikara. (Lucas 12:6, 7, 24) Tulongan iran makamoria ya ‘inyasingger’ ira nen Jehova pian manlingkor ed sikato, kanian seguradon papablien tora. (Juan 6:44) Paseguroan iran agda bukbukor​—dakel a matoor a lingkor nen Jehova so walaan met na mipadpara iran liknaan. Aminsan et si propeta Elias so pirmin agonigon a labay to lay ompatey. (1 Arari 19:1-4) Arum ya alanaan a Kristianos nen inmunan siglo so nanliknan ‘pinoot’ na dilin kapusoan da. (1 Juan 3:20) Naligliwa itayo diad pakaamtan saray matoor ed panaoy Biblia so walaan met na “kairapan a singa sikatayo.” (Santiago 5:17) Nayarian yo met ya irepaso iray makapaseseg ya artikulo diad Say Panag-Bantayan tan Awake! ed saray nadidismaya. Saray maaron sagpot yo pian nipawil so kompiyansa na saratan et naimano na Dios ya angiter la ed sikayo bilang ‘langkap a totoo.’​—Hebreos 6:10.

‘Pangipaalagey’ ed Pulok

12. Antoy ipapatnag na balikas a ‘pangipaalagey ed laman nen Kristo,’ tan antoy tombok ed pangipaalagey ed pulok?

¹² Komadua, saray ‘langkap a totoo’ so niiter tekep na gagalan ‘pangipaalagey ed laman nen Kristo.’ (Efeso 4:12) Inusar dia nen Pablo so piguratibon panagsalita: “Kipaalagey” a mangipapanonot ed panagpaalagey, tan “[say] laman nen Kristo” so manutukoy ed totoo​—saray membro na alanaan a Kristianon kongregasyon. (1 Corinto 12:27; Efeso 5:23, 29, 30) Kaukolan a tulongan na mamatatken iray agagi ra pian ombiskeg ed espiritual. Say gagala ra et ‘mangipaalagey tan aliwan mamagbag’ ed pulok. (2 Corinto 10:8) Say tombok ed pangipaalagey ed pulok et say aro, ta “say panangaro so mamaabig [“mamaalagey,” NW].”​—1 Corinto 8:1.

13. Antoy kabaliksan na ma-empatya, tan akin ya importantin ipanengneng na mamatatken so empatya?

¹³ Say sakey ya aspekto na aro ya ontutulong ed mamatatken a mangipaalagey ed pulok et say empatya. Say pagmaliw a ma-empatya et kabaliksan toy pililikna ed arum​—pian talosan iray kanonotan tan liknaan da, ya ikokonsidera iray limitasyon da. (1 Pedro 3:8) Akin ya importanti parad mamatatken so pakawalaay empatya? Manuna ed amin et lapud si Jehova​—say angiter ed ‘langkap a totoo’​—so Dios na empatya. Sano maniirap odino pirmin maneermen iray lingkor to, sikatoy mililikna ed sikara. (Exodo 3:7; Isaias 63:9) Sikatoy makonsidera ed saray limitasyon da. (Salmo 103:14) Panon sirin a nipanengneng na mamatatken so empatya?

14. Diad antoran dalan a nipanengneng na mamatatken so empatya ed arum?

¹⁴ Sano walay onasingger ed sikaran nadidismaya, sikaray ontalineng, a bibidbiren iratan a liknaan to. Panggunaetan dan talosan so apalabas, personalidad, tan saray sirkumstansia na agagi ra. Diad ontan sano mangiter na makapaalagey a Makasulatan a tulong iray mamatatken, mainomay itan ya awaten na saray karnero lapud manlalapu itan ed saray pastol a talagan makakatalos tan mangiyaansakit ed sikara. (Uliran 16:23) Say empatya so mamapakiwas met ed mamatatken a mangikonsidera ed saray limitasyon na arum tan saray liknaan a nayarin epekto to. Alimbawa, arum a maalwar a Kristianos so nakokonsiensia lapud limitado so pakapanlilingkor da ed Dios, anganko et lapud inkatatken odino makapuy lan bunigas. Diad biek a dapag, arum so mankaukolan na panamaseseg pian napaaligwas day ministeryo ra. (Hebreos 5:12; 6:1) Say empatya so mamakiwas ed mamatatken a mananap na “saray makapaliket a salsalita” a mamaalagey ed arum. (Eclesiastes 12:10) Sano nipaalagey tan apakiwas iray karnero nen Jehova, say aro ra ed Dios so mamakiwas ed sikaran manggawa’d anggaay nayarian da a manlingkor ed sikato!

Lalakin Mangiyaalibansa na Pankakasakey

15. Antoy kabaliksan na balikas ya ‘inkasaksakey ed pananisia’?

¹⁵ Komatlo, saray ‘langkap a totoo’ so nitatarya ta pian “sikatayo ya amin so makarateng ed pankakasakey [“inkasaksakey,” NW] na pananisia, tan say pikakabat ed Anak na Dios.” (Efeso 4:13) Say balikas ya ‘inkasaksakey ed pananisia’ et kabaliksan toy pankakasakey ya aliwa labat lan diad saray sisiaen, noagta ontan met ed saray mananisia. Saya sirin so sananey a rason no akin a say Dios so angiter ed sikatayo na ‘langkap a totoo’​—pian mangiyalibansay pankakasakey ed limog na totoo to. Panon dan nagawaan iya?

16. Akin ya importanti parad mamatatken so panmantini ed pankakasakey ed limog da?

¹⁶ Unona, nepeg dan mantinien so pankakasakey ed limog da. No naapag-apag iray pastol, napaulyanan iray karnero. Say mablin panaon a nausar komon ed panagpastol ed pulok so ompan agkapilitan a gagamgamen la na andukey iran miting tan singbatan ed saray ag-importantin bengatla. (1 Timoteo 2:8) Nayarin aliwan automatikon manpapakna iray mamatatken ed kada pamaakaran a pantotongtongan da, ta lalaki iran walaan na nanduruman tuloy a personalidad. Say pankakasakey so agmangamper ed pakawalaan day nanduruman opinyon odino pangibalikas ni ingen ed saratan ed asimbang a paraan legan na lukas-kanonotan a tongtongan. Pansiasiansiaen na mamatatken so pankakasakey da diad marespeton italineng ed sakey tan sakey ya anggapoy inmuna lan panaghusga. Tan basta anggapoy nasusumlang a prinsipyo ed Biblia, balang sakey so mabulos ya onabuloy tan manuporta ed napandesisyonan na ulop na mamatatken. Say maabuloy ya espiritu so mangipanengneng a sikaray igigiya na ‘kakabatan a manlapu ed tagey,’ salanti ‘kareenan, katunongan.’​—Santiago 3:17, 18.

17. Panon a makatulong iray mamatatken ed pamasiansia’d pankakasakey ed loob na kongregasyon?

¹⁷ Saray mamatatken met so alerton mangiyalibansay pankakasakey ed loob na kongregasyon. Sano nasesesgay kareenan lapud impluensian pansengegay inkaapag-apag​—a singa say makapasakit a talabutob, tendensian man-inap, odino misasanok ya awawey​—akaparaan iran mangiter na makatulong a simbawa. (Filipos 2:2, 3) Singa bilang, nayarin kabat na mamatatken iray indibidual ya alablabas a makritiko odino walay tendensian misalet ed saray gagawaen na arum, a magmamaliw lan mibabali. (1 Timoteo 5:13; 1 Pedro 4:15) Panggunaetan na mamatatken a tulongan iratan pian nipamoria a sayan kurang et sumlang ed imbangat la na Dios ed sikatayo tan sirin et balang sakey so nepeg a “taroken to naani so awi’ton dili.” (Galacia 6:5, 7; 1 Tesalonica 4:9-12) Diad pangusar ed Kasulatan, ipaliwawa ran ipipia nen Jehova iray dakel a bengatla ed indibidual a konsiensia tayo, tan anggapo ed sikatayo so nepeg a mangukom ed arum lapud saratan a pamaakaran. (Mateo 7:1, 2; Santiago 4:10-12) Pian mankakasakey ed panaglingkor, nepeg a niwalay panagmatalek tan respeto ed loob na kongregasyon. Diad pangiter na Makasulatan a simbawa sano nakakaukolan, ontulong iray ‘langkap a totoo’ ed sikatayo pian napansiansiay kareenan tan pankakasakey tayo.​—Roma 14:19.

Panalimbeng ed Pulok

18, 19. (a) Saray ‘langkap a totoo’ so manalimbeng ed sikatayo manlapud siopa? (b) Manlapud anto nin arum a kapeligroan a nakaukolan a nasalimbengan iray karnero, tan panon ya onkiwas iray mamatatken pian salimbengan iray karnero?

¹⁸ Komapat, itatarya nen Jehova so ‘langkap a totoo’ pian manalimbeng ed sikatayo manlapud pakaimpluensiaan na “antokaman a dagem na bangat, unong ed saray kasiliban na totoo, dia ed kasaolan da, unong ed panamalingo na kalingo.” (Efeso 4:14) Say orihinal a salitan “kasiliban” et inkuan a mankabaliksan na “pansaol diad dice” odino “larino ed panangibuntok ed dice.” Agta mangipapanonot itan ed sikatayo ed inkasilib na saray apostata a mangipakurang? Diad pangusar na malamoyot iran argumento et uusaren day Kasulatan diad getman ayaten iray tuan Kristiano ya onarawi ed pananisia. Nepeg ya akabantay iray mamatatken ed “[saratan a] masiban lobo”!​—Gawa 20:29, 30.

¹⁹ Saray karnero nen Jehova so nepeg a nasalimbengan met manlapud arum a kapeligroan. Andi-takot a sinalimbengan nen David a pastol nensaman so pulok nen ama to manlapud saray managsibar. (1 Samuel 17:34-36) Natan met et nayarin onlesa iray kipapasen sano saray mapagan Kristianon papastol so kaukolan a mangipanengneng na inkakpel ta pian nasalimbengan so pulok manlapud siopaman a manmaltrato odino manlames ed saray karnero nen Jehova, nagkalalo la’d saramay agmakayari. Tampol ya ekalen na mamatatken manlapud kongregasyon iramay benger a managkasalanan a sigagalan manguusar na kasiliban, panamalikdo, tan panagliput pian manggaway karelmengan.b​—1 Corinto 5:9-13; ikompara so Salmo 101:7.

20. Akin a nalikna tayoy inkaligen diad panangiyansakit na ‘langkap a totoo’?

²⁰ Agaylay pisalsalamat tayo parad ‘langkap a totoo’! Lapud maaron panangiyansakit da, nalikna tayoy inkaligen, ta sitatamoy da itayon ipepetek lamet, simamaaro da itayon ipapaalagey, sibubulos dan pansiasiansiaen so pankakasakey tayo, tan sipapakpel da itayon sasalimbengan. Balet panoy nepeg a panmoria na ‘langkap a totoo’ ed betang da’d kongregasyon? Tan panon tayon nipanengneng ya aapresiaen tayo ra? Sarayan tepet so singbaten ed ontumbok ya artikulo.

[Saray paimano ed leksab]

Kasin Nanonotan Yo?

◻ Sioparay ‘langkap a totoo,’ tan akin a say Dios diad panamegley nen Kristo et inter to ira ed kongregasyon?

◻ Panon a gagawaen na mamatatken so responsabilidad da pian nipetek lamet so pulok?

◻ Antoy nagawaan na mamatatken pian nipaalagey daray kapananisiaan da?

◻ Panon a napansiansia na mamatatken so pankakasakey ed kongregasyon?

[Litrato ed pahina 10]

Ontulong ed mamatatken so empatya pian pasesegen iramay nadidismaya

[Litrato ed pahina 10]

Say pankakasakey ed limog na mamatatken so mangiyalibansa na pankakasakey ed loob na kongregasyon