Atateng, Antoy Ibabangat na Alimbawa Yo?
“Aligen yo sirin so Dios, singa anak to kayon inararo; tan mankurang kayo ed aro.”—EFESO 5:1, 2.
1. Antoran klase na panangidirehi so intarya nen Jehova ed inmunan sanasawan too?
SI Jehova so Manangigapoy uksoyan na pamilya. Otang na balang pamilya ed sikato so inkiwala na satan lapud inletneg toy inmunan pamilya tan inikdan toy inmunan sanasawa a too na pakayarin manparakel. (Efeso 3:14, 15) Intaryaan toy Adan tan Eva na manuna iran instruksion nipaakar ed saray responsabilidad da tan inikdan to met ira na dakel a pankanawnawa pian usaren so personal a panbulon diad panggawa ed saraya. (Genesis 1:28-30; 2:6, 15-22) Kayarin nankasalanan si Adan tan Eva, nagmaliw a lalon makawetwet iray kipapasen a kaukolan ya arapen na saray pamilya. Siansia, simamaaron angitarya si Jehova na saray pananontonan ya ontulong ed saray lingkor to a mangarap ed saratan a kipapasen.
2. (a) Diad anton paraan ya apaletan nen Jehova so nisulat a simbawa diad impangitekep na insangin instruksion? (b) Anton tepet so kaukolan ya itepet na atateng ed inkasikara?
2 Bilang Engranden Instruktor tayo, mas dakel ni agawaan nen Jehova nen say impangitarya to na nisulat iran panangiwanwan nipaakar ed no antoy nepeg tayon gawaen tan paliisan. Nensaman la et intekep to ed nisulat ya instruksion so insangin instruksion diad panamegley na saray saserdote tan saray propeta tan diad panamegley na saray ulo na pamilya. Siopay uusaren to pian mangitarya na ontan ya insangin panagbangat ed panaon tayo? Saray Kristianon mamatatken tan atateng. No sakey kan ateng, kasin gagawaen moy betang mo pian bangatan so pamilyam ed saray dalan nen Jehova?—Uliran 6:20-23.
3. Antoy naaralan na saray ulo na pamilya manlapud si Jehova no nipaakar ed epektibon panagbangat?
3 Panoy nepeg a kiiter na satan ya instruksion ed loob na pamilya? Angipanengneng si Jehova na padron. Malinlinew ton imbaga no antoy maong tan mauges, tan mabulos ton inulit iratan. (Exodo 20:4, 5; Deuteronomio 4:23, 24; 5:8, 9; 6:14, 15; Josue 24:19, 20) Sikatoy angusar na makatenyeg-kanonotan iran tepet. (Job 38:4, 8, 31) Diad panamegley na saray ilustrasyon tan tudtua ed bilay iran alimbawa, sasagyaten toy emosyon tayo tan momoldien toy kapusoan tayo. (Genesis 15:5; Daniel 3:1-29) Atateng, sano babangatan yoray ananak yo, kasin panggugunaetan yon aligen itan a padron?
4. Antoy naaralan tayo manlapud si Jehova nipaakar ed panagdisiplina, tan akin ya importanti so disiplina?
4 Mapekder si Jehova no antoy duga, balet natatalosan toray epekto na ag-inkayadyari. Kanian antis a manusa, sikatoy manbangat ni tan mangiter na paulit-ulit iran pasakbay tan panonot ed ag-ayadyarin totoo. (Genesis 19:15, 16; Jeremias 7:23-26) Sano manidisiplina, gagawaen to itan ed kagkanepegan, aliwan alablabas. (Salmo 103:10, 11; Isaias 28:26-29) No ontan so pidedeneng tayo’d ananak tayo, satan so mamaneknek a kabat tayo si Jehova, tan mas mainomay parad sikara so pangamta met ed sikato.—Jeremias 22:16; 1 Juan 4:8.
5. Antoy naaralan na atateng manlapud si Jehova nipaakar ed italineng?
5 Makapakelkelaw, ontatalineng si Jehova bilang maaron mangatatawen ya Ama. Aglabat basta mangiiter na saray ganggan. Papasesegen to itayon ibesngaw tayoray liknaan tayo ed sikato. (Salmo 62:8) Tan no agtayo nibalikas ya eksakto iray liknaan tayo, sikatoy agmamasnok manlapud tawen. Maan-anos to itayon babangatan. Sirin, agaylan matukoy so simbawa nen apostol Pablo: “Aligen yo sirin so Dios, singa anak to kayon inararo”! (Efeso 4:31–5:1) Agaylan maabig ya alimbawa so impanengneng nen Jehova parad atateng legan dan panggugunaetan a bangatan iray ananak da! Satan so alimbawan manabi ed kapusoan tayo tan pagmaliwen to itayon mankaliktan a manakar ed dalan to ed bilay.
Say Epekto na Alimbawa
6. Panon a say ugali tan alimbawa na atateng et mangimpluensia ed ananak da?
6 Likud ed insangin instruksion, say alimbawa met so mangimpluensian tuloy ed saray kalangweran. Labay man odino andi na atateng, sikaray aligen na ananak da. Nayarin panliketan itan na atateng—no maminsan et pakabiglaan da—no narengel day ananak dan mangibalikas na saray bengatlan imbalikas dan mismo. Sano napatnagan so aralem ya apresasyon ed espiritual iran pamaakaran ed kondukta tan awawey na atateng, saya so mamawala na positibon impluensia ed ananak.—Uliran 20:7.
7. Anton klase na alimbawa na ateng so impanengneng nen Jefte ed marikit to, tan diad anton nansumpalan?
7 Say epektoy alimbawa na ateng so niyilustran maong ed Biblia. Si Jefte, ya inusar nen Jehova a mangidaulo ed Israel ed pambiktorya sumpad saray Amonita et sakey met ya ama. Say rekord na ebat to’d ari na Amon so pakapatnagan a si Jefte so mabetbet a nambasa ed awaran na impideneng nen Jehova ed Israel. Nayarian ton aonen itan ya awaran a bulobulos, tan sikatoy angipanengneng na mabiskeg a pananisia ed si Jehova. Andi-duaruwan say alimbawa to so tinmulong ed marikit to a mamayubo ed pananisia tan espiritu na dilin-panagsakripisyo ya impanengneng to diad impisipan parad legay-bilay a serbisyo bilang marikit a nitalaga ed si Jehova.—Uko-ukom 11:14-27, 34-40; ikompara so Josue 1:8.
8. (a) Anton maabig ya ugali so impanengneng na atateng nen Samuel? (b) Panon ya angungguna itan ed si Samuel?
8 Napanuliranan si Samuel bilang sakey ya ugaw tan matoor ed Dios bilang sakey a propeta legay bilay to. Labay yo ta’n ontan met so pansumpalan na ananak yo? Analisaen so alimbawan impanengneng na atateng nen Samuel, si Elkana tan Ana. Anggaman aliwan nagnap so kipapasen na sankaabungan da, sikaray maparanay ya oonla ed Silo a mandayew, ed pasen a kawalaan na sagradon tabernakulo. (1 Samuel 1:3-8, 21) Imanoen pay pirmin liknaan nen Ana sanen nampikasi. (1 Samuel 1:9-13) Imanoen no antoy alikna ran dua nipaakar ed kaimportantian na panumpal ed antokaman ya insipan ed Dios. (1 Samuel 1:22-28) Say maabig ya alimbawa ra so andi-duaruwan tinmulong ed si Samuel a mamayubo ed saray kualidad a tinmulong ed sikaton mangemtan ed dugan kurang—anggano saray totoon kalimog to a nepeg komon a nanlingkor ed si Jehova so agnanrespeto ed saray dalan na Dios. Sinmabi panaon, inmatalek nen Jehova ed si Samuel so responsabilidad bilang propeta To.—1 Samuel 2:11, 12; 3:1-21.
9. (a) Antoran impluensia ed abung so walaan na maong ya epekto ed si Timoteo? (b) Anton klase na too so nagmaliwan nen Timoteo?
9 Kasin labay yon magmaliw a singa si Timoteo so anak yo, a bilang tobonbalon laki et nagmaliw a kaulop nen apostol Pablo? Say ama nen Timoteo so agmananisia, balet say ina tan bai to so angipanengneng na maabig ya alimbawa nipaakar ed panamabli’d espiritual iran bengatla. Andi-duaruwan tinmulong iya ed pangiletneg na maong a pundasyon parad bilay nen Timoteo bilang sakey a Kristiano. Akabatan tayon say ina to, si Eunice, tan say bai ton si Loida so walaan na “pananisia a matua.” Say kabibilay da bilang Kristiano et aliwan pansimpisimpitan; sikaray talagan nambilay a mitunosan ed papanisiaan da, tan binangatan day tobonbalon Timoteo ya ontan met so gawaen to. Pinaneknekan nen Timoteo a sikatoy napanmatalkan kanian masimoon ton nampagaan so pankaabigan na arum.—2 Timoteo 1:5; Filipos 2:20-22.
10. (a) Antoran alimbawa ed paway na abung so nayarin mangapekta ed ananak tayo? (b) Antoy nepeg a reaksion tayo no napatnagan iraya ed panagsalita odino ugali na ananak tayo?
10 Saray alimbawan mangapekta ed ananak tayo et aliwa labat lan diad loob na abung. Walaray ugugaw a nakakaiba ran maneeskuela, saray managbangat a say trabaho ra et moldien so malangwer iran kaisipan, totoon mangipapasen a maong a kaukolan ed balang sakey so itulok ed niletneg a maong iran kustombre na tribu odino komunidad, saray sikat ed isport a saray agawaan da et malaknab ya irarayew, tan saray opisyal na gobierno a say kondukta ra so nibabalita. Minilyon ya ugugaw so makakaimaton met la ed inkaruksa na bakal. Kasin pakasurprisaan tayo no sarayan impluensia so napatnagan ed panagsalita odino ed ugali na ananak tayo? Antoy reaksion tayo sano gawaen da itan? Kasin say ansakit a pamaat odino pantami so manolbar ed problema? Imbes a panlabiran a tampol so ananak tayo, agta magmaong no tepetan tayoy inkasikatayo, ‘Wala tay bengatla ed paraan na pidedeneng nen Jehova ed sikatayo a makatulong ed pakatebek ed no panon ya asikasoen iyan problema?’—Ikompara so Roma 2:4.
11. Sano nalingo iray atateng, panon a mangapekta iya ed ugali na ananak da?
11 Siempre, saray ag-ayadyarin atateng so aliwan naynay a maabig so pangarap da ed saray problema. Walaray pakalingo ra. Sano namoria na ananak itan, kasin maneral itan ed panagrespeto ra’d atateng da? Nayarin ontan, nagkalalo la no ibaliwala na atateng iray dilin lingo ra diad pirmin pangipilit ed autoridad da. Balet say pansumpalan so duman tuloy no mapaabeba tan mabulbulos ya akoen na atateng iray lingo ra. Diad ontan, sikaray makapangipanengneng na makanan alimbawa parad ananak da, a kaukolan a manaral a manggawa met ed satan.—Santiago 4:6.
No Antoy Nibangat na Alimbawa Tayo
12, 13. (a) Antoy kaukolan a naamtaan na ananak nipaakar ed aro, tan panon a nibangat iya ed sankaepektiboan a paraan? (b) Akin ya importantin naamtaan na ananak so nipaakar ed aro?
12 Walaray dakel a makanan leksion a nibangat ya epektibon tuloy sano say insangin instruksion et tinekepan na maong ya alimbawa. Konsideraen so pigara.
13 Pangipanengneng na andi-siblet a panangaro: Sakey ed sankaimportantian iran leksion a napaelet na alimbawa et say kabaliksan na aro. “Aroen tayo ta [say Dios] so angaro ed sikatayo ya inmuna.” (1 Juan 4:19) Sikatoy Lapuan tan supremon alimbawa na aro. Sayan aprinsipyoan ya aro, a·gaʹpe, so asalambit ed Biblia ed masulok a 100 danay. Satan so kualidad a pakabidbiran ed tuan Kristianos. (Juan 13:35) Satan ya aro so kaukolan tayon ipanengneng ed Dios tan ed si Jesu-Kristo ontan met ed totoo ed sakey tan sakey—anggan ed totoon agda itayo labalabay. (Mateo 5:44, 45; 1 Juan 5:3) Sayan aro so nepeg a niwala’d kapusoan tayo tan napatnagan ed kabibilay tayo antis tayon nibangat itan ed saray ananak tayo ed epektibon paraan. Mas epektibo iray gawa nen saray salita. Diad loob na pamilya, kaukolan na ananak a nanengneng tan naeksperiensia so panangaro tan saray misiglaotan a kualidad, a singa say lugor. No anggapo iraya, naamper so iyaligwas na sakey ya ugaw ed pisikal, mental, tan emosyonal a paraan. Kaukolan met na ananak a nanengneng no panon a suston nipatnag so panangaro tan lugor ed kaparan Kristianos ed paway na pamilya.—Roma 12:10; 1 Pedro 3:8.
14. (a) Panon a nabangatan iray ananak a manggaway maabig a kimey a makapenek? (b) Panon a nagawaan iya ed situasyon na pamilya yo?
14 Panaral no panoy pankimey: Say kimey et sakey a manunan aspekto na bilay. Pian nawalaan na liknaan na dilin-inkamakana, kaukolan ya aralen na sakey a too so panggaway maabig a kimey. (Eclesiastes 2:24; 2 Tesalonica 3:10) No naikdan so ugaw na saray trabaho balet ta agto ni kabisadon maong insan pantamian lapud agto agawaan a marakep iratan, agmaseguron makaaral a mamaaligwas ed kimey to. Balet no makaaral so ugugaw diad aktual a pankimey a kaibay atateng da tan matukoy a nakomendaan, sikaray mas maseguron makaaral a mankimey a makapenek. No say alimbawa na atateng et tinekepan na panangipaliwawa, naaralan na ananak so aliwa labat lan panumpal ed trabaho noagta no panon to met a talonaan iray problema, no panoy pangiyan-anos ed trabaho anggad nasumpal itan, tan no panoy panrason tan pandesisyon. Diad onian kipapasen et sikaray natulongan a natalosan a mankikimey met si Jehova, a sikatoy maong a mankimey, tan lapud satan et inalig nen Jesus so Ama to. (Genesis 1:31; Uliran 8:27-31; Juan 5:17) No mandadalus so pamilya odino mannenegosyo, arum ed saray membro na pamilya so maniiban mankimey. Odino anganko et say ina so makapangibangat ed anak ton laki odino bii a manluto tan mansinop na anganan. Say ama a say trabaho to et arawi ed abung so makapangiplano na saray trabahoen dan sanaama diad abung. Agaylan makagungguna no sankanonot na atateng so aliwa labat a pakasumpal a tampol ed saray trabaho noagta kinlongan iray ananak parad bilay!
15. Diad antoran dalan a nibangat iray leksion nipaakar ed pananisia? Iyilustra.
15 Mantinien so pananisia anggaman ed kairapan: Makana met ya aspekto so pananisia diad bilay tayo. Sano sisingbaten so pananisia ed panagaral na pamilya, nayarin naaralan na ananak a deskribien itan. Naamtaan da met so paneknek a mamabulaslas ed pananisia diad kapusoan da. Balet no nanenengneng daray atateng da a mangipapatnag na agnagiing a pananisia anggaman ed pirmin subsubok, say epekto et legay-bilay. Sakey ya iyaaralan na Biblia diad Panama so pinagyaw na masiken to a pataynanen ed abung da no agto itunday panaglingkor to’d si Jehova. Siansia, kaibay apatiran angkekelag nin ananak to, sikatoy maparanay a manaakar na 16 kilometro insan onlugan ed bus parad sananey nin 30 kilometro pian makasabi ed sankaasinggeran a Kingdom Hall. Lapud apaseseg ed satan ya alimbawa, manga 20 a membro na pamilya to so angabrasa ed dalan na katuaan.
Pangipanengneng na Alimbawa Diad Inagew-agew a Panagbasay Biblia
16. Akin ya irerekomenda so inagew-agew a panagbasay pamilya ed Biblia?
16 Sakey ed makanan tuloy iran kustombre a niletneg na dinanman a pamilya—say kustombre a mangungguna ed atateng tan magmaliw ya alimbawan aligen na ananak—et say regular a panagbasay Biblia. No nayadyari, manbasay Biblia ya inagew-agew. Aliwan say karakel na nabasa so sankaimportantian. Say nagkalalo nin makabaliksan et say inkamaparanay tan say paraan a panggawa ed satan. Parad ugugaw, say panagbasay Biblia so nayarin natekepan na pandengel ed saray audiocassette na My Book of Bible Stories no wala iratan ed lenguahe yo. Say panagbasa ed Salitay Dios ya inagew-agew so ontulong ed sikatayo pian napansiansian niyuna iray kanonotan na Dios. Tan no nagawaan met na saray pamilya so ontan a panagbasay Biblia ya aliwa labat lan saray indibidual, saya so makatulong ed intiro iran sankaabungan pian manakar ed saray dalan nen Jehova. Sayan panangiyugali so nipaseseg ed agano nin “Say Dalan na Dios ed Bilay” iran Kombension ed draman Sikayoran Pamilya—Iyugali Yoy Inagew-agew a Panagbasay Biblia!—Salmo 1:1-3.
17. Panon a say panagbasay pamilya ed Biblia tan panangipatlep ed manuna iran teksto so ontulong ed pangiyaplika’d simbawa ed Efeso 6:4?
17 Say panagbasay Biblia bilang pamilya so mitunosan ed insulat nen apostol Pablo diad apuyanan a sulat to’d saray Kristiano ed Efeso, salanti: “Sikayo ya atateng [kaamaan], agyo ilagyat a pasanoken so saray anak yo: noag ingen bangatan yo’ra ed kadudusa tan panamilin [“panametek-kanonotan,” NW] na Katawan.” (Efeso 6:4) Antoy kabaliksan na satan? Say “panametek-kanonotan” et literal a kabaliksan toy “pangipaslep ed kanonotan”; kanian papasesegen iray Kristianon kaamaan pian ipaslep so kanonotan nen Jehova a Dios ed ananak da—pian tulongan so ananak a naamtaan iray kanonotan na Dios. Pasesegen so ananak a mangipatlep ed manuna iran teksto pian natulongan iran makadampot ed saya. Say gagala et say pakawalaan na kanonotan nen Jehova a mangigiya ed kaisipan na ugugaw ta pian saray pilalek tan kondukta ra et mantultuloy a makapangisindag na maridios iran estandarte balanglan kaulop na atateng iray ananak odino andi. Say Biblia so pundasyon na ontan a kaisipan.—Deuteronomio 6:6, 7.
18. Sano mamabasa na Biblia, antoy nakaukolan ta pian (a) natalotalosan itan? (b) nagunggunaan manlapud simbawa a lugan na satan? (c) onkiwas unong ed ipaparungtal na satan nipaakar ed gagala nen Jehova? (d) nagunggunaan manlapud ibabaga na satan nipaakar ed saray ugali tan kiwas na totoo?
18 Siempre, pian naimpluensiaan na Biblia so kabibilay tayo, kaukolan tayon talosan so ibabaga to. Parad dakel, saya so mankaukolan na maminpigan panagbasa ed saray kabiangan. Pian natalotalosan so pigaran balikas, kaukolan tayon anapen iray salita ed diksyonaryo odino ed Insight on the Scriptures. No lugan na teksto so simbawa odino sakey a ganggan, ipanaon a pantongtongan iray situasyon ed panaon tayo a kitukoyan na satan. Insan nayarin itepet yo, ‘Panon a say pangiyaplika ed saya so mangungguna ed sikatayo?’ (Isaias 48:17, 18) No sasaglawien na teksto so pigaran aspekto na gagala nen Jehova, itepet, ‘Panon ya aapektaan na saya so kabibilay tayo?’ Ikuan lan babasaen yoy salaysay a manasalambit ed saray awawey tan kiwas na totoo. Antoran desdes ed bilay so asagmak da? Panoy impangarap da ed saraya? Panon itayon nagunggunaan manlapud alimbawa ra? Lawas ya ipanaon pian singbaten no antoy kabaliksan na salaysay ed kabibilay tayo natan.—Roma 15:4; 1 Corinto 10:11.
19. Bilang umaalig na Dios, antoy nitarya tayo parad ananak tayo?
19 Agaylan abig a dalan pian nipaslep so kanonotan na Dios ed kaisipan tan kapusoan tayo! Diad ontan et talagan natulongan itayon magmaliw ya ‘umaalig ed Dios, singa anak ya inad-aro.’ (Efeso 5:1) Tan mangitarya itayo na alimbawa a talagan makanan aligen na ananak tayo.
Kasin Nanonotan Yo?
◻ Panon a nagunggunaan iray atateng manlapud alimbawa nen Jehova?
◻ Akin a say insangin instruksion ed ananak et nepeg a tekepan na maong ya alimbawa na ateng?
◻ Antoray pigaran leksion a sankaabigan a nibangat diad panamegley na alimbawa na ateng?
◻ Panon itayon sigpot a nagunggunaan manlapud panagbasay pamilya ed Biblia?
[Saray litrato ed pahina 10]
Panggagayagaan na dakel so inagew-agew a panagbasay Biblia bilang pamilya