Manlapud Pirmin Inkaduka Anggad Impagmaliw a Mayamyaman

UNONG ED SALAYSAY NEN MANUEL DE JESUS ALMEIDA

Nianak ak nen Oktubre 1916, say sankayogtanan ed 17 ananak. Siamera ed saray papanguloan ko so inatey lapud sakit tan malnutrasyon, kanian agkon balot ira apinengnengan. Sikamin natitilak a walora so akiamong ed atateng mi ed melag a purok ya asingger ed Porto, Portugal.

SAY melag ya abung mi et walaay mainget a sala tan sakey kuarton ugipan. Aasolen mi so iinumen mi ed sakey a bobon a ngalngali kapalduay kilometro so kaarawi to, tan say panaglutoan mi so karaanan la.

Bektan sarag la na saray kuyak, sikara lay mantrabaho ed tanemay mais. Saray almo ra so akalegpet na daiset parad tagano na pamilya. Lapud tulong da et siak labat ya anak so akapanaral na daiset. Anggaman mairap so bilay mi, sikami debotadon tuloy ed Iglesia Katolika, diad ilalon anggan panon et walay nitulong to ed kabibilay mi.

Kaleganay bulan na Mayo, walay natatawag a panagnobena na simbaan. Diad loob na nantutumbokan a siameran agew et sikami manakar a mimisa ed palbangon anggaman ambilunget ni. Diman et sikami mandasal, diad panisian mangitarok iya na panamendision na Dios. Inisip mi met a say pari so sakey a masanto, manangilaman na Dios. Balet, asabin nauman itan a panmoria mi.

Impananap na Bengatlan Magmaong

Sanen agkami akabayar na buis ed simbaan, say pari so andian labat na konsiderasyon ed sikami lapud kairapan mi’d bilay. Akadismayaan mi iya. Say impresyon ko ed simbaan et dinmuma la, kanian nen mantaon ak la na 18, denesidek a taynan so pamilyak pian amtaen no wala so magmaong ed bilay nen say pantrabaho ed saray alog tan pisangsang ed simbaan. Nen 1936, sinmabi ak ed Lisbon, say kabiseran syudad na Portugal.

Diman ko akabat si Edminia. Anggaman liknaen kon pinalikdo ak na relihyon ko, tinumbok mi akaugalian tan nankasal kami ed Iglesia Katolika. Insan nen 1939, ginmapoy Guerra Mundial II. Legay bakal, siak so inkargado ed 18 bodega, diad sanagew et anggad 125 a trak so nakakargaan mi na saray uusaren ed guerra.

Say katatakot ed bakal pati say pibabali na Iglesia Katolika so angapektan tuloy ed siak. Nanupapetan ko, ‘Talaga ta’n manatalima so Dios ed katooan? Panon so nepeg a pandayew tayo ed sikato?’ Pigaran taon ed saginonor nen 1954, walay masiken, sakey ed Tastasi nen Jehova, so akitongtong ed siak nipaakar ed tepetepet ko. Sayan tongtongan so amasimbalo’d intiron bilay ko.

Aliketan Lapud Ilalon Walad Biblia

Sayan mapangasin laki, si Joshua, so angisalaysay ed siak a say Panarian na Dios so mogmon solusyon ed saray problema diad mundo tan say kareenan tan kaligenan so nagawa labat diad panamegley na uley na Panarian. (Mateo 6:9, 10; 24:14) Aliketan ak ed imbaga to, balet ta masuyat kon awaten iray salaysay to lapud inmunan asagmak ko la ed relihyon. Sanen inyopresi ton iyaralan toak na Biblia, inawat ko itan diad kondisyon ya ag-onkekerew na kuarta tan agto totongtongen so nipaakar ed politika. Sikatoy inmabobon, ya impaseguro ton libre iyoopresi to.​—Apocalipsis 22:17.

Binmaleg so kompiyansak ed si Joshua. Kanian kinerew ko ed sikato so panpirpirawatan ko nanlapulad inkatobonbalok. “Posibli ta so pakawalaan ko na personal a kopya na Biblia?” Kaawat ko, alay liket kon nabasa ed unonan pankanawnawa ed mismon Salita na Manamalsa tayo iray sipan a singa say: “Say Dios met lanlamang so wala naani ed [katooan] . . . Punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la”!​—Apocalipsis 21:3, 4.

Nagkalautla, say isisipan na Biblia a kaekal na inkaduka tan sakit so makaligliwa ed siak. Inkuan na matoor a lakin si Elihu nipaakar ed Dios: “Sikato mangiter na kanen a daakan.” (Job 36:31) Tan diad silong na matunong ya uley na Panariay Dios, kuan na Biblia, “say manaayam agto naani ikuan, Mabeblay ak.” (Isaias 33:24) Agaylan si Jehova a Dios et walaan na maaron interes parad katooan! Talagan inmaralem so interes ko ed saray sipan to!

Pilpilimerok so inmatendi ed miting na Tastasi nen Jehova nen Abril 17, 1954. Espisyal a miting iman​—say Memoryal a selebrasyon na impatey nen Kristo. Nanlapulad saman et regular ak la’d saray miting. Ag-abayag et innabang ko met la’d arum so naaaralan ko. Diad saraman a panaon dima’d Portugal, sikami manpipiknik a binulan diad gilig na dayat, insan walay nagawan bautismo. Pitoran bulan kayari inmunan impitongtong nen Joshua ed siak, indedikak so inkasiak ed si Jehova a Dios tan insimbolo itan diad bautismo ed danum diad dayat.

Kagapo na 1954 wala labat lay ngalngali sanlasus a Tastasi ed intiron Portugal. Kanian, baleg so pankaukolan parad lalakin mangidaulo ed panagpulong a kimey. Maples so inyaligwas ko ed espiritual, tan ag-abayag et naikdan ak na saray responsabilidad ed loob na kongregasyon. Nen 1956, siak so aturon congregation servant, a singa tawag ed saman ed manangasikason manangimaton, diad samay onkomaduan kongregasyon na Tastasi nen Jehova diad Lisbon. Natan et wala lay masulok a sanlasus a kongregasyon ed sayan syudad tan ed saray baryo to.

Agunggunaan Lapud Panagparawes

Anggaman sikami nen Edminia so limitado diad pinansyal, lawas lukas so puerta mi ed Kristianon agagi tayo. Nen 1955 et sakey a payunir, a singa tawag ed sigpot-panaon iran ebanghelisador ed Tastasi nen Jehova, so sinmamar ed Portugal a pasempet ed Brazil parad internasyonal a “Triumphant Kingdom” ya Asamblea diad Alemanya. Lapud problema’d transportasyon, sikatoy nanpirmi ed abung ed loob na sakey bulan, tan sikami agunggunaan a tuloy ed espiritual lapud imbisita to!

Arum a binmisita ed abung mi ed saman et laktipen daray membro na pamilya ed hedkuarter na Tastasi nen Jehova ed Brooklyn, New York, a singa di Hugo Riemer tan say kakuarto ton si Charles Eicher. Akipangdem ira ed sikami tan angiter na saray paliwawa ed agagin Portuges. Singa kami kapkapanposnak iran siwsiw a narnarasan, a pitalaran miray makbol ya espiritual a taganon tarok da.

Nanayam met ed abung miray managbiahen manangasikaso na Tastasi nen Jehova legan na saray imbisita ra. Sakey ya agnalinglingwanan a bisita nen 1957 et si Álvaro Berecochea, manangasikaso na sanga ed Morocco, a naasain ya ombisita ed Portugal pian pasesegen iray agagi. Sikatoy akiaral ed panagaral na libro ed abung mi, tan sikatoy pinilit min manpundo ed abung kaleganan a walad Portugal. Sikami abendisionan a maong tan apataba ed espiritual kaleganay sakey-bulan ya imbisita to, bangta si Álvaro met so tinmaba, lapud maong a manluto so pinablik ya Edminia.

Say pirmin inkaduka, a singa samay asagmak ko diad kaugawan ko, so mangapektan tuloy ed sakey a too. Ingen, atalosan ko a diad lalon pangiter tayo ed si Jehova tan ed saray matoor a lingkor to, lalo to met itayon bendisionan. Aminpigan amoriak iyan katuaan lapud impamarawes mi ed amin a sarag min parawesen.

Diad kombension diad Porto nen 1955, niyanunsioy kagawa na internasyonal a kombension na Tastasi nen Jehova diad Yankee Stadium ed New York City nen 1958. Walay contribution box ed kada Kingdom Hall ed intiron bansa​—a dagdaiset ni ed saman​—pian nagastosay kibaki na saray delegadon Portuges ed kombension. Isipen yo pay liket mi sanen sikamin sanasawa so apibilang ed sarayan delegado? Alay liket mi diad imbisita ed sankamundoan a hedkuarter na Tastasi nen Jehova ed Brooklyn sanen wadman kami ed Estados Unidos parad kombension!

Sinungdoay Panamasegsegang

Nen 1962 asebelan so panagpulong a kimey na Tastasi nen Jehova ed Portugal, tan saray misionaryo​—pati sikara di Eric Britten, Domenick Piccone, Eric Beveridge, tan saray kaasawaan da​—so pinataynan. Kayari to, sikami agnaabuloyan a mantitipon ed saray Kingdom Hall, kanian ginawa mi itan ed maamot a paraan diad saray ayaman; nisay posibli ni so pakagawa na angkabaleg iran kombension diad Portugal. Kanian nagmaliw a responsabilidad ko so pangiyuksoy na tranportasyon parad Kristianon agagi tayo pian naatendian iratan a kombension diad arum a bansa.

Say pangiyuksoy parad angkabaleg a grupo na Tastasin manbiahe ed sananey a bansa so mairap. Ingen, say sagpot so makatunongan, no isipen iray makapakelaw ya espiritual a gunggunan naawat na agagin Portuges. Agaylan makapabiskeg ya eksperiensia so pakaatendi ra ed saray kombension diad Switzerland, Inglatera, Italya, tan Pransya! Lapud saratan a kombension et niwala met so pankanawnawa na pakapangisempet da na saray literatura ed bansa ra. Diad saraman a taon et aminpigapigan kinerew mi karehistro bilang relihyoson organisasyon diad Portugal, balet ta ag-iraya inabuloyan.

Kayarin pinataynan iray misionaryo ed kagapo na 1962, pinabiskeg na saray sekreta so kampanya ran patundaey panagpulong mi. Dakerakel ya agagi tayo so naaresto tan nidemanda. Walaray dokumentadon report ed dakel ed sarayan ebento a nipalapag ed sayan dyurnal tan say kaiba ton magasin, ya Awake!a

Sakey ed saraman so nipisok lapud panagpulong et sakey a payunir ya akapangiparungtalan ko na maong a balita nipaakar ed Panarian na Dios. Lapud aromog na polisya so address ko ed saray kagawaan to, siak so pinatawag tan tinetepetan.

Saginonor, duaran polis so binmisita ed abung ko. Inala daray katulongan ed panagaral ed Biblia ontan met ed 13 kopya na Biblia. Intuloy day panamagyaw da, ya aminpiton pinmawilpawil ira ed nanduruman panaon pian sukisoken so lugar mi. Kada bekta ed satan, et mapalareper da kamin tinetepetan.

Aminpigan siak so impatawag pian manestigo ed biang na kaparan Tastasi ed saray kaso ed korte. Anggaman ag-atagey so aral ko unong ed mundo, inikdan ak nen Jehova na ‘kakabatan ya agnayarian a liktaran tan sumpaen na saray kakabusol.’ (Lucas 21:15) Diad sakey ya inkagawa et nikelawan so huis ed testimonyak ya intepet to no antoy asumpal ko. Amin ed korte so manelek sanen inkuan kon komapat a grado labat so asabik.

Legan ya onloloor so panamasegsegang, ondaraak met so bilang na saramay onkikiwas unong ed mensahe na Panarian. Kanian, say mas daiset nen 1,300 a Tastasi ed Portugal nen 1962 so dinmakel ed masulok nen 13,000 nen 1974! Ambegya, nen Mayo 1967, siak so naimbitaan a manlingkor bilang managbiahen manangasikaso. Diad sayan kimey et binisitak iray kongregasyon na Tastasi nen Jehova pian pabiskegen ira ed espiritual.

Panggagayagaay Sankabalgan a Kaykayamanan

Nen Disyembre 1974, apribilihyoan ak a mibiang ed panangirehistro pian magmaliw a legal so kimey na Tastasi nen Jehova diad Portugal. Diad tinmumbok a taon sikamin sanasawa so nagmaliw a membro na pamilyan Bethel na Tastasi nen Jehova diad Estoril. Aturo ak met a manlingkor bilang membro na Branch Committee ed Portugal.

Alay liket so pakakaimano ed ibubulaslas na panagpulong ed Portugal tan ed saray teritoryan walad panangasikaso na sanga mi! Laktipen na saraya so Angola, say Azores, Cape Verde, Madeira, tan São Tomé tan Príncipe. Diad loob na linmalabas a taon et makapagayagay pakanengneng ed saray taga-Portugal a nibakin misionaryon manlingkor ed sarayan dalin, a pakapatnagay baleg ya interes ed mensahe nipaakar ed Panarian. Isipen pay liket mi ta natan et walaan kami la na masulok nen say 88,000 a manangiproklama na Panarian ed sarayan lugar, pati ed masulok a 47,000 diad Portugal! Say inmaatendi ed Memoryal ed sarayan bansa nen 1998 et 245,000, no ikompara ed kulang a 200 sanen nagmaliw ak a Tasi nen 1954.

Sikami nen Edminia so sigpot-puson miabobon ed inkuan na salmista ed Biblia a “say sanagew ed loob na saray saban [nen Jehova] magmaong ni nen say sanlibo.” (Salmo 84:10) Sano isipen koy kipapasen min pakaskasi nensaman tan ipareng iratan ed saray kayamanan ed espiritual a panggagayagaan ko la, naliliknak so alikna nen propeta Isaias: “O Jehova, sika so Dios ko; sika so paatageyen ko, igalang ko naani ngaran mo; ta nanggawa ka na saray makapakelaw, . . . Ta sika so apireng na duka, sakey ya apireng na naukolan ed kairapan.”​—Isaias 25:1, 4.

[Paimano ed leksab]

[Saray litrato ed pahina 24]

Tagey: Iyaabawag nen Brother Almeida diad Lisbon so uksoyan a pangibaki na saray delegado ed kombension diad New York nen 1958

Pegley: Mangikokondukta na napangaligan a servant’s meeting ed “Peace on Earth” Internasyonal ya Asamblea diad Paris

Leksab: Inarkila iran bus ya akaparaan parad distriton kombension diad Pransya

[Litrato ed pahina 25]

Mangikokondukta na morning worship diad sanga ed Portugal

[Litrato ed pahina 25]

Sanga ed Portugal, nidedika nen 1988

[Litrato ed pahina 26]

Apaseseg kami ed saray paliwawa nen Brother Hugo Riemer sanen binmisita manlapud Brooklyn Bethel

[Litrato ed pahina 26]

Kaibay akulaw ko