Ginawa Ra so Linawa nen Jehova

Pinili nen Maria so “Maong a Betang”

DIAD panaon nen Jesus, apegetan iray Judion bibii na rabiniko iran tradisyon. Kanian, ag-ira impanaral ed say Ganggan. Peteg, asaglawi ed sakey ya opinyon ya inaon ed Mishnah: “No siopaman a too et pagamoran toy ilalak ton bii na pikakabat ed Ganggan et singa to binangatay inkatalandew.”​—Sotah 3:4.

Bilang resulta et dakel a bibii so agtanto akaaral nen inmunan-siglo diad Judea. “Anggapoy ebidensia a sakbay na impanministeryo nen Jesus et naabuloyan iray Judion bibii a magmaliw a babangatan na sakey a matalonggaring a managbangat, nisay mibaroy ed ontan a managbangat, odino manbangat ed siopaman nilikud ed saray ugugaw,” kuan na The Anchor Bible Dictionary. Diad lalon panmelmelag ed bibii, arum a lider na relihyon so amawala ni ingen na totontonen a say sakey a laki et agnayarin mitongtong ed bii diad publiko!

Binaliwala nen Jesus iratan ya agmaridios ya awawey. Sikatoy nambangat ed bibii tan lalaki, tan namparan saray lalaki tan bibii so kabiangan ed papatumbok to. (Lucas 8:1-3) Diad sakey ya inkagawa, naimbitaan si Jesus bilang sankaili nen Marta tan Maria. (Lucas 10:38) Sarayan duan bibii so agagi nen Lazaro, tan sikaran talo so babangatan tan maabig a kakaaro nen Jesus. (Juan 11:5) Anganko ta sayan pamilya et prominenti, lapud ta dakel so linman nantambayo ed si Marta tan Maria sanen inatey si Lazaro. Diad antokaman a kipapasen, walay makanakanan naaralan ed agawa ed abung da sanen sinankaili da si Jesus, aliwa lambengat ed sikara noagta ontan met ed sikatayo.

Nanaral ed Salian nen Jesus

Anggapoy duaruwa, magunaet ira di Marta tan Maria a parungoan si Jesus na dakel a nakan tan nayarin sarag da iya. (Ikompara so Juan 12:1-3.) Balet sanen sinmabi bisita ra, si Maria so “imyurong ed salian nen Jesus, tan nandengel na salita to.” (Lucas 10:39) Anggapoy makaamper a tradisyon na totoo ed si Jesus pian bangatan iyan masimoon a biin ontanlan magunaet a makaaral! Naisip tayon si Maria et manyudyurong ed arapan nen Jesus, ya impasen toy inkasikaton sakey a manaaral a madengedengel ed ibabangat na Maestro to.​—Ikompara so Deuteronomio 33:3; Gawa 22:3.

Aliwan singa si Maria, si Marta so “ataltalibaga ed dakel a kapagaan.” Lapud panpaparaan na maartin panangan, sikatoy okupadon tuloy ed matrabahon gagawaen to. Ag-abayag et mansyodot si Marta ta bukbukor toy mantratrabaho bangta say agi to so wadman a manyudyurong ed salian nen Jesus! Kanian pinaer nen Marta iray ibabaga nen Jesus ed si Maria, seguro bigbiglan sinmalet, a nankuan: “Katawan, agmo ta kapagaan a say agik panbukbukoren toak a manpaga? Ibagam ed sikato a tulongan toak.”​—Lucas 10:40.

No ontan labat et anggapo pay makapuy ed kerew nen Marta. Diad tua, talagan mairap so panparaan na iparungo parad sakey a grupo, tan kaukolan ya agnipasakbat so kimey ed sakey labat a too. Balet, naimano nen Jesus ed say balikas to so pankanawnawan pakabangat to na makanakanan leksion. “Marta, Marta,” inkuanto, “makaliktan ka tan dakel so kagonigonan mo: Balet sakey so sankaukolan: ta si Maria pinili to so maong a betang, a sikato so agnaekal ed sikato.”​—Lucas 10:41, 42.

Aglabay nen Jesus ya ibagan si Marta et andian na interes ed espiritual a bengabengatla. Kasunian to et amta ton sikatoy biin napno na maridios a debosyon.a Maseguron satan so manunan rason no akin ya inimbitaan toy Jesus ed abung da. Balet, diad maamuyot ya impamaat to, indanet nen Jesus a diad panpapaga nen Marta ed iparungo to et nasasaew toy mataltalag a pankanawnawan pakaawat na personal a bilin manlapud Anak na Dios.

Tua, say kultura ed saman a panaon et nayarin anuporta ed panmorian say kablian na sakey a bii so napaneknekan a maong diad abilidad to ed saray kimey ed abung. Balet impanengneng na saray salita nen Jesus a saray bibii, singa met ed lalaki so makayurong ed salian na Anak na Dios tan makaawat na balbalikas nipaakar ed bilay! (Juan 4:7-15; Gawa 5:14) Nisesengeg ed saya, mas magmaong komon no si Marta et angiparaan na pigaran putahe labat​—odino anggan sakey labat​—diad ontan et naanamot toy iyurong ed salian na Katawan tan makaaral.​—Ikompara so Mateo 6:25.

Leksion parad Sikatayo

Natan, naromog so lalaki tan bibii ed limog na saramay onkikiwas unong ed imbitasyon nen Jesus a ‘mangaala ed danum na bilay ya andi bayar.’ (Apocalipsis 22:17) Apakiwas lapud aro, arum​—singa si Marta​—so manggagaway anggaay nayarian da pian itarya iray pankaukolan na kapananisiaan da. Sikaray walaan na mausar a pikakabat tan onkikiwas a tampol, tan isisipan nen Jehova a tumangan toray kimey dan atekepay aro. (Hebreos 6:10; 13:16) Walara anganko so mipadparan tuloy ed si Maria. Sikaray maulimek tan manonot ed espiritual a bengabengatla. Say inkagunaet dan mandalepdep ed Salitay Dios so mamapaelet a maong ed pananisia ra.​—Efeso 3:17-19.

Walaan na importantin betang iratan a klase na indibidual ed loob na Kristianon kongregasyon. Balet, diad kaunoran et kaukolan ya amin so ‘manpili na maong a betang’ diad pangiyunan tuloy ed espiritual a bengabengatla. Diad panganamot ed lalon importantin bengabengatla, nawalaan tayoy abobon tan bendision nen Jehova.​—Filipos 1:9-11.

[Paimano ed leksab]