Kasin Alablabas so Kakaukolanen nen Jehova ed Sikatayo?

“Anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”​—MIQUEAS 6:8.

1. Antoy nayarin rason no akin ya agmanlilingkor so arum ed si Jehova?

WALAY kakaukolanen nen Jehova ed totoo to. Balet kayarim a nabasa so walad tagey ya inaon iran salita manlapud propesiya nen Miqueas, nikuan mon makatunongan iray kakaukolanen nen Jehova. Anggaman kuan, dakel so agmanlilingkor ed Engranden Manamalsa tayo, tan arum a datin nanlingkor ed sikato et tinmunda lan manlingkor. Akin? Lapud isipen dan alablabas so kakaukolanen na Dios ed sikatayo. Ontan kasi? Odino ompan walay problema ed awawey na sakey a too nipaakar ed kakaukolanen nen Jehova? Iter na maawaran a salaysay so aralem a kakabatan nipaakar ed sayan pamaakaran.

2. Siopa si Naaman, tan antoy impagawa na propeta nen Jehova ed sikato?

² Akating si Naaman a hepe na armaday Sirya, balet ta nibaga ed sikaton walay sakey a propeta nen Jehova diad Israel a makapanpaabig ed sikato. Kanian nambiahe si Naaman tan saray lingkor to ya amaarap ed Israel tan akasabi ra ed ayaman na propeta na Dios a si Eliseo. Imbes ya ompaway ed abung to pian abeten so dederlengen a bisita to, angibaki si Eliseo na lingkor to a mangibaga ed si Naaman: “Manames ka ed Jordan a maminpito a danay, et say laman mo ompawil ed sika, tan malinis ka naani.”​—2 Arari 5:10.

3. Akin a diad pilimero et aglabay a gawaen nen Naaman so ipapagawa nen Jehova?

³ No tinulok nen Naaman so ipapagawa na propetay Dios, sikato komoy onabig ed makapadimlan sakit. Sirin, kasin alablabas so ipapagawa nen Jehova ed sikato? Andin balot. Ingen, agginawa nen Naaman so ipapagawa nen Jehova. “Aliwa ta a say Abana tan say Farpar, ya ilog na Damasco, magmaong ni nen saray amin a danum na Israel?” so insuppiat to. “Agak ta makapanames ed sikara, tan nalinisan ak?” Lapud satan, sisasanok ya inmalis si Naaman.​—2 Arari 5:12.

4, 5. (a) Antoy tumang ed intulok nen Naaman, tan panoy inkiwas to ed impakaawat ed satan? (b) Antoy konsideraen tayo natan?

⁴ Anton talaga so problema ed si Naaman? Aliwa met a mairap a gawaen so ipapagawa ed sikato. Mataktikan inkuan na saray lingkor nen Naaman: “No say propeta imbilin to ed sika a manggawa ka na arum a baleg a bengatla, sikato komon so agmo ginawa? Aglalo sirin, sanen imbaga to ed sika, Manames ka, et nalinisan ka?” (2 Arari 5:13) Say problema et say awawey nen Naaman. Liknaen ton sikatoy ag-atrato tekep na dignidad a kanepegan to tan sakey ni et ipapagawa ed sikato so impasen ton singa ag-epektibo tan kipaabebaan to. Balet, kinmiwas si Naaman ed mataktikan simbawa na saray lingkor to tan aminpiton linmegep ed Ilog na Jordan. Nonoten pay gayaga to sanen “say laman to pinmawil a singa say laman na melag ya ugaw, et sikato so malinis nensaman”! Sikatoy misalsalamat a maong. Sakey ni, inyabawag nen Naaman a manlapulad saman a manpatuloy, sikatoy agla mandayew ed arum a dios noagta si Jehova lambengat.​—2 Arari 5:14-17.

⁵ Diad intiron awaran na too, kinaukolan nen Jehova ya ontulok so totoo ed nanduruman pananontonan. Imbitaan mi kan mangonsidera’d pigara ed saraya. Legan mon kokonsideraen, tepetan moy inkasika no panoy ikiwas mo no ipagawa nen Jehova ed sika iratan a bengatla. Diad saginonor, usisaen tayo no antoy kakaukolanen nen Jehova ed sikatayo natan.

No Antoy Kinaukolan nen Jehova Nensaman

6. Antoy impagawa ed inmunan sankaparis a too, tan panoy ikiwas yo ed ontan iran instruksion?

⁶ Binilin nen Jehova so inmunan sankaparis a too, si Adan tan Eva, a mamabaleg na ananak, makmakan so dalin, tan uleyan so ayayep. Apalaboan met so sanasawa na maawang a singa parkin ayaman. (Genesis 1:27, 28; 2:9-15) Balet ta walay panameget. Agda nepeg so mangan na bunga na sakey a kiew, sakey labat ed dakerakel a manbubungan kiew ed harden na Eden. (Genesis 2:16, 17) Aliwan alablabas itan a kakaukolanen, agta ontan? Agmo ta panggayagaan so panggawa ed satan ya asainmin, tekep na ilalon manbilay ya ando lan ando ed naspot a bunigas? Anggano pinmatnag so managtukso ed harden, agmo ta nipulisay so argumento to? Tan agka ta onabobon a walaan si Jehova na kanepegan a mangipaakseb na sakey a simplin panameget?​—Genesis 3:1-5.

7. (a) Anton asainmin so niiter ed si Noe, tan anton isusumpa so asagmak to? (b) Panoy panmoriam ed impagawa nen Jehova ed si Noe?

⁷ Diad saginonor, ginanggan nen Jehova si Noe a mangipaalagey na biong a kisalbaan ed sankagloboan a delap. Lapud kinabaleg na biong, aliwan mainomay so trabaho tan anganko et ginawa iman a walaray dakel a manbabalaw tan onsusumpa. Ingen, agaylan pribilihyo parad si Noe a naisalba toy sankaabungan to, nilikud ni ed dakerakel ya ayayep! (Genesis 6:1-8, 14-16; Hebreos 11:7; 2 Pedro 2:5) No naikdan ka na ontan ya asainmin, kasin pankimeyan mon maong a sumpalen itan? Odino ikuan mon alablabas so ipapagawa nen Jehova ed sika?

8. Antoy ipapagawa ed si Abraham, tan anto so niyilustra bilang resultay intulok to?

⁸ Walay bengatlan mair-irap ya impagawa na Dios ed si Abraham, ya inkuanto: “Alam natan so laki ya anak mo, say anak mo a bogbogtong, ya inararom, salanti si Isaac, ta onla ka ed dalin a Moria; ta sikato so yapay mo’d man a sakey a pinoolan a bagat.” (Genesis 22:2) Lapud insipan nen Jehova a say andiay ilalak ed saman ya Isaac et nawalaay ilalak, asubok so pananisia nen Abraham ed abilidad na Dios a paolien si Isaac. Sanen ibagat la nen Abraham si Isaac, inyagel na Dios so balolaki. Inyilustra na sayan inkagawa ya iyapay na Dios so dili ton Anak parad katooan tan paolien to ed saginonor.​—Genesis 17:19; 22:9-18; Juan 3:16; Gawa 2:23, 24, 29-32; Hebreos 11:17-19.

9. Akin ya aliwan alablabas so ipapagawa nen Jehova ed si Abraham?

⁹ Nayarin isipen na arum ya alablabas so ipapagawa nen Jehova a Dios ed si Abraham. Balet ontan kasi? Kasin moriaen tayon agmaaro so Manamalsa tayo, a makayarin mamaoli ed inaatey, no kerewen to ed sikatayon tuloken tayo anggan manresulta itan ed temporaryon iyugip tayo ed patey? Ag-inisip itan nen Jesu-Kristo tan saray inmunan patumbok to. Sikaray mabulos a managmak na kapairap ed pisikal, anggan ipapatey a mismo, ta pian gawaen so linawa na Dios. (Juan 10:11, 17, 18; Gawa 5:40-42; 21:13) No kakaukolanen itan na saray sirkumstansia, kasin mabulos mo met a gawaen itan? Konsideraen so pigaran bengatla a kinaukolan nen Jehova ed saramay malabay a magmaliw a totoo to.

Say Ganggan nen Jehova ed Israel

10. Sioparay angisipan a gawaen dan amin so ipapagawa nen Jehova, tan antoy inter to ed sikara?

¹⁰ Dinmakerakel so kapolian nen Abraham diad panamegley na anak ton si Isaac tan apo ton si Jacob, odino Israel, anggad nagmaliw a nasyon na Israel. Inliktar nen Jehova iray Israelita manlapud inkaaripen ed Ehipto. (Genesis 32:28; 46:1-3; 2 Samuel 7:23, 24) Ag-abayag kayari na satan, insipan dan gawaen so antokaman ya ipagawa na Dios ed sikara. Inkuan da: “Amin a sinalita nen Jehova gawaen mi.” (Exodo 19:8) Mitunosan ed pilalek na saray Israelita a pauleyan ed sikato, inikdan nen Jehova so nasyon na masulok a 600 a ganggan, pati lay Samploran Ganggan. Sinmabi panaon, sarayan ganggan na Dios, a niiter panamegley nen Moises, so akabatan bilang Ganggan.​—Esdras 7:6; Lucas 10:25-27; Juan 1:17.

11. Antoy sakey a gagala na Ganggan, tan antoray pigaran pananontonan a kinmanan pakasumpalan na satan?

¹¹ Say sakey a gagala na Ganggan et pian salimbengan iray Israelita diad impangiter na makagungguna iran pananontonan a manguley ed saray pamaakaran a singa say moralidad nipaakar ed sekso, saray talosan ed negosyo, tan panangasikaso ed ugaw. (Exodo 20:14; Levitico 18:6-18, 22-24; 19:35, 36; Deuteronomio 6:6-9) Nitarya iray pananontonan no panon a tratoen so kaparan totoo ontan met ed ayayep na sakey. (Levitico 19:18; Deuteronomio 22:4, 10) Saray kakaukolanen nipaakar ed tinaon iran piesta tan pantitipon parad panagdayew so analimbeng ed totoo diad espiritual a paraan.​—Levitico 23:1-43; Deuteronomio 31:10-13.

12. Anto so manunan gagala na Ganggan?

¹² Impaimano nen apostol Pablo so manunan gagala na Ganggan, ya insulat to: “Niarum lapu ed saray kasusunggay, angga ed ag-isabi na ilalo [Kristo] a sikato so akagawaan na sipan.” (Galacia 3:19) Impanonot na Ganggan ed saray Israelita a sikaray ag-ayadyari. Makatunongan sirin a nakaukolan day ayadyarin bagat a sigpot a makaekal ed saray kasalanan da. (Hebreos 10:1-4) Kanian say gagala na Ganggan et pian iparaan so totoo a mangawat ed si Jesus, say Mesias, odino Kristo. Insulat nen Pablo: “Say ganggan sikato so managbangat ed sikatayo pian itarok to itayo ed Kristo, tan napatunong itayo lapud pananisia.”​—Galacia 3:24.

Kasin Makapabelat so Ganggan nen Jehova?

13. (a) Panoy impangipasen na ag-ayadyarin totoo ed Ganggan, tan akin? (b) Kasin talagan makapabelat so Ganggan?

¹³ Anggaman say Ganggan et “masantos tan matunong, tan maong,” ipapasen na dakel a makapabelat itan. (Roma 7:12) Lapud naspot so Ganggan, agnakapet na saray Israelita so atagey ya estandarte to. (Salmo 19:7) Satan so rason no akin a tinawag itan nen apostol Pedro bilang “pako ya anggan saray atateng tayo, anggan sikatayo agtayo ayarian ya inawit.” (Gawa 15:10) Siempre, say Ganggan a mismo et agmakapabelat, tan say intulok ed satan so angungguna ed totoo.

14. Antoray pigaran alimbawa a mangipapanengneng a say Ganggan et akagunggunaan a tuloy na saray Israelita?

¹⁴ Alimbawa, diad silong na Ganggan, agnipriso so sakey a matakew noagta kaukolan a mantrabaho pian manbayar na dobli odino onsulok ni pian nabayaran to so tinakew to. Diad ontan et agpakaskasi so biktima, nisay nabelatan iray totoon mankikimey na impasya pian suportaan so sistemay prisoan. (Exodo 22:1, 3, 4, 7) Insebel iray delikadon tagano. Say karne-baboy, no agniluton maong et panlapuay trichinosis, tan say koniho so panlapuay tularemia. (Levitico 11:4-12) Mipadpara, say Ganggan so proteksion diad impangisebel ed pangegnay bangkay. No dinmiwit so sakey a too ed bangkay, sikatoy kinaukolan a manames tan ipesak toray kawes to. (Levitico 11:31-36; Numero 19:11-22) Kaukolan ya ikotkot so tai, a kaprotektaan na totoo ed ikayat na mikrobyo, ya adiskobre lambengat itan na saray sientista ed agano niran siglo.​—Deuteronomio 23:13.

15. Antoy apaneknekan a pabelat ed saray Israelita?

¹⁵ Aliwan alablabas so kinaukolan na Ganggan ed totoo. Balet agnibaga itan nipaakar ed lalakin angalay betang a panangipatalos ed Ganggan. Nipaakar ed saray totontonen ya impaakseb da, onia so impaimano na A Dictionary of the Bible, ya inuksoy nen James Hastings: “Kada ganggan ed Biblia so apaliberan na sakey a sangal na angkelag iran pananontonan. . . . Kanian sinalin ipilaktip so amin a natebek a kaso ed nasasakopan na Ganggan, tan ed andiay panangasin panagkatunongan pian itunos so intiramintin kondukta na too diad panamegley na mapeget a totontonen a paraan. . . . Apepe so dikta na konsiensia; say pakayari na salitay Dios so dinaeg tan pinaer na dakerakel ya inyarum a totontonen.”

16. Antoy imbaga nen Jesus nipaakar ed makapabelat iran totontonen tan tradisyon na saray lider na relihyon?

¹⁶ Kinondena nen Jesu-Kristo iray lider na relihyon ya angipaakseb na dakerakel a totontonen, a kuanto: “Sikara mamerber ira na ambebelat ya awiawit tan makapairap ya awiten, tan sikaray ipasakbat da ed abala na saray totoo; balet sikara lanlamang agda ra labay a galawen ed tamuro ra.” (Mateo 23:2, 4) Impabitar to a say makapabelat a ginaway-too iran totontonen tan tradisyon da, pati saray maseremonyan panaglinis, et ginawa ton “andi-kakanaan so salitay Dios.” (Marcos 7:1-13; Mateo 23:13, 24-26) Balet, anggan sakbay nin linma diad dalin si Jesus, pikewet lay impangibangat na saray relihyoson managbangat ed Israel ed no anton talagay kakaukolanen nen Jehova.

No Anton Talaga so Kakaukolanen nen Jehova

17. Akin ya ag-aliketan si Jehova ed saray popoolan ya apay na andiay pananisia iran Israelita?

¹⁷ Diad panamegley nen propeta Isaias, inkuan nen Jehova: “Wala ed siak so masarag ed saray bagat a pinoolan a karkarnero, tan say taba na saray pinataba ya ayep; et agak manliket ed dala na saray baka, ni saray kordero ni saray kanding.” (Isaias 1:10, 11) Akin ya ag-aliketan so Dios ed saray apay a kinaukolan ton mismo ed Ganggan? (Levitico 1:1–4:35) Lapud ta sikatoy agnirespeto na saray totoo. Kanian, sikaray abilin: “Manuras kayo, manlinis kayo; iwaklit yo so mauges ed saray gawa yo a manlapu ed arap na saray matak; ontunda kayo a manggawa na mauges; Manaral kayo a manggawa na maong; anapen yo so katunongan, tulongan yo so inaposan, ikatunongan yo so saray ulila, iyagel yo so balo a bii.” (Isaias 1:16, 17) Agta saya so ontulong ed sikatayon natalosan no antoy kakaukolanen nen Jehova ed saray lingkor to?

18. Anton talagay kakaukolanen nen Jehova ed saray Israelita?

¹⁸ Impanengneng nen Jesus no anton talagay kakaukolanen na Dios. Impabitar to itan sanen sikatoy atepetan, “Dinan so baleg a ganggan ed katunongan?” Inmebat si Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikatoya so baleg tan unonan ganggan. Tan say komadua a mipadpara ed sikato saya, Aroen mo so kaparam a too unong ed sikan dili. Dia ed sarayan duaran ganggan so pansaksabitan na amin a katunongan [“Ganggan,” NW] tan say salita na saray Propetas.” (Mateo 22:36-40; Levitico 19:18; Deuteronomio 6:4-6) Ontan met so indanet nen propeta Moises sanen intepet to: “Antoy arum a kaukolanen nen Jehova a Dios mo ed sika noag say takotan mo si Jehova a Dios mo, manonton ka ed saray amin a daladalan to, say panlingkor mo ed Jehova ed amin a pusom tan ed amin a kamarerwam. Sumpal mo so saray ganggan nen Jehova, tan saray pananontonan to?”​—Deuteronomio 10:12, 13; 15:7, 8.

19. Panoy impanali na saray Israelita ya ompatnag a masanto, balet antoy imbaga nen Jehova ed sikara?

¹⁹ Anggaman ed inkauges da, labay na saray Israelita a sikaray ompatnag a masanto. Anggaman say kakaukolanen lambengat na Ganggan a pan-ayunal et diad tinaon ya Agew na Pananakbong, sikaray mabetbet a nanayunal. (Levitico 16:30, 31) Balet binaat ira nen Jehova, a kuanto: “Aliwa ta a saya so panayunal a pinilik: say pamultot ed saray taker na inkarelmeng, pian pangukbar ed saray taker na pako, et napaulyan komon a nibulos so saray inaposan, tan pian puteren tayo komon so balang pako? Aliwa ta a say pangyutob mo na tinapay mo ed narasan, tan say pangalam ed abung mo na duka a pinataynan? No nanengneng mo so lakseb, et sikato so kawesan mo; ya agmo komon yamot so inkasika a manlapu ed laman mo a dili?”​—Isaias 58:3-7.

20. Antoy amaatan nen Jesus ed saray relihyoson mansimpisimpitan?

²⁰ Miulibayan so problema na saraman a mantunongtunongan ya Israelita ed saray relihyoson mansimpisimpitan ya angibagaan nen Jesus na: “Manbayar kayo na kakaplo na yerbabuena tan anis tan cumino, balet pinaulyan yo ya agsinumpal so saray ambelbelat a pamaakaray katunongan salanti, kaalasan, tan panangasi tan pananisia; balet saraya komon so nepeg yon gawaen, tan agyo paulyan iray arum ya aggawaen.” (Mateo 23:23; Levitico 27:30) Agta saray salita nen Jesus so ontulong ed sikatayon natalosan no anton talagay kakaukolanen nen Jehova ed sikatayo?

21. Panoy impanegek nen propeta Miqueas ed kakaukolan tan agkakaukolan nen Jehova ed sikatayo?

²¹ Pian napalinew no antoy kakaukolanen tan agkakaukolanen nen Jehova ed sikatayo, onia so intepet na propetay Dios a si Miqueas: “Anto so laen ko ed arap nen Jehova, tan pangidakmomok na inkasiak ed arap na atagey a Dios? Onla ak ta naani ed arap to a pati saray bagat a napoolan, tan saray kilaw a baka a mantaon na sakey? Napaliket ta si Jehova ed saray nilibo a karnero a kalakian, odino ed samplon libo ya il-ilog a larak? Iter ko ta naani so panguloan ya anak ko lapu ed impakasumlang ko, say bunga na laman ko lapu ed kasalanan na kamarerwak? Impatnag to ed sika, O too, so maong: et anto ta so kaukolan nen Jehova ed sika, noag say manggawa lambengat na inkatunong, tan mangaro na kaabigay linawa, tan manakar a mauy-uyamo ed Dios mo?”​—Miqueas 6:6-8.

22. Antoy nagkalautlan kinaukolan nen Jehova ed saramay walad silong na Ganggan?

²² Kanian sirin, antoy nagkalautlan kinaukolan nen Jehova ed saramay nambilay ed silong na Ganggan? Siempre, nepeg dan aroen si Jehova a Dios. Sakey ni, inkuan nen apostol Pablo: “Say amin a ganggan ed saya a saksakey a salita so kasumpalan to; Aroen mo so kaparam a too unong ed sikan dili.” (Galacia 5:14) Mipadpara, oniay inkuan nen Pablo ed saray Kristiano ed Roma: “Say mangaro ed kapara ton too sinumpal to so ganggan. . . . Say aro sirin, sikato so panumpal ed ganggan.”​—Roma 13:8-10.

Aliwan Alablabas Itan

23, 24. (a) Akin ya agbalot alablabas parad sikatayo a gawaen so ipapagawa nen Jehova? (b) Antoy ontumbok a konsideraen tayo?

²³ Agtayo ta nasasagyat ed inkamaaro, inkamanonot, inkamapangasi nen Jehova a Dios? Say bogbogtong ya Anak to, si Jesu-Kristo, so linma dia ed dalin pian itandoro so aro na Dios​—pian naamtaan na totoo so panamabli ed sikara nen Jehova. Diad pangiyiilustra ed aro na Dios, onia so inkuan nen Jesus nipaakar ed saray ordinaryon anuyaw: “Agnapelag naani sakey ed sikara ed dalin no agyabuloy nen Ama yo.” Kanian sinampotan to: “Agkayo antakot sirin; ta mamabli kayo nen saray amayamay ya anuyaw.” (Mateo 10:29-31) Segurado, agbalot alablabas parad sikatayo a gawaen so antokaman ya ipapagawa na maaron Dios!

²⁴ Balet, antoy kakaukolanen nen Jehova ed sikatayo natan? Tan akin ya isipen na arum ya alablabas so kakaukolanen na Dios? Diad pangusisa ed sarayan tepet, natalosan tayo no akin a makapakelkelaw a pribilihyo so panggawa ed antokaman ya ipapagawa nen Jehova.

Kasin Naebatan Yo?

◻ Akin ya aglabay na arum so manlingkor ed si Jehova?

◻ Panon a nanduruma so kakaukolanen nen Jehova ed inlabas na saray taon?

◻ Kinmana so Ganggan ed antoran gagala?

◻ Akin ya aliwan alablabas so kakaukolanen nen Jehova ed sikatayo?

[Litrato ed pahina 18]

Saray ginaway-too a totontonen, a singa say maseremonyan panaglinis, so nanggawan makapabelat ed panagdayew