2000—Kasin Nikadkaduman Taon?
WALA ta so bengatlan espisyal nipaakar ed taon 2000? Inkalapagan a momoriaen itan na totoon manaayam ed Mamasagur a daldalin bilang unonan taon na komatlon milenyo. Nigapo laray malaknab a preparasyon ed panselebra’d satan. Impepeket laray angkabaleg ya electronic a relo pian paleksab a bilangen iray segundo anggad igapo na balon milenyo. Naoorganisa laray angkabaleg a pantitipon parad Bispiras na Balon Taon. Wala laray ilalakon kamisita a de-tatak na end-of-millennium iran diparan diad saray lakoan ed angkelag iran baley ontan met ed saray shopping mall ed baleg a syudad.
Saray simbaan, baleg tan melag, so mibiang ed sakey taon a karukey iran piesta. Diad kagapo na ontumbok a taon, iilaloan a manbiahen mamaarap ed Israel si Pope John Paul II pian idaulo iray Romanon Katoliko ed tatawagen a “say jubileo a selebrasyon na Iglesia Katolika Romana ed milenyo.” Kakalkulaen a duara tan kapalduan milyon anggad anemiran milyon a turista, manlapud debosyonado anggad maupapet, so manplaplanon ombisita ed Israel no ontumbok a taon.
Akin a dakerakel a totoo so manplaplanon ombisita ed Israel? Nansalita parad papa, onia so inkuan na sakey ya opisyal na Vatican, si Roger Cardinal Etchegaray: “Say taon 2000 so selebrasyon parad si Kristo tan say impanbilay to ed sayan dalin. Sirin, natural labat ya onla’d dia so Papa.” Panon a misiglaotan so taon 2000 ed si Kristo? Say taon 2000 so kaslakan ya ipapasen a mananda ed eksakton 2,000 a taon manlapud inkianak nen Kristo. Balet ontan kasi? Imanoen tayo.
Say taon 2000 so nagkalalo lan makabkabaliksan ed saray membro na pigaran relihyoson grupo. Kombinsido ira a diad loob na ontumbok a taon odino onsulok ni, ompawil si Jesus ed Palandey na Olibo tan say bakal na Armagedon, ya asalambit ed libro na Apocalipsis, so ombetag ed abeban patar na Megiddo. (Apocalipsis 16:14-16) Diad panatalaran da ed sarayan ebento, nilasus a residenti na E.U. so mangilalako ed saray kaabungan da tan maslak ed saray kayarian da tan onaalis ira ed Israel. Unong ed report, pian nagunggunaan so siopaman ya agmakayarin manaynan ed saray abung da, sakey a prominentin ebanghelista ed E.U. so angisipan a de-kolor a nibrodkas ed telebisyon so ipapawil nen Jesus!
Diad mamasagur iran dalin, ompapalalo iray plano ed pan-inagurasyon ed komatlon milenyo. Balet, saray totoo ed arum a daldalin et gagawaen daray normal ya aktibidad da. Sarayan totoo—say karaklan a populasyon na mundo—so agmanisian si Jesus na Nazaret et Mesias. Nisay kaukolan dan awaten so B.C.-A.D. ya estilo ed panagpetsa.a Alimbawa, dakel a Muslim so manguusar na dilin kalendaryo ra, unong ed satan et say ontumbok a taon so 1420—aliwan 2000. Bibilangen na saray Muslim iray taon manlapud petsan intaynan na propetan si Muhammad ed Mecca ya amaarap ed Medina. Bilang intiramenti, saray totoo ed sankamundoan so manguusar na manga 40 a nanduruman kalendaryo.
Kasin say taon 2000 so walaan na kabaliksan parad saray Kristiano? Kasin say Enero 1, 2000 et talagan agew a makabkabaliksan? Sarayan tepet so naebatan ed ontumbok ya artikulo.
[Paimano ed leksab]
a Diad B.C.-A.D. a sistemay panagpetsa, saray ebenton agawa sakbay na tradisyonal a panaon na inkianak nen Jesus so tinawag a “B.C.” iran taon (kasakbayan nen Kristo); saramay agawa kayari na satan et tinawag ya “A.D.” iran taon (Anno Domini—“diad taon na Katawan tayo.”) Balet, arum a makabat ya iskolar so malabay a mangusar ed sekular iran pananawag a “K.K.P.” (kasakbayan na Komon a Panaon tayo) tan “K.P.” (na Komon a Panaon tayo.)