Sano Ondaak so Inkamabunlok

NO PANKANAWNAWAM so mangiregalo ed sakey ya ari, antoy iter mo ed sikato? Panon to no sikatoy sankayamanan tan sankakabatan a manuley ed mundo? Kasin makanonot ka na antokaman a regalon makapaliket ed sikato? Ngalngali talon libon taon lay apalabas, inumameng na reyna na Seba iratan a tepet leleg ya ipaparaan toy ibisita to ed ontan a manuley​—si Arin Solomon na Israel.

Ibabaga ed sikatayo na Biblia a say regalo to et laktipen toy 120 talento na balitok “tan balbalingit a sankaraklan, tan mabli a batobato.” Diad kaplesan a bili, say balitok labat et mankantidad la na ngalngali $40,000,000. Say larak a balsamo, a sakey ya ambalingit tan makatambal a larak, et singa kamabli na balitok bilang sakey a produkto. Anggaman ag-imbaga na Biblia no kaunongay inter na reyna ed si Solomon, balet ibabaga na satan ed sikatayo ya agnaparaan so regalo to.​—1 Arari 10:10.

Mapatnag a mayaman tan mabunlok a bii so reyna na Seba. Nagkalalo ni, sikatoy apalaboan lapud inkamabunlok to. Inkuan na Biblia a, “si ari Solomon initer to ed reyna ed Seba so ami a pilalek to, anggan anto a kinerew to, nilikud imay inyakar to nen reyna ed Seba ed ari.” (2 Awaran 9:12) Tua, nayarin ugali la na saray maarin totoo a mansalatan na regalo; ingen, espisipikon binitla na Biblia so ‘inkamapalabo’ nen Solomon. (1 Arari 10:13) Insulat a mismo nen Solomon: “Say mapalabo a kamarerwa napataba; et say mansalog nasalog met.​—Uliran 11:25.

Siempre, say reyna na Seba so nansakripisyo met a maong na panaon tan sagpot to pian nabisita si Solomon. Nayarin say Seba so walad lugar na kaplesan a Republika na Yemen; kanian say reyna tan say ulop na aka-kamelyo to so nambiahe na masulok a 1,600 a kilometro paarap ed Jerusalem. Singa inkuan nen Jesus, “[sikatoy] nanlapu ed saray sampot na dalin.” Akin kasin nansagpot nin maong a linma so reyna na Seba? Say manunan inakaran to et pian “ondengel na kakabatan nen Solomon.”​—Lucas 11:31.

Ibabaga na 1 Arari 10:1, 2 a say reyna na Seba so “linma pian [si Solomon] so salien to ed saray mairap a tepet. . . . Impanon to ed sikato so amin a wala ed puso to.” Panoy inyebat nen Solomon? “Si Solomon imbaga to ed sikato so saray amin a tepet to: anggapo so bengatla a niamot ed ari ya agto imbaga ed sikato.”​—1 Arari 10:3.

Nikelawan ed nadngel tan anengneng to, sipapaabeban inmebat so reyna: “Mapalar iraya ya ariripen mo, a manalagey a naynay ed arap mo, tan makadngel na kakabatan mo!” (1 Arari 10:4-8) Anggaman aliber iray kayamanan, agto balet imbagan maliket iray lingkor nen Solomon lapud saratan. Imbes, abendito iray lingkor nen Solomon lapud ta naynay dan narengelan so inter na Dios a kakabatan nen Solomon. Agaylan abig ya alimbawa so reyna na Seba parad totoo nen Jehova natan, a manggagayaga ed mismon kakabatan na mismon Manamalsa tan ed say Anak to, si Jesu-Kristo!

Makatantanda met so ontumbok a komento na reyna ed si Solomon: “Nagalang si Jehova a Dios mo.” (1 Arari 10:9) Mapatnag, anengneng toy pakayari nen Jehova lapud kakabatan tan inkaaligwas nen Solomon. Mitunosan iya ed akadkaunan insipan nen Jehova ed Israel. ‘Say panumbok ed saray pananontonan ko,’ so inkuanto, “sikato so kakabatan yo tan pananalos yo ed pakanengneng na katooan, ya ondengel naani ed saraya ya amin a pananontonan, tan kuan da, Tuatua a saya a nasyon sikato so sakey a makabat tan makatalos a katooan.”​—Deuteronomio 4:5-7.

Onsingger ed Manangiter na Kakabatan

Diad modernon panaon et minilyon so onkakamang ed organisasyon nen Jehova lapud natetebek da a say “Israel na Dios” so “makabat tan makatalos a katooan,” ya aliwan nisipor ed sikara, noagta lapud inwanwan ira na ayadyarin ganggan tan prinsipyo na Dios. (Galacia 6:16) Ipapanengneng na bilang na abautismoan ed agano niran taon a nilasus nilibo a balon babangatan ed tinaon, bilang resulta, so mangibabaga ed espiritual ya Israel: “Mila kami naani ed sikayo, tan sikami nadngelan mi a say Dios wala ed sikayo.” (Zacarias 8:23) Agaylay pankelaw na sarayan balo ni sano nanenengneng da so bangkete na espiritual a tagano ya impaparungo nen Jehova ed saray lingkor to! Agniran balot akanengneng na singa ontan ed datin relihyon da.​—Isaias 25:6.

Panangiter ed Sankatalonggaringan a Manangiter

Lapud amayamay a naaawat da, natural labat ya umamengen na saray maapresia no antoy niiter da met ed say sankatalonggaringan ya Ari tan Manangiter, si Jehova a Dios. Ipaparungtal na Biblia a say sankaabigan a niregalo tayo ed si Jehova et say “bagat a panangidayew.” (Hebreos 13:15) Akin? Lapud sayan bagat so direktan misiglaotan ed panangiliktar na bilay, manunan kapagaan nen Jehova ed sayan panaon na anggaan. (Ezequiel 18:23) Niarum ni, say pangiter ed biskeg tan panaon na sakey pian tulongan so mansasakit, say nagogonigon, tan arum ni et sakey a naabobonan a bagat.​—1 Tesalonica 5:14; Hebreos 13:16; Santiago 1:27.

Baleg so nagawaan na pankontribusyon na kuarta. Pagmaliwen dan posibli so pakapawala na saray Biblia, nibase’d Biblian literatura, tan say pakapangipaalagey na saray pasen a pakapanduruypoan na saray Kristiano. (Hebreos 10:24, 25) Niiter met na saray kontribusyon so tulong iran pundo parad saray abiktima ed saray bakal tan natural iran desyang.

Pian nigiya itayo nipaakar ed panangiter, indatak na Salitay Dios so pigaran maabig a prinsipyo. Alimbawa, ibabangat na satan a mangiter iray Kristiano, na aliwan ageteran a kantidad, noagta say makatunongan a niiter da, a gawaen a mabulbulos, manlapud maliket a puso. (2 Corinto 9:7) Walaray makapangiter na dakel; saray arum, singa say dukan balo a bii ed panaon nen Jesus, so nayarin makapangiter labat na daiset. (Lucas 21:2-4) Agta makatantanda a si Jehova​—say Akankayarian na intiron talba​—so mamapabli ed regalo tan bagat a walaay maabig a motibo a ginawa nipaakar ed ngaran to.​—Hebreos 6:10.

Ta pian makapangiter iran sililiket, lawas a napapakabatan iray totoo nen Jehova ed nanduruman pankaukolan tan ed epektibo iran paraan pian nakapet iratan a pankaukolan. Bilang resulta, tetenyegen na masanton espiritu nen Jehova iray mabulos a puso ya onkiwas. Tinumbok iyan totontonen ed Israel nensaman diad impamaalagey ed tabernakulo tan, diad saginonor et say templo. (Exodo 25:2; 35:5, 21, 29; 36:5-7; 39:32; 1 Awaran 29:1-19) Nen inmunan siglo K.P., satan met a totontonen so akatulong ed saray Kristiano ed impakawalaan na saray kayarian a nakaukolan da pian nipasabi so maong a balita na Panarian ed amin a nasyon tan ed panuporta ed saray agagi diad Israel legan na eras.​—1 Corinto 16:2-4; 2 Corinto 8:4, 15; Colosas 1:23.

Ontan met natan, bebendisionan nen Jehova so totoo to, tan mantultuloy toran bendisionan, diad pangiter to ed sikara na nakaukolan da pian nasumpal so sankabalgan a kampanya na panagpulong tan panagbangat ya anengneng na sankamundoan ed kapiganman.​—Mateo 24:14; 28:19, 20.

Antoray Kaplesan a Pankaukolan?

Diad agano niran taon et nirehistro la iray Tastasi nen Jehova ed dakel a bansa a datin apegetan so kimey da. Bilang resulta, apatnagan ed dakel ed sarayan daldalin so pirmin indakel na bilang na saray manangipalapag. Natalosan a kaukolan a tuloy iray Biblia tan nibase’d Biblian literatura.

Ontan met ed saray Kingdom Hall. Onliligada’d 9,000 a balon Kingdom Hall so nakaukolan ed sankamundoan natan. No nipaalagey so sakey a Kingdom Hall ed kada agew, mankaukolan itan na masulok a 24 taon pian nakapet iratan a kaplesan a pankaukolan! Kaleganan to, ngalngalin pitoran balon kongregasyon so napoporma ed inagew-agew, a dakel ed saratan et diad lugar a mairap so panagbilay. Diad biek a dapag, dakel ed sarayan pasen et agla nakaukolan so magastos iran paalagey. Diad arum a pasen, say Kingdom Hall ya onsarag met la ed pankaukolan tan onkanan maabig a pantasi ed komunidad so nayarin nisumpal diad $6,000 lambengat.

Nen inmunan siglo, walaray Kristiano a magmaong so panagbilay da nen say arum, kanian nansulat si apostol Pablo: “Lapu ed pampapara; say kadaakan yo panoan to ed sayan manaakar a panaon so kakulangan na arum, pian say kadaakan da panoan to met so kakulangan yo; pian dia ed saya wala so pampapara komon.” (2 Corinto 8:14) Natan, say mipadparan “pampapara” so mangitatarya na nakaukolan iran pundo a mamawala na saray Biblia, literatura na Biblia, Kingdom Hall, tulong no walay agawan desyang, tan arum a bengatla ed dakel a parti na mundo. Agaylan bendision so ontan a panangiter​—dia ed say mangiiter tan mangaawat!​—Gawa 20:35.

Singa nipatnag ed saray sulat a nanaawat na Sosyedad manlapud mabunlok-impanpuson totoo, dakel ed saray managbasa na sayan magasin so maliket ya ontulong balet ta ag-ira segurado ed nanduruman dalan na pakapankontribusyon da. Maseguron say akatekep a kahon so ontulong a mangebat ed sarayan tepet.

Legan na maglorian impanari nen Solomon, “amin iray arari ed dalin” ya akapibalita ed sikato so binmisita ed sikato. Balet, saksakey labat a manuley so binitla na Biblia​—say reyna na Seba. (2 Awaran 9:23) Agayla so impansakripisyo to! Balet ta sikatoy mayamyaman ya atumangan​—nagkalalo la diad pansampot lay bisita to et sikatoy “atameeng tan mankelkelaw.”​—2 Awaran 9:4, Today’s English Version.

Diad arapen, dakel ni so gawaen nen Jehova, say sankatalonggaringan ya Ari tan Manangiter, nen say agawaan nen Solomon ed saramay nansakriprisyo parad Sikato. Bilang ebat, sikara met so siaalagey ya “atameeng tan mankelkelaw,” ya aglabat la ira iliktar nen Jehova diad say makapataktakot ya agew na panangukom to noagta kayari na satan et ‘ibuskag toy lima to tan peneken toy pilalek na amin a bengatlan mabilay.’​—Salmo 145:16.

[Kahon ed pahina 22]

Saray Paraan a Pinili na Arum Pian Mangiter na

KONTRIBUSYON PARAD SANKAMUNDOAN A KIMEY

DAKEL so mangigagana, odino mangigegeter, na kantidad ya ipelag da ed saray “contribution box” ya atatakan na “Contributions for the Society’s Worldwide Work​—Matthew 24:14.” Kada bulan et ipapawit na saray kongregasyon irayan kantidad balanglan diad sankamundoan a hedkuarter ed Brooklyn, New York, odino diad lokal a sangan opisina.

Saray boluntaryon donasyon a kuarta so nayarin direktamentin nipawit ed Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, odino diad opisina na Sosyedad a manlilingkor ed bansa yo. Saray alahas odino arum nin ankablin bengatla so nayari met ya idonasyon. Sakey ya antikey a sulat a mangibabagan satan so sakey a direktan langkap so nepeg a nitekep ed sarayan kontribusyon.

UKSOYAN NA KONDISYONAL A DONASYON

Nayarin niiter so kuarta ed Watch Tower Society ed silong na espisyal a reglamento a ditan, no bilang ta say angidonar et walaay personal a pankaukolan to, say donasyon so ipawil ed sikato. Parad nagkalalon impormasyon, ipangasin mitalosan ed say Treasurer’s Office diad address a nipaimano ed tagey.

NIPLANON PANANULONG

Bilang kaaruman ed direktan langkap a kuarta tan kondisyonal iran donasyon na kuarta, wala niray arum a paraan na panangiter pian benepisyoan so serbisyo nipaakar ed Panarian ed sankamundoan. Laktipen na saraya so:

Seguro: Say Watch Tower Society so nayarin ingaran bilang benepisyari na sakey a life insurance policy odino ed panretiro/pension plan.

Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipatey ed Watch Tower Society, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap odino diad silong na sakey a reglamento a diad panamegley na say almo a mantultuloy ya ibayar ed angidonar.

Lote tan Abung: Say nayarin ilakon lote tan abung so nayarin idonasyon ed Watch Tower Society diad panamegley na direktan langkap odino diad pangireserba ed satan bilang panayaman na angidonar, a makapantultuloy a manayam ditan legay bilay to. Nepeg a mitalosan nin unona ed Sosyedad sakbay ya iyalis ed ngaran na Sosyedad so antokaman a lote tan abung.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Sosyedad so ingaran bilang benepisyari na sakey a paknaan na panangimatalek. Say sakey a nimatalek a pakabenepisyoan na sakey a relihyoson organisasyon so nayarin mangitarya na pigaran bentaha ed panag-buis.

Singa isusuheri na terminon “niplanon pananulong,” sarayan nengneng na donasyon so kaslakan a mankakaukolan na pigaran panagplano ed biang na mangidonar. Pian tulongan iray indibidual a manpipilalek a benepisyoan so Sosyedad ed panamegley na pigaran nengneng na niplanon pananulong, say Sosyedad so angiparaan na brosyur ya Ingles ya atituloan na Planned Giving to Benefit Kingdom Service Worldwide. Say brosyur so nisulat bilang ebat ed dakel a tepet a naaawat na Sosyedad nipaakar ed saray langkap, testamento, tan imatalek. Lugan to met iray kaaruman a mausar ya impormasyon nipaakar ed lote, pinansyal, tan panangiplano ed buis. Tan denisinyo itan pian ontulong ed saray indibidual ed Estados Unidos a manplaplanon manggawa na espisyal a regalo ed Sosyedad natan odino mangiter na kanepegan diad ipatey pian pilien so sankaabigan tan sanka-epektiboan a paraan diad panangikonsidera ed pamilya ra tan personal iran sirkumstansia ra. Nayarin makala ed sayan brosyur diad pangerew na sakey a kopya a direkta manlapud Charitable Planning Office.

Kayari impamasa ed brosyur tan impangonsulta ed Charitable Planning Office, dakel la so akatulong ed Sosyedad tan ontan met, naromog so sankatagyan a balor ed saray benepisyo’d buis ed panggawa’d satan. Say Charitable Planning Office so kaukolan a pasantabian tan nawalaan na kopya na antokaman a mitukoyan a dokumento nipaakar ed dinanman ed sarayan uksoyan. No sikay interesado ed dinanman ed sarayan niplanon pananulong iran uksoyan, sikay kaukolan a mitalosan ed Charitable Planning Office, balanglan diad pansulat odino diad pantelepono, diad address a nilista ed leksab odino diad opisina na Sosyedad a manlilingkor ed bansa yo.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 306-1000

[Saray litrato ed pahina 23]

Saray kimey na Tastasi nen Jehova so susuportaan na boluntaryo iran donasyon