Eebatan na Biblia Iray Importantin Tepet ed Panaon Tayo

KASIN makabaliksan so Biblia natan? Pian say ebat et on, kaukolan a sayan kadaanan a libro so mangiter na giya ed saray managbasa nipaakar ed saray tema a paniinteresan tan misiglaotan ed kaplesan a panaon. Kasin itatarya na Biblia so makagunggunan simbawa nipaakar ed saray tema a peteg ya importanti ed mundo natan?

Imanoen tayo so duaran peles ya isyu. Diad panggawa ed satan, usisaen tayo no antoy ibabaga na Biblia nipaakar ed sarayan pamaakaran.

Akin ya Aabuloyan na Dios so Kairapan?

Nisengeg ed saray kipapasen ed mundo natan, sakey ed kaslakan lan tuloy a nitetepet et: Akin ya aabuloyan na Dios a manirap so inosintin totoo? Sayan tepet so makatunongan, lapud ondarakel a totoo so naaapektoan na marawal a krimen, inkauges, palaspas a panagpatey, personal a trahedya, tan arum ni.

Alimbawa, nen Hunyo 1998 sakey a maples a tren so alesles ed sakey a taytay ed mamaamianen na Aleman, ya inateyan na masulok a sanlasus a pasahero. Anggan saray eksperiensiadon doktor tan bombero ya angasikaso ed saray asugatan tan inaatey so agonigon ed saman a pirmin aksidenti. Intepet na sakey ya obispo na Evangelical Church: “Pinablin Dios, Akin ya agawa ni iya?” Agnaebatan itan a mismo na obispo.

Ipapanengneng na saray eksperiensia a sano managmak na mauges iray inosentin totoo ya agda amtay sengegan, no maminsan et ansaki-sakit a maong so liknaan da. Dia so pakatulongan na Biblia, ta ipapaliwawa to no akin a sasagmaken na saray inosentin totoo so kaugsan tan kairapan.

Sanen pinalsa nen Jehova a Dios so dalin tan amin a bengatla ditan, agto ginetman say sankatooan so managmak na kaugsan tan kairapan. Panoy pakaseguro tayo? Lapud diad impakasumpal to’d impamalsa to, “Say Dios anengneng to so amin a bengatla a ginawa to, et nia maong iran tuloy.” (Genesis 1:31) Tepetan moy inkasika, ‘No walay bengatlan naimatonan kon mauges, kasin ikuan kon “maong [a] tuloy” itan?’ Siempre andi! Mipadpara, sanen inyabawag na Dios a ‘maong a tuloy’ so amin a bengatla, anggapoy pakasuysoyan na karelmengan ed dalin. Kanian kapigan tan panon a ginmapo so karelmengan?

Kayarin tuloy na inkapalsa na inmunan atateng tayo, si Adan tan Eva, sakey a makapanyarin espiritun pinalsa so inmasingger ed bii tan inangat toy inkamatua nen Jehova tan say inkamakanepegan na inkasoberano To. (Genesis 3:1-5) Sayan pinalsa, si Satanas a Diablo, so diad saginonor et insuppiat ton agmansiansian matoor iray totoo ed Dios ed silong na kairapan. (Job 2:1-5) Antoy reaksion nen Jehova ed sayan situasyon? Inyabuloy ton onlabas so panaon ta pian napatnagan a saray totoo so agmatalonan makapangiwanwan ed saray kurang da a sian ed sikato. (Jeremias 10:23) Sano onkiwas iray pinalsa a kontra ed saray ganggan tan prinsipyo na Dios, say resulta et kasalanan, a mamawala na makapasakit iran kipapasen. (Eclesiastes 8:9; 1 Juan 3:4) Balet, anggaman ed sarayan mairap a sirkumstansia, amta nen Jehova ya arum a totoo so mansiansian matoor ed sikato.

Nanlapulad satan a mauge-uges ya impanrebeldi ed Eden, manga 6,000 taon lay linmabas. Kasin andukerukey la itan? Sarag nen Jehova a deralen la komon si Satanas tan saray onsusuporta ed sikato ed dakel lan sigloy apalabas. Balet agta magmaong so panalagar anggad naekal lan amin so naisip a panduaruwa nipaakar ed kanepegan na inkasoberano nen Jehova tan say katooran na totoo ed sikato? Agta tua a diad peles a hudisyal iran sistema et nayarin sabien toy pigaran taon pian napaneknekan so kaso ed korte no siopa so duga tan siopa so aliwa?

Nisengeg ed kaimportantian na saray isyun nipaarap ed si Jehova tan ed katooan​—say sankatalbaan ya inkasoberano tan say katooran na totoo​—agaylan makabat ya inyabuloy na Dios ya onlabas so panaon! Natan et malinew tayon nanenengneng no antoy nagawa sano ibaliwala na totoo iray ganggan na Dios tan uleyan da so dilin kurakurang da. Say resulta so malaknab a kaugsan. Tan satan so rason no akin a dakerakel ya inosentin totoo so maniirap natan.

Balet, makapaliket ta ipapanengneng na Salitay Dios ya aliwan magnayon so karelmengan. Diad tua, magano lan panganggaen nen Jehova so kaugsan tan saramay pansesengegan na satan. “[Nipaakar ed] marelmeng,” ibabaga na Uliran 2:22, “napegpeg a manlapu ed dalin, tan saray liputan nabagot ira ed sikato.” Diad biek a dapag, saramay matoor ed Dios so makapanilalo ed sakey a panaon, a natan et asingsingger la, sano “andi gapo la naani ipatey; tan anggapo la naani onnangis o dageyem, o ot-ot.”​—Apocalipsis 21:4.

Kanian, malinlinew ya isasalaysay na Biblia no akin a maniirap iray inosenti. Ipapaseguro to met ed sikatayo a say kaugsan tan kairapan so magano lan mangangga. Balet, legan a naeeksperiensia tayo so peles iran kairapan ed bilay, kaukolan tayo so ebat ed sananey ya importantin tepet.

Antoy Gagala na Bilay?

Anganko natan et mas ni nen say ed kapiganman ed awaran na katooan, saray totoo so manggugunaet a mangamta no antoy kabaliksan na bilay. Dakel so mangitetepet ed inkasikara, ‘Akin a manbibilay ak? Panon kon naromog so kabaliksan ed bilay ko?’ Makasengeg ed nanduruma iran sirkumstansia, itetepet da irayan tepet.

Say bilay na indibidual so nayarin deralen na personal a trahedya. Singa bilang, diad banda’d gapo na 1998 sakey a biin mantaon na 12 a manaayam ed Bavaria, Alemanya, so kinidnap tan pinatey. Sakey taon ed saginonor, inaksobi na ina to a sikatoy inagew-agew a manaanap ed gagala na bilay​—balet anggapoy nansumpalan. Arum a kalangweran so napapakiwas a manumameng nipaakar ed kabaliksan na bilay. Sikaray manaanap na kaligenan, kapenek, tan liknaan ya awaten na arum, a mansumpal labat ed kaandiay ilalo diad ikakasmak na pansimpisimpitan tan inkauges. Isesentro na arum ya indibidual so kabibilay da ed sakey a karera, balet naroromogan da a say pakayari, inkabantog, tan saray kayarian et agmamenek ed akindalem a panpipirawat a naamtaay rason na kiwawala ra.

Antokaman so mamakiwas ed sakey a too a manupapet nipaakar ed gagala na bilay, sayan tepet so mankaukolan na seryoso tan makapenek ya ebat. Maminsan lamet, say Biblia so pakagunggunaan a tuloy. Ipapabidbir toy Jehova bilang Dios na gagala, sakey a walaan na maabig iran rason ed amin a gagawaen to. Nitepet tayo, Mamaalagey ka ta na sakey ya abung ya anggapoy rason? Seguradon andi, lapud ta say pamaalagey na abung et mankaukolan na baleg a pangipundar na kuarta tan sabien toy pigaran bulan odino taon. Mamaalagey kay abung ta pian panayaman mo odino na sananey. Parehon panagkatunongan so onaplika met ed si Jehova. Agto nansagpotan so impamalsa ed dalin tan saray mabilay a bengatla ditan ya anggapoy rason tan gagala. (Ikompara so Hebreos 3:4.) Antoy gagala to parad dalin?

Say propesiya nen Isaias so mangipapabidbir ed si Jehova bilang “say Dios ya anibukel tan nanggawa na dalin.” On, sikato so “angiletneg ed [say dalin] tan sikato so pinalsa to ya aliwa a kibalatar, a tinibukel to ta pian sikato so panayaman.” (Isaias 45:18) On, nanlapulad inkapalsa na dalin, gagala nen Jehova a panayaman itan. Ibabaga na Salmo 115:16: “Saray tawen, salanti saray katawenan, kien ira nen Jehova. Bangbalet say dalin inter to ed saray anak na totoo.” Kanian ipapanengneng na Biblia a pinalsa nen Jehova so dalin pian panayaman na matulok a totoo, a mangasikaso ed satan.​—Genesis 1:27, 28.

Kasin inuman nen Jehova so gagala to lapud impanrebeldi di Adan tan Eva? Andi. Panoy pakaseguro tayo? Bueno, konsideraen iyan punto: Say Biblia so nisulat nilibon taon kayari na impanrebeldi ed Eden. No inkaindan na Dios so orihinal a gagala to, akin ya ag-asalambit itan ed Biblia? Say mapatnag a konklusion et agnauman so gagala to ed dalin tan ed katooan.

Sakey ni, agbalot onsaew so gagala nen Jehova. Diad panamegley nen Isaias, inter na Dios iyan panamaseguro: “Unong a say uran tan say musiak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan pambungaen da tan pambukelen da, tan pangitdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangyakaran ko ed sikato.”​—Isaias 55:10, 11.

No Antoy Iilaloan na Dios ed Sikatayo

Malinew sirin, a nawalaan itayo na kompiyansa ed kasumpalan na gagala na Dios pian napanayaman na matulok a totoo so dalin ed ando lan ando. No sakey itayo ed saramay apribilihyoan a manayam a permanenti ed dalin, nepeg tayon gawaen so inkuan nen makabat ya Arin Solomon: “Takotan mo so Dios, tan unoren mo so saray ganggan to; ta saya sikato so katiponan na kanepegan na too.”​—Eclesiastes 12:13; Juan 17:3.

Say pambilay a mitunosan ed gagala nen Jehova parad katooan et kabaliksan toy pangamta ed say tuan Dios tan pitunosan ed saray kakaukolanen to a singa nidatak ed Masanton Kasulatan. No gawaen tayo natan iya, napanggayagaan tayo so ilalon andi-anggaan a bilay ed paraison dalin, a ditan et agtayon balot ontundan manaral na balo iran bengatla nipaakar ed Dios tan ed makapakelaw a pinalsa to. (Lucas 23:43) Agaylan makapaliket ya ilalo!

Dakel a mansusukimat parad gagala na bilay so ontutupleg ed Biblia tan makakaromog ira na baleg a liket natan la. Singa bilang, sakey a kalangweran a manngaran na Alfred so agmakaromog ed kabaliksan na bilay. Say pibabali na relihyon ed guerra so pankabusolan ton maong, tan pansyodotan toy pansimpisimpitan tan inkabulok na politika. Binisita nen Alfred iray Indian ed Amianen ya Amerika diad ilalon nagamoran toy pakaliwawaan nipaakar ed gagala na bilay, balet ta dismayado labat a sinmempet ed Europa. Lapud andian na ilalo, sikatoy binmaling ed druga tan garambasal a musika. Balet, say regular tan maalwar a panangusisa ed Biblia so tinmulong ed si Alfred ed saginonor pian naamtaan toy tuan gagala na bilay tan naromog toy inkapnek.

Napandependian a Liwawa ed Dalan Tayo

Anto sirin so nibaga tayo nipaakar ed Biblia? Kasin makabaliksan itan natan? On, peteg, lapud iyoopresi toy panangigiya ed peles iran isyu. Ipapaliwawa na Biblia a say karelmengan so agmanlalapu ed Dios tan ontulong ed sikatayon mananap ed makapenek a gagala na bilay. Niarum ni, dakel so ibaga na Biblia nipaakar ed arum a pamaakaran a pirmin paniinteresan natan. Saratan a tema a singa say panangasawa, panamabaleg ed anak, saray relasyon ed kaparan too, tan ilalo na inaatey so nasasalambit ed Salita na Dios.

No agmo ni agawaan itan, ipangasin usisaen a maong iray lugan na Biblia. Bektan naromogan mo so tuan kablian na saray panangigiya to ed bilay, naliknam a tuloy so singa alikna na salmista a nanilalo ed si Jehova a Dios parad panangigiya tan inkanta to: “Say salitam sikato so sakey a silewan ya onkana ed saray salisalik, tan sakey a liwawa ya onkana ed basbas ko.”​—Salmo 119:105.

[Litrato ed pahina 6]

Kasin antam no akin ya aabuloyan na Dios a manirap iray inosenti?

[Litrato ed pahina 7]

Napanggayagaan mo so bilay a walaay gagala