‘Ilaban Yo so Inkasikayo tan Saramay Ontalineng ed Sikayo’
“Lawas mon imanoen so inkasika tan say panagbangat mo. . . . Diad panggawam ed saya, nilaban mo so inkasika tan saramay ondengel ed sika.”—1 TIMOTEO 4:16, NW.
1, 2. Anto so mamapakiwas ed saray tuan Kristiano pian mantultuloy ira ed manangisalbay-bilay a kimey da?
DIAD sakey a nisulinek a baryo ed mamaamianen a Thailand, sinali na sanasawan Tastasi nen Jehova so balo nin naaralan da a lenguahe ed saray kabiangan na tribun manaayam ed pukdol. Ta pian nainabang da so maong a balita na Panarian na Dios ed saray ombaryo, aganggano nin inaral na sanasawa so lenguahen Lahu.
2 “Agmi nadeskribe so gayaga tan inkapnek a nalilikna mi, diad iyaakar mi ed sarayan interesadon totoo,” so impaliwawa na asawan laki. “Petepeteg a nalilikna min makapipibiang kami ed kasumpalan na Apocalipsis 14:6, 7, diad panangiyabawag na maabig a balita ed ‘balang nasyon tan poli [“tribu,” NW] tan salita.’ Daiset lan teritorya so agni atayek na maong a balita, tan maseguron sakey iya ed saraman. Ngalngali agmi nasabaan iray iyaaralan mi.” Malinew, pilalek na sayan sanasawa ya aliwan sikara lambengat so nilaban noagta ontan met ed saramay ontalineng ed sikara. Bilang Kristianos, agta ontan met so iilaloan tayon amin a gawaen?
“Lawas Mon Imanoen so Inkasika”
3. Pian nisalba so arum, anto so nepeg tayo nin gawaen?
3 Sinimbawa nen apostol Pablo si Timoteo a, “Lawas mon imanoen so inkasika tan say panagbangat mo,” tan onaplika iya ed amin a Kristiano. (1 Timoteo 4:16) On, nepeg ya imanoen tayo nin unona so inkasikatayon dili, pian natulongan tayo so arum a makagamor na kilalaban. Panon tayon nagawaan iya? Say sakey lan bengatla et nepeg tayon mansiansian alerto ed panaon a pambibilayan tayo. Angiter si Jesus na tugyop na tanda ta pian naamtaan na saray patumbok to no kapigan so isabi na “kasampotan na sistema na bengabengatla.” Ingen, inkuan met nen Jesus ya agtayo eksakton naamtaan no kapigan so isabi na anggaan. (Mateo 24:3, 36, NW) Panoy ikiwas tayo ed satan a katuaan?
4. (a) Anton awawey so kaukolan tayon ipatnag nipaakar ed panaon a natitilak ed sayan sistema? (b) Anton awawey so nepeg tayon paliisan?
4 Nayarin oniay itepet na balang sakey ed sikatayo, ‘Kasin uusaren ko so antokaman a panaon a natitilak ed sayan sistema pian nilaban koy inkasiak tan saramay ondengel ed siak? Odino kasin iisipen kon, “Lapud agtayo amtan eksakto no kapigan so isabi na anggaan, agko ni pampagaan itan”? Mapeligro so awawey a walad kaunoran. Direktan mikontraan itan ed simbawa nen Jesus: “Manparaan kayo met komon; ta dia ed oras ya agyo isisipen onsabi’ Anak na too.” (Mateo 24:44) Petepeteg ya aliwa la iyan panaon pian ontayer so seseg tayo ed panaglingkor ed si Jehova odino manilalo ed mundo parad seguridad odino inkapnek.—Lucas 21:34-36.
5. Antoran ehemplo so impanengneng na saray sakbay-Kristianon tastasi nen Jehova?
5 Say sakey nin paraan pian nipanengneng tayo ya iimanoen tayo so inkasikatayo et diad matoor a pansungdo bilang Kristianos. Nantultuloy a nansungdo iray lingkor na Dios nensaman, balanglan inilaloan da so tampol a kiliktar odino andi. Kayari ton sinaglawi iray ehemplo na saray sakbay-Kristianon tastasi a singa di Abel, Enoc, Noe, Abraham, tan Sara, oniay inkuan nen Pablo: “Agda ni inawat so saray sipan, ingen sikara so anengneng da tan sikara so imbano ra nanlapu ed arawi, tan impatua’ra a sikara so sankaili tan manaakar ed tapew na dalin.” Ag-ira sinmuko ed antokaman iran pilalek parad sakey a bilay a mainawa, nisay atukso ira ed imoral iran pakadetdetan a walad kaliberliber da, balet sigugunaet dan inilaloan so ‘kasumpalan na saray sipan.’—Hebreos 11:13; 12:1.
6. Panon ya angapekta ed dalan na panagbilay na inmunan-siglon Kristianos so panmoria ra ed kilalaban?
6 Naeksperiensia met na saray inmunan-siglon Kristiano so impagmaliw dan ‘sankaili’ ed sayan mundo. (1 Pedro 2:11) Anggan kayari na impakaliktar da manlapud inkaderal na Jerusalem nen 70 K.P., agtinmundan nampulong iray tuan Kristiano odino ag-ira pinmawil ed minumundon dalan na panagbilay. Amta ran walay engranden kilalaban a manatalaran ed saramay mansiansian matoor. Diad tua, diad pansumpasumpal lay 98 K.P., insulat nen apostol Juan: “Say mundo mangangga, tan saray penel to: sabalet so mangunor ed linawa na Dios onsiansia lawas.”—1 Juan 2:17, 28.
7. Panon ya impanengneng na Tastasi nen Jehova so panagsungdo ed moderno iran panaon?
7 Diad moderno iran panaon et nansiansia met iray Tastasi nen Jehova ed Kristianon kimey, anggaman nasasagmakan da iray maramsak a panamasegsegang. Kasin anggapoy kakanaan na pansusungdo ra? Andin balot, lapud oniay impaseguro’d sikatayo nen Jesus: “Say misungdo ya angga ed kasampotan, sikato lanlamang so nilaban naani,” balanglan satan et panganggaan la na daan a sistema odino anggaan lay kaplesan a bilay na sakey. Diad kioli, nonoten tan tumangan nen Jehova so amin a matoor a lingkor to ya inaatey la.—Mateo 24:13; Hebreos 6:10.
8. Panon tayon nipanengneng ya aapresiaen tayo so impansungdo na saray Kristiano nensaman?
8 Niarum ni, maliket itayo ta saray matoor a Kristiano nensaman et aglambengat nampaga ed mismon kilalaban da. Maseguron say impakaaral tayo nipaakar ed Panarian na Dios panamegley na saray sagpot da so pisalsalamatan tayo lapud ta nansungdo ira’d panusumpal da ed ganggan nen Jesus: “Manggawa kayo na saray babangatan ed amin a nasyones, . . ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Anggad akalukas ni so pankanawnawa ed sikatayo, nipanengneng tayo so pisasalamat tayo diad pampulong ed arum ya agni akadngel ed maong a balita. Balet, say panagpulong so pilimero lambengat a kundang pian ontundas ed panaggaway babangatan.
‘Imanoen Yoy Panagbangat Yo’
9. Panon a makatulong ed sikatayo so positibon awawey pian makapangigapo tayo na saray panangiyaral na Biblia?
9 Say asainmin tayo et aliwa lambengat a manpulong noagta manbangat met. Ingganggan itayo nen Jesus ya ibangat so totoo a mangunor ed amin a bengatla ya ingganggan to. Tua, diad arum a teritorya et ompatnag a daiset so malabay a manaral nipaakar ed si Jehova. Balet say pakawalaan na negatibon panmoria ed teritorya so mangamper ed saray sagpot tayon mangigapoy panangiyaral na Biblia. Si Yvette, a payunir ed sakey a teritoryan tinawag na arum ya anawet a teritorya, so akaimano ed saray bisita ed saman a lugar, ya andian na negatibon awawey kanian sikatoy akapangigapo na saray panangiyaral na Biblia ed sikara. Diad impagmaliw ton positibo ed panmoria to, aromog met nen Yvette so totoo a malabay a manaral na Biblia.
10. Anto so manunan betang tayo bilang managbangat na Biblia?
10 Nayarin masuyat so arum a Kristiano a mangiyopresi na panangiyaral na Biblia ed saray interesado lapud iisipen dan agda sarag so mangiyaral. Tua, nanduruma so abilidad tayo. Balet agla nakaukolan a magmaliw itayo nin onsianon tuloy pian magmaliw a matalonan managbangat na Salitay Dios. Mapuersa so puron mensahe na Biblia, tan inkuan nen Jesus ya amta na saray kinmarnero so bosis na tuan Pastol sano narengel da itan. Say kimey tayo sirin et say pangipasabi ed mensahe na Maabig a Pastol, si Jesus, unong a mapatnag a nagagawaan tayo.—Juan 10:4, 14.
11. Panon kayon magmaliw a mas epektibo diad panulong yo ed sakey ya iyaaralan na Biblia?
11 Panon yon nipasabi so mensahe nen Jesus diad mas epektibon paraan? Unona, kabisadoen yo ni no anto so ibabaga na Biblia nipaakar ed teman pantongtongan. Nakaukolan a natalosan yon mismo so tema sakbay yon ibangat itan ed arum. Ontan met, mantinien so mapagalang balet makaaron atmospera legan na panagaral. Saray iyaaralan, pati ananak, so mas makaaral no aliwa iran iri-iri tan ipanengneng ed sikara na managbangat so respeto tan panangasi.—Uliran 16:21.
12. Panon yon naseguro a natatalosan na iyaaralan no anto so ibabangat yo ed sikato?
12 Bilang sakey a managbangat, agyo labay a basta nipresenta iray katuaan ed iyaaralan insan ebatan to lambengat so tepet. Sikatoy tulongan yon makatalos ed nanaaralan to. Say edukasyon, eksperiensia ed bilay, tan pikabisado na iyaaralan na Biblia so mangapekta ed pakatalos to no anto so ibabaga yo. Kanian, nayarin itepet yo’d inkasikayo, ‘Natatalosan to kasi so kabaliksan na saray tekston nisitas ed aaralen a materyal?’ Nasarag yon papawayen so walad kanonotan to panamegley na saray tepet ya aglambengat ebatan na on odino andi noagta mankaukolan na eksplinasyon. (Lucas 9:18-20) Diad biek a dapag, masuyat so arum ya iyaaralan a mantepet ed mangiyaaral ed sikara. Kanian, tumbotumbok lambengat ira balet ta agda natatalosan so ibabangat ed sikara. Pasesegen so estudyante a mantepet tan paibesngaw ed sikato no antoran punto so agto natalosan a maong.—Marcos 4:10; 9:32, 33.
13. Panon yon natulongan so iyaaralan a magmaliw a managbangat?
13 Say importantin gagala na panangiyaral na Biblia et say panulong ed iyaaralan pian magmaliw met a managbangat. (Galacia 6:6) Lapud satan a gagala, no manrepaso kayo ed inaral yo et nayarin paipaliwawa yo’d iyaaralan yo so sakey a punto diad simpli iran salita, a singano sikato so mangipaliwawa ed sakey a too a pilpilimero toy makadngel ed satan. Kayari na satan, sano sikatoy kualipikado la’d ministeryo, nayarian yon itagar a manpulong. Nayarin komportabli so liknaan to no miulop ed sikayo, tan say pakaeksperiensia to so makatulong ed ibulaslas na kompiyansa to angga ed sarasarag to lay manpulong.
Tulongan so Iyaaralan Pian Magmaliw a Kaaro nen Jehova
14. Anto so manunan kalat yo bilang managbangat, tan anto so makatulong pian matalona yon nadampot itan?
14 Say manunan kalat na balang sakey a Kristianon managbangat et say panulong ed iyaaralan a magmaliw a kaaro nen Jehova. Nagawaan yo iya, aliwa lambengat ed panagsalita yo noagta diad alimbawa yo met. Say pambangat ya atekepan na alimbawa so walaan na mabiskeg ya epekto ed kapusoan na saray iyaaralan. Mas epektibo iray gawa nen saray salita, nagkalalo la no nipaakar ed panangipurek ed saray moral a kualidad tan makasagyat a seseg diad saray iyaaralan tayo. No naimano to a say panagsalita tan gagawaen yo et makasengeg ed maong a relasyon ed si Jehova, sikato so mas napakiwas a mamayubon mismo ed ontan a relasyon.
15. (a) Akin ya importantin nabayuboan na iyaaralan so dugan motibo ed panaglingkor ed si Jehova? (b) Panon yon natulongan so iyaaralan pian mantultuloy ya onaligwas ed espiritual?
15 Labay yon manlingkor so sakey ya iyaaralan ed si Jehova ya aliwa lambengat a lapud labay toy makaliktar ed Armagedon noagta Sikatoy inaro to. Diad panulong ed sikato a mamayubo ed ontan a malinis a motibo, mangipapaalagey kayo na agnapoolan iran materyales a mansiansia ed saray subok ed pananisia. (1 Corinto 3:10-15) Say makapuy a motibo, a singa say agmanepeg a pilalek a mangalig ed sikayo odino ed arum nin too, so agmamabiskeg ed sikato pian resistian iray agmakristianon impluensia odino sikatoy agmanpakpel a manggawa na duga. Nodnonoten, agkayo magmaliw a managbangat ed sikato ed amin lan panaon. No walay pankanawnawa yo, sikato so napaseseg yo a lalon onapit ed si Jehova diad pambasa ed Salitay Dios ed agew-agew tan panmolimoli ed satan. Diad onian paraan et mantultuloy ya onsepsep ed sikato so “alasir na makagungguna iran salita” manlapud Biblia tan nibase’d-Biblia iran publikasyon kayari la na pangiyaral ed sikato.—2 Timoteo 1:13, NW.
16. Panon yon ibangat so iyaaralan pian manpikasi ed impapuson paraan?
16 Nayarian yo met a tulongan so iyaaralan pian mas onapit ed si Jehova diad pangibangat yo ed sikato a manpikasi ed impapuson paraan. Panon yon nagawaan itan? Sikato so nayarin ipaarap yo ed modelon pikakasi nen Jesus, ontan met ed dakel iran masimoon a pikakasi a nikurit ed Biblia, a singa saramay walad salmo. (Salmo 17, 86, 143; Mateo 6:9, 10) Niarum ni, no narengel na iyaaralan yo a lukasan tan saraan yo so panagaral panamegley na pikakasi, nalikas to so liknaan yo ed si Jehova. Sirin, saray pikakasi yo so nepeg a lawas pakapatnagan na inkasimoon tan inkamabulos a mangibesngaw, tan asimbang met diad espiritual tan emosyonal a paraan.
Pankimeyan Yon Ilaban so Ananak Yo
17. Panon a makatulong iray atateng ed ananak da pian mansiansia ira ed basbas ya ompugta’d kilalaban?
17 Siempre, labay tayo met a kaiba iray kapamilyaan tayo ed saramay kaliktan tayon nilaban. Dakel ya ananak na Kristianon atateng et masimoon tan ‘malet ed pananisia.’ Balet, say katuaan so agnilamot a maong ed kapusoan na arum. (1 Pedro 5:9; Efeso 3:17; Colosas 2:7) Intalirak na dakel ed sarayan kalangweran so Kristianon dalan sanen wala la ra’d edad. No ateng kayo, anto so nagawaan yo pian napaliisan so ontan a pansumpalan? Unona, pankimeyan yon pawalaen so maligsan atmospera ed pamilya. Say maabig a bilay na pamilya so mangiletneg na pundasyon parad mabunigas a panmoria ed autoridad, panamabli ed manepeg iran walna, tan maliket a relasyon ed arum. (Hebreos 12:9) Kanian say maapit a siglaotan ed loob na pamilya so pamabulaslasan ed sakey ya anak pian sikatoy makapikaaro ed si Jehova. (Salmo 22:10) Saray mabiskeg a pamilya so mankakasakey a manggawa na saray bengatla bilang sakey a yunit—anggano nepeg a mangisakripisyo so atateng ed panaon ya usaren da komon ed personal a pakagunggunaan da. Diad onian paraan, nibangat yo so ananak yo panamegley na alimbawa yo pian susto so pakapandesisyon da nipaakar ed bilay. Atateng, say mas nakaukolan na ananak yo et, aliwan saray materyal a pankaabigan, noagta sikayo—say panaon yo, biskeg yo, tan panangaro yo. Kasin iiter yo iratan ed ananak yo?
18. Nepeg a tulongan na atateng iray ananak da diad panresolbi ed antoran klase na tepet?
18 Agnepeg ya ipasen na Kristianon atateng a saray ananak da et automatikon magmaliw met a Kristiano. Oniay naimano nen Daniel, sakey a matatken tan ama na limaran ananak: “Nepeg ya ipanaon na atateng so pangekal ed saray panduaruwa ya agnapaliisan a mangimpluensia ed ananak da diad eskuelaan tan arum nin pasen. Nepeg a maanos dan tulongan iray ananak da a mananap na saray ebat ed saray tepet a singa say: ‘Kasin manbibilay tayo lan talaga ed panaon na anggaan? Talaga kasin saksakey lambengat so tuan relihyon? Akin a makapuy a kaulop so ompatnag a maong a kaeskuela? Makapuy kasi so pisekso sakbay a mankasal?’” Sikayoran atateng, nailaloan yo a bendisionan nen Jehova iray sagpot yo, lapud sikatoy interesado met ed pankaabigan na ananak yo.
19. Akin a sankaabigan a saray atateng a mismo so mangiyaral ed ananak da?
19 Isipen na arum ya atateng ya agda nasarag so mangiyaral ed mismon ananak da. Balet, aliwan ontan komon so isipen yo, lapud ta anggapo lay walad magmaong a kipapasen pian nibangat so ananak yo noagta sikayon mismo. (Efeso 6:4) Diad pangiyaral yon mismo ed ananak yo, naamtaan yo no anto so walad kapusoan tan kanonotan da. Kasin impapuso odino napipilitan lambengat iran onebat. Kasin papanisiaan dan talaga so nanaaralan da? Kasin tudtua si Jehova ed sikara? Naebatan yo lambengat iratan tan arum nin makanan tepetepet no sikayon mismo so mangiyaral ed ananak yo.—2 Timoteo 1:5.
20. Panon a nagawaan na atateng so panagaral na pamilya ra a makapaliket tan makagungguna?
20 Panon yon mantinien so programa na panagaral na pamilya yo no nigapo yo la itan? Si Joseph, sakey a matatken tan ama na ugaw nin anak a laki tan bii, so angikuan: “Singa met ed arum niran panangiyaral na Biblia, nepeg a makapaliket so panagaral na pamilya, sakey a bengatlan pitalaran na amin. Pian nagawaan itan na pamilya mi, agmi eestriktoan so oras. Say panagaral mi et nayarin manbayag na sakey oras, balet anggano sagpaminsan et samplora lambengat a minuto so pakapanaral mi, siansia nin manaaral kami. Say sakey a bengatlan mangipupurek a maong ed panagaral mi diad kada simba et say paimamari mi ed ananak mi iray eksenan manlapud My Book of Bible Stories.a Say laknab na panangipaslep tan say pakakatalos so mas importanti nen say karakel na parapon nakobrian.”
21. Kapigan so pangibangat na atateng ed ananak da?
21 Siempre, say pangibangat ed ananak yo so aglambengat gawaen ed oras na pormal a panagaral yo. (Deuteronomio 6:5-7) Say Tasi ed Thailand ya abitla ed gapo so angikuan: “Natantandaan ko ni no panon so naynay a pangitatagar ed siak nen Dad a manpulong, a bisikletaen mi so sankasulinekan a teritorya na kongregasyon mi. Maseguron say maabig ya alimbawa na atateng mi tan say impangibangat da’d sikami diad amin a sirkumstansia so akatulong pian onloob kami ed sigpot-panaon a ministeryo. Tan epektibo nin siansia irayan naaralan ko. Siansia nin mankikimey ak ed sankasulinekan iran lugar na lawak!”
22. Anto so resulta na ‘panimano yo’d inkasikayo tan ed panagbangat yo’?
22 Maganggano la, diad dugan panaon, onsabi si Jesus pian ipaakseb to so panangukom na Dios ed sayan sistema. Onlabas itan a baleg ya ebento ed sankatalbaan ya awaran, balet saray matoor a lingkor nen Jehova so mantultuloy a manlingkor ed sikato a walaan na ilalon andi-anggaan a kilalaban. Kasin pipirawaten yo so piiba ed sikara, kaibay ananak tan saray iyaaralan yo na Biblia? Tandaan sirin: “Lawas mon imanoen so inkasika tan say panagbangat mo. Mansiansia ka ed sarayan bengatla, ta diad panggawam ed saya, nilaban mo so inkasika tan saramay ondengel ed sika.”—1 Timoteo 4:16, NW.
[Paimano ed leksab]
a Impalapag na Watchtower Bible and Tract Society of New York, Inc.
Kasin Nipaliwawa Yo?
• Anto so nepeg ya awawey tayo, lapud agtayo amta no kapigan so eksakton panaon na pangukom na Dios?
• Diad antoran paraan a ‘naimano tayo so panagbangat tayo’?
• Panon yon natulongan so sakey ya iyaaralan pian magmaliw a kaaro nen Jehova?
• Akin ya importanti so pangipanaon na atateng a mangibangat ed ananak da?
[Litrato ed pahina 15]
Onligsa so panagaral diad mapagalang balet makaaron atmospera
[Litrato ed pahina 18]
Say pangimari ed saray istorya ed Biblia, a singa say impangusay nen Solomon ed duaran balangkantis, et pagmaliwen ton makapaliket iray panagaral na pamilya