Kasin Makaromog Kay Akindalem a Kareenan?

Nen 1854, onia so insulat na Amerikanon autor a si Henry Thoreau: “Dakel a lalaki so manbibilay a dismayado.”

Mapatnag a diad panaon to et agnanggayagaan na maslak a totoo so akindalem a kareenan. Balet, ngalngali 150 a taon la so apalabas manlapud saman. Kasin duma laray bengatla natan? Odino kasin onaaplika niray salita nen Thoreau? Komusta ka balet a mismo? Kasin napepenek ka, tan walaan ka na kareenan? Odino kasin agka maligen, agmakakaseguro ed arapen, ‘maermen lapud kadidismaya,’ unong ya impangibalikas nen Thoreau?

MAKAPAERMEN, dakel iray bengatla ed mundo a manasamsam ed akindalem a kareenan na totoo. Salambiten tayo pay pigara labat. Diad dakel iran bansa et say agpakaempleyo tan abeban almo so pansesengegay irap na bilay tan lapud satan et naaandian lay ilalo ed ekonomya. Diad arum a daldalin dakel so manbubunek ed panaanap day kayamanan tan materyal a kaykayarian. Balet, mabetbet a say laslasan ya istilo na panagbilay et mangiiter na kapagaan, aliwan kareenan. Say sakit, guerra, krimen, ag-inkahustisya, tan panagpairap so mangeekal met na kareenan na totoo.

Nanggunaetan Dan Anapen so Akindalem a Kareenan

Dakel so agla makaanos ed kipapasen na mundo. Si Antônioa so sakey a lider na saray trabahador ed sakey a balbaleg a pagawaan diad São Paulo, Brazil. Diad paniilalon napaaligwas so kipapasen na panagbilay, sikatoy akibiang ed saray panagprotesta tan demostrasyon, balet saya so ag-angiter ed sikato na kareenan ed nonot.

Iilaloan na arum a say panangasawa so mangiter na baleg a kaligenan ed bilay da, balet nayarin nadismaya ira. Si Marcos so sakey a matalonan negosyanti. Sikatoy akibiang ed politika tan nagmaliw a mayor diad sakey a maaligwas a syudad. Balet ta maprobleman maong so bilay to ed abung. Sanen tinmaynan ed abung so ananak to, sikaran sanasawa so nansian lapud agmakapanpaknaan.

Labalabay nen Gerson, sakey a “kanto boy” diad Salvador, Brazil, so mipalaran. Sikatoy akilugan-lugan ed saray drayber na trak a linma ed saray nanduruman syudad. Kabekta, sikatoy adik ed druga, a tinatakewan toy totoo parad bisyo to. Aminpigan sikatoy narel na saray polis. Anggaman ed inka-agresibo tan inkabusangel to, panpirawatan nen Gerson so akindalem a kareenan. Kasin naromog to itan?

Naulila la’d ina si Vania sanen sikatoy ugaw ni, tan nipudir ed sikato so responsabilidad ed abung, pati say panag-asikaso ed mansasakit ya agi ton bii. Akimisa si Vania balet ta liknaen ton sikatoy pinaulyan na Dios. Talagan sikatoy andian na kareenan ed nonot.

Wadtan met si Marcelo, a mahilig ed panliliket. Labalabay toy man-party a kaiba iray kalangweran​—pansasayaw, paniinuman, tan panag-abuso ed druga. Aminsan et sikatoy akilaban tan asakitan toy sananey a kalangweran. Kayari na saman, sikatoy magbabawi ed ginawa to tan kinmerew na tulong ed Dios. Kaliktan to met so nawalaan na kareenan ed nonot.

Sarayan eksperiensia so mangiyiilustra ed pigaran situasyon a nayarin maneral ed kareenan ed nonot. Wala tay antokaman a paraan pian narapat na say lider na saray trabahador, say politiko, say kanto boy, say apisak ed trabaho ya ugaw nin bii, tan say mahilig ed party so akindalem a kareenan ya aanapen da? Wala tay antokaman a nibangat ed sikatayo na say agawa ed sikara? Say ebat ed sarayan duaran tepet so on, a singa imanoen tayo ed ontumbok ya artikulo.

[Paimano ed leksab]

[Litrato ed pahina 3]

Kasin pampipirawatan moy nawalaan na akindalem a kareenan?