Pambilay a Walaray Kapeligroan
“Amin a bengatlan gawaen mo ed inagew-agew a kabibilay—pati iyugip—et mangilalanor na kapeligroan a pakarisgoan na bilay mo.”—Magasin a Discover.
NIYAALILING so bilay ed panakar diad akataneman na saray mina, ya anggan anton oras et pakarisgoan odino kipateyan tan mabetbet ya anggapoy pasakbay. Manduruma iray sengegan na kapeligroan ed kada bansa. Kalaktip ed saratan iray aksidenti ed trapiko, guerra sibil, eras, AIDS, kanser, sakit ed puso, tan dakel niran bengatla. Alimbawa, diad sub-Sahara ya Aprika, say AIDS so numero uno a manitigway, diad agano nin taon et “anigway na 2.2 milyon, 10 danay ed bilang na inaatey ed amin a guerra sibil ed Aprika,” inkuan na U.S.News & World Report.
Ambegya, binilyon a kuarta so gagastosen ed sankamundoan diad pamaparukey ed bilay tan pamabawas ed kapeligroan na sakit tan kabaldado. Dakel ed saray ideyan inyalibansa, a singa say maabig a panangan tan panag-inum ontan met ed pisikal ya ehersisyo, so nayarin mamawala na makagungguna iran resulta. Balet, wala so lapuan na napanmatalkan ya impormasyon ed amin ya importantin pamaakaran na panagbilay a makatulong ed sikan napanggayagaan so mas liktar tan mas maligen a bilay. Satan a lapuan et say Biblia. Lugan na satan iray giya parad pangasikaso ed malaknab iran pamaakaran a mangapekta ed bunigas tan pankaabigan tayo. Siempre, aliwan detalyado so panutukoy na Biblia ed amin a problema. Ingen, mangitatarya itan na alay abig iran prinsipyo a mangigiya ed sikatayo ed saray pamaakaran a singa say panangan, bunigas na laman, awawey na kanonotan, sekso, say panangusar ed alkohol, sigarilyo, tan say tatawagen a panligliwaan iran druga, tan dakel niran bengatla.
Parad dakel et nabebelatan met ed bilay lapud ag-inkaligen ed pinansyal. Natulongan itayo met dia na Biblia. Aglambengat ipapaseseg na satan so makabat a panmoria ed kuarta tan panangipakurang ed kuarta noagta ipapaimano met na satan no panon so pagmaliw a maong ya empleado odino amo. Diad simplin panangibaga, say Biblia so maabig a giya, aliwa lambengat ed pinansyal a kaligenan tan pankaabigan ed pisikal, noagta parad bilay a mismo. Kasin labay mon amtaen no panon kapraktikal so Biblia natan? Ipangasi sirin ya ituloy a basaen.