Report na Saray Manangiyabawag na Panarian

Onkikiwas so Latvia ed Maong a Balita

MALINEW ya ibabaga na Biblia a linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Timoteo 2:4) Narerengel la itan natan na saramay agnaikdan na pankanawnawa ed loob na dakel a taon pian narengel so maong a balita! Diad Latvia, singa ed arum niran parti na mundo, onkikiwas iray totoo a nanduruma so edad tan binalegan da ed mensahe, a singa ipanengneng na onggendan iran eksperiensia.

• Diad Rēzekne, sakey a baley ed mamabukig a Latvia, sakey ya ina tan say tin-edyer ya anak ton bii so tinmepet na direksion ed sakey a biin walad karsada. Kayarin nibaga so impormasyon ed sikara, samay bii, a sakey manaya ed saray Tastasi nen Jehova, so angiter ed sikara na sakey ya imbitasyon parad saray miting na Tastasi.

Lapud relihyosa so san-ina, nandesidi iran onatendi. Nantongtongan da balet diad dalan a no walay naimano ran antokaman a makapuy diman et onalis laran tampol. Balet, makapainteres a tuloy so miting kanian agbalot sinmulming ed nonot da so onalis. Inawat day opresin pangiyaral na Biblia tan onaatendi laran regular ed saray miting. Diad loob labat na taloy bulan et kaliktan da lay mibiang ed panagpulong tan diad arapen et nabautismoan.

• Diad sakey a syudad ed mamasagur a Latvia, apulongan na sakey a Tasi so 85 años lan Anna, ya angipanengneng na puron interes tan impaiyaralan na Biblia. Sikatoy sinumpa a maong na anak ton bii tan arum niran membro na pamilya to. Balet ag-inabuloyan nen Anna a naamper so panaaral toy Biblia lapud isusumpa odino ed inka-akulaw tan inka-beblay la na laman to.

Sakey ya agew, imbaga nen Anna ed anak to a sikato lay manpabautismo. “No manpabautismo kayo, iyakar ta kayo’d nursing home,” so inyebat na anak nen Anna. Balet sayan panamagyaw so ag-angamper ed si Anna. Lapud pisikal a kipapasen to, sikatoy binautismoan diad mismon abung to.

Antoy reaksion na anak nen Anna ed saya? Anguman so awawey to, tan kayari na bautismo et intaryaan toy ina to na espisyal a panangan. Insan tinepetan toy ina to, “Natan ta abautismoan kayo la, antoy liknaan yo?” Say inyebat nen Anna? “Singa ak kapanyanak!”

• Nen Disyembre1988, akatongtong na duaran Tastasi so retiradon opisyal na sundalo na datin Sobyet Unyon. Lapud sikatoy manisian walay Manamalsa, inawat toy panangiyaral na Biblia, tan akibiang met ed saginonor so akulaw to. Maples so inyaligwas da tan ag-abayag et nagmaliw iran agbautismadon manangipalapag. Diad tinmumbok a tiagew, abautismoan so datin opisyal. Amaseseg ed amin diad kongregasyon so pirmin panamabli na sanasawa ed espiritual iran bengatla. Niarum ni, tinmulong iran maong ed impamasimbalo ed sakey ya abung a ginawan marakep a Kingdom Hall.