No Panon a Naapektaan na Inkabalo so Duaran Bii

SI Sandra so sakey a balo a manaayam ed Australia. Sanen inatey so asawa to pigaran taon lay apalabas, si Sandra so abigbigla. “Say impakamoria a biglan naandi’d-bilay so asawak tan sankamaapitan a kaarok so angapektan maong ed siak. Agkon talaga nanonotan no panon ak ya akasempet manlapud ospital odino no antoy ginawak ni’d saman ya agew. Legan na tinmumbok a pigaran simba, saray katatakotan ko so nagmaliw a tuloytuloy ya ot-ot ed laman.”

Si Elaine, a mas panguloan a kaaro nen Sandra so manga anem taon lan abalo. Kinomponi nen Elaine so masiken to, si David, ed loob na anem bulan antis na impatey to lapud kanser. Masyado so impanermen to ya ag-abayag kayari na impatey na masiken to, sikato so temporaryon abulag. Kayari duay taon sikato so alukbob ed publiko. Anggapoy aromog na doktor a sakit to. Balet, adiskobre to a pupukoken nen Elaine so ermen to, kanian inrekomenda to a sikato so onsempet tan piliten toy onakis. “Abayag nin panaon antis kon atalonaan so ermen ko,” so inako nen Elaine, tan sano begtebegtew, “kaslakan lan siak so onla ed kuarto tan sakbongan koy ulok na kawekawes nen David.”

On, say ipatey na inad-aron asawa so pansengegan na nanduruman reaksion, lapud say inkabalo et talagan alodloor ni nen say basta pambilay ya anggapoy asawa. Singa bilang, si Sandra, walay panaon ya alikna ton sikatoy anguman. Singa ed dakel ya agano nin maneermen iran balo, alikna to met a sikato so agmakayari, agmaligen. Anonotan nen Sandra: “Lapud apasal ak a say pinal a mandedesisyon et say masiken ko, siak so abiglan mandesisyon a bukor. Aliwan diridiretsoy ugip ko. Naksawan tan abanalan ak. Agko anggan amtay gawaen ko.”

Inagew-agew diad intiron mundo et walaray eksperiensia a miulibayan ed naeksperiensia di Sandra tan Elaine. Saray sakit, aksidenti, guerra, etnikon panagpalanit, tan karawalan diad inkalapagan so sengegay idaraak na bilang na saray balo.a Dakel ed sarayan bibii so mamupukok ed ermen da, ya agda amta no anto so gawaen. Anto so nagawaan na kakaaro tan kakanayon pian natulongan iramay abalo a mangiyaarunsa ed bilay da? Say onsublay ya artikulo so walaan na saray suhestion a nayarin makatulong.

[Paimano ed leksab]