Sigpot ya Ontalindeg tan Tekep na Mapekder a Kombiksion

‘Nia! Say Baleg ya Ulop!’

SAKEY itan ya isyun akawetwetan na saray lingkor nen Jehova ed loob na saray dekada. Abayag so impansagpot pian naresolbi itan diad Makasulatan a paraan. Say pamaakaran so nansumpal ed dakel ya impansisingbat. Balet aromog a siansia so ebat ed Biblia, tan saya so pirmin amaliket ed nandaragup a dumerengel ed Washington, D.C., nen taon 1935.

Say impansisingbatan et lapud kaslakan lan isyu: Anto so pakabidbiran ed “baleg a karaklan” (King James Version), odino “baleg ya ulop” (New World Translation), ya asalambit ed Apocalipsis 7:9? Kasin manayam ed tawen iyan grupo na saray mananisia?

Sakey ya Abayag ya Isyu

Nanlapula’d panaon nen apostol Juan angga ed panaon tayo, saray Kristiano so nawewetwet nipaakar ed pakabidbiran ed “baleg a karaklan.” Impasen na saray Estudyante na Biblia so baleg ya ulop bilang segundaryon mangatatawen a klase, sakey a grupon walaan na pikakabat ed Biblia ingen agtanto mibibiang diad panangiwakawak ed satan.

Balet, walaray pigaran kakaiba na saray alanaan a Kristiano a nagmaliw a maseseg a tuloy ed panagpulong a kimey. Agda nampirawatan so onla ed tawen. On, say ilalo ra et mitunosan ed say publikon paliwawa a “Minilyon a Manbibilay Natan so Aglan Balot Ompatey,” ya impresenta na saray totoo nen Jehova manlapud 1918 anggad 1922. Saratan ya indibidual so nabendisionan na bilay ya andi-anggaan diad dalin.

Siningbat na The Watch Tower ed Oktubre 15, 1923, so parabolo nen Jesus nipaakar ed saray karnero tan saray kanding tan angikuan: “Irerepresenta na saray karnero so amin a totoo na saray nasyon, aliwa ran nailalak-ed-espiritu balet nikiling ed inkatunong, a sikaray angawat ed si Jesu-Kristo ed nonot da bilang say Katawan tan sikaray manatalaran tan maniilalo ed magmaong a panaon diad silong na uley to.”​—Mateo 25:31-46.

Dakel Niran Sinag na Liwawa

Nen taon 1931, siningbat na Vindication, Libro Uno, so kapitulo 9 na Ezequiel tan binidbir iraman so atatakan ed moling parad kilalaban diad pangangga na mundo bilang saray karnero ed parabolo nen Jesus. Deneskribe na Vindication, Libro Tres (nipalapag nen 1932), so maptek impanpuson awawey na aliwan-Israelitan laki a si Jonadab, a linmugan ed karwahe na alanaan ya Ari na Israel a si Jehu tan akila pian nengnengey seseg nen Jehu ed pamatey ed saray palson managdayew. (2 Arari 10:15-28) Inkuan na libro: “Inrepresenta odino inyanino nen Jonadab itan a klase na totoo natan dia ed dalin [a] sinmian ed organisasyon nen Satanas, ya ontatalindeg ed dapag na inkatunong, tan sikara so iliktar na Katawan diad panaon na Armagedon, sikaray iliktar to ed kairapan, tan sikaray palaboan na bilay ya andi-anggaan diad dalin. Saraya so manutugyop na ‘saray karneron’ klase.”

Nen 1934, impalinew na The Watchtower a saray Kristianon walaan na mangaraldalin ya ilalo so nepeg a manggawa na dedikasyon ed si Jehova tan nabautismoan. Say liwawa nipaakar ed sayan mangaraldalin a klase so talagan linmiwawa a masmasnag!​—Uliran 4:18.

Masnag a Liwawa na Pakatalos

Say pakakatalos ed Apocalipsis 7:9-17 so ngalngali lan onsindag ed mankidyam a liwawa. (Salmo 97:11) Imbalikas na The Watchtower so ilalo a say kombension ya akaeskedyul nen Mayo 30 anggad Hunyo 3, 1935, diad Washington, D.C., E.U.A., et “sakey a peteg a ligliwa tan pakagunggonaan” na saraman so inlitrato nen Jonadab. Et ontan so agawa!

Diad makatenyeg paliwawan “Say Baleg a Karaklan,” a nipaliwawa ed ngalngalin 20,000 a nandaragup, imparungtal nen J. F. Rutherford so Makasulatan a paneknek a saray modernon-agew ya “arum a karnero” so pareho lanlamang ed samay “baleg ya ulop” ed Apocalipsis 7:9. (Juan 10:16) Diad kapantokan na sayan paliwawa, kinerew na espiker: “Ipangasin onalagey pa iraman so amin a walaan na ilalon manbilay ya ando lan ando diad dalin?” Sanen akaalagey so dakel a kabiangan na dumerengel, inyabawag nen Rutherford: “Nia! Say baleg a karaklan!” Dinmeen, insan tinumbokan na maksil ya impantitipak. Diad tinmumbok ya agew, abautismoan iray 840 a balon Tastasi nen Jehova, maslak ed saraya so mankuan a kabiangan ira na baleg ya ulop.

Sakey a Makatantandan Kiwawala

Sakbay na 1935, say ondarakel a bilang na saraman so kinmiwas ed mensahe na Biblia tan angipanengneng na seseg ed panangipulong na maong a balita, so angipatnag na interes ed pambilay a maando diad Paraison dalin. Andian ira na panpilalek ya onla ed tawen, lapud ag-inter ed sikara na Dios so ilalo ed mangatatawen a bilay. Say impakabidbir da’d inkasikaran mismo bilang baleg ya ulop na arum a karnero so angipatnag a nen 1935, say panatawag ed 144,000 iran alanaan a Kristiano so ngalngali la nakompleto.​—Apocalipsis 7:4.

Sanen binmetag so Guerra Mundial II, pirmi impamasya nen Satanas a Diablo pian patundaen so katitipon na saraman so manugyop na baleg ya ulop. Apegetan so kimey a panagpulong na Panarian diad dakel iran bansa. Legan na saraman a mauddiem a panaon, tan agano ni sakbay na impatey to nen Enero 1942, inkuan nen J. F. Rutherford: “Say ‘baleg a karaklan’ et singano agmagmaliw ya ontan karakel.”

Balet lapud panamendision na Dios, anguman iray pamaakaran. Lapud ‘sigpot ya ontatalindeg tan tekep na mapekder a kombiksion,’ saray alanaan tan say kakaiba ra, say arum a karnero, so manusumpal ed panaggaway-babangatan a kimey. (Colosas 4:12; Mateo 24:14; 28:19, 20) Kasabi na 1946, say bilang na saray Tastasi nen Jehova a manpupulong ed sankamundoan et 176,456​—maslak ed saraya so kabiangan na baleg ya ulop. Nen taon 2000, masulok ya 6,000,000 a Tastasi so matoor a manlilingkor ed si Jehova diad 235 a daldalin​—peteg a baleg ya ulop! Tan mantutultuloy ya ondarakel so bilang.