Tepetepet Manlapud Saray Managbasa

Kaunongay kabayag na impanirap nen Job?

Walaray totoon maniisip a saray subok ed si Job so ninmatnat ed loob na dakel a taon, balet anggapoy ontan a sasaglawien na libro na Job a kabayag ya impanirap.

Say primeron kabiangan na saray subok ed si Job, salanti, say inkaandi na saray kapamilyaan tan kaykayarian to, so ompatnag ya agawa diad antikey labat a panaon. Oniay nabasa tayo: “Et agawa ed sakey ya agew sanen saray anak [nen Job] a lalaki tan bibii mangakan tan maniinum ira na alak ed abung na kamasikenan ya ari [“sankapanguloanan ya agi,” NW] ra.” Nantutumbokan a nibalita ed si Job a sikato so aperdian​—na saray bakbaka, asno, karnero, kamelyo, tan ariripen to a mamapastol ed saraman ya ayayep. Ompatnag a kayarin tuloy na satan et akabatan nen Job so impatey na saray anak ton lalaki tan bibii, a “mangakan tan maniinum ira na alak ed abung na sankapanguloanan ya agi ra.” Ompatnag ya agawan amin iya ed saksakey ya agew.​—Job 1:13-19.

Say tinmumbok a kabiangan na saray subok ed si Job so maseguron abaybayag. Inasinggeran nen Satanas si Jehova tan inkuan ton si Job so agmakapanmatoor no sikato lan mismo so pairapen​—diad mismon laman to. Diad ontan et si Job so dinapoan na “makapasinagem a pelsa manlapu ed dapan na sali to angga ed toktok.” Say inkayat na sayan sakit ed interon laman to so nayarin mankaukolan na panaon. Tan maseguron kaukolay panaon pian say “amin a mauges a sinmabi” et nabalitaan na saray mankuankuanan a managligliwa to, a linma ed sikato.​—Job 2:3-11.

Si Elifaz so taga-Teman diad dalin na Edom, tan say lugar nen Zophar et diad bandad amianen-sagur na Arabia, kanian saray panaayaman da so agtanton arawi ed lugar nen Job diad Uz, a posiblin walad amianen na Arabia. Balet, si Bildad so sakey a Suhita, tan kabkabat a saray totoo to so nanayam ed gilig na Eufrates. No si Bildad et wadman ed lugar to ed saman, nayarin kaukolan so pigaran simba odino bulan pian nabalitaan to so kipapasen nen Job tan manbiahe nin mamaarap ed Uz. Siempre, posibli a sarayan talo so asingger ed kawalaan nen Job sanen ginmapo so paniirap to. Antokaman so agawa, sanen sinmabi so taloran kaaro nen Job, sikaray “akiyurong ed sikato ed tapew na dalin a pitoy agew tan pitoy labi” ya ag-ira nansalita.​—Job 2:12, 13.

Insan asabi so kaunoran a kabiangan na saray subok ed si Job, a saray detalye na satan so amano ed dakel a kapitulo na libro. Walaray serye na impandiskuti odino pansasalita na saramay mankuan a managligliwa, tan mabetbet ya inebatan ira nen Job. Kayari na saman, say kalangweran ya Elihu so amaat, tan kinorehi nen Jehova si Job manlapud katawenan.​—Job 32:1-6; 38:1; 40:1-6; 42:1.

Kanian say impanirap nen Job tan inkasolbar na satan so nayarin agawa ed loob na pigaran bulan, a nayarin kulang a sakey taon. Maseguron naeksperiensya yo la a saray mairap a subok et singano agla manampot. Ingen, agtayo nepeg a lingwanan a saratan so peteg a mangangga, a singa agawa ed si Job. Anggan kaunongay kabayag na saray subok ya kidungetan tayo, nodnonoten tayo so pananuporta na Dios, a singa nipaimano ed saray impuyan a salita: “Ta say anlemew ya ermen mi a sikatoy maganggano, manggawa ed sikami ed tagey tan alablabas ni ed kaatagey na sakey a maando a belat na gloria.” (2 Corinto 4:17) Oniay insulat nen apostol Pedro: “Say Dios na amin a grasya, ya anawag ed sikayo ed andi-angga a gloria to lapu ed Kristo, dia ed kayari impantepel yo na irap ed magano, sikaton dili, payadyarien, paleten, pabiskegen to kayo komon.”​—1 Pedro 5:10.