Mantultuloy a Manlingkor ed si Jehova Tekep na Mapekder a Puso
“Say pusok et mapekder, O Dios, say pusok et mapekder.”—SALMO 57:7, NW.
1. Akin a nayarian tayo so nawalaan na kombiksion a singa si David?
SIKATAYO so napagmaliw nen Jehova a mapekder ed Kristianon pananisia, ta pian makapansiansia itayo ed tuan Inkakristiano bilang dedikadon lingkor to. (Roma 14:4) Kanian nawalaan itayo na kombiksion a singa si salmistan David, ya apakiwas a mangikanta: “Say pusok apaelet [“mapekder,” NW], O Dios.” (Salmo 108:1) No mapekder so puso tayo, napakiwas itayon manumpal ed dedikasyon tayo ed Dios. Tan diad panilalo ed sikato parad panangigiya tan biskeg, napaneknekan tayo so pagmaliw ya agnagiing, malet ed determinasyon tan kombiksion tayo bilang mansiasiansian matoor, a ‘lawas walaan na daakan a kimey ed Katawan.’—1 Corinto 15:58.
2, 3. Anto so kabaliksan na saray simbawa nen Pablo a nikurit ed 1 Corinto 16:13?
2 Oniay insimbawa nen apostol Pablo ed saray patumbok nen Jesus ed Corinto nensaman, a maseguron onaplika met ed saray Kristiano natan: “Manpuyat kayo, mansiansia kayo ed pananisia, manugali kayo na singa ugali laki, tan ombiskeg kayo.” (1 Corinto 16:13) Diad Griego et kada sakey ed sarayan ganggan so walad present tense, a mangipapaseseg ed tuloytuloy ya ikiwas. Anto so kabaliksan na sayan bilin?
3 Nayarian tayo so “manpuyat” ed espiritual a paraan diad isumpa ed Diablo tan pansiansian maapit ed Dios. (Santiago 4:7, 8) Say panmatalek ed si Jehova so makatulong ed sikatayo pian mansiansian nikasakey tan ‘malet ed Kristianon pananisia.’ Sikatayo—kaiba so dakel a bibii ed limog tayo—so ‘manugali a singa ugali na lalaki’ diad makpel a panlingkor ed Dios bilang manangiyabawag na Panarian. (Salmo 68:11) “Ombiskeg” tayo diad pantultuloy a manilalo ed mangatatawen ya Ama tayo parad biskeg a manggawa na linawa to.—Filipos 4:13.
4. Anto so angitonton ed bautismo tayo bilang Kristianos?
4 Ipapatnag tayo ya inawat tayo so tuan pananisia sano manggawa itayo na nagnap a dedikasyon ed si Jehova tan isimbolo itan diad kipalgep ed danum. Balet anto so angitonton ed bautismo tayo? Unona et akagamor itayo na suston pikakabat ed Salita na Dios. (Juan 17:3) Saya so amawala na pananisia tan amakiwas ed sikatayon magbabawi, a mangipapatnag na tuan panermen ed apalabas iran impankasalanan. (Gawa 3:19; Hebreos 11:6) Insan sinmublay so impanpataoli tayo, ya imbeneg tayo laray makapuy ya agamil pian manbilay a mitunosan ed linawa na Dios. (Roma 12:2; Efeso 4:23, 24) Say tinmumbok et say sigpot-puson dedikasyon ed si Jehova panamegley na pikakasi. (Mateo 16:24; 1 Pedro 2:21) Kinmerew tayo ed Dios na maong a konsiensia tan abautismoan bilang simbolo na dedikasyon tayo ed sikato. (1 Pedro 3:21) Say panmolimoli ed sarayan kundang so ontulong ed sikatayon mansiansian niyapasakey ed pankaukolan a mantultuloy tayon sumpalen so dedikasyon tayo tan ed panlingkor ed si Jehova tekep na mapekder a puso.
Mantultuloy a Manusisa Parad Suston Pikakabat
5. Akin a nepeg itayon mantultuloy ya onggamor na Makasulatan a pikakabat?
5 Pian makapambilay itayo unong ed dedikasyon tayo ed Dios, nepeg a mantultuloy itayon onggamor na makapabiskeg-pananisian pikakabat diad Kasulatan. Agaylan makapaliket so impakagamor na espiritual a tagano sanen primeron naamtaan tayo so katuaan na Dios! (Mateo 24:45-47) Saratan a “panangan” et mananam—tan makapabunigas iratan ed sikatayo diad espiritual a paraan. Natan et makana so pantultuloy ya onggamor na masustansyan espiritual a tagano ta pian namantini tayo so mapekder a puso bilang dedikadon lingkor nen Jehova.
6. Panon kayon atulongan a mamayubo na masimoon ya apresasyon ed katuaan na Biblia?
6 Nakaukolan so sagpot pian nagamoran so kaaruman a pikakabat ed Kasulatan. Singa itan panaanap ed niyamot iran kayamanan—bengatlan mankaukolan na panagsagpot. Balet agaylan makapatumang so pakaromog ed ‘mismon pikakabat ed Dios’! (Uliran 2:1-6) Sanen say Biblia so primeron inyaral ed sikayo na sakey a manangipalapag na Panarian, nayarin inusar to so libron Pikakabat a Mangitonton ed Andi-anggaan a Bilay. Dakel a panaon so nausar pian nakobrian so kada kapitulo, a nayarin masulok a sakey a sesyon. Agunggonaan kayo sanen imbasa tan siningbat iray nisitas a teksto. No mairap a talosan so sakey a punto, nipaliwawa itan. Akaparaan a maong so mangiyaaral ed sikatayo na Biblia, nampikasi parad espiritu na Dios, tan tinmulong ed sikayo a mamayubo na masimoon a panamabli ed katuaan.
7. Antoray mangikualipika ed sakey a too a mangibangat na katuaan na Dios ed arum?
7 Matukoy iyan sagpot, lapud oniay insulat nen Pablo: “Ta say babangatan ed salita na Dios minabang komon ed saman so mangibangat dia ed amin a kaabigan.” (Galacia 6:6) Say Griegon teksto dia so mangipapabitar a saray bangat ed Salitay Dios so nipaslep ed nonot tan puso na sakey a ‘nibabangat.’ Say kibabangat yo ed ontan a paraan so mangikualipika ed sikayon magmaliw a managbangat ed arum ni. (Gawa 18:25) Pian natoor yo so dedikasyon yo, nepeg yon mantinien so espiritual a bunigas tan inkapekder yo diad pantultuloy a panaral ed Salita na Dios.—1 Timoteo 4:13; Tito 1:13; 2:2.
Nodnonoten so Impagbabawi tan Impanpataoli Yo
8. Panon a posibli so panmantini ed maridios a kondukta?
8 Kasin nanonotan yo ni so inawan alikna yo sanen naaralan yo so katuaan, nagbabawi, insan alikna yo so panamerdona na Dios a nibase ed pananisia ed dondon bagat nen Jesus? (Salmo 32:1-5; Roma 5:8; 1 Pedro 3:18) Maseguron agyo labay so ompawil ed makasalanan a panagbilay. (2 Pedro 2:20-22) Nilikud ni ed arum iran bengatla, say regular a pikakasi ed si Jehova so ontulong ed sikayo a manmantini ed maridios a kondukta, a manbilay unong ed dedikasyon yo, tan mantultuloy a manlingkor ed si Jehova a sitotoor.—2 Pedro 3:11, 12.
9. Lapud imbeneg tayo laray makasalanan ya agamil, anton kurang so nepeg tayon gegemtanen?
9 Lapud impanpataoli yo la diad impangibeneg ed makasalanan iran agamil, mantultuloy ya onkerew na tulong ed Dios pian mansiansian mapekder so puso yo. Singano mamapaarap kayo la ed duman dalan balet ta tinmupleg kayo ed napanmatalkan a mapa tan ginmapo kayon manbiahe ed dugan dalan. Aleg komon a nabalang kayo ed dalan yo natan. Mantultuloy a manmatalek ed panangigiya na Dios, tan magmaliw a determinadon mansiansia ed dalan ya ompugta ed bilay.—Isaias 30:20, 21; Mateo 7:13, 14.
Agyon Balot Lilingwanan so Dedikasyon tan Bautismo Yo
10. Antoran punto so nepeg tayon nodnonoten nipaakar ed dedikasyon tayo ed Dios?
10 Nodnonoten ya indedika yo lay inkasikayo ed si Jehova diad pikakasi, a sinononot ed magnayon, sitotoor a panlingkor ed sikato. (Judas 20, 21) Say kabaliksan na dedikasyon et kibiig, odino kisian, parad sagradon gagala. (Levitico 15:31; 22:2) Say dedikasyon yo et aliwan temporaryon paknaan odino obligasyon ed totoo. Satan so permanentin dedikasyon ed Sankatalbaan a Soberano, tan say pambilay unong ed satan so mankaukolan na panmatoor ed Dios legay-bilay. On, ‘manbilay odino ompatey, kien itayo nen Jehova.’ (Roma 14:7, 8) Say liket tayo so akadepende ed panagpasakop tayo ed linawa to tan ed pantultuloy tayon manlingkor ed sikato tekep na mapekder a puso.
11. Akin a nepeg yon nodnonoten so bautismo tan say kabaliksan na satan?
11 Lawas tandaan a say bautismo yo et simbolo na interon-puson dedikasyon yo ed Dios. Aliwa itan a paskaran a panagbautismo, lapud sikayon mismo so nandesisyon. Kasin determinado kayo la natan a mangusar ed panagdesisyon yo unong ed linawa na Dios legay-bilay yo? Kinmerew kayo ed Dios na maong a konsiensia tan abautismoan bilang simbolo na dedikasyon yo ed sikato. Pansiansiaen itan a maong a konsiensia diad panumpal yo ed dedikasyon yo, tan onsabi ed sikayo so mayaman a panamendisyon nen Jehova.—Uliran 10:22.
Walaan na Betang so Panagdesisyon Yo
12, 13. Panon a misiglaotan so mismon panagdesisyon tayo ed dedikasyon tan bautismo?
12 Petepeteg, say dedikasyon tan bautismo so angitarok na dakel iran gunggona ed minilyon a totoo ed sankadalinan. Sano isimbolo tayo so dedikasyon tayo ed Dios diad pampabautismo ed danum, ompatey itayo no nipaakar ed apalabas a kurang na bilay tayo balet aliwan say nipaakar ed dilin panagdesisyon tayo. Bilang mananisia ya abangatan a maong, sikatayo so peteg ya angagamil ed mismon panagdesisyon tayo sanen indedika tayoy inkasikatayo ed Dios diad pikakasi tan abautismoan itayo. Kakaukolanen na pangidedika tan pampabautismo so pangamta ed linawa na Dios insan sikatayon mismo so mandesisyon ed satan. (Efeso 5:17) Kanian aaligen tayo si Jesus, ya angagamil ed dilin panagdesisyon to sanen intalirak to so kimey to bilang karpentero, nampabautismo, tan sigpot ton intalaga so inkasikato diad panggawa na linawa na mangatatawen ya Ama to.—Salmo 40:7, 8; Juan 6:38-40.
13 Gagala nen Jehova a Dios a say Anak to so ‘nayadyari dia ed panamegley na irirap.’ Kinaukolan sirin ya agamilen nen Jesus so panagdesisyon to pian nasungdoan to iratan ya ir-irap tekep na katooran. Lapud satan, sikato so angisaklang na “pikakasi tan pikekerew, a tekep na mabiskeg a tagleey tan saray lua, . . . tan sikato so nadngel lapud masanton panaglikas [“maridios a takot,” NW] to.” (Hebreos 2:10, 18; 5:7, 8) No ipatnag tayo met so ontan a mapagalang a takot ed Dios, makapanseguro tayo met a sikatayo so ‘narengel,’ tan makapanmatalek itayo a si Jehova so manggawa ed sikatayon mapekder bilang dedikadon Tastasi to.—Isaias 43:10.
Nayarian Yon Pansiansiaen so Mapekder a Puso
14. Akin a nepeg tayon basaen so Biblia ed inagew-agew?
14 Anto so makatulong ed sikayo pian napansiansia so mapekder a puso tan sirin et makapambilay kayo unong ed dedikasyon yo ed Dios? Diad gagala a nagamoran so lalon-ondaraak a pikakabat ed Salitay Dios, basaen so Biblia ed inagew-agew. Saya so bengatlan maparanay ya ipapaseseg ed sikatayo na “matoor tan makabat ya aripen.” Niiter itan a simbawa lapud say pambilay unong ed dedikasyon tayo so mankaukolan na pantultuloy a pankurang ed katuaan na Dios. No kabkabat so organisasyon nen Jehova a mamapawala na palso iran bangat, agbalot niiter ed saray Tastasi nen Jehova tan ed saramay pupulongan da so bilin a basaen so Biblia.
15. (a) Anto so nepeg a nodnonoten sano mandedesisyon? (b) Akin a nibagan say sekular a kimey et onkokomadua labat a kimey na sakey a Kristiano?
15 Sano mandedesisyon, lawas nodnonoten no panon iratan a mangapekta ed panusumpal yo ed dedikasyon yo ed si Jehova. Saya so nayarin misiglaotan ed sekular a kimey yo. Kasin panggugunaetan yon usaren itan pian niyabanti so tuan panagdayew? Anggaman naiimano na saray karaklan a manpapa-empleyo a napanmatalkan tan epektibo iray dedikadon Kristiano, naiimano ra met ya agman-aambisyon iray Tastasi nen Jehova ya onasenso ed mundo tan agmilalaslasan ed arum parad sankatalonggaringan iran posisyon. Saya so lapud say kalat na saray Tastasi et aliwan say pakawalaan na kayamanan, inkabantog, impluensya, odino pakayari. Parad saramay manbibilay unong ed dedikasyon da ed Dios, say sankaimportantian et say panggawa ed linawa na Dios. Say sekular a kimey ya ontutulong ed sikaran makagamor na saray kakaukolanen da ed bilay et onkokomadua labat a kimey, sakey a trabahon walaan na segundaryon kaimportantian. Singa si apostol Pablo, say manunan kimey da et say Kristianon ministeryo. (Gawa 18:3, 4; 2 Tesalonica 3:7, 8; 1 Timoteo 5:8) Kasin iyuuna yoray intereses na Panarian ed bilay yo?—Mateo 6:25-33.
16. Anto so nagawaan tayo no say agmanepeg a kapagaan so mangaamper la ed pambilay tayo unong ed dedikasyon tayo ed Dios?
16 Arum so adaeg lawari na nanduruman kapagaan sakbay dan naamtaan so katuaan. Balet manlepleppua ed kapusoan da so liket, pisasalamat, tan aro ed Dios sanen sinayakup da so ilalo ed Panarian! Say panmolimoli ed saray bendisyon a nanggayagaan da manlapu la’d nensaman so nayarin tinmulong ed sikara a manbilay unong ed dedikasyon da ed si Jehova. Diad biek a dapag, komusta balet no say agmanepeg a kapagaan ed saray probleman kaslakan ed bilay ed sayan sistema so manesesga la natan a mangamper ed “salita na Dios,” a singa saray sabit a mangaamper ed mabunan itubo na saray palakay? (Lucas 8:7, 11, 14; Mateo 13:22; Marcos 4:18, 19) No nalilikas yon onggagapo la itan ed sikayo odino ed pamilya yo, ipiya yo so kapagaan yo ed si Jehova tan manpikasi kayo a tulongan to kayon ombulaslas ed aro tan apresasyon. No ipaawit yo ed sikato so makapabelat ed sikayo, tulongan to kayo tan ikdan to kayo na biskeg a mantultuloy ed maliket a panaglingkor ed sikato tekep na mapekder a puso.—Salmo 55:22; Filipos 4:6, 7; Apocalipsis 2:4.
17. Panon a posibli so panalona ed saray pirmin subok?
17 Mantultuloy ed regular a panagpikasi ed si Jehova a Dios, no panon a nampikasi kayo sanen angidedika kayo ed sikato. (Salmo 65:2) Sano natutukso a manggawa na makapuy odino nipapaarap ed pirmin subok, onkerew na panangigiya na Dios tan say tulong to pian natumbok itan. Nodnonoten so pankaukolan na pananisia, lapud oniay insulat nen babangatan a Santiago: “No siopaman ed sikayo so makulang na kakabatan, pakerewen ed Dios; a mangiter na mabunlok ed amin a too, tan agto balawen; tan niiter ed sikato. Bangbalet pakerewen ed pananisia, ya andi panduaruwa: ta say sakey a manduaruwa singa sakey a daluyon ed dayat a nagalaw galaw na dagem, tan nibantak ed biek tan biek. Kanian agpa isipen na satan a too a naawa’to so antokaman ed Katawan; say too a nankadua so kanonotan to agmakapansiansia ed amin ya awey to.” (Santiago 1:5-8) No ompatnag a pirmi la so subok, makapanseguro itayo ed saya: “Agkayo asabian na bengatlan katutukso noag samay nitepel na ami too; bangbalet say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.”—1 Corinto 10:13.
18. Anto so nayarian tayon gawaen sano say seryoson inyamot a kasalanan so mamapaletey ed determinasyon tayon manbilay unong ed dedikasyon ed si Jehova?
18 Anto no nagogonigon so konsiensia yo lapud sakey a seryoson inyamot a kasalanan a mamapaletey ed determinasyon yon manbilay unong ed dedikasyon yo ed Dios? No magbabawi kayo, naligliwa kayo ed pakaamta ya ‘agbalawen nen Jehova so puso a maralit tan mansisibkel.’ (Salmo 51:17) Patulongan ed saray maaron Kristianon mamatatken, a nodnonoten a sikara—bilang mangaalig ed si Jehova—so agmanleglemew ed pilalek yon nipawil so maong a relasyon ed mangatatawen ya Ama yo. (Salmo 103:10-14; Santiago 5:13-15) Insan diad inkapasimbalo ed espiritual a biskeg tan mapekder a puso, nayarian yon ipetek iray dadantalen na salisali yo tan naromog yon posibli so pambilay unong ed dedikasyon yo ed Dios.—Hebreos 12:12, 13.
Mantultuloy a Manlingkor Tekep na Mapekder a Puso
19, 20. Akin ya importante a mantultuloy tayon manbilay unong ed dedikasyon tayo?
19 Diad sarayan maatap a panaon, nepeg tayon pambanikelan so manbilay unong ed dedikasyon tayo tan mantultuloy a manlingkor ed Dios tekep na mapekder a puso. Inkuan nen Jesus: “Say misungdo ya angga ed kasampotan, sikato lanlamang so nilaban naani.” (Mateo 24:13) Lapud manbibilay itayo la ed “kaunoran iran agew,” say anggaan so onsabi ed anggan kapigan. (2 Timoteo 3:1) Niarum ni, anggapo ed sikatayo so makapanseguro a mabilay itayo nabuas. (Santiago 4:13, 14) Kanian importante so pantultuloy tayon manbilay unong ed dedikasyon tayo natan!
20 Indanet itan nen apostol Pedro ed komaduan sulat to. Impabitar to a singa saray agmaridios ya atawtaw ed Delap, naderal met so simbolikon dalin, odino marelmeng a sosyedad na too, diad “agew nen Jehova.” Kanian onia so inyabawag nen Pedro: ‘Anton nengneng na inkatoo so nepeg yon pagmaliwan ed amin a masantos a panagbilay tan kasimpitan’! Onia met so impaseseg to ed sikara: “Inararok, diad pikakabat ed sarayan bengatla alwaran yo ompan, dia ed kasagyat yo ed lingo na saray mangarumsis a totoo napelag kayo ed satan a kaligenan yo.” (2 Pedro 3:5-17) Agaylan makapaermen sano say bautismadon too so nabalang tan manampot so bilay to ya ag-akapansiansian mapekder ed puso to!
21, 22. Panon ya apaneknekan a tua iray salita na Salmo 57:7 diad biang nen David tan ed saray tuan Kristiano?
21 Say determinasyon yo a manbilay unong ed dedikasyon yo ed Dios so nayarin napabiskeg no sinononot kayo ed maliket ya agew na impanbautismo yo tan onkerew na tulong ed Dios ta pian saray panagsalita tan gawa yo so makapaliket ed sikato. (Uliran 27:11) Agbalot dismayaen nen Jehova so totoo to, tan maseguro a kaukolan so panmatoor ed sikato. (Salmo 94:14) Impatnag to so panangasi tan panangabagey diad impangamper ed saray gagaem na kakabusol tan diad impangiliktar to ed si David. Lapud misalsalamat ed satan, inyabawag nen David so inkamapekder, say agnagiing, a panangaro to ed Angiliktar ed sikato. Oniay inkanta to tekep na pirmin liknaan: “Say pusok et mapekder, O Dios, say pusok et mapekder. Mankanta ak tan mankanta ak na panangidayew.”—Salmo 57:7, NW.
22 Singa si David, saray tuan Kristiano so aliwan kibangkibang ed debosyon da ed Dios. Tekep na mapekder a kapusoan, bibidbiren da a si Jehova so panlapuan na kililiktar tan kisalba ra, a pangipapaarapan da na maliket iran kanta na panangidayew da. No mapekder so puso yo, akadepende itan ed Dios, tan diad tulong to et nayarian yon sumpalen so dedikasyon yo. On, nayarian yo so magmaliw a singa say “matunong” ya oniay inkanta na salmista nipaakar ed satan: “Sikato ag-antakot naani ed saray mauges a balbalita: say puso to niligen a maniilalo ed Jehova.” (Salmo 112:6, 7) Tekep na pananisia ed Dios tan sigpot a panagmatalek ed sikato, nayarian yo so manbilay unong ed dedikasyon yo tan mantultuloy a manlingkor ed si Jehova tekep na mapekder a puso.
Kasin Natandaan Yo?
• Akin a nepeg itayon mantultuloy ya onggamor na suston pikakabat ed Biblia?
• Akin a kaukolan a sinononot itayo ed impagbabawi tan impanpataoli tayo?
• Panon tayon nagunggonaan ed pannodnonot ed dedikasyon tan bautismo tayo?
• Anto so ontulong ed sikatayo pian mantultuloy a manlingkor ed si Jehova tekep na mapekder a puso?
[Saray litrato ed pahina 18]
No pagmaliwen tayon manunan kimey so Kristianon ministeryo, makapantultuloy itayon manlingkor ed si Jehova tekep na mapekder a puso
[Litrato ed pahina 18]
Kasin mamantinien yo so espiritual a bunigas yo diad inagew-agew a panagbasa na Salitay Dios?