Nitandoro si Jehova No Kapeten Iray Madibinon Kakaukolanen
“Sikato so yabalbaleg ko [“itandorok,” NW] dia ed pisasalamat.”—SALMO 69:30.
1. (a) Akin a manepeg a nitandoro si Jehova? (b) Panon a sikatoy nitandoro tayo tekep na pisasalamat?
SI JEHOVA so makapanyarin-amin a Dios, say Sankatalbaan a Soberano, say Manamalsa. Bilang ontan, manepeg ya itandoro so ngaran tan saray gagala to. Say kabaliksan na pangitandoro ed si Jehova et say pirmin pangiyatagey ed sikato, pangidayew tan pangigloria ed sikato panamegley na salita tan gawa. Pian nagawaan itan ‘tekep na pisasalamat’ et nakaukolan a sikatayo lawas so misalsalamat ed gagawaen to ed sikatayo natan tan ed gawaen to ed arapen. Say awawey a kaukolan tayon ipatnag et nipabitar ed Apocalipsis 4:11, ya oniay inyabawag na matoor iran espiritun pinalsa ed tawen: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” Panon tayon nitandoro si Jehova? Diad panaral nipaakar ed sikato insan panggawa ed kakaukolanen to ed sikatayo. Nepeg tayon nalikna so alikna na salmista sanen inkuanto: “Ibangat moak a mangunor na linawam; ta sika so Dios ko.”—Salmo 143:10.
2. Panon a pidenengan nen Jehova iramay mangitatandoro ed sikato tan saramay agmangitatandoro ed sikato?
2 Papablien nen Jehova iramay mangitatandoro ed sikato. Satan no akin a sikato so “mananumang ed saray mananap ed sikato.” (Hebreos 11:6) Anto so tumang? Inkuan nen Jesus ed pikakasi to ed mangatatawen ya Ama to: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) On, saramay ‘mangitandoro ed si Jehova dia ed pisasalamat’ so ‘manawir ed dalin tan manayam ditan lawas.’ (Salmo 37:29) Diad biek a dapag, “anggapo so tumang ed mauges a too.” (Uliran 24:20) Tan diad sarayan kaunoran ya agew, maganat so pankaukolan ya itandoro si Jehova lapud magano to lan deralen iray marelmeng tan iliktar iray matunong. “Say mundo mangangga, tan saray penel to: sabalet so mangunor ed linawa na Dios onsiansia lawas.”—1 Juan 2:17; Uliran 2:21, 22.
3. Akin a nepeg itayon manimano a maong ed libro nen Malaquias?
3 Say linawa nen Jehova so naromog diad Biblia, lapud ‘amin a Sulat et impuyan na Dios.’ (2 Timoteo 3:16) Lugan na Salitay Dios so dakel iran salaysay no panon a bebendisyonan nen Jehova iramay mangitatandoro ed sikato tan no anto so nagawa ed saramay agmangitatandoro ed sikato. Sakey ed saratan a salaysay so misiglaotan ed agawa diad Israel legan na panaon nen propeta Malaquias. Manga taon 443 K.K.P., legan na impan-gobernador nen Nehemias diad Juda, insulat nen Malaquias so libro ya inngaran ed sikato. Lugan na sayan mapuersa tan makapasagyat a libro so impormasyon tan saray propesiya a ‘nisulat a bilin ed sikatayo, ya asabian da so kasumpalan na sayan panaon.’ (1 Corinto 10:11) Say panimanon maong ed saray salita nen Malaquias so makatulong ed sikatayon manparaan parad ‘baleg tan makapataktakot ya agew nen Jehova,’ sano deralen To la iyan marelmeng a sistema.—Malaquias 4:5.
4. Anton anemiran punto so managyat na imano tayo diad Malaquias kapitulo 1?
4 Panon a say libro na Malaquias, a nisulat ed masulok a 2,400 a taon lay apalabas, so ontulong ed sikatayo diad sayan koma-21 a siglo pian makapanparaan parad baleg tan makapataktakot ya agew nen Jehova? Say primeron kapitulo so mangipaarap na imano tayo ed anemiran punto a makana diad panangitandoro ed si Jehova tekep na pisasalamat ta pian nagamoran so pabor to tan say andi-anggaan a bilay: (1) Aaroen nen Jehova so totoo to. (2) Nepeg tayon ipanengneng so panamabli ed sagrado iran bengatla. (3) Iilaloan nen Jehova ya iter tayo ed sikato so sankaabigan tayo. (4) Say tuan panagdayew so napapakiwas lapud andi-siblet a panangaro, aliwan lapud agum. (5) Say naabobonan a serbisyo ed Dios so aliwan makapabelat a totontonen. (6) Balang sakey ed sikatayo so nepeg a mikuentaan ed Dios. Kanian diad sayan primero ed taloran artikulo nipaakar ed libro na Malaquias, konsideraen tayo so kada sakey ed saray punto legan tayon uusisaen so Malaquias kapitulo 1.
Aaroen nen Jehova so Totoo To
5, 6. (a) Akin ya inaro nen Jehova si Jacob? (b) No aligen tayo so inkamatoor nen Jacob, anto so nailaloan tayo?
5 Nipabitar so aro nen Jehova diad akauna iran bersikulo na Malaquias. Say libro so ginmapo ed oniaran salita: “Say awit na salita nen Jehova ed Israel.” Kaaruman ni, oniay kuan na Dios: “Siak inaro takayo.” Bilang alimbawa, diad parehon bersikulo, oniay kuan nen Jehova: “Inarok si Jacob.” Si Jacob et walaan na pananisia ed si Jehova. Sinmabi panaon, sinalatan nen Jehova na Israel so ngaran nen Jacob, tan sikato so nagmaliw ya unonan ateng na nasyon na Israel. Si Jacob so inaro nen Jehova lapud sikatoy toon walaan na pananisia. Inaro met nen Jehova iramay kabiangan na baley to ya angipatnag na awawey nen Jacob ed Sikato.—Malaquias 1:1, 2.
6 No inaro tayo si Jehova tan matoor itayon miulop ed totoo to, naligliwa itayo ed balikas na 1 Samuel 12:22: ‘Si Jehova agto ikaindan so baley to nipaakar ed baleg a ngaran to.’ Aaroen tan tutumangan nen Jehova so totoo to, parad andi-anggaan a bilay. Kanian onia so nabasa tayo: “Manmatalek ka ed Jehova tan manggawa ka na maong; manayam ka dia ed dalin, tan tuatua a natagano ka. Manliga ka a dili met ed Jehova: et iter to ed sika so saray pirawat na pusom.” (Salmo 37:3, 4) Say pangaro tayo ed si Jehova so mangilalanor ed komaduan punto a nipaimano ed sikatayo diad Malaquias kapitulo 1.
Ipanengneng so Panamabli ed Sagrado Iran Bengatla
7. Akin a ginula nen Jehova si Esau?
7 Singa abasa tayo ed Malaquias 1:2, 3, kayari na inkuan nen Jehova ya, “inarok si Jacob,” inkuanto a, “ginulak si Esau.” Akin ya ontanlay pandumaan? Si Jehova so intandoro nen Jacob, andi balet ed si Esau, a kalason to. Si Esau so tinawag met ya Edom. Diad Malaquias 1:4, say dalin na Edom so atawag a sakop na inkauges, tan saray manaayam ditan et naukom. Say ngaran ya Edom (a mankabaliksan na “Ambalanga”) so nipangaran ed si Esau lapud inlako toy inkapanguloan to ed si Jacob parad ambalangan digo. ‘Minudmora nen Esau so inkapanguloan to,’ kuan na Genesis 25:34. Pinaseseg nen apostol Pablo iray kapananisiaan a manalwar ya “anggapo komon so managlawan, odino too ya agmangigalang ed saray bengatla a sagrado, singa si Esau, a lapu ed sanlipong a kanen inlako to so inkapanguloan to.”—Hebreos 12:14-16.
8. Antoy amakiwas ed si Pablo ya iyaliling si Esau ed sakey a managlawan?
8 Akin ya insiglaot nen Pablo iray kiwas nen Esau ed pilalawanan? Lapud say pakawalaan na mentalidad nen Esau so mangitonton ed sakey a too ya onsaew a mangapresya ed sagrado iran bengatla. Diad ontan et manresulta iya ed seryoso iran kasalanan, a singa say pilalawanan. Kanian, nayarin itepet na kada sakey ed sikatayo: ‘Kasin natutukso ak no maminsan a mangisalat na Kristianon tawir ko—say andi-anggaan a bilay—parad bengatlan temporaryo a singano sanyaong a digo? Kasin nayarin agko namomoria a mumudmoraen ko iray sagradon bengatla?’ Si Esau so walaan na agmakankaanos a pilalek a mamenek ed pisikal a kagletan. Inkuanto ed si Jacob: “Apuram, panangasim, ikdan moak pa na sankaakmon na satan ya ambalanga.” (Genesis 25:30) Makapaermen, singano onia so ibabaga na arum ed saray lingkor na Dios: “Apuram la! Akin ya alagaren ni so mapagalang a kasal?” Say pilalek ed seksual a kapenek antokaman so nirisga et singa sanyaong a digo parad sikara.
9. Panon tayon napansiansia so mapagalang a takot ed si Jehova?
9 Agtayon balot leleglemewen so sagrado iran bengatla diad agpanrespeto ed kasimpitan, katooran, tan say espiritual a tawir tayo. Imbes a magmaliw a singa si Esau, aligen tayo so matoor a Jacob tan pansiansiaen tayo so mapagalang a takot ed Dios diad pangipanengneng na aralem a panamabli ed sagrado iran bengatla. Panon tayon nagawaan iya? Diad pagmaliw a maalwar pian nakapet iray kakaukolanen nen Jehova. Saya so makatunongan a mangitonton ed sikatayo ed komatlon punto ya impabitar na Malaquias kapitulo 1. Anto itan?
Iter ed si Jehova so Sankaabigan Tayo
10. Diad anton dalan a minudmora na saray saserdote so dulang nen Jehova?
10 Saray saserdote na Juda a manlilingkor ed templo diad Jerusalem legan na panaon nen Malaquias so ag-angiyapay ed si Jehova na sankaabigan iran bagat. Ibabaga na Malaquias 1:6-8: “Say anak a laki igalang to so ama to, et say aripen say katawan to: no siak sirin so ama, iner so kawalaan na kigalang ko? Et no siak so manunaan iner so kawalaan na itakot ed siak? Kuan nen Jehova na saray ehersito ed sikayo, O saserdote, a manmudmora ed ngaran ko.” ‘Ed anto so nanmudmoraan mi ed ngaran mo?’ so intepet na saray saserdote. “Sikayo mangibagat kayo na marutak a tinapay,” so inyebat nen Jehova. “Anto so anutakan mi ed sika?” so intepet na saray saserdote. Kanian oniay inkuan ed sikara nen Jehova: “Dia ed saman so pankuanan yo, Say dulang nen Jehova sikato so mumudmoraen.” Impatnag na saratan a saserdote a minudmora ra so dulang nen Jehova diad impangiyapay da na bagat a walaay deperensya a kuanda: “Sikato so aliwan mauges.”
11. (a) Anto so imbaga nen Jehova nipaakar ed agnaabobonan iran bagat? (b) Diad anton dalan a natetel iray totoo ed inkalapagan?
11 Akikatunongan sirin si Jehova nipaakar ed saratan ya agnaabobonan a bagat: “Sikato natan so [“awiten mo ed gobernador,” NW] mo; napaliket naani ta ed sika? Odino awaten to ta naani so inkatoom?” Andi, say gobernador da so agnapaliket ed ontan a regalo. Agta lalon ag-awaten na Soberano ed Uniberso so walay deperensya iran apay! Tan aliwan saray saserdote labat so natetel. Tua, impatnag da so panmudmora ed si Jehova diad aktual ya impanbagat da. Balet agmet kasi natetel iray totoo ed inkalapagan. Petepeteg ya ontan! Sikara so amili ed saratan a bulag, piley, tan mansasakit ya ayayep tan impaibagat da iratan ed saray saserdote. Agaylan inkamakasalanan!
12. Panon itayon natulongan a mangiter ed si Jehova na sankaabigan tayo?
12 Say pangiter tayo na sankaabigan tayo ed si Jehova so paraan pian nipatnag a talagan sikatoy inaro tayo. (Mateo 22:37, 38) Aliwan singa saray anawet-tenten a saserdote ed panaon nen Malaquias, inanabang na organisasyon nen Jehova so Makasulatan ya instruksion ya ontutulong ed sikatayo pian nitandoro si Jehova tekep na pisasalamat diad pangapet ed saray madibinon kakaukolanen. Misiglaotan ed saya so komapat ya importantin punto a naala tayo ed Malaquias kapitulo 1.
Say Tuan Panagdayew so Apakiwas Lapud Aro, Aliwan Agum
13. Anto so gagawaen na saray saserdote a mangipatnag ya apakiwas ira ed agum?
13 Saray saserdote ed panaon nen Malaquias so masiblet, agmaaro, tan maagum na kuarta. Panoy pakaamta tayo? Oniay ibabaga na Malaquias 1:10: “O no komon wala so sakey ed sikayo nensaman a mangikapot ed saray pinto, pian agyo komon panelselan na apoy ed altar ko ed kaapaan! Siak andian ak na liket ed sikayo, kuan nen Jehova na saray ehersito, agko met naani awaten so sakey a bagat ed lima yo.” On, saraman a maagum a saserdote so nampabayar ni ingen ed sankasimplian iran serbisyo ed templo, a pababayaran da so anggan say pangikapot labat ed saray puerta tan panelsel ed altar! Agpankelawan a si Jehova so ag-aliketan ed saray imbabagat da!
14. Akin a nibaga tayo a saray Tastasi nen Jehova so apakiwas ed aro?
14 Say inkaagum tan inkasiblet na makasalanan iran saserdote ed Jerusalem nensaman so mangipanonot ed sikatayo, ya unong ed Salitay Dios, saray maagum a totoo so agmakatawir ed Panarian na Dios.” (1 Corinto 6:9, 10) Say panmolimoli ed saray sinisiblet a paraan na saratan a saserdote so mamaaralem na panamabli tayo ed sankamundoan a panagpulong a gagawaen na Tastasi nen Jehova. Satan so boluntaryo, tan agtayon balot mansisingil parad antokaman a kabiangan na ministeryo tayo. Andi, ‘aliwa itayon managlako na salita na Dios.’ (2 Corinto 2:17) Singa si Pablo, balang sakey ed sikatayo so matuan makapangibaga: ‘Sililiket ya impulong ko ed sikayo so ebanghelyo na Dios ya anggapo so bayar to.’ (2 Corinto 11:7) Imanoen a si Pablo so ‘sililiket ya angipulong ed ebanghelyo.’ Isusuheri na satan so komaliman punto a nipaimano ed sikatayo diad Malaquias kapitulo 1.
Panaglingkor ed Dios Aliwan Makapabelat a Totontonen
15, 16. (a) Anto so awawey na saray saserdote nipaakar ed saray iyaapay a bagat? (b) Panon so pangiyaapay na saray Tastasi nen Jehova ed saray bagat da?
15 Saray andiay-pananisian saserdote so angipasen ed panangiyapay ed saray bagat bilang makapakesaw a totontonen. Satan so makapabelat ed sikara. Singa nabasa ed Malaquias 1:13, inkuan na Dios ed sikara: “Sikayo kuan yo met, Nia, agayla a sagpot! Et sikato so inangob yo.” Inangob, odino minudmora na saraman a saserdote iray sagradon bengatla na Dios. Ipikasi tayo ya agtayon balot magmaliw a singa sikara. Imbes, lawas tayon ipanengneng so awawey a napatnagan ed saray salita na 1 Juan 5:3: “Saya so aro na Dios, a sumpalen tayo so saray ganggan to: tan saray ganggan to aliwa ran ambelat.”
16 Panliketan tayo komon so pangiyapay na espiritual iran bagat ed Dios, ya agbalot ipapasen iya a makapabelat a totontonen. Talinengen tayo komon iray mapropetikon salita: “Ikuan yo ed [si Jehova], Ekalen mo ya amin so inkauges, tan awaten mo so maong; dia ed ontan yapay mi naani a singa saray baka a kalakian so bagat na saray bibil mi.” (Oseas 14:2) Say balikas a ‘baka a kalakian na saray bibil mi’ so mankabaliksan na espiritual iran bagat, saray sasalitaen tayo ed panangidayew ed si Jehova tan nipaakar ed saray gagala to. Ibabaga na Hebreos 13:15: “Lapu ed [Jesu-Kristo] sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” Agaylan liket tayo ta saray espiritual a bagat tayo so aliwan basta labat totontonen, noagta impapuson panangipatnag na panangaro tayo ed Dios! Saya so mangitonton ed komanem a punto a naala tayo ni manlapud Malaquias kapitulo 1.
Nepeg a Mikuentaan so Balang Sakey
17, 18. (a) Akin ya insamba nen Jehova imay ‘onkikiwas a masilib’? (b) Anto so agninonot na saratan a kinmiwas a sisisilib?
17 Saray sinansakey a nambilay ed panaon nen Malaquias so walaan na mismon eebatan lapud saray gawa ra, tan ontan itayo met. (Roma 14:12; Galacia 6:5) Kanian, onia so ibabaga na Malaquias 1:14: “Naayew so mamalingo, a walaan ed pulok to na sakey [ya andiay-depekton] kalakian, et mangisipan, tan mangibagat ed Katawan na sakey a walaan na kabalawan.” Say toon walaay pulok so walaan na dakel ya ayayep, ya aliwan saksakey a karnero—ya anggapo lay napanpilian to. Diad pamili na sakey ya ayep ya ibagat, agto pilien imay bulag, piley, odino mansasakit. No pinili to itan a walay deperensya ya ayep, mangipanengneng a minudmora to so uksoyan nen Jehova ed panagbagat, lapud say toon walaan na pulok na ayayep so maseguron makapanpili na sakey ya andian na saray deperensya!
18 Makatunongan sirin ya insamba nen Jehova imay onkikiwas a masilib, a walaan na manepeg a kalakian ya ayep balet ta say intarok to—odino nayarin tinengteng to—ed saserdote pian paibagat et samay bulag, piley, odino mansasakit. Ingen, anggapon balot so pakapatnagan ya anggan sakey ed saray saserdote so angaon ed ganggan na Dios ya ag-aabobonan so ayep a walaan na deperensya. (Levitico 22:17-20) Amta na saray makatunongan a totoo a mauges so pansumpalan da no ontan so iter dan regalo ed gobernador da. Balet diad katuaan to et sikaray akaarap ed Sankatalbaan a Soberano, si Jehova, a mas matalonggaring nen say siopaman a toon gobernador. Onia so impangikuan na Malaquias 1:14 ed pamaakaran: “Siak sakey ak a baleg ya Ari, kuan nen Jehova na saray ehersito, et say ngaran ko sikato so makapataktakot ed saray Gentil.”
19. Anto so pipirawaten tayo, tan anto so kaukolan tayon gawaen?
19 Bilang matoor a lingkor na Dios, pampipirawatan tayo so panaon sano say Baleg ya Ari, si Jehova, so galangen na amin a katooan. Diad satan a panaon, “say dalin napano naani ed pikakabat ed Jehova, singa saray danum sakbongan da so dayat.” (Isaias 11:9) Kaleganan ni, panggunaetan tayo a kapeten iray kakaukolanen nen Jehova diad pangalig ed salmista ya angikuan: ‘Sikato so itandorok dia ed pisasalamat.’ (Salmo 69:30) Pian nagawaan itan, si Malaquias so walaan na kaaruman nin simbawa a pakagunggonaan tayon maong. Diad ontumbok a duaran artikulo, komon ta maalwar tayon konsideraen so arum niran parte na libro na Malaquias.
Kasin Nanonotan Yo?
• Akin a nepeg tayon itandoro si Jehova?
• Akin a saray panagbagat na saray saserdote ed panaon nen Malaquias so ag-inabobonan nen Jehova?
• Panon tayon mangiyapay na bagat na panangidayew ed si Jehova?
• Anto so nepeg a mamakiwas ed sikatayo parad tuan panagdayew?
[Litrato ed pahina 9]
Tinukoy na propesiya nen Malaquias so panaon tayo
[Litrato ed pahina 10]
Ag-inapresya nen Esau iray sagradon bengatla
[Litrato ed pahina 11]
Saray saserdote tan totoo so angiyapay na agnaabobonan iran bagat
[Litrato ed pahina 12]
Diad sankamundoan et libre so pangiyaapay na saray Tastasi nen Jehova ed bagat na panangidayew da