“Onapit Kayo ed Dios”

“Onapit kayo ed Dios, tan sikato so onapit ed sikayo.”​—SANTIAGO 4:8, NW.

1, 2. (a) Anto so mabetbet ya ibabaga na totoo? (b) Anto so insimbawa nen Santiago, tan akin a kinaukolan itan?

“GOD with us.” Niyarkos iratan a salita diad saray simbolo na bansa tan diad saray unipormi na sundalo. Niukit iray salitan “In God we trust” diad dakerakel a sinsilyo tan ed kaplesan iran papel de bangko. Kaslakan lan ibabaga na totoo a walaan ira na maapit a relasyon ed Dios. Balet, agkayo kasi onabobon a mas ni so kakaukolanen ed peteg a pakawalaan na ontan a relasyon nen say basta panalambit odino pangisulat labat ed saratan pian naimano na arum?

² Ipapabitar na Biblia a posibli so pakawalaan na relasyon ed Dios. Balet ta nakaukolan so pansagpot. Anggan say arum ya alanaan a Kristiano nen inmunan siglo et kinaukolan a mamaelet ed relasyon da ed si Jehova a Dios. Arum so kinaukolan a pasakbayan na Kristianon manangasikaso a si Santiago nipaakar ed saray tendensia na laman da tan say pakakarutakan da la ed espiritual. Diad satan a simbawa et oniay mapuersan imbilin to: “Onapit kayo ed Dios, tan sikato so onapit ed sikayo.” (Santiago 4:1-12, NW) Anto so labay ya ibaga nen Santiago ed “onapit kayo”?

3, 4. (a) Anto so nayarin nipanonot ed saray inmunan-siglon manbabasa ed sulat nen Santiago nipaakar ed balikas ya “onapit kayo ed Dios”? (b) Akin ya apaseguroan itayo a posibli so iyapit ed Dios?

³ Inusar nen Santiago so balikas a kabkabisado na dakel ed saray manbabasa ed sulat to. Inter na Mosaikon Ganggan ed saray saserdote so espisipiko iran bilin no panon so “onasingger” ed si Jehova diad biang na totoo to. (Exodo 19:22) Nayari sirin ya apanonotan iray manbabasa ed sulat nen Santiago ya agnepeg a leglemewen so iyaasingger ed si Jehova. Si Jehova so sankatalonggaringan a dederlengen diad uniberso.

⁴ Diad biek a dapag, unong ya inkuan na sakey ya iskolar na Biblia, “sayan bilin [ed Santiago 4:8] so mangipaparungtal na mapuersan inkapositibo.” Amta nen Santiago a simamaaro lawas si Jehova ya angimbita ed saray ag-ayadyarin totoo ya onapit ed Sikato. (2 Awaran 15:2) Say bagat nen Jesus so angilukas na dalan a sigpot tayon naasinggeran si Jehova. (Efeso 3:11, 12) Natan et nilukas ed minilyon a totoo so dalan pian makaasingger ed Dios! Panon tayon naanamot iyan alay abig a pankanawnawa? Konsideraen tayon antikey so taloran paraan pian makaapit itayo ed si Jehova a Dios.

Mantultuloy ya ‘Onggamor na Pikakabat’ ed Dios

5, 6. Panon ya iyiilustra na alimbawa na kalangweran a Samuel so sasaglawien na ‘igamor na pikakabat’ ed Dios?

⁵ Unong ed Juan 17:3, oniay inkuan nen Jesus: “Saya sikato so andi-anggaan a bilay, a naamtaan da ka [“nagamoran da so pikakabat ed sika,” NW] a saksakey a tuan Dios, tan saman so imbakim, salanti Jesu-Kristo.” Dakel iran patalos ed sayan bersikulo so medyo midumaan ed patalos na New World Translation. Imbes ya ibagan “onggamor na pikakabat” ed Dios, impatalos da labat itan a verb ya “amtaen” so Dios odino “naamtaan” so Dios. Balet, inkuan na pigaran iskolar a wala ni nasasaglawi ed talos na salita ya inusar ed orihinal a Griego.

⁶ Say maapit a pakapikabat ed Dios so aliwa lan balon bengatla diad panaon nen Jesus. Alimbawa, nabasa tayo ed Hebreon Kasulatan a sanen ugaw ni Samuel et “agto ni amta si Jehova.” (1 Samuel 3:7) Kabaliksan kasi na saya a dagdaiset so amta nen Samuel nipaakar ed Dios to? Andi. Maseguron dakel la so imbangat ed sikato na atateng to tan saray saserdote. Balet, unong ed sakey ya iskolar et say Hebreon salita ya inusar ed satan a bersikulo so “nausar ed sankaapitan a kabkabat.” Aliwa nin maap-apit so pikakabat nen Samuel ed si Jehova, lapud ta diad saginonor ni so panserbi to bilang pinagkasangiyan nen Jehova. Diad imbaleg nen Samuel et petepeteg ya akabat to si Jehova, tan awalaan na maapit a siglaotan ed sikato.​—1 Samuel 3:19, 20.

7, 8. (a) Akin a kaukolan ya agtayo nadismaya diad panaral ed aralem iran bangat na Biblia? (b) Anto so pigaran aralem a katuaan na Salitay Dios a nepeg tayon aralen?

⁷ Kasin onggagamor kayo na pikakabat ed si Jehova ta pian maapit kayon makapikabat ed sikato? Pian nagawaan itan, nakaukolan a ‘bayuboan yo so pampilalek’ parad espiritual a tagano ya itatarya na Dios. (1 Pedro 2:2, NW) Aglabat mankokontento ed saray manunan bangat na Biblia. Panggunaetan ya aralen so pigaran aralem iran bangat na Biblia. (Hebreos 5:12-14) Kasin nadidismaya kayo ed saratan a bangat, ya ipapasen iratan a mair-irap? No ontan, nodnonoten a si Jehova so “Engranden Managbangat.” (Isaias 30:20, NW) Amta to no panon ya ipasabi so aralem iran katuaan ed saray ag-ayadyarin nonot na totoo. Tan nayarian ton bendisyonan so masimoon iran sagpot yo a makatalos ed walan ibabangat to ed sikayo.​—Salmo 25:4.

⁸ Akin ta no surien yoy inkasikayo nipaakar ed pigaran ‘aralem iran bengatla na Dios’? (1 Corinto 2:10) Aliwa iratan a makapasawan tema a nayarin pandebatian na saray teologo tan klerigo. Saratan so mausa-usar a doktrina a mangitatarya na makapasagyat iran aralem a pakatalos nipaakar ed walad kanonotan tan puso na maaron Ama tayo. Alimbawa, say dondon, say “sagradon sekreto,” tan say nanduruman sipanan ya inusar nen Jehova pian nasalimbengan so totoo to tan nasumpal iray gagala to​—sarayan tema tan dakel nira so makapaliket tan makapatumang parad personal a panagsukimat tan panagaral.​—1 Corinto 2:7, NW.

9, 10. (a) Akin a mapeligro so inkamapaatagey, tan anto so ontulong ed sikatayo pian napaliisan itan? (b) No nipaakar ed pikakabat ed si Jehova, akin a panggunaetan tayo so magmaliw a mapaabeba?

⁹ Diad ibubulaslas yo ed pikakabat ed aralem iran espiritual a katuaan, manalwar ed kapeligroan a nayarin epekto na pakawalaay pikakabat, salanti, say inkamapaatagey. (1 Corinto 8:1) Mapeligro so inkamapaatagey, lapud ikasipa na satan iray totoo manlapud Dios. (Uliran 16:5; Santiago 4:6) Tandaan, anggapo so toon makapangilastog ed pikakabat to. Diad pangiyilustra, konsideraen pa irayan salita ed introduksion na sakey a libro a manusuri ed sankabaloan iran sientipikon agawaan na katooan: “Diad lalon ikakabat tayo, lalon namomoria tayo a dagdaiset so amta tayo. . . . Amin a naaralan tayo la so melmelanting ni no ikompara ed walan aralen tayo ni.” Maabig so ontan a panagpaabeba. Natan et walaan itayo na babaleg a rason pian mansiansian mapaabeba lapud sankalaknaban a tugyop na pikakabat​—say pikakabat ed si Jehova a Dios. Akin?

¹⁰ Imanoen so pigara ed saray balikas na Biblia nipaakar ed si Jehova. “Saray kanonotan mo aralem ira a tuloy.” (Salmo 92:5) “Say pakatalos [nen Jehova] anggapo so sampot to.” (Salmo 147:5) “Anggapo so makausisa ed linawa [nen Jehova].” (Isaias 40:28) “O say kaaralman na kayamanan na kakabatan tan pakaamta na Dios!” (Roma 11:33) Malinew, agtayon balot naamtaan so amin nipaakar ed si Jehova. (Eclesiastes 3:11) Binangatan to itayo la na dakel iran alay abig a bengatla, ingen ta lawas a walad sikatayo so malaklaknab a tugyop na pikakabat a nakaukolan nin aralen. Agta satan ya ilalo et makapasagyat tan sengegan na pagmaliw tayon mapaabeba? Sirin, diad panaaral tayo et lawas tayon usaren so pikakabat tayo bilang basiyan na iyapit ed si Jehova tan diad panulong ed arum a manggawa met na ontan​—ya aliwan pian ipaatagey tayo so inkasikatayo ed arum.​—Mateo 23:12; Lucas 9:48.

Ipatnag Yo so Aro Yo ed si Jehova

11, 12. (a) Panon itayon naapektaan ed pikakabat a nagagamoran tayo nipaakar ed si Jehova? (b) Anto so mandetermina no kasin peteg so panangaro na sakey a too ed si Jehova?

¹¹ Matukotukoy so impangisiglaot nen apostol Pablo ed pikakabat tan aro. Oniay insulat to: “Saya so kerewen ko a say aro yo ondaak a lalo nin lalo komon ed kakabatan dia ed amin a panangimano.” (Filipos 1:9) Imbes a magmaliw itayon mapaatagey, amin a mablin katuaan a naaralan tayo nipaakar ed si Jehova tan ed saray gagala to so nepeg a mamadaak ed aro tayo ed mangatatawen ya Ama tayo.

¹² Siempre, aliwan ontan so dakel a mankuan a mangaaro ed Dios. Nayarin sikara so masimoon ed mabiskeg iran liknaan a walad kapusoan da. Maong iratan a liknaan tan nakomendaan ni ingen itan sano mitunosan ed suston pikakabat. Balet saratan a mismo et aliwan petepeteg ya aro ed Dios. Akin ya andi? Imanoen so impanguker na Salitay Dios ed satan ya aro: ‘Saya so aro ed Dios, a sumpalen tayo so saray ganggan to.’ (1 Juan 5:3) Say aro sirin ed si Jehova so petepeteg lambengat sano nipatnag itan ed matulok iran gawa.

13. Panon itayon natulongan na maridios a takot pian nipatnag so aro tayo ed si Jehova?

¹³ Say maridios a takot so ontulong ed sikatayon ontulok ed si Jehova. Sayan aralem a takot tan respeto ed si Jehova so resulta na pakakagamor tayo na pikakabat ed sikato tan pakakaaral ed magnayon ya inkasanto, gloria, pakayari, inkahustisya, kakabatan, tan aro to. Importante so ontan a takot diad iyapit tayo ed sikato. Diad tua, imanoen so ibabaga na Salmo 25:14: “Say pikakaaro ed Jehova wala ed saray ontakot ed sikato.” Kanian no walaan itayo na maabig a takot a napaermen so inad-aron mangatatawen ya Ama tayo, napaapit itayo ed sikato. Say maridios a takot so ontulong ed sikatayo ya ontalineng ed makabat a simbawa a nikurit ed Uliran 3:6: “Dia ed saray amin a dalan mo sikato so bidbiren mo, et sikato itonton to so saray basbas mo.” Anto so kabaliksan na satan?

14, 15. (a) Anto so arum ed saray desisyon a kipapaarapan tayo ed agew-agew a panagbilay? (b) Panon itayon makapandesisyon diad paraan a mangipatnag na maridios a takot tayo?

¹⁴ Nakaukolan yoy mandesisyon ed kada agew, baleg man odino melag. Singa bilang, anto so itotongtong yo ed saray katrabahoan, kaeskuelaan, kakaabay yo? (Lucas 6:45) Kasin pankulian yo iray ipapagawa ed sikayo, odino basta nisumpal yo labat itan? (Colosas 3:23) Kasin onapit kayo ed saramay agtanton mangaaro odino agmangaaro ed si Jehova, odino panggunaetan yon pabiskegen iray pisisiglaotan yo ed saray totoon matakken ed espiritual? (Uliran 13:20) Anto so gawaen yo, anggan diad melag iran paraan, pian niyalibansa so intereses na Panarian na Dios? (Mateo 6:33) No saratan a Makasulatan a prinsipyo a singa saray nisitas dia so mangigigiya ed inagew-agew iran panagdesisyon yo, petepeteg sirin ya iimanoen yo si Jehova ed ‘amin a dalan yo.’

¹⁵ Bilang resulta, diad kada desisyon a gawaen tayo et nepeg a nigiya itayo ed sayan punto: ‘Anto so pagagawa ed siak nen Jehova? Anton kurang so makapalikliket ed sikato?’ (Uliran 27:11) Say pangipatnag na maridios a takot ed sayan paraan so matalonggaring a paraan pian nipatnag tayo so panangaro tayo ed si Jehova. Say maridios a takot so mamakiwas met ed sikatayon mansiansian malinis​—diad espiritual, moral, tan pisikal. Tandaan a diad satan met a bersikulo a pinaseseg nen Santiago iray Kristiano ya ‘onapit ed Dios,’ oniay imbilin to ni: “Linisan yo so limalima yo, sikayo a managkasalanan; tan gogolan yo so puspuso yo, sikayo a nankadua so linawa.”​—Santiago 4:8.

16. Diad pangiiter tayo ed si Jehova, anto so agtayon balot nagawaan, ingen ta anto so nayarin matalonan nagawaan tayo?

¹⁶ Siempre, say pangipatnag tayo na aro tayo ed si Jehova so mangilalanor ni na bengatla nen say ipaliis labat ed mauges. Say aro so mamakiwas met ed sikatayo a manggawa na maptek. Singa bilang, panon itayon onkiwas ed pirmin inkamabunlok nen Jehova? Oniay insulat nen Santiago: “Amin a maong a palangkap tan amin ya ayadyarin palangkap [so] manlapu ed tagey tan onleksab a manlapu ed Ama na saray liwawa.” (Santiago 1:17) On, sano iter tayo ed si Jehova iray kaykayarian tayo, sikato so agtayo napayaman. Walad sikato so amin a bengabengatla. (Salmo 50:12) Tan sano iter tayo ed si Jehova so panaon tan biskeg tayo, agtayo papanoan so pankaukolan ya agto nakapet. Anggano agtayo ipulong so maong a balita na Panarian na Dios, napakelyaw to iray kabatoan! Akin sirin ya iter tayo ed si Jehova so amin a kaykayarian, panaon, tan biskeg tayo? Manuna ed amin, lapud ipapatnag tayo so aro tayo ed sikato tekep na interon puso, kamarerwa, kanonotan, tan biskeg tayo.​—Marcos 12:29, 30.

17. Anto so mamakiwas ed sikatayon mangiter a sililiket ed si Jehova?

¹⁷ Sano mangiter itayo ed si Jehova, nepeg tayon gawaen itan a sililiket, “ta say Dios aroen to so sililiket a mangiter.” (2 Corinto 9:7) Say prinsipyo a nikurit ed Deuteronomio 16:17 so ontulong ed sikatayo a mangiter a sililiket: “Balang sakey a laki mangiter naani unong na nayarian to a nikanepegan ed impangasi nen Jehova a Dios ya inter to ed sika.” Sano umamengen tayo so inkamabunlok nen Jehova ed sikatayo, nalikna tayo so pankaliktan a mabunlok a mangiter ed sikato. Satan a panangiter so mamaliket ed sikato, a mipadpara ed panliket na sakey ya ateng ed melag a regalo na inadaron anak to. Say pangipatnag tayo ed aro tayo ed sayan paraan so ontulong ed sikatayon onapit ed si Jehova.

Paeleten so Inkamaapit Panamegley na Pikakasi

18. Akin a makanakana so pangonsidera ed no panon so pamaaligwas tayo ed kalidad na saray pikakasi tayo?

¹⁸ Saray panaon ed pampikasin bukor so mangiter ed sikatayo na mablin pankanawnawa​—saray kipapasen parad maapit tan personal a pitotongtong ed mangatatawen ya Ama tayo. (Filipos 4:6) Lapud say pikakasi so makanan paraan na iyaapit ed Dios, makanakana so panumameng ed kalidad na saray pikakasi tayo. Saratan so agmet kaukolan a matalonggaring ed panangibalikas tan inkaalutor, balet saratan so nepeg a masimoon iran balikas a manlalapu ed puso. Panon tayon napaaligwas so kalidad na saray pikakasi tayo?

19, 20. Akin a mandalepdep sakbay itayon manpikasi, tan anto so arum ed saray matukoy a tema a dalepdepen tayo?

¹⁹ Nayarin mandalepdep itayo ni sakbay a manpikasi. No mandalepdep itayo kasakbayan ni, makapanpikasi itayo ed espesipiko tan makabaliksan a paraan, a napaliisan sirin so pangulit-ulit ed saray balikas a naynay a nausar tan mainomay a nanonotan. (Uliran 15:28, 29) Nayarin makatulong so panmorekdek ed pigara ed saray teman sinalambit nen Jesus diad modelon pikakasi to insan ikonsidera no panon irayan misiglaotan ed saray dilin sirkumstansya yo. (Mateo 6:9-13) Alimbawa, nayarin tepetan tayo so inkasikatayo no anton melag a kimey so nagawaan tayo diad panumpal ed linawa nen Jehova diad dalin. Nayari ta’n ibalikas tayo ed si Jehova so pilalek tayon pausar ed sikato anggad posible tan onkerew na tulong to diad panumpal ed antokaman iran asainmin ya inter to ed sikatayo? Kasin nabebelatan itayo ed kapagaan ed materyal iran pankaukolan tayo? Antoray kasalanan a nakaukolan tayoy panamerdona, tan nipaakar ed siopa a nakaukolan tayo so magmaliw a lalon manamerdona? Antoran tukso so manedetdet ed sikatayo, tan kasin momoriaen tayo no panon ya inkaganatan so pankaukolan tayo na pananalimbeng nen Jehova ed satan a pamaakaran?

²⁰ Niarum ni, nayarin isipen tayo so nipaakar ed totoon kabkabat tayo a mankakkaukolan na tulong nen Jehova. (2 Corinto 1:11) Balet, aglilingwanan so misalamat. No umamengen tayo itan, maseguron manisip itayo na saray rason pian misalamat ed si Jehova tan mangidayew ed sikato ed kada agew lapud daakan a kaabigan to. (Deuteronomio 8:10; Lucas 10:21) Say panggawa ed satan so walaan na kaaruman a gunggona​—makatulong itan ed sikatayon nawalaan na mas positibo tan maapresyan awawey ed bilay.

21. Say panaral ed anto iran Makasulatan ya alimbawa so nayarin ontulong ed sikatayo sano onasingger itayo ed si Jehova diad pikakasi?

²¹ Say panagaral so mamaaligwas met ed pikakasi tayo. Wala iray alay abig a pikakasi na matoor a lalaki tan bibii a nikurit ed Salitay Dios. Singa bilang, no nipapaarap itayo ed makapaangat a problema, a mamapawalay kapagaan tan takot ni ingen ed biang tayo odino ed saray inad-aro tayo, nayarin basaen tayo so pikakasi nen Jacob nipaakar ed pakapidumog to la ed maingongot lan agi to, si Esau. (Genesis 32:9-12) Odino nayarin aralen tayo so pikakasin imbalikas nen Arin Asa sanen sesesgaen na puersa na onliligada ed sakey milyon iran Etiope so totoo na Dios. (2 Awaran 14:11, 12) No nagogonigon itayo ed sakey a probleman mamapabanday la ed maong a ngaran nen Jehova, makana sirin a konsideraen so pikakasi nen Elias ed arap na saray managdayew ed si Baal diad Palandey Carmel, a singa met ed pikakasi nen Nehemias nipaakar ed makapasinagem a kipapasen na Jerusalem. (1 Arari 18:36, 37; Nehemias 1:4-11) Say pambasa tan pandalepdep ed saratan a pikakasi so mamabiskeg ed pananisia tayo tan mangiter ed sikatayo na saray ideya no panon tayon sankaabigan ya iyasingger ed si Jehova iray kapagaan a mamapabelat ed sikatayo.

22. Anto so teksto tayo ed taon 2003, tan anto so nayarin panapanaon ya itepet tayo ed inkasikatayo diad interon taon?

²² Malinew, anggapo lay babaleg a kagalangan, anggapo lay magmaong a kalat, nen say italineng ed simbawa nen Santiago ya “onapit kayo ed Dios.” (Santiago 4:8) Komon ta gawaen tayo itan diad iyaligwas ed pikakabat tayo ed Dios, diad panggunaet ya ipatnag so aro tayo ed sikato a nagkalalo, tan diad pamayubo ed inkaapit ed sikato diad pikakasi. Diad interon taon 2003, legan a sinononot itayo ed Santiago 4:8 bilang teksto tayo ed ontumbok a taon, itultuloy tayon usisaen so inkasikatayo no kasin sikatayo so peteg ya onaapit ed si Jehova. Komusta balet so kaunoran a kabiangan na satan a balikas? Diad anton pantalos ya ‘onapit ed sikayo’ si Jehova, a mangitarok na antoran bendisyon? Konsideraen itan diad ontumbok ya artikulo.

Kasin Natandaan Yo?

• Akin a seryosoen so iyapit ed si Jehova?

• Anto so pigaran kalat a nayarin iletneg tayo nipaakar ed igamor na pikakabat ed si Jehova?

• Panon tayon nipatnag a peteg so panangaro tayo ed si Jehova?

• Diad antoran dalan a nayarin napaelet tayo so inkaapit ed si Jehova panamegley na pikakasi?

[Blurb ed pahina 12]

Say teksto-ed-taon 2003 et: “Onapit kayo ed Dios, tan sikato so onapit ed sikayo.”​—Santiago 4:8, NW.

[Litrato ed pahina 8, 9]

Diad imbaleg nen Samuel et akabat ton maong si Jehova

[Litrato ed pahina 12]

Say impikasi nen Elias diad Palandey Carmel so maabig ya ehemplo ed sikatayo