“Singger Kayo ed Dios, et Sikato so Onsingger Naani ed Sikayo”
Antis Tan Kayari na Panagaral—Uumanen na Salitay Dios so Kabibilay na Totoo
NO AKABKABAT mo la si Tony sanen sikatoy tin-edyer ni, anengneng mo komon so mapasang tan busangel a tobonbalo a mabetbet ed pigaran mabanday a pasen ed Sydney, Australia. Saray kakaaro to et membro na pangkat. Mabetbet iran nalalanor ed saray panagloob, panlalaban na saray pangkat, tan pampapaltogan diad karsada.
Ginmapon nansigarilyo si Tony sanen sikatoy mantaon na siamira. Diad edad a 14, sikatoy regular lan manma-marijuana tan imoral so panagbilay to. Sanen 16 años to, sikatoy nagmaliw ya adik ed heroin, tan saya so nansumpal ed impangusar to na cocaine, LSD—“diad tua, antokaman a makapaalimureng ed siak,” so inkuan nen Tony. Insan to inletneg so panaglako na druga ed kabkabat a duaran sindikato. Ag-abayag si Tony so balitado a sakey ed saray seguradon managsuplay na druga diad east coast na Australia.
Inagew-agew et manga $160 (U.S.) anggad $320 (U.S.) so peperdien nen Tony ed bisyo ton panangusar na heroin tan marijuana. Balet say pamilya to so nagkalalon napeperdi. Oniay inkuan to: “Sikami nen akulaw ko so aminpigan pinatuyongan na paltog tan kutsilyo na saray kriminal a manaanap na druga tan kuarta a walad pudir mi.” Kayari na amitlon inkipriso, atebek nen Tony a kaukolan ton usisaen so direksion na bilay to.
Anggaman sikatoy datin mimimisa, liknaen nen Tony a sikatoy arawdawi ed Dios ya ipapasen a mamopool a magnayon ed saray managkasalanan diad impierno bilang dusa. Balet, sanen sikatoy dinalaw na duaran Tasi nen Jehova, si Tony so asurprisa ed impakaamta ya aliwan ontan so Dios. Tan maliket si Tony lapud nayarian ton ipetek so bilay to tan mangawat na saray bendisyon na Dios. Apakiwas si Tony ed imbalikas nen Jesu-Kristo ya: “Amin a bengatla et posibli ed Dios.” (Marcos 10:27, NW) Nagkalalon atenyeg si Tony ed saray makapaseseg a salitan: “Singger kayo ed Dios, et sikato so onsingger naani ed sikayo.”—Santiago 4:8.
Aarapen natan nen Tony so angat a pangiyarunsa ed bilay to a mitunosan ed saray estandarte na Biblia. Inkuan to: “Say inmunan intundak et say panagsigarilyo, bengatlan agkon balot nagawaan nensaman, anggaman aminpigak a sinali. Diad biskeg nen Jehova, nitundak so panag-heroin tan panag-marijuana, bisyo ya angontrol ed siak diad apalabas a 15 taon. Agko inilaloan a posiblin natundaan irayan bisyo.”
Imbes ya ontakot ed Dios a mamapairap a magnayon ed totoo diad impierno—doktrinan anggapo ed Biblia—inawat di Tony tan say akulaw to so ilalon magnayon a panayam diad paraiso ed dalin. (Salmo 37:10, 11; Uliran 2:21) “Kinaukolan ko so dakel a panaon tan impasyan sagpot pian nitunos koy bilay ko unong ed saray estandarte na Dios,” so inaksobi nen Tony, “balet diad tulong nen Jehova et tinmalona ak.”
On, sayan datin adik ed druga so nagmaliw a Kristiano. Diad pangikakana ra ed panaon tan kaykayarian da, sikara nen akulaw to so manguusar na nilibon oras diad kimey a panagbangat na Biblia. Okupado met iran mamapabaleg ed duaran anak da a walaan na takot ed Dios. Sayan baleg ya impanguman so agawa panamegley na agnaresistian a pakayari na Salitay Dios, say Biblia. On, unong ya inkuan nen apostol Pablo, “say salita na Dios sikatoy mabilay tan mabiskeg.”—Hebreos 4:12.
Anggaman walaray onian makapaseseg ya alimbawa, saray arum so agmakatunongan a mangisusuppiat a dederalen na nibase ed Biblia a panagpulong na Tastasi nen Jehova iray pamilya tan papakapuyen na satan so maabig a kalidad na saray tobonbalo. Seguradon susuppiaten na kaso nen Tony itan ya ibabaga ra.
Singa si Tony, naamtaan na dakel a natalonaan so makapatey ya inka-adik. Panon? Diad panamegley na pananisia tan panagmatalek ed Dios tan say Salita to, tan diad panamegley met na suporta na saray manangiyansakit tan maaron kalimog a Kristiano. Maliket a sinampotan nen Tony: “Naimatonan ko no panon a sinalimbengan na saray prinsipyo ed Biblia iray ananak ko. Insalba na saray bangat na Biblia so panamaley mi. Tan makakaugip laray kakaabay mi natan lapud aliwa ak lan sesga ed sikara.”
[Blurb ed pahina 9]
‘Diad biskeg nen Jehova, nitundak so bisyok a panagdruga ya angontrol ed siak diad loob na 15 taon’
[Kahon ed Pahina 9]
Makatulong Iray Prinsipyo na Biblia
Akatulong ed dakel ya adik ed druga iray nanduruman prinsipyo na Biblia pian itunda iyan makaderal a bisyo. Say onggendan so arum ed sarayan prinsipyo:
“Linisan tayo komon so inkasikatayon dili ed ami’tilol na laman tan espiritu, a yadyarien itayo na kasantosan dia ed takot ed Dios.” (2 Corinto 7:1) Sumpa ed ganggan na Dios so pangusar na druga.
“Say takot ed Jehova sikato so sengeg na kakabatan; et say pikakabat ed Sankasantosan sikato so pakatalos.” (Uliran 9:10) Akatulong ed dakel so panangigalang ed si Jehova a nibase ed suston pikakabat ed sikato tan ed saray dalan to pian makalukpos ed impluensya na druga.
“Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.” (Uliran 3:5, 6) Napatunda so makaderal a bisyo diad panamegley na impapuson panagmatalek tan sigpot a panagpiya ed Dios.