“Singger Kayo ed Dios, et Sikato so Onsingger Naani ed Sikayo”

Antis tan Kayari​—Mauddiem ya Apalabas, Masnag ya Arapen

“SAY salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, . . . tan masiglat a mangibiig ed saray nonot tan saray getma na puso.” (Hebreos 4:12) Ontan so inkuan nen apostol Pablo nipaakar ed ontatanek a pakayari na mensahe na Dios. Say abilidad na satan a natalos so puso so nagkalautlan apatnagan legan na inmunan siglo K.P. Anggaman mauges so impluensya ed saman a panaon, saramay nagmaliw a Kristiano so angisulong na balon personalidad.​—Roma 1:28, 29; Colosas 3:8-10.

Say manamasimbalon pakayari na salitay Dios, unong a nikurit ed Biblia et mapatpatnag met natan. Alimbawa, imanoen pa so kaso na sakey ya atagey tan mabiskeg a laki a manngaran na Richard. Lapud misasanok, si Richard so mipunitian a tampol sano napasyodot labat na daiset. Say bilay to so naapektaan a tuloy na karawalan. Si Richard so akibiang ni ingen ed muyong na boksing. Sikatoy nampasal a maong tan nagmaliw a heavyweight boxing champion diad Westphalia, Alemanya. Si Richard so mainum met tan mabetbet a sikatoy alanor ed panlalaban. Diad sakey ya inkagawa et walay sakey ya apatey, tan dawitdawit a nipriso si Richard.

Komustay panamaley nen Richard? “Antis kamin nanaral nen Heike na Biblia,” so nanonotan ni nen Richard, “nagsi-nagsi so istiloy kabibilay mi. Si Heike so mabetbet ed saray kakaaro ton bibii legan a siak so manliligliwa​—a manuna so boksing, surfing, tan diving.”

Sanen ginmapon nanaral na Biblia si Richard tan Heike ed saray Tasi nen Jehova, liknaen nen Richard ya agto nayarian a gawaen so singano imposiblin pananguman pian nitunos so bilay to ed saray atagey ya estandarte ya indatak ed Salitay Dios. Balet, legan ton nakakabat a nagkalalo si Jehova a Dios, abayuboan nen Richard so mabiskeg a pilalek a sikatoy paliketen. Amoria nen Richard ya ag-aabobonan na Dios iray mangaaro ed karawalan odino saramay mangaanamot ed satan parad panligliwaan. Naaralan nen Richard a “saman so labalabay to so karamsakan [et] gulaen na kamarerwa [nen Jehova].”​—Salmo 11:5.

Niarum ni, say ilalon manbilay ya andi-angga diad paraison dalin so anagyat ed si Richard tan Heike. Kaliktan da so manayam diman a mankaiba! (Isaias 65:21-23) Say imbitasyon a “singger kayo ed Dios, et sikato so onsingger naani ed sikayo” so anenyeg a maong ed si Richard. (Santiago 4:8) Atebek to so kakanaan na italineng ed sayan impuyan a simbawan: “Agmo sibletan so too a mapasoot [“ibegan so toon misasanok,” NW], tan agmo pilien so anggan anto ed saray dalan to. Ta say marumsis sikato so sakey a kadimla nen Jehova; balet say pikakaaro to wala ed maptek.”​—Uliran 3:31, 32.

Anggaman mabiskeg so pilalek ton umanen so kabibilay to, amoria nen Richard ya agto itan nagawaan ed dilin biskeg to. Atebek ton kaukolan toy onkerew na tulong ed Dios diad pikakasi. Kanian sikatoy kinmiwas a mitunosan ed saray salita nen Jesus ed saray apostol To: “Manpikasi kayo, pian agkayo onloob ed katutukso; say espiritu tua a sikatoy malikeliket, balet say laman makapuy.”​—Mateo 26:41.

Sanen naamtaan nen Richard no panoy panmoria na Dios ed karawalan tan inkamasanok, aseguro to a say boksing et makapuy ya isport. Diad tulong nen Jehova tan diad panamaseseg na saramay angiyaral ed sikato na Biblia, intunda nen Richard so pakapilanor ed karawalan. Intunda to la so boksing tan pilalaban tan nandesisyon a paaligwasen so panamaley to. “Say impakaaral ko ed katuaan manlapud Biblia so akatulong ed siak ya ontunda tan manisip nin unona antis ak ya onkiwas,” so inkuan nen Richard, a mauyamo la natan a manangasikaso diad sakey ed saray kongregasyon na saray Tasi nen Jehova. Inyarum to: “Saray prinsipyo na aro tan respeto so mangiwawanwan la natan ed siak diad relasyon ko ed akulaw ko tan ed ananak ko. Bilang resulta, inmapit ed balang sakey so pamilya mi.”

No maminsan et saray totoon akadngel na lingon balita so mangaakusan saray Tasi nen Jehova so mamubuyak ed saray pamilya. Balet, saray alimbawa na saray indibidual a singa si Richard so mamapaneknek a lingo itan. Diad tua et say katuaan ed Biblia so manresulta ed kaligenan na sankaabungan tan masnag ya arapen parad saramay walaan na mauddiem ya apalabas.​—Jeremias 29:11.

[Blurb ed pahina 9]

“Say ilalo a paraison dalin so anagyat ed siak a manguman”

[Kahon ed pahina 9]

Saray Prinsipyo ed Biblia a Makatulong

Say Biblia so mangisesekar na mabiskeg ya impluensya ed kabibilay na totoo. Niraya so pigaran Makasulatan a prinsipyo ya akatulong ed saray misasanok ya indibidual a manguman:

“Say matantan a manpasnok sikato so magmaong nen say makapanyari; et say manuley [“mandangka,” NW] ed espiritu to, nen say mangala na syudad.” (Uliran 16:32) Say agnapokpokan a sanok et tanda na kakapuyan, aliwan biskeg.

“Say kalakal na too manggawa ed sikato [a] matantan a manpasnok.” (Uliran 19:11) Say pakawalaan na pakatebek tan pakatalos ed kipapasen so ontulong ed sakey a natebek so akindalem iran rason na komprontasyon tan mamokpok ed biglan isanok.

‘Agka mikaaro ed too a maisasanok ompan naaral mo iray dalan to.’ (Uliran 22:24, 25) Sikakabat a papaliisan na saray Kristiano so milimog ed saramay misasanok.