No Akin ya Ag-itayo Makapambilay a Bukor

“Magmaong so duara nen say sakey . . . Ta no niparukol so sakey ed sikara, nayarian na sananey a bangonen so kaiba to.”​—Arin Solomon

SI Arin Solomon na kadaanan ya Israel so angikuan: “Magmaong so duara nen say sakey, lapud walay maabig a tumang da ed sagpot da. Ta no niparukol so sakey ed sikara, nayarian na sananey a bangonen so kaiba to; balet panon la no niparukol so sakey tan anggapo so sananey a mamangon ed sikato?” (Eclesiastes 4:9, 10, NW) Idadanet sirin na sayan makabat a mangiimano ed awawey na too a nakaukolan tayo so kaulop tan importante ya agtayo isisian so inkasikatayo. Balet, aliwa iyan opinyon labat na too. Say imbalikas nen Solomon et manlalapu ed madibinon kakabatan tan panangipuyan.

Aliwan makabat so pangisian ed inkasikatayo. Nakaukolan na totoo so sakey tan sakey. Amin tayo so mankaukolan na biskeg tan tulong a nagamoran tayo manlapud arum a totoo. “Say onsian anapen to so dili a pilalek to,” so kuan na proverbio ed Biblia. “Tan misangsangan sumpa ed aralem a kakabatan.” (Uliran 18:1) Kanian agpankelawan a saray manaaral nipaakar ed saray siglaotan ed sosyedad na too so mamapaseseg ed saray sinansakey a miulop ed sakey a grupo tan nawalaan na interes ed arum.

Kabiangan ed saray simbawa parad kiyaligwas na bilay ed komunidad et say sinalambit nen Propesor Robert Putnam a “pamabiskeg ed impluensya na pananisia ed Dios.” Matalonggaring iray Tasi nen Jehova ed sayan pamaakaran lapud panggagayagaan da so proteksion diad loob na singa-pamilya iran kongregasyon ed interon dalin. Mitunosan ed saray salita nen apostol Pedro, sikaray ‘mangaaro ed interon ulopan na sanaagi,’ a mapagalang ya ‘ontatakot ed Dios.’ (1 Pedro 2:17) Papaliisan met na saray Tasi so onsian tan saray makaderal ya epekto na satan lapud say dakel a maabig a kimey da a nisiglaot ed tuan panagdayew so mamapasiansia ed sikaran mibiang ed pananulong ed kaparan totoo a makaaral ed katuaan a naromog ed Salitay Dios, say Biblia.​—2 Timoteo 2:15.

Anguman so Kabibilay Da Lapud Aro tan Maong ya Ulopan

Saray Tasi nen Jehova so manutugyop na nankakasakey a komunidad a kada membro et walaan na importantin betang. Alimbawa, konsideraen pa so kaso nen Miguel, Froylán, tan si Alma Ruth, a kabiangan iran talo na parehon pamilyay Latin-Amerika. Sikaray nianak a walaay deperensya’d pukel a sengegay inkabekew da. Sikaray aka-wheelchair. Panon ya angapekta ed bilay da so pililimog ed saray Tasi?

Oniay inkuan nen Miguel: “Asagmak ko so makapagonigon a panaon, balet sanen akilimog ak ed saray totoo nen Jehova, anguman so bilay ko. Talagan mapeligro so pangisian ed inkasika. Say pililimog ed saray kapananisiaan diad saray Makristianon miting, a kaiba iran sinimba, so baleg ya akatulong ed siak pian naliknak so inkakontento tan inkapnek.”

Oniay inkuan met nen Alma Ruth: “Walaray bekta a siak so agonigon a maong; agaylay ermen ko. Balet sanen naaralan ko so nipaakar ed si Jehova, amoriak a siak so maapit a makapisiglaotan ed sikato. Satan so sankablian a bengatla ed bilay ko. Sikami so susuportaan a maong na pamilyak, tan satan so lalon amaapit ed sikami.”

Say tatay nen Miguel so maaron angibangat ed sikato a manbasa tan mansulat. Insan si Miguel so angibangat met ed si Froylán tan Alma Ruth. Kaukolan iya parad espiritualidad da. “Agunggonaan kamin tuloy ed impakaaral min manbasa lapud nayarian mi lay napenek ed espiritual diad pambasa na Biblia tan saray nibase ed Biblia a publikasyon,” kuan nen Alma Ruth.

Natan et si Miguel so manlilingkor bilang sakey a Kristianon matatken. Si Froylán et aminsiam to lan abasa so interon Biblia. Apadaak nen Alma Ruth so serbisyo to ed si Jehova diad panlilingkor to bilang ministron payunir, odino sigpot-panaon a manangiyabawag na Panarian, manlapu la nen 1996. Oniay inkuanto: “Adampot ko iyan kalat lapud panamendisyon nen Jehova, legan a siak so susuportaan na pinablin agagin bibii, aliwa labat a diad panagpulong noagta dia met ed panagbangat, pian niyaralan ko na Biblia so 11 a totoo ya agapoan ko la.”

Sananey nin maabig ya alimbawa so impanengneng nen Emelia, a naaksidente kanian kapilitan a mangusar na wheelchair lapud naapektaan iray bikking tan tenten to. Saray Tasi nen Jehova ed syudad na Mexico so angiyaral ed sikato na Biblia, tan nen 1996 et sikatoy abautismoan. Oniay inkuan nen Emelia: “Antis kon naamtaan so katuaan, nilabay ko lay manbikkel; agko la labay so manbilay. Begtebegtew ak a maong, labi-agew ya onaakis ak. Balet sanen akilimog ak ed totoo nen Jehova, aliknak so panangaro na saray agagi. Apaseseg ak ed panangiyansakit da. Nagmaliw a singa kuyak odino amak so sakey ed saray matatken. Sikato tan say pigaran ministeryal a lingkor so mangaawit ed siak ya aka-wheelchair diad saray miting tan diad panagpulong.”

Si José, ya abautismoan bilang sakey ed saray Tasi nen Jehova nen 1992, so manbukbukor. Sikato so manedad la na 70, tan nanretiro la ed trabaho to nen 1990. Nagogonigon ed saman si José, balet kayarin pinulongan na sakey a Tasi, sikatoy tampol ya inmatendi ed saray Makristianon miting. Nanliketan to iray nadngel tan anengneng to’d man. Singa bilang, naobserbaan to so maong ya ulopan na sanaagi tan alikna to so panangasikaso ra ed sikato. Saray mamatatken tan ministeryal a lingkor diad kongregasyon to so mangaasikaso natan ed sikato. (Filipos 1:1; 1 Pedro 5:2) Saratan a kapananisiaan et “sakey a ligliwa” ed sikato. (Colosas 4:11) Sikatoy ipapadoktor da, bibisitaen da ed ayaman to, tan sinuportaan da ed amipat ya operasyon to. Oniay inkuanto: “Sikaray mangiyaansakit ed siak. Sikaray peteg a pamilyak. Panggagayagaan ko so piuulop ed sikara.”

Wala so Peteg a Liket ed Panangiter

Sanen imbaga nen Arin Solomon a “magmaong so duara nen say sakey,” unonan sinalambit to so nipaakar ed kaapaan na panguusar na sakey a too ed amin a biskeg to diad pantitipon na materyal a kaykayamanan. (Eclesiastes 4:7-9, NW) Satan so mismon panggugunaetan na dakel a gegemtanen natan, anggano pakaandian la na relasyon na too diad loob tan paway na pamilya.

Say maagum tan masiblet ya awawey so sengegan no akin a dakel so mangisisian ed inkasikara. Saya so ag-angitarok ed sikara na liket odino inkapnek ed bilay, lapud kaslakan la so isasaew tan inkaandian na ilalo diad limog na saramay paiimpluensyaan ed ontan ya awawey. Diad kasunian, saray kapkapangisalaysay ya alimbawa so mangipapabitar ed maabig iran epekto na pililimog ed saramay manlilingkor ed si Jehova a papakiwasen na panangaro ed sikato tan ed kapara ran too. Say regular ya iyaatendi ed saray Makristianon miting, pananuporta tan panangasikaso na saray kaparan Kristiano, tan maseseg a pankimey diad ministeryo so makanan tulong ed sarayan indibidual pian natalonaan so negatibon liknaan lapud pambubukbukor da.​—Uliran 17:17; Hebreos 10:24, 25.

Lapud nakaukolan tayo so sakey tan sakey, natural labat a say panggawa na saray bengatla parad arum so makapaliket. Oniay inkuan nen Albert Einstein, a say kimey to so akagunggonaan na arum: “Say kablian na too . . . so napatnagan diad saray iiter to, aliwan diad saray naaawat to.” Mitunosan iya ed saray salita na Katawan tayon Jesu-Kristo: “Lalo a mapalar so mangiter nen say mangawat.” (Gawa 20:35) Sirin, bangta maabig so pakaawat na aro, mas lalon maabig no ipatnag itan ed arum.

Sakey a managbiahen manangasikaso, ya abayag lan ombibisita ed saray kongregasyon pian ontulong ed espiritual a paraan tan akatulong ed impangipaalagey na saray pantitiponan na saray Kristianon mairap-bilay so angibalikas ed liknaan to ed onian paraan: “Say magayagan panlilingkor ed saray agagi tan pakakanengneng ed sikaran misalsalamat so mamapakiwas ed siak a mantultuloy ya anamoten iray pankanawnawa pian ontulong. Naeeksperiensyak a say pangipatnag na personal ya interes ed arum so tombok ed liket. Tan kabat ko a bilang mamatatken, nepeg a magmaliw itayon ‘singa amotan ed dagem, . . . singa saray agus na saray danum ed pasen ya amaga, singa anino na sakey a baleg a batondampay ed sakey a dalin ya apagaan.’”​—Isaias 32:2.

Alay Kaligliwaan na Panayam ed Inkasaksakey!

Seguradon wala so baleg a gunggona tan peteg a liket ed panulong ed arum tan panggunaet a makapiulop ed arum a manlilingkor ed si Jehova. ‘Nengneng yo!,’ so inkelyaw na salmista. “Alay kaabigan tan alay kaligliwaan na panayam na sanaagi ed inkasaksakey!” (Salmo 133:1) Importante so pankakasakey na pamilya diad panuporta ed sakey tan sakey, unong a nipabitar diad kaso di Miguel, Froylán, tan si Alma Ruth. Tan agaylan bendisyon so pakapikasakey ed arum diad tuan panagdayew! Kayarin sinimbawa nen apostol Pedro so kaasawaan a lalaki tan bibii, onia so insulat to: “Say kaunoran a salitak, mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.”​—1 Pedro 3:8.

Say tuan pankakaaro so makagunggonan tuloy diad emosyonal tan espiritual a paraan. Sinimbawa nen apostol Pablo iray kapananisiaan to, a kuanto: “Ibalap yo so apunaw ed puso, tagano yo so saray makapuy, masungdo kayo komon ed amin. . . . Tumboken yo lawas so maong, ya ipakana ed sakey tan sakey tan dia ed amin.”​—1 Tesalonica 5:14, 15.

Anapen sirin iray praktikal a paraan pian manggawa na maabig ed arum. ‘Manggawa kayo na maabig ed saray amin, nagkalalo ed saray kapananisiaan [yo],’ ta saya so mangarum na tuan kabaliksan ed bilay yo tan pakakontentoan tan pakapenekan yo. (Galacia 6:9, 10) Oniay insulat nen Santiago a babangatan nen Jesus: “No sakey ya agin laki o bii nalakseban tan naandian iray kanen da ed agew-agew, et sakey ed sikayo ikuan to ed sikara: Onla kayo la ed kareenan, naimengan tan napesel kayo komon; anta agyo iter ed sikara so bengatla ya antokaman a kaukolan na laman: Anto so gunggona ra?” (Santiago 2:15, 16) Mabitar so ebat ed satan a tepet. Nepeg ya ‘agtayo nengnengen so kayarian tayon dili, noag say nengnengen tayo met iray bengatlan kayarian na arum.’​—Filipos 2:4.

Nilikud ed panulong ed arum diad materyal a paraan sano walay nikaduman pankaukolan odino agawa iran desyang, saray Tasi nen Jehova so okupadon tuloy a manginanabang ed kapara ran totoo diad sankaimportantian a paraan​—diad pangipupulong ed maong a balita na Panarian na Dios. (Mateo 24:14) Say pibibiang na masulok ya 6,000,000 a Tasi diad pangiyaabawag ed sayan mensahe na ilalo tan ligliwa so ebidensya na puro tan maaron interes da ed arum. Balet say pangiter na tulong manlapud Masanton Kasulatan so makapenek met ed sananey nin pankaukolan na too. Anto itan?

Pamenek ed Importantin Pankaukolan

Pian napanggayagaan so tuan liket, sikatayoy kaukolan a nawalaan na manepeg a pisisiglaotan ed Dios. Oniay nibaga nensaman: “Say katuaan a nalilikna na too a nakaukolan toy ontawag ed say papanisiaan ton atagtagey tan mas makapanyari nen sikato, diad amin a pasen tan panaon, manlapud gapo anggad natan, so mangipapabitar a say relihyon et nisipor tan nepeg a makatunongan a bidbiren. . . . Nepeg itayon ontakot, onkelaw tan mangigalang pian namoria so inkalapagan a panaanap na too, tan pananisia to, ed Sankatageyan.”​—Man Does Not Stand Alone, nen A. Cressy Morrison.

Oniay inyabawag nen Jesu-Kristo: “Mapalar iramay sinononot ed espiritual a pankaukolan da.” (Mateo 5:3, NW) Agnayarian na totoo so onsian ed arum diad andukey a panaon. Balet, lalon mapeligro no isian tayoy inkasikatayo ed Manamalsa tayo. (Apocalipsis 4:11) Nepeg a manunaan ed bilay tayo so igamor tan pangiyaplika ed ‘mismon pikakabat na Dios.’ (Uliran 2:1-5) On, nepeg a determinado tayon mamenek ed espiritual a pankaukolan tayo, lapud agtayo nayarian so manbilay a bukor tan nisian ed Dios. Say maliket tan peteg a makatumang a bilay so mandependi ed maabig a pisisiglaotan ed si Jehova, ‘say Sankatageyan ed amin a dalin.’​—Salmo 83:18.

[Litrato ed pahina 5]

Miguel: “Asagmak ko so makapagonigon a panaon, balet sanen akilimog ak ed saray totoo nen Jehova, anguman so bilay ko”

[Litrato ed pahina 5]

Alma Ruth: “Sanen naaralan ko so nipaakar ed si Jehova, amoriak a siak so maapit a makapisiglaotan ed sikato”

[Litrato ed pahina 6]

Emelia: “Antis kon naamtaan so katuaan, . . . begtebegtew ak a maong”

[Litrato ed pahina 7]

Say pililimog ed saray tuan managdayew so ontulong pian napenek so espiritual a pankaukolan tayo