Istorya ed Bilay

Naeksperiensyak so Maaron-Kaabigan tan Panangasikaso nen Jehova

UNONG ED SALAYSAY NEN FAY KING

Maomaong iray atateng ko, balet singa met ed dakel a totoo, anggapoy interes dan balot ed relihyon. Oniay datin ibabaga nen nanay ko: “Talagan wala so Dios, ta no anggapo siopa so nanggawa’d saray rosas, tan siopa so nanggawa’d kakiewan?” Balet angangga labat ed satan.

SAY tatay ko so inatey nen 1939 sanen mantaon ak na 11, tan nanayam kami nen nanay ko diad Stockport, ya asingger ed abalaten na Manchester, Inglatera. Pirawrawat ko a nakabat a nagkalalo so Manamalsak tan rerespetoen ko so Biblia, anggaman anggapo ni so amtak nipaakar ed satan. Kanian denesidik so onla ed Church of England pian amtaen no antoy niyopresi na satan.

Anggapoy tanton epekto ed siak na saray seremonya, balet sanen binasa iray Ebanghelyo, anggan panon et akombinse ak ed saray salita nen Jesus a talagan tua so Biblia. No nonoten ko so apalabas, singano agnapanisiaan ya agko ni abasa so Biblia. Anggan diad saginonor sanen siak so inikdan na sakey a kaaro na pamilya mi na “Balon Sipan” a modernon patalos, agkon balot binasa itan.

Say interak na Bakal ed Korea nen 1950 so peteg a nan-umamengan ko. Kasin onlaknab so panlalaban, a singa ed inlaknab na Guerra Mundial II? No ontan, panon kon natulok so ganggan nen Jesus ya aroen so kakabusol ko? Bangbalet, kasin ontanyareg ak labat tan nengnengen so totoo ya onlulusob ed bansa mi tan anggapoy gawaen ko pian amperen ira? No ontan so ginawak, siak so seguradon ompapaliis ed responsabilidad ko. Anggaman nawewetwet ak ed saman, kombinsido ak nin siansia a walad Biblia iray ebat ed amin a tepet ko, anggaman agko amta no panon odino iner so pakaromogan ed saratan.

Impananap ed Katuaan Diad Australia

Nen 1954, denesidi mi nen nanay ko so onalis diad Australia, a diman so panaayaman nen atsik Jean. Kayari na pigaran taon, imbaga’d siak nen Jean a kinerew to ed saray Tasi nen Jehova a dalawen da ak lapud amta ton interesado ak ed Biblia tan mimimisa ak. Labay ton amtaen no antoy panmoriak ed sikara. “Agko amta no kasin susto odino aliwa iray paliwawa ra,” so impatua to ed siak, “balet anggan panon et walaray paliwawa ra, a magmaong nen saray paliwawa na saray iglesia.”

Si Bill tan Linda Schneider, say sanasawan binmisita ed siak, so makapalikliket. Sikara so ngalngali lan man-70 tan sikara so abaybayag la a Tasi. Sikaray nantrabaho diad istasyon na radyo ya ipapakurang na saray Tasi nen Jehova diad Adelaide, tan sanen asebelan so panagpulong a kimey diad Australia legan na Guerra Mundial II, sikaray linmoob bilang sigpot-panaon ya ebanghelisador. Anggaman baleg so nitutulong nen Bill tan Linda ed siak, siansia nin mansusukimat ak ed nanduruman relihyon.

Siak so intagar na katrabahoan ko a minengneng ed ebanghelista a si Billy Graham, a kayari na satan et pigara ed sikami so akiarap ed sakey a pari a mangeebat ed saray tepet. Intepet ko iman so siansia nin mangogonigon ed siak: “Panon kan magmaliw a Kristiano tan mangaro ed kakabusol mo sano oonla ka a mamatey ed sikara diad bakal?” Inmungol so interon grupo​—a mapatnag a nan-umamengan dan amin itan a tepet! Kabebekta et imbaga na pari: “Agko amta so ebat ed satan. Nonoten ko ni.”

Kaleganan na satan, agak tinmunda ya impaiyaralan na Biblia ed si Bill tan Linda, tan nen Setyembre 1958, siak so abautismoan. Pinilalek ko a tumboken so alimbawa na saray angibangat ed siak, kanian kasabi Agosto ed tinmumbok a taon, nampalista ak bilang sakey a regular payunir, sakey a sigpot-panaon ya ebanghelisador. Kayari na waloy bulan siak so inimbitaan a magmaliw a sakey ed saray espisyal payunir. Malikeliket ak sanen naamtaan kon si atsik Jean so inmaligwas met ed panaaral to tan abautismoan la!

Nilukas so Sakey a Pankanawnawa

Nanlingkor ak ed sakey ed saray kongregasyon ed Sydney tan walay pigaran inyaralan ko na Biblia. Sakey ya agew, akatongtong ko so sakey a retirado lan pari na Church of England tan tinepetan ko no anto so ibabaga na iglesia nipaakar ed anggaan na mundo. Anggaman imbaga to’d siak a sikatoy angibangat ed doktrina na iglesia ed loob na 50 a taon, siak so abigla ed ebat to: “Kaukolan ko ni so mansukimat nipaakar ed satan lapud agak marunong ed Biblia ya aliwan singa ed saray Tasi nen Jehova.”

Ag-abayag kayari na satan, walay imbitasyon parad saray boluntaryo a manlingkor diad Pakistan. Siak so nan-aplay, ya agko amtan ag-ibabaki iray bibiin wala’d kasuloan, noagta saray lalakin wala’d kasuloan odino sanasawa labat. Mapatnag ya impawit da so aplikasyon ko diad hedkuarter ed Brooklyn lapud ag-abayag et akaawat ak na sulat a mangibabagan wala so bakante diad Bombay (tatawagen natan a Mumbai), India, no labay kon awaten itan. Satan et nen 1962. Inawat ko itan tan nansiansia ak ed Bombay ed loob na 18 a bulan sakbay ak ya inmalis ed Allahabad.

Inteen kon tampol so inkasiak ed panaral na Hindi. Sayan lenguahe so kaslakan ya apasakey ed espeling tan panangibalikas, kanian aliwan tanton mairap ya aralen. Anggaman ontan, mabetbet a makapadismaya sano kerewen na unabung a mansalita ak lay Ingles imbes a piliten koy mansalita na lenguahe ra! Balet sayan balon teritorya so amawala na makapainteres tan makapasagyat iran angat, tan nanggayagaan ko so impilimog ed saray kaparan Tasi a nanlapud Australia.

Sanen malangwer ak ni, ninonot ko so miasawa, balet sanen abautismoan ak, okupado ak lan maong ed panaglingkor ed si Jehova pian nonoten ni itan. Balet natan et naliliknak lamet a nakaukolan ko so kaiba ed bilay. Siempre, agko labay a taynanan so bansan aka-asainan ko, kanian impikasik itan a pamaakaran ed si Jehova insan nilingwanan ko la itan.

Ag-inilaloan a Bendisyon

Si Edwin Skinner so mangaasikaso ed kimey na sanga ed India diad saman a panaon. Sikato so kabiangan na komawalon klase na Watchtower Bible School of Gilead nen 1946 a kaiba so dakel nin matoor ya agagin lalaki, a pati si Harold King tan si Stanley Jones, a nibaki ed Tsina.a Nen 1958, si Harold tan si Stanley so impisok ed bartolina nisengeg ed panagpulong a kimey da diad Shanghai. Sanen nibulos si Harold nen 1963, sikatoy sinulat nen Edwin. Binales itan nen Harold kapawil to ed Hong Kong kayari na impanlapu to diad Estados Unidos tan Britanya tan sinalambit to a labay to lay mangasawa. Imbaga to’d si Edwin ya impikasi to iyan pamaakaran sanen walad prisoan, tan tinepet to ed si Edwin no walay kabat ton Tasi ya inangay ton magmaliw ya asawa.

Diad India et iyuuksoy la so maslak a pan-asawa, tan mabetbet a kekerewen ed si Edwin a mangiyuksoy ed satan, balet naynay a sikatoy ag-onaabuloy. Kanian impasa to so sulat nen Harold ed si Ruth McKay, a say masiken ton si Homer et sakey ya ombiabiahen manangasikaso. Diad kaunoran, siak so sinulat nen Ruth pian ibaga a walay sakey a misionaryo ya abayag lan walad katuaan tan manaanap na asawaen to, tan tinepet to no interesado ak a misulatan. Agto imbaga’d siak no siopa iman ya agin laki odino antokaman nin bengatla nipaakar sikato.

Siempre, anggapoy arum a makaamta ed pikakasik a labay ko lay nawalaan na kaiba, nilikud ed si Jehova, kanian diad primero et agak inmabuloy ed satan ya ideya. Balet, sanen ninodnonot kon maong itan, siak so lalon akombinse a mabetbet ya eebatan nen Jehova iray pikakasi tayo diad paraan ya agtayo iilaloan. Kanian binales ko so sulat nen Ruth tan inkuan ko a nayarian ton kerewen ed saman ya agin laki a mansulat lamet daput no agto ak oobligaen a miasawa ed sikato. Say komaduan sulat nen Harold King et parad siak.

Saray litrato nen Harold tan say istorya to so pinmatnag ed nanduruman peryodiko tan magasin kayari na inkibulos to ed prisoan diad Tsina. Natan et sikatoy kabkabat la ed interon mundo, balet say rekord na inkamatoor to ed teokratikon panaglingkor so nandinayewan ko. Kanian nansulatan kami ed loob na limay bulan, insan linma ak ed Hong Kong. Nen Oktubre 5, 1965 et nankasal kami.

Labay mi lan pareho so nawalaan na asawa tan mansiansia ed sigpot-panaon a serbisyo, tan legan a sikami so ontatakken, moriaen mi a kakkaukolan mi la so nawalaan na kaiba. Binmulaslas so panangarok ed si Harold, tan legan a naiimatonan ko so inkamapangasi tan inkamakonsidera to ed pidedeneng to ed saray totoo tan ed saray onlelesan problema a misiglaotan ed panlilingkor mi, onaaralem so panagrespetok ed sikato. Nanggayagaan mi so malikeliket a panamaley ed loob na 27 a taon tan dakel a bendisyon so naawat mi manlapud si Jehova.

Saray Tsino so makukulin totoo, tan pinabpablik ira a tuloy. Say lenguahen uusaren ed Hong Kong et Cantonese, sakey a dialekton Tsino a walaan na mas dakel a tono, odino panguman-uman na boses, nen say Mandarin kanian medyo mairap itan ya aralen. Ginmapo kami nen Harold diad misionaryon ayaman diad sangan opisina na saray Tasi nen Jehova, insan nanlingkor kami diad nanduruman teritorya ed Hong Kong. On, sikami so malikeliket, balet nen 1976 et siak so awalaan na graben sakit.

Impangarap ed Saray Problema ed Bunigas

Siak so pigay bulan lan manpaparala, kanian inmabeban maong so dalak. Kinaukolan ko so manpa-opera, balet imbaga’d siak na saray doktor diad ospital ya agda ak operaan no anggapo so dala ta no andi et siak so nayarin ompatey nisengeg ed pakaekatan na dala. Sakey ya agew sanen pantotongtongan na saray doktor so kasok, siak so papasooten na saray nars ya umanen so desisyon ko, a kuan dan anggapoy kanepegan ko a paulyan labat lay inkasiak ya ompatey. Wala so 12 operasyon ya akaeskedyul ed saman ya agew, a 10 ed saratan et panagpaekal, balet naimanok ya anggapo so anuppiat ed saray malukon a bibii nipaakar ed pamatey ed ananak da.

Diad kaunoran, nanggawa na sulat si Harold a mangibabagan anggapo so antokaman ya ebatan na ospital no siak so ompatey, tan inmabuloy iray doktor a manggawa na nakaukolan ya operasyon. Siak so inyakar ed operating room tan akaparaan lan turokan na anestisya. Balet, diad unor a bekta et ag-inmabuloy so managturok na anestisya, kanian siak so kinaukolan a paalisen na ospital.

Diad ontan et kinmonsulta kami ed independentin gynecologist. Sanen amoria ton grabe so kipapasen ko, inyopresi to ya operaan to ak tan mamura labat​—daput no agmi ibaga ed arum no pigaray siningil to ed sikami. Matalona so impan-opera to​—tan anggapon balot so inusar a dala. Diad saman a pankanawnawa et mapatpatnag so maaron-kaabigan tan panangasikaso nen Jehova ed sikami nen Harold.

Nen 1992, si Harold so graben nansakit. Inmalis kami diad sangan opisina tan sikamin dua so maaron inasikaso diman. Anampot so mangaraldalin a kurso na pinablik ya asawa nen 1993 diad edad ya 81.

Pinmawil Ak ed Inglatera

Maliket ak ed impagmaliw kon membro na pamilyay Bethel ed Hong Kong, balet naimanok a naiirapan ak lan maong a mantepel ed petang tan inkamakelpa. Insan walay ag-inilaloan a sinmabin sulat a nanlapud hedkuarter ed Brooklyn, a lapu ed bunigas ko et tetepeten da no labay koy onalis ed sakey a sanga a mas dakel so pasilidad parad pangasikaso ed bunigas. Kanian nen taon 2000, siak so pinmawil ed Inglatera tan nagmaliw ak a kabiangan na pamilyay Bethel ed London. Talagan saya so maaron probisyon! Siak so malikeliket ya inabrasa, tan panggagayagaan kon tuloy so nanduruman asainmin ko, a kabiangan la so itutulong kon mangasikaso ed librarya na pamilyay Bethel a walaan itan na 2,000 a tomo.

Siak so mililimog met ed kongregasyon a Tsino a mantitipon ed London, ingen ta anguman dia iray bengatla. Natan et dagdaiset a totoo so manlalapud Hong Kong, imbes, sikaray manlalapud bansan Tsina. Say salita ra et Mandarin, kanian sakey itan a balon angat diad panagpulong a kimey. Diad loob na bansa et walaray report nipaakar ed dakel a makapainteres a panangiyaral ed Biblia a nikokondukta ed saray titulado lan estudyante a nanlalapud Tsina. Sikara so maseeseet tan panggagayagaan da so naaaralan dan katuaan ed Biblia. Makapaliket so ontulong ed sikara.

Diad mareereen a balon ayaman ko, mabetbet kon momolimolien so maliket a bilay ko tan lawas kon pandinayewan so maaron-kaabigan nen Jehova. Sankapatnagan itan ed amin a bengatlan misiglaotan ed gagala to, tan sankaimano so pangaasikaso to ed saray lingkor to bilang indibidual. Siak so walaan na amin a rason pian misalsalamat ed amin a maaron panangasikaso to ed siak.​—1 Pedro 5:6, 7.

[Paimano ed leksab]

[Litrato ed pahina 24]

Sanen manlilingkor ak ed India

[Saray litrato ed pahina 25]

Si Harold King nen 1963 tan nanlingkor ed Tsina nen dekada na 1950

[Saray litrato ed pahina 26]

Say agew na impankasal mi diad Hong Kong, Oktubre 5, 1965

[Litrato ed pahina 26]

Saray kaiba mi a membro na Bethel ed Hong Kong, say sanasawan Liang diad pegley, tan say sanasawan Gannaway diad kawanan