Manmatalek ed Espiritu na Dios Sano Nipapaarap ed Manguman-uman a Kipapasen na Bilay

“Seetan mo a sikukuli so ompatnag a naabobonan ed arap na Dios.”​—2 TIMOTEO 2:15.

1. Antoran pananguman so manubok ed espiritual a pankaabigan tayo?

TULOYTULOY so panguuman na mundo a walad kaliberliber tayo. Naiimatonan tayo so makapasagyat ya iyaaligwas na siensia tan teknolohiya, a katekep so pirmin iyaabeba na saray estandarte ed moral. Unong a siningbat tayo la ed akadkaunan artikulo, nepeg a resistian na saray Kristiano so espiritu na mundo a sumpad Dios. Balet, diad panguuman na mundo, manguuman itayo met ed dakel a paraan. Dinmalan itayo ed inkaugaw anggad nagmaliw itayon wala la’d edad. Nayarin awalaan odino naandian itayo na kayamanan, bunigas, tan saray inadaro’d bilay. Agtayo nakontrol so ontan a dakel a pananguman, tan saratan so nayarin mangiyaarap na balo tan mairap iran angat ed espiritual a pankaabigan tayo.

2. Panon a sinagmak nen David so pananguman ed bilay to?

² Walaray totoo ya akasagmak na pirmin pananguman ed bilay da a singa si David, ya anak nen Jesse. Biglan anguman so kipapasen nen David bilang ordinaryon managpastol tan nagmaliw a bantog a palbayani ed interon nasyon. Diad saginonor et sikato so nagmaliw a takas, a singa-ayep ya inanop na sakey a maimon ya ari. Kayari na satan, si David so nagmaliw ya ari tan konkestador. Intepel to iray makapaot-ot a nansumpalan na ambelat ya impankasalanan to. Sinagmak to so trahedya tan inkaapag-apag ed loob na pamilya to. Sikato so akatipon na kayamanan, tinmakken, tan akalikna na saray beblay ya epekto na itatakken. Anggaman ed dakel iran pananguman ed bilay to, impatnag nen David so legay-bilay a kompiyansa tan panagmatalek ed si Jehova tan ed espiritu To. Ginawa to so anggaay nayarian to ya ompatnag a “naabobonan ed arap na Dios,” tan sikatoy benendisyonan na Dios. (2 Timoteo 2:15) Anggaman midumaan iray sirkumstansya tayo ed si David, makaaral itayo ed paraan na impangarap to ed saray pamaakaran ed bilay to. Makatulong ed sikatayo so ehemplo to pian natebek tayo no panon a nagamoran so tulong na espiritu na Dios legan tayon aarapen iray pananguman ed bilay tayo.

Kapaabebaan nen David​—Sakey a Maabig ya Alimbawa

3, 4. Panon ya anguman so kipapasen nen David bilang sakey ya ordinaryon managpastol a tobonbalo ya anggad imbantog to ed nasyon da?

³ Sanen sikatoy tobonbalo, si David so aliwan matalonggaring diad loob na mismon pamilya to. Sanen sinmabi si propeta Samuel ed Betlehem, inyarap na ama nen David so pitora ed waloran ilalak to. Si David, a sankayugtanan ya ilalak, so intilak a manpastol ed saray karnero. Ingen ta pinili nen Jehova si David a magmaliw ya ari na Israel. Si David so tinawag ed kaumaan. Insan oniay inkuan na rekord na Biblia: “Si Samuel inala to so saklor na larak, tan sikato so nilanaan to dia ed pegley na saray agagi to: Et say espiritu nen Jehova linma a sankamakapanyarian ed David nanlapu ed saman ya agew tan kayari to.” (1 Samuel 16:12, 13) Si David so nanmatalek ed satan ya espiritu legan na impanbilay to.

⁴ Agnambayag et binmantog iyan managpastol a tobonbalo diad nasyon to. Sikato so atawag a manserbi tan mantogtog na musika parad ari. Pinatey to so mibabakal a si Goliat, sakey a masebesebeg a higante a tinakotan na anggan saray atalitali lan sundalo na Israel. Sanen sikato so aturon mangidaulo ed saray mibabakal, si David so matalonan akibakal ed saray Filisteo. Sikato so pinabpabli na totoo. Anibukel ira na saray kanta a mangitatandoro ed sikato. Diad akadkauna, deneskribe na sakey a mananimbawa nen Arin Saul so kalangweran nin David, ya aliwa lambengat a “marunong dia ed panagtogtog” na arpa noagta “makapanyari [met] a laki a mabayani, tan laki a mibabakal, tan masimpit dia ed panagsalita, tan malimgas a too.”​—1 Samuel 16:18; 17:23, 24, 45-51; 18:5-7.

5. Anto so nayarin mamalastog ed si David, tan panon tayon naseguro a sikato so agnagmaliw ya ontan?

⁵ Say inkabantog, inkataraki, inkatobonbalo, maong a pananalita, inkadunong ed panagtogtog, inka-onsiano ed pibabakal, panangabobon na Dios​—so ompatnag a wala lan amin ed si David. Dinanman ed saratan a bengatla so nayarin mamalastog ed sikato, balet ta agto inabuloyan iratan. Imanoen pa so ebat nen David ed si Arin Saul, a papaasawa to ed si David so anak ton marikit. Tekep na peteg a kapaabebaan, oniay inkuan nen David: “Siopa ak, tan anto so bilay ko, odino say pamilya nen amak dia ed Israel, pian siak naani so manugang na ari?” (1 Samuel 18:18) Nipaakar ed komento na sakey ya iskolar ed sayan bersikulo, oniay insulat to: “Say labay ya ibaga nen David et aliwan say personal a kualipikasyon to, aliwan say kipapasen to ed bilay, nisay kapolian to, so pakagamoran toy kanepegan a magmaliw a manugang na ari.”

6. Akin a nepeg tayon bayuboan so kapaabebaan?

⁶ Nagmaliw a mapaabeba si David lapud binidbir to a diad amin ya aspekto et matalonggaring a tuloy si Jehova nen saray ag-ayadyarin totoo. Pankelawan nen David so pangiimano ni ingen na Dios ed too. (Salmo 144:3) Amta met nen David ya antokaman a matalonggaring ed sikato et makasengeg labat ed impangipatnag nen Jehova na kapaabebaan, a nampaabeba pian tulongan, protektaan, tan asikasoen To si David. (Salmo 18:35) Agaylan abig a leksion parad sikatayo! Saray talento, agawaan, tan pribilehyo tayo so agbalot nepeg a manggawa ed sikatayon mapaatagey. “Anto so wala ed sika ya agmo naawat?” so insulat nen apostol Pablo. “No inawat mo akin et manpaspasirayew ka a singa agmo naawat?” (1 Corinto 4:7) Pian nagamoran tayo so masanton espiritu na Dios tan panggayagaan so panangabobon to, nepeg tayon bayuboan tan pansiansiaen so kapaabebaan.​—Santiago 4:6.

“Aleg a Sikayo a Dili so Ombales”

7. Anton pankanawnawa so niyarap a mismo ed si David a nayarian to lan pateyen si Arin Saul?

⁷ Anggaman agnagmaliw a mapaatagey si David lapud inkabantog to, nanimonan itan nen Arin Saul, ya andian la na espiritu na Dios, kanian inggagaem ton pateyen si David. Anggano anggapoy kasalanan nen David, sikato so tinmakas lapud napepeligro lay bilay to insan nanayam ed kalawakan. Diad sakey ya inkagawa, legan na maruksan panguusil ed si David, linmoob si Arin Saul ed sakey ya ungib, ya agto amta ya akaamot diman si David tan saray kaiba to. Si David so pinaseseg na saray bataan to ya anamoten so pankanawnawa, ya ompatnag ya inter na Dios, pian pateyen si Saul. Nilitrato tayo ed isip tayo a walara ed ambilunget ya ungib, ya oniay iyeesaes da ed si David: “Nia so agew ya inkuan nen Jehova ed sika, Nia, yawat ko so kabusol mo ed limam, tan gawaen mo ed sikato so isipen mo a maong ed sika.”​—1 Samuel 24:2-6.

8. Akin a pinokpokan nen David so inkasikato ya ombales?

⁸ Agkinabil nen David si Saul. Lapud pangaagamil to na pananisia tan anos, impalima to la iray pamaakaran ed si Jehova. Sanen tinmaynan lay ari ed ungib, si David so kinmelyaw ed sikato tan inkuanto: “Si Jehova ukomen to ita, tan si Jehova ibales to ak ed sika; balet say limak ag-onsumpa ed sika.” (1 Samuel 24:12) Anggaman amta to a walay kasalanan nen Saul ed sikato, agbinmales si David, ya agto nansalita na maabuso ed si Saul. Diad pigara nin inkagawa, pinokpokan nen David so inkasikato ya ombales. Imbes, sikato so nanmatalek ed si Jehova a mangipetek ed saray bengatla.​—1 Samuel 25:32-34; 26:10, 11.

9. Akin ya agtayo nepeg ya ombales sano makasagmak itayo na isusumpa odino panamasegsegang?

⁹ Singa si David, nayarin nidunget kayo ed mairap iran kipapasen. Nayarin susumpaen odino papasegsegangen kayo na saray kaeskuela, katrabahoan, kapamilyaan, odino arum nin agyo kapananisiaan. Agkayo ombabales. Manilalo ed si Jehova, ya onkerew kayo na masanton espiritu to ya ontulong ed sikayo. Nayarin nasagyat iratan ya agmananisia ed maong a kondukta yo tan magmaliw ira a mananisia. (1 Pedro 3:1) Antokaman so nagawa, napaseguroan kayo a naiimatonan nen Jehova so kipapasen yo tan sikatoy manggawa na bengatla nipaakar ed satan diad dugan panaon to. Oniay insulat nen apostol Pablo: “Aleg a sikayo a dili so ombales, inararo, noag ingen ikdan na pasen so sanok na Dios: ta nisulat; Siak so akankien na panamales; siak so ontumang naani, kuan na Katawan.”​—Roma 12:19.

“Dengelen Yo so Panangibangat”

10. Panon so inkaplag nen David ed kasalanan, tan panon ton sinalin sakbongan itan?

¹⁰ Linmabas so dakel a taon. Si David so nagmaliw a pinabpabli ya ari tan binmantog ed nanduruman pasen. Lapud impanbilay to a pakapatnagan na matalonggaring ya inkamatoor, kalaktip la so mararakep a salmo ya insulat to bilang panangidayew ed si Jehova, nayarin isipen na sakey a sayan too et agbalot napelag ed ambelat a kasalanan. Ingen ta sikato so nankasalanan. Sakey ya agew, anengneng na ari manlapud atep na palasyo to so sakey a magangganan bii a manaames. Sikato so nanusisa nipaakar ed sayan bii. Sanen naamtaan to a sayan bii et si Bat-seba tan say masiken ton, si Urias, so linman akibakal, sikato so impatawag nen David tan inakdolan to. Diad saginonor, naamtaan to a say bii et malukon. Pansengegan itan na baleg a gulo sano nakabatan itan! Diad silong na Mosaikon Ganggan, say pikakalugoran et sakey a krimen a walaan na dusa ya ipapatey. Maseguron inisip na ari a nayarin sakbongan so kasalanan. Kanian sikato so angipasabi na ganggan ed armada, a pasempeten da si Urias ed Jerusalem. Inilaloan nen David a sanlabin kaiba nen Urias si Batseba, balet ag-itan agawa. Lapud desperado lay David, imbaki to si Urias ed bakalan ya awit toy sulat ed si Joab, a komandante na militar. Say sulat so mangigaganggan ya iyarap si Urias ed bakalan a manresulta ed ipatey to. Inunor itan nen Joab, tan inatey si Urias. Kayari na impanngilin nen Bat-seba ed niyugalin panaon na panag-ermen, sikato so inasawa nen David.​—2 Samuel 11:1-27.

11. Anton kipapasen so imparungtal nen Natan ed si David, tan anto so reaksion nen David?

¹¹ Singa epektibo itan a paraan, anggaman amta la komon nen David a say interon pamaakaran et sankanengneng nen Jehova. (Hebreos 4:13) Linmabas so pigaran bulan, tan nianak so ugaw. Insan, diad panangidirehi na Dios, si Natan a propeta so linma ed si David. Imparungtal na propeta ed ari so sakey a kipapasen nipaakar ed sakey a mayaman a too a walaay dakdakel a karnero, ya inala tan pinarti to so alenleneg tan pinabpablin karnero na sakey a pobrin too. Satan ya istorya so anenyeg ed liknaan nen David nipaakar ed inkahustisya tan agton balot nan-inapan a walaan itan na aralem a kabaliksan. Inukom a tampol nen David so mayaman a too. Lapud sanok to, inkuan to ed si Natan: “Say laki a nanggawa na saya sikato so manepeg ya ompatey.”​—2  Samuel 12:1-6.

12. Anton panangukom so imbalikas nen Jehova sumpad si David?

¹² ‘Sika iman a laki!’ so inyebat na propeta. Inukom nen David so inkasikaton dili. Maseguron say insanok nen David so biglan naandi lapud sikatoy abaibaingan tan pirmin naermenan. Lapud abigla, sikato so dinmengel sanen imbalikas nen Natan so agnapaliisan a panangukom nen Jehova. Anggapo laray salitan makaligliwa odino makatambayo. Minudmora nen David so salita nen Jehova diad impanggawa to na mauges. Agta impapatey to si Urias panamegley na kampilan na kabusol? Say kampilan so pansengegan ni na makapasinagem iran epekto ed sankaabungan nen David. Agta maamot ton inala so asawa nen Urias? Nagawa met ed sikato so ontan a kaugsan, aliwan diad maamot, noagta mapublikon paraan.​—2 Samuel 12:7-12.

13. Panon so inkiwas nen David ed pananisiplina nen Jehova?

¹³ Say maabig ed biang nen David et agto imburi so kasalanan to. Agto nantamian si propeta Natan. Agto tinetel so arum odino angikatunongan ed ginawa to. Sanen niparungtal ed sikato iray kasalanan to, inako nen David so eebatan to, a kuanto: “Nankasalanan ak sumpa ed Jehova.” (2 Samuel 12:13) Impabitar na Salmo 51 so pirmin impanermen to ed kasalanan to tan say inkasimoon na panagbabawi to. Oniay inkerew to ed si Jehova: “Agmo ak ibantak ed arawi ed arap mo; tan agmo ekalen ed siak so masanto ya espiritum.” Sikato so manisia a si Jehova, diad panangasi to et agmanmudmora ed “puso a maralit tan mansisibkel” ed kasalanan. (Salmo 51:11, 17) Si David so nantultuloy a nanmatalek ed espiritu na Dios. Anggaman si David so agsinalimbengan nen Jehova manlapud saray makapasinagem ya epekto na kasalanan to, sikato so pinerdona nen Jehova.

14. Panon so nepeg tayon ikiwas ed pananisiplina nen Jehova?

¹⁴ “Amin nankasalanan, tan makulang ira ed gloria na Dios.” (Roma 3:23) No maminsan et nayarin napelag itayo ed ambelat a kasalanan, a singa si David. Singa say sakey a maaron ama a manidisiplina ed ananak to, ontan met so pamepetek nen Jehova ed saramay manggugunaet a manlingkor ed sikato. Anggaman makagunggona so disiplina, aliwan mainomay itan ya awaten. Diad tua, no maminsan et ‘makapaermen’ itan. (Hebreos 12:6, 11) Ingen, no ‘dengelen tayo so panangibangat’ odino disiplina, makapipulangan itayo ed si Jehova. (Uliran 8:33) Pian napanggayagaan tayo so tuloytuloy a panamendisyon na espiritu nen Jehova, nepeg tayon awaten so panametek tan panggunaetan tayon gamoran so panangabobon na Dios.

Agmanmatalek ed Maapa Iran Kayamanan

15. (a) Diad antoran paraan ya uusaren na arum a totoo iray kayamanan da? (b) Anto so pilalek nen David a pakausaran na kayamanan to?

¹⁵ Anggapo so pakapatnagan a si David so walaan na atagey a kipapasen na panagbilay odino nanlapu ed mayaman a pamilya. Balet, akatipon si David na dakerakel a kayamanan legan na impan-ari to. Unong a kabat yo la, dakel so mangiyaamot ed kayamanan da, a maagum dan paparakelen itan, odino gagastosen dan bukor. Arum so manguusar ed kuarta ra pian igloria so inkasikaran dili. (Mateo 6:2) Duma so impangusaran nen David ed kayamanan to. Nampilalekan to so pangigalang ed si Jehova. Imbalikas nen David ed si Natan so pilalek ton mangipaalagey na templo parad si Jehova pian pangikargaan ed kaban na sipanan, a wala nensaman ed Jerusalem tan “manaayam ed loob na saray kobongkobong.” Aliketan si Jehova ed getma nen David balet diad panamegley nen Natan et nibaga ed si David a say mangipaalagey ed templo et say ilalak ton si Solomon.​—2 Samuel 7:1, 2, 12, 13.

16. Antoran preparasyon so ginawa nen David parad pangipaalagey na templo?

¹⁶ Nantipon si David na materyales ya usaren ed sayan baleg a proyekton panagpaalagey. Oniay inkuan nen David ed si Solomon: “Intadiak a nipaakar ed abung nen Jehova so sanlasus libo a talento a balitok, tan sanlibo a laksa a talento a balitok, tan ed gansa tan balatyang ya agsinimbang; ta sikato so daakan; kiew met tan bato angitadia ak; et naaruman mo ra.” Diad personal a kayamanan to, sikato so anginagnag na 3,000 a talento na balitok tan 7,000 a talento na pilak.a (1 Awaran 22:14; 29:3, 4) Say mabunlok ya impangiter nen David et aliwan panagpangta, noagta panangipatnag na pananisia tan debosyon ed si Jehova a Dios. Bilang panamidbir ed Lapuan na kayamanan to, oniay inkuanto ed si Jehova: “Saray amin a bengatla nanlapu ra ed sika, tan ed kayarian mo a dili angiter kami ed sika.” (1 Awaran 29:14) Say inkabunlok nen David so amakiwas ed sikato a manggawa ed amin a nayarian to pian iyalibansa so puron panagdayew.

17. Panon ya onaplika so simbawa ed 1 Timoteo 6:17-19 diad saray mayaman tan mairap-bilay?

¹⁷ Komon ta usaren tayo met iray materyal a kaykayarian tayo a manggawa na maabig. Imbes a gegemtanen tayo so materyalistikon dalan na panagbilay, magmaong so panggunaet a nagamoran so panangabobon na Dios​—salanti say dalan na tuan kakabatan tan liket. Oniay insulat nen Pablo: “Dia ed saray mangayaman dia ed mundo, ibilin mo ed sikara ya ag-ira mantagey na linawa, tan agda met igaton so ilalo ra ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo. A manggawa ra komon na maabig, a mayaman ira komon ed saray maabig a gawa, a managpalangkap ira, a mainomay iran mangiter. A mantipon ira na nipaakar ed sikara ed sakey a maabig a pangiletnegan a niparaan ed panaon ya onsabi, pian nabembenan da so bilay, a sikato so bilay a peteg.” (1 Timoteo 6:17-19) Antokaman so kipapasen tayo ed panagbilay, manmatalek itayo ed espiritu na Dios tan gegemtanen tayo so kurang na bilay a manggawa ed sikatayon “mayaman dia ed Dios.” (Lucas 12:21) Anggapo lay mas mabli ni nen say naabobonan a talindeg ed arap na maaron mangatatawen ya Ama tayo.

Ipatnag Yo so Inkasikayo a Naabobonan ed Arap na Dios

18. Diad anton paraan ya inletneg nen David so maabig ya ehemplo parad saray Kristiano?

¹⁸ Diad interon bilay to, nanggunaetan nen David a gamoran so panangabobon nen Jehova. Oniay inkanta to: “Kasian mo ak komon, O Dios, kasian mo ak; ta say kamarerwak onsalimbeng ed sika.” (Salmo 57:1) Aliwan maapa so impanmatalek to ed si Jehova. Tinmakken si David, a “nagnap ed saray agew.” (1 Awaran 23:1) Anggaman akagawa si David na ambelat a kasalanan, sikato so nanodnonotan bilang sakey ed dakerakel a tasi na Dios ya angipatnag na alay abig a pananisia.​—Hebreos 11:32.

19. Panon so pakapangipatnag tayo ed inkasikatayo a naabobonan ed arap na Dios?

¹⁹ Diad kidudunget yo ed manguuman iran kipapasen na bilay, tandaan a no panon a tinulongan, pinabiskeg, tan impetek nen Jehova si David, ontan met so gawaen To ed sikayo. Singa met si David, si apostol Pablo so nidunget ed dakel a pananguman ed bilay to. Ingen, sikato met so nansiansian matoor diad impanmatalek to ed espiritu na Dios. Oniay insulat to: “Nayarian ko a gawaen so ganagana ed saman so mamabiskeg ed siak.” (Filipos 4:12, 13) No manmatalek itayo ed si Jehova, tulongan to itayon ontalona. Labay to itayon ontalona. No ontalineng tan onapit itayo ed sikato, ipagamor to ed sikatayo so biskeg a manggawa ed linawa to. Tan no mantultuloy itayon manmatalek ed espiritu na Dios, nayarian tayon ‘ipatnag so inkasikatayo a naabobonan ed arap na Dios’ natan tan ed ando lan ando.​—2 Timoteo 2:15.

[Paimano ed leksab]

Panon Yon Ebatan?

• Panon itayon makapanalwar sumpad inkamapaatagey?

• Akin ya ag-itayo nepeg ya ombales?

• Anto so nepeg a panmoria tayo ed disiplina?

• Akin a nepeg itayon manmatalek ed Dios tan aliwan diad kayamanan?

[Litrato ed pahina 16, 17]

Nanmatalek si David ed espiritu na Dios tan nanggunaetan ton gamoran so panangabobon To. Ontan met kasi so gagawaen yo?

[Litrato ed pahina 18]

“Saray amin a bengatla nanlapu ra ed sika, tan ed kayarian mo a dili angiter kami ed sika”