Panangasikaso ed Saray Maedad la—Sakey a Makristianon Responsabilidad
“Angga ni ed inkamasiken Siak iman, tan angga ni ed pan-uban awiten ta kayo.”—ISAIAS 46:4.
1, 2. Panon a miduma so panangasikaso na mangatatawen ya Ama tayo ed panangasikaso na totoon atateng?
PAPABALEGEN na saray debosyonadon atateng so ananak da manlap ud kapangiyanak, inkaugaw, anggad pagmaliw dan katayatdang. Anggan sano wala la’d edad iray kalangweran tan wala met la iray pamilya ra, saray kaamaan tan kainaan da so mantutultuloy nin mangiiter ed sikara na maaron panangasikaso tan tulong.
2 Anggaman walay limitasyon ed nagawaan na totoo ed ananak da, say mangatatawen ya Ama tayo so lawas makapangiter na maaron panangasikaso tan tulong ed saray matoor a lingkor to. Oniay inkuan nen Jehova ed pinili ton totoo to nensaman: “Angga ni ed inkamasiken Siak iman, tan angga ni ed pan-uban awiten ta kayo.” (Isaias 46:4) Agaylan makapaseguro iratan a salita parad saray maedad lan Kristiano! Ag-ikakaindan nen Jehova iramay manmamatoor ed sikato. Imbes, insipan to a tulongan, suportaan, tan igiya to ra legan na pambilay da, anggad itakken da.—Salmo 48:14.
3. Anto so konsideraen ed sayan artikulo?
3 Panon tayon naalig so maaron panangiyansakit nen Jehova ed saray maedad la? (Efeso 5:1, 2) Konsideraen tayo iray paraan a pangasikaso na saray ananak, manangasikaso na kongregasyon, tan sinansakey a Kristiano ed saray maedad lan membro na sankamundoan ya impanaagi tayo.
Say Responsabilidad Tayo Bilang Ananak
4. Anto so responsabilidad na Kristianon ananak ed atateng da?
4 “Igalang mo so amam tan inam.” (Efeso 6:2; Exodo 20:12) Diad sayan simpli ingen ta makabkabaliksan ya inaon ed Hebreon Kasulatan, pinanonotan nen apostol Pablo iray ananak nipaakar ed responsabilidad da ed atateng da. Balet panon ya onaplika irayan salita ed panangasikaso ed saray maedad la? Ontulong ed sikatayo so makapaligsay-puson alimbawa nen sakbay-Kristianon panaon pian naebatan itan a tepet.
5. (a) Anto so mangipapabitar ya ag-alingwanan nen Jose iray obligasyon to ed pamilya to? (b) Anto so kabaliksan na pangigalang ed atateng tayo, tan anton maabig ya alimbawa so impanengneng nen Jose nipaakar ed saya?
5 Diad loob na masulok a 20 a taon, ag-anengneng nen Jose so masiken lan ama to, say patriarkan si Jacob. Balet, mapatnag ya agnaandi so panangaro nen Jose ed ama ton si Jacob. Diad tua, sanen impabidbir la nen Jose so inkasikato ed agagi to, oniay intepet to: “Mabilay ni amak?” (Genesis 43:7, 27; 45:3) Diad saman a panaon, say dalin na Canaan so asalot na eras. Kanian, oniay impasabi nen Jose ed si ama to: “Onla kayo dia ed siak, agkayo mantatantan. Et manayam ka ed dalin a Gosen tan wala ka naani ed asingger ed siak . . . Et taganoen ta kayo’d man.” (Genesis 45:9-11; 47:12) On, say panangigalang ed maedad lan atateng so mangilaktip ed panalimbeng ed sikara tan pangitarya na nakaukolan dan materyal sano agda la nayarian a legpeten so inkasikaran dili. (1 Samuel 22:1-4; Juan 19:25-27) Si Jose so maliket ya angawat ed sayan responsabilidad.
6. Panon ya impanengneng nen Jose so puron panangaro ed ama to, tan panon tayon naalig so alimbawa to?
6 Lapud panamendisyon nen Jehova, si Jose so nagmaliw a sakey ed saray sankayamanan tan sankaimpluensyaan a too diad Ehipto. (Genesis 41:40) Balet agto nampa-importante nisay agto la naarap so mangigalang ed 130 años ya ama to. Sanen naamtaan ton asingger lay Jacob (odino Israel), “imparaan to so karusa to, insan linma ya onabet ed kinen Israel ya ama to, diman ed Gosen; et impatnag to so inkasikato ed sikato, tan linakap to so beklew to, tan nannangis na abayag a sankalakap to.” (Genesis 46:28, 29) Sayan impangabet to et aliwa lambengat a panangipanengneng na respeto. Inar-aro nen Jose so masiken lan ama to tan agto imbaing ya ipanengneng so panangaro to. No walaan itayo na maedad laran atateng, kasin ontan met so mabunlok a pangipapanengneng tayo na panangaro tayo ed sikara?
7. Akin a kinaliktan nen Jacob so niponpon ed Canaan?
7 Say debosyon nen Jacob ed si Jehova so nansiansian mabiskeg anggad impatey to. (Hebreos 11:21) Lapud pananisia to ed saray sipan na Dios, inkerew nen Jacob ya iyalis so bangkay to diad Canaan. Pinagalangan nen Jose so ama to diad impangunor to ed sayan kerew, anggaman nalalanor so baleg a panangisakripisyo tan sagpot.—Genesis 47:29-31; 50:7-14.
8. (a) Anto so manunan mamakiwas ed sikatayo pian asikasoen iray maedad lan atateng tayo? (b) Anto so ginawa na sakey a sigpot-panaon a lingkor ta pian naasikaso iray maedad lan atateng to? (Nengnengen so kahon ed pahina 17.)
8 Anto so amakiwas ed si Jose a mangasikaso ed ama to? Anggaman saray sengegan et say panangaro tan otang a linawa to ed samay angiter ed sikato na bilay tan amabaleg ed sikato, maseguron alikna met nen Jose so pirmin pilalek a paliketen si Jehova. Ontan met so nepeg a pilaleken tayo. Oniay insulat nen Pablo: “No wala so balo a wala’ra so anak to odino apo, amtaen na saraya komon ya unona ya ipanengneng so kasimpitan da ed kaamong da’n dili, tan tumangan da so kaatengan da: ta saya sikato so makapalikliket ed arap na Dios.” (1 Timoteo 5:4) On, say aro ed si Jehova tan mapagalang a takot ed sikato so mamakiwas ed sikatayon mangasikaso ed maedad laran atateng tayo, antokaman iray kairapan a nalalanor ed panggawa ed satan.a
No Panon a Nipatnag na Mamatatken so Panangiyansakit Da
9. Siopa so tinuro nen Jehova a manpastol ed pulok, kalaktip laray maedad a Kristiano?
9 Sanen asingger lan ompatey si Jacob, tinukoy to si Jehova bilang “say [tuan] Dios ya anagano ed siak ed amin a bilay ko ya abayag lan anggad natan.” (Genesis 48:15) Natan, papastolan nen Jehova iray mangaraldalin a lingkor to panamegley na saray Kristianon manangasikaso, odino mamatatken, diad panangidirehi na Anak to, si Jesu-Kristo, ‘say manunan pastol.’ (1 Pedro 5:2-4) Panon a naalig na saray manangasikaso si Jehova legan dan aasikasoen iray maedad lan membro na pulok?
10. Anto so ginawa pian nitarya so materyal a tulong ed saray maedad lan Kristiano? (Nengnengen so kahon ed pahina 19.)
10 Kayarin tuloy na inkiletneg na Kristianon kongregasyon, anuro iray apostol na “pitoran lalaki a . . . napno na espiritu tan kakabatan” pian mangasikaso ed ‘inagew-agew a panginabang’ na tagano diad limog na mankaukolan iran Kristianon babalo. (Gawa 6:1-6) Diad saginonor, imbangat nen Pablo so manangasikason si Timoteo ya ilista to iramay napanuliranan a maedad lan balo a nepeg a mangawat na materyal a tulong. (1 Timoteo 5:3, 9, 10) Ontan met, saray manangasikaso na kongregasyon natan so mabulos a mangiyareglo ed praktikal a pananulong ed saray maedad lan Kristiano sano nakaukolan. Balet, nagkalalo ni so nakaukolan diad pangasikaso ed saray matoor a maedad la.
11. Anto so imbaga nen Jesus nipaakar ed mankaukolan a balon bii ya angipelag na melag a kontribusyon?
11 Diad pansamposampot lay mangaraldalin a ministeryo to, yinmurong si Jesus ed templo tan “ninengneng to no panon so panangipelag na saray dakel a katooan na pilak ed panangisimpenan na kayamanan.” Insan walay naimano to. Oniay inkuan na salaysay: “Dinmago so sakey a duka a biin balo et angipelag na duaran blankas, a katiponan to so sakey a marabilis.” Tinawag nen Jesus iray babangatan to tan inkuan to: “Tua kuan ko ed sikayo, Sayan duka a bii a balo angipelag na dakdakel nen saray amin a manpepelag ed panangisimpenan na kayamanan. Ta sikaran amin angipelag ira ed nasusulokan da; sikato balet dia ed inka-ukolan to impelag to ya amin so wala ed sikato, salanti amin a pambilay to.” (Marcos 12:41-44) No ikonsidera so kantidad na kuarta, melmelag so kontribusyon na balon bii, balet amta nen Jesus a papablien na mangatatawen ya Ama to so ontan ya interon-kamarerwan panangipatnag na debosyon. Antokaman so edad na dukan balo, ag-imbaliwala nen Jesus so ginawa na balon bii.
12. Panon a nipatnag na mamatatken so apresasyon da ed walan nitutulong na saray maedad lan Kristiano?
12 Singa si Jesus, ag-ibabaliwala na saray Kristianon manangasikaso no anto so nagagawaan na saray maedad la pian niyalibansa so tuan panagdayew. Walay rason na saray mamatatken pian komendaan iray maedad la a mibibiang ed ministeryo, mibibiang ed saray miting, walaan na positibon impluensya ed kongregasyon, tan ed panagsungdo ra. Say masimoon a balikas na panamaseseg so makatulong ed saray maedad la pian ‘manliket’ ed sagradon serbisyo ra, a paliisan iray makapadismayan panangikompara ed nagagawaan na arum a Kristiano odino ed apalabas iran agawaan da la.—Galacia 6:4.
13. Diad antoran dalan a nausar na saray mamatatken iray abilidad tan eksperiensya na saray maedad la?
13 Nayarian na mamatatken a bidbiren so makanan tulong na saray maedad lan Kristiano diad pangusar da ed eksperiensya tan saray abilidad na saray maedad la. Saray napanuliranan a maedad la so nayarin sagpaminsan ya usaren ed saray demostrasyon odino interbio. “Maniimanon maong iray dumerengel tan ontatalineng ira sano man-interbio ak na maedad lan agin laki odino bii ya amabaleg ed ananak da diad katuaan,” so inkuan na sakey a matatken. Nanreport iray mamatatken ed sananey a kongregasyon nipaakar ed sakey a 71 años a payunir ya agin bii a matalona ed pananulong to ed saray manangipalapag na Panarian pian magmaliw a regular ed lawak na kimeyan. Papasesegen to met ira a manggawa ed “saray manuna” a bengatla, a singa say panagbasa na Biblia tan say inagew-agew a teksto insan say pandalepdep ed babasaen da.
14. Panon ya impatnag na sakey ya ulop na mamatatken so apresasyon da ed sakey a matakken lan kaparan manangasikaso?
14 Papablien met na mamatatken so tulong na saray maedad lan kapara ran manangasikaso. Si José, a masulok to lan 70 años tan manlilingkor bilang matatken ed loob na dakel lan dekada, so agano nin nampaopera. Lapud mabayag so pampaabig to, inisip to ya ikbanan so pribilehyo to bilang mangidadaulon manangasikaso. “Asurprisa ak ed reaksion na arum a mamatatken,” so inkuan nen José. “Imbes ya awaten da so suhestion ko, tinepet da no anton praktikal a tulong so nakaukolan ko pian nitultuloy kon nagawaan iray responsabilidad ko.” Diad tulong na sakey a malangwer nin elder, nitultuloy nen José so maliket a panagserbi to bilang mangidadaulon manangasikaso, tan saya so bendisyon ed kongregasyon. Oniay inkuan na sakey a kapara ton matatken: “Aapresyaen a maong na agagi so kimey nen José bilang sakey a matatken. Sikato so papablien tan rerespetoen da lapud eksperiensya tan alimbawa na pananisia to. Napapabiskeg to so kongregasyon mi.”
Iyansakit so Balang Sakey
15. Akin a nepeg a pampagaan na amin a Kristiano so pankaabigan na saray maedad lan walad limog da?
15 Aliwa lambengat a saray ananak a walaay maedad lan atateng tan saray aturon lingkor so nepeg a mangiyansakit ed saray maedad la. Diad impangiyaliling nen Pablo ed Kristianon kongregasyon ed say laman na too, oniay insulat to: “Say Dios inuksoy to so laman ed sikato ya inikdan to na lalon daakan a galang so kabiangan a makulang; pian anggapo so pansisian ed laman, noag saray kabiangan wala so dili a panagpaga ra ed sakey tan sakey.” (1 Corinto 12:24, 25) Pian walay pantutunosan ed ikurang na Kristianon kongregasyon, nepeg a pampagaan na kada membro so pankaabigan na saray kapananisiaan to, pati saray maedad la.—Galacia 6:2.
16. Panon tayon nipatnag so interes tayo ed saray maedad la sano onatendi itayo ed saray Makristianon miting?
16 Say Kristianon pantitipon so maabig a pankanawnawa pian nipatnag so interes tayo ed saray maedad la. (Filipos 2:4; Hebreos 10:24, 25) Kasin ipapanaon tayo so pitongtong ed saray maedad la diad saratan ya okasyon? Anggaman matukoy so pangomusta ed kipapasen da ed pisikal, sarag tayo kasi so ‘manginabang ed sikara na espiritual a langkap,’ a nayarin sakey a makapabiskeg ya eksperiensya odino punto ed Kasulatan? Lapud limitado lay pakasarag na arum a maedad la, maabig no sikatayo so onasingger la ed sikara imbes a sikara so alagaren tayon onasingger ed sikatayo. No makapuy lay pakadngel da, nayarin nakaukolan tayo so mansalitan matantan tan malinew ya ibekas iratan. Ta pian niwala so peteg a ‘pakapampapabiskegan ed balang sakey’ nepeg tayon talinengen a maong so ibabaga na maedad lan agi.—Roma 1:11, 12, NW.
17. Panon tayon nipatnag so panangiyansakit tayo ed saray maedad lan Kristiano ya apukok la ed abung?
17 Panon to no agla makaatendi ed Makristiano iran miting so pigaran maedad la? Ipapabitar na Santiago 1:27 ya obligasyon tayon “dalawen so saray ulila tan babalo a bibii ed kaermenan da.” Tan panlikliketan na saray maedad la no ondalaw tayo ed sikara! Si Pablo so begtebegtew la sanen sikatoy nipriso diad Roma nen manga 65 K.P. Pinirawat ton nanengneng so kakimeyan ton si Timoteo tan oniay insulat to: “Gawam so nayarian mo pian onla ka ed siak a magano.” (Filemon 9; 2 Timoteo 1:3, 4; 4:9) Anggaman aliwa iran literal a nipriso, arum a maedad la so apukok ed abung da lapud problema ed bunigas. Nayarin singa labay dan ibaga ya, ‘Ipangasi yo, dalaw yo ak pa.’ Kasin onkikiwas itayo ed ontan iran kerew?
18. Antoran gunggona so nagamoran ed ibisita tayo ed saray maedad la?
18 Agbalot leleglemewen so makagunggona iran epekto na ibibisita ed masiken odino akulaw lan agi ed espiritual. Sanen walad Roma so sakey a Kristianon manngaran na Onesiforo, sikato so maseet a nananap ed si Pablo, tan nalmo to, tan ‘aramarama a nanligliwa ed sikato.’ (2 Timoteo 1:16, 17) “Labalabay koy mituyaw ed saray kalangweran,” so inkuan na sakey ya akulaw lan agi. “Say mas labalabay ko et ipapasen da ak a membro na pamilya ra. Makapaseseg itan ed siak.” Oniay inkuan ni na sakey ya akulaw lan Kristiano: “Apresyaen kon tuloy sano walay mangipawit ed siak na kard, ontawag ed siak ed telepono ed loob labat na pigaran minuto, odino sagpaminsan ya ombisita ed siak. Makaparepresko itan ed siak.”
Tutumangan nen Jehova Iramay Mangiyaansakit
19. Antoran bendisyon so nagamoran diad pangasikaso ed saray maedad la?
19 Say panangasikaso ed saray maedad la so manresulta ed dakel a bendisyon. Say pilimog ed saray maedad la tan pangikana ed pikakabat tan eksperiensya ra so sakey a nikaduman pribilehyo. Naeksperiensya na saray mankokomponi so babaleg a liket lapud panangiter, ontan met ed liknaan a walaay agawaan tan akindalem a kareenan diad impanumpal ed Makasulatan a responsabilidad da. (Gawa 20:35) Niarum ni, agnakaukolan ya ontakot iramay mangaasikaso ed saray maedad la ya ompan paulyanan ira sano ontakken met la ra. Oniay ipapaseguro ed sikatayo na Salitay Dios: “Say mapalabo a kamarerwa napataba; et say mansalog nasalog met.”—Uliran 11:25.
20, 21. Panon so panmoria nen Jehova ed saramay mangaasikaso ed saray maedad la, tan anto so nepeg a determinasyon tayo?
20 Tutumangan nen Jehova iray matakot ed Dios ya ananak, manangasikaso, tan arum niran manangiyansakit a Kristiano lapud bulos-linawa a pangaasikaso ra ed saray pankaukolan na maedad lan kapananisiaan da. Mitunosan itan ya awawey ed sayan uliran: “Say walaan na panangasi ed duka pautangen to si Jehova, et say maong a gawa to ipawil to ed sikato a bayaran.” (Uliran 19:17) No say aro so mamakiwas ed sikatayon mangipatnag na kamaongan ed saray duruka tan mairap-bilay, satan a panangiter so ipasen na Dios bilang pautang ed sikato a bayaran to na saray bendisyon. Bayaran to itayo met ed maaron pangaasikaso tayo ed saray maedad lan kaparan managdayew, a dakel ed sikara so “duruka ed sayan mundo [balet ta] mayaman ed pananisia.”—Santiago 2:5.
21 Agaylan mabunbunlok so ibayar na Dios! Laktipen na satan so andi-anggaan a bilay. Parad dakerakel a lingkor nen Jehova, satan so magnayon a bilay diad paraison dalin, a ditan et naekal la ray epekto na atawir a kasalanan tan panggayagaan la na saray matoor a maedad la so kipawil na kaksilan da sanen kalangweran ni ra. (Apocalipsis 21:3-5) Diad pantatalaran tayo ed satan ya abenditon panaon, itultuloy tayon sumpalen so Makristianon responsabilidad tayo ya asikasoen iray maedad la.
[Paimano ed leksab]
a Parad praktikal iran suhestion ed no panon ya asikasoen iray maedad laran atateng, nengnengen so Awake! na Pebrero 8, 1994, pahina 3-10.
Anto Iray Ebat Yo?
• Panon a nigalang na ananak so maedad lan atateng da?
• Panon a nipatnag na mamatatken so panamabli ra ed maedad laran membro na pulok?
• Anto so nagawaan na saray Kristiano pian nipatnag da so puron interes ed saray maedad la?
• Antoran bendisyon so nagamoran ed panangasikaso ed maedad laran Kristiano?
[Kahon ed pahina 17]
Sanen Mankaukolan na Tulong Iray Atateng To
Si Philip et manlilingkor bilang boluntaryon komikimey ed konstruksion diad Liberia nen 1999 sanen abalitaan ton grabe lay sakit nen ama to. Lapud amta ton mankaukolan na tulong so ina to, denesidi to so onsempet pian ipatambal so ama to.
“Aliwan mainomay so desisyon kon onsempet,” so nanonotan nen Philip, “balet aliknak a say manunan obligasyon ko et say atateng ko.” Diad loob na tinmumbok a taloran taon, niyalis to so atateng to diad mas matukoy ya ayaman tan diad tulong na saray kapara ran Kristiano diman et akaadapta ira ed ayaman da pian naasikaso iray nikaduman pankaukolan nen ama to.
Mas akaparaan la natan so ina nen Philip a mangasikaso ed graben pansasakit nen ama to. Nen agano ni labat et akaawat si Philip na imbitasyon a mankimey bilang boluntaryo diad sangan opisina na saray Tasi nen Jehova ed Macedonia.
[Kahon ed pahina 19]
Agda Imbaliwala Iray Pankaukolan To
Sanen si Ada, sakey ya 85 años a Kristiano diad Australia, so agla makapaway ed ayaman to lapud makapuy a bunigas, inyuksoy na mamatatken ed kongregasyon so panulong ed sikato. Inorganisa ra so sakey a grupo na saray kapananisiaan a makatulong ed sikato. Maliket irayan agagi a mangasikaso ed saray kimey a singa say panaglinis, panagpesak, panagluto, tan pangasikaso ed arum niran bengatla.
Inggapo itan ya itutulong ngalngali sakey a dekada lay apalabas. Anggad natan et masulok lan 30 a kaparan Tasi nen Jehova so tinmulong a mangasikaso ed si Ada. Sikato so bibisitaen da nin siansia, ya ibabasaan da na saray publikasyon na Biblia, ipapaamta ra ed sikato so iyaaligwas ed espiritual na saramay walad kongregasyon, tan sikatoy maparanay a kaiba ran manpikasi.
Oniay komento na sakey a Kristianon matatken: “Ipapasen na saramay mangaasikaso ed si Ada a pribilehyo so ontulong ed sikato. Dakel so napapaseseg ed matoor a serbisyo to diad dakel lan dekada, tan agda nibaliwala iray pankaukolan to.”
[Litrato ed pahina 16]
Kasin mabunlok itayo ed panangipatnag tayo na panangaro ed maedad laran atateng tayo?
[Saray litrato ed pahina 18]
Nayarian na amin ed kongregasyon so mangipatnag na panangaro ra ed maedad laran kapananisiaan da