Tepetepet Manlapud Saray Managbasa

Antoy labay ya ibaga nen Jesus sanen imbaga to ed saray babangatan ton: “Anengneng ko si Satanas a naplag nanlapu ed tawen a singa kirmat”?

Kapkapampili nen Jesus ed 70 iran babangatan, tan “imbaki to ra a sanderwa ed arap to, ed amin a syudad tan pasen, a sikaton dili asingger la a laen to.” Sanen pinmawil so 70, sikaray malikeliket lapud matalonan impanpulong da. “Katawan, anggan saray demonyo apatulok mi ra lapud ngaran mo,” so inkuan da. Kayari ran imbaga itan, oniay inkuan nen Jesus: “Anengneng ko si Satanas a naplag nanlapu ed tawen a singa kirmat.”​—Lucas 10:1, 17, 18.

Diad primero et ompatnag a tutukoyen nen Jesus so sakey ya ebenton agawa la. Ingen, kayari na 60 taon na impanalambit nen Jesus ed saray salita ed tagey, inusar na masiken lan apostol Juan so mipara iran salita, sanen insulat to: “Nibantak dia ed dalin so baleg a dragon, say daan ya uleg, a manngaran na Diablo tan si Satanas, a sikato so mantila ed lapag na sankamundoan; nibantak dia ed dalin, tan saray anghel to nibantak ira ya alanor ed sikato.”​—Apocalipsis 12:9.

Sanen insulat nen Juan iratan a salita, wala ni’d tawen si Satanas. Panon tayon naseguro? Lapud say Apocalipsis et sakey a libro na propesiya, aliwan awaran. (Apocalipsis 1:1) Kanian, agni nibasileng si Satanas diad dalin sanen mabilay ni si Juan. Diad tua, ipapatnag na ebidensya a saya so agawa kayarin tuloy na inkitrono nen Jesus bilang Ari na Panarian na Dios nen 1914.a​—Apocalipsis 12:1-10.

Akin sirin et sinalambit nen Jesus a singano apagit lay Satanas manlapud tawen? Isusuheri na arum ya iskolar a babaaten nen Jesus iray babangatan to lapud agmanepeg a panlalastog da. Panisiaan da a singano oniay ibabaga to: ‘Tinmalona kayo ed saray demonyo, balet agkayo magmamaliw a malastog. Si Satanas et nagmaliw a makinon, a sengegan itan na biglan inkaplag to.’

Agtayo nayarin ipilit so panmoria tayo nipaakar ed satan. Balet, singano mas posible a si Jesus et mililiket ed saray babangatan to tan tutukoyen to so pakaandi nen Satanas diad arapen. Mas kabisadon tuloy nen Jesus nen say siopaman ed saray babangatan to so nipaakar ed mauge-uges a pambusol na Diablo. Isipen pa so liket ya alikna nen Jesus sanen nadngel ton apatulok na saray ag-ayadyarin totoon babangatan to iray mabiskeg a dedemonyo! Sayan impamatulok ed saray demonyo so pagpauna lambengat ed arapen a panaon a si Jesus, bilang Miguel ya arkanghel, so mibakal ed si Satanas tan ibasileng to diad dalin manlapud tawen.

Sanen inkuan nen Jesus ya anengneng ton “naplag” la si Satanas, sikatoy mapatnag a mangidadanet ed seguradon kapelag nen Satanas. Saya so mipadpara ed arum a propesiya ed Biblia a manutukoy ed arapen iran ebento a singano agawa la. Alimbawa, imanoen no panon a nibalikas so pigaran kabiangan na propesiya nipaakar ed Mesias diad Isaias 52:13–53:12 a singano agawa la. Maseguron ibabalikas nen Jesus so kompiyansa a nagawa so kapagit nen Satanas ed tawen unong ed gagala na Ama To. Segurado met si Jesus a diad aturon panaon na Dios, si Satanas tan saray demonyo to so nibantak ed kaaralman tan sigpot lan naderal diad saginonor.​—Roma 16:20; Hebreos 2:14; Apocalipsis 20:1-3, 7-10.

[Paimano ed leksab]