No Akin a Dakel so Manduaruwa a Napankasakey na Relihyon so Katooan

“AROEN mo so kaparam a too.” (Mateo 22:39) Sayan manunan totontonen ed kondukta so irarayew na dakel a relihyon. No sarayan relihyon et epektibo ed pangibabangat da ed saray membro ra ya aroen so kapara ran too, saray pulok da so makapan-uulop tan mankakasakey. Balet, ontan kasi so naiimano yo? Kasin mabiskeg ya impluensya iray relihyon parad pankakasakey? Oniay intepet ed agano nin surbi diad Alemanya: “Kasin pankakasakeyen na saray relihyon so totoo, odino saratan so lalon mamubuyak ed sikara?” Diad saramay inmebat, 22 porsiento so mangipapasen a pankakasakeyen na saray relihyon so totoo, bangta 52 porsiento so mangipapasen a saratan so mangaapag, odino mamubuyak, ed sikara. Nayarin ontan met so panmoria na saray totoo ed bansa yo.

Akin a dakel so manduaruwa a napankasakey na relihyon so katooan? Nayarin lapud amta ra so agawgawa ed apalabas. Imbes ya impan-uulop na relihyon so totoo, mabetbet a satan so amuyak ed sikara. Diad arum a kipapasen, say relihyon so anakbong ed saray makapasinagem a tuloy ya inkaruksa. Konsideraen so pigaran alimbawa dia labat ed apalabas a 100 a taon.

Inimpluensyaan na Relihyon

Diad komaduan guerra mundial, saray Romano Katoliko ed Croatia tan saray Ortodokso ed Serbia diad saray Balkan so nanlalaban. Bibidbiren na namparan grupo a tutumboken da si Jesus, ya angibangat ed papatumbok to ya aroen day kapara ran too. Ingen, say panlalaban da so angitonton ed “sakey ed saray nirekord a makapakebbiew a tuloy a panamatey ed sibilyan,” unong ya inkuan na sakey a managsukimat. Atalagnaw so mundo diad impamatey ed masulok a 500,000 a lalaki, bibii, tan ugugaw.

Nen 1947, say baleg a kabiangan na India so awalaan na populasyon a ngalngalin 400 a milyon​—ngalngalin kakalima na populasyon ed mundo​—a maslak et Hindu, Muslim, tan Sikh. Sanen apaldua so India, nianak so bansan Islam a Pakistan. Diad saman a panaon, nilasus libo iran takas a nanlapud satan a duaran bansa so pinopoolan, pinepekpek, pinapairap, tan pinapaltog diad nantutumbokan a relihyoson panamatey.

Nilikud ni ed saratan a makapagonigon ya alimbawa, say sesga na terorismo so pinmarungtal diad inggapo na balon siglo. Natan et manaalerto so interon mundo lapud terorismo, tan ibabaga na dakel a teroristan grupo a konektado ira ed sakey a relihyon. Kanian ag-ipapasen so relihyon bilang manangiyalibansa na pankakasakey. Imbes, mabetbet ya isisiglaot itan ed karawalan tan agpankakasakey. Agpankelawan sirin ya inkompara na peryodikon-magasin a FOCUS ed pulbura iray manunan relihyon ed mundo​—Budismo, Kakristianoan, Confucianismo, Hinduismo, Islam, Judaismo, tan Taoismo.

Pansasangsang ed Limog na Saray Membro

Bangta manlalaban so pigaran relihyon, arum so nagugulo lapud pansasangsang ed limog na saray membro. Singa bilang, diad agano niran taon, saray iglesia na Kakristianoan so naaapag lapud saray agmanampot a debati nipaakar ed doktrina. Oniay namparan itetepet na klero tan say lego: Kasin naabuloyan so pankontrol ed panag-anak tan panagpaekal? Nayari kasin ordinaan bilang papari so bibii? Panoy nepeg a panmoria na simbaan ed homoseksualidad? Nepeg kasin abobonan na relihyon so pambabakal? Lapu ed satan ya agpankakasakey, dakel so manuumameng, ‘Panon a napankasakey na relihyon so katooan no agto anggan napankasakey iray dilin membro to?’

Malinew a say relihyon ed inkalapagan so sinmaew a mangipaseseg na pankakasakey. Balet kasin amin a relihyon et naaapag-apag? Kasin wala so miduman relihyon a makapankasakey ed katooan?

[Litrato ed pahina 3]

Popolis ya asugatan diad impanlalaban na relihyoso iran grupo ed India nen 1947

[Credit Line]

Nilitrato na Keystone/Getty Images