Nagmaliw a Petepeteg Iray Pagpaunan Panangiparungtal na Panarian na Dios

“Maong no imatleken yo [so mapropetikon salita] a singa bilang sakey a silewan ya onsisinag ed pasen ya ambilunget.”​—2 PEDRO 1:19.

1. Anto so walan pandumaan a naromog tayo diad mundo natan?

MANTUTUMBOKAN a krisis​—ontan so naynay a nagagawa ed mundo natan. Manlapud pakadederal na kaliberliber anggad terorismo ed mundo, ompapalalo iray problema na katooan a singano agla naamper. Anggan saray relihyon ed mundo so agmakatulong. Diad tua, mabetbet a papalooren da iray nagagawa diad pangisusugsog day inkapanatiko, panagbusol, tan nasyonalismo a mangaapag ed totoo. On, unong a nipasakbay la, say “makapal a kabilungetan” so manasakbong ed “saray balbaley” odino nasyones. (Isaias 60:2) Balet, minilyon so matalek met a maniilalo ed arapen. Akin? Lapud maniimano iran maong ed mapropetikon salita na Dios “bilang sakey a silewan ya onsisinag ed pasen ya ambilunget.” Papaigiya ira ed “salita,” odino mensahe na Dios, a naromog ed Biblia.​—2 Pedro 1:19.

2. Unong ed propesiya nen Daniel nipaakar ed “panaon na kasumpalan,” siopa lambengat so naikdan na espiritual a pakatalos?

² Nipaakar ed “panaon na kasumpalan” odino anggaan, oniay insulat nen propeta Daniel: “Dakerakel naani so saray ombatik ya onla tan ompawil, tan say pikakabat ondaak naani. Dakel naani so mangogol na inkasikara lanlamang, tan paputien da so inkasikara lanlamang, tan nalinisan ira; balet saray marelmeng manggawa ra naani a mareldelmeng; et anggapo ed saray marelmeng so makatalos naani; balet saray makabat makatalos ira naani.” (Daniel 12:4, 10) Say espiritual a pakatalos so nigana lambengat ed saramay masimoon ya “ombatik ya onla tan ompawil,” odino maseet a manaaral ed Salitay Dios, manpapasakop ed saray estandarte to, tan manggugunaet a manggawa ed linawa to.​—Mateo 13:11-15; 1 Juan 5:20.

3. Legan na dekaday 1870, anton importantin katuaan so atebek na saray inmuunan estudyante na Biblia?

³ Kasakbayan la na dekaday 1870, sakbay ya onggapo so ‘kaunoran iran agew,’ insindag nen Jehova a Dios so nagkalalon liwawa nipaakar ed “saray misteryo na panarian na tawen.” (2 Timoteo 3:1-5; Mateo 13:11) Diad saman a panaon et atebek na sakey a grupo na saray estudyante na Biblia a say ipawil nen Kristo et agnanengneng, a midumaan ed papanisiaan na karaklan. Sano sikatoy nitrono la ed tawen, si Jesus so ompawil diad pantalos ya ipaarap to so maarin panangimano to diad dalin. Say nanenengneng a tugyop na saray tanda so mamasakbay ed saray babangatan to a ginmapo la so agnanengneng a kiwawala to.​—Mateo 24:3-14.

Sano Magmaliw lan Petepeteg so Pagpaunan Panangiparungtal

4. Panon so pamapabiskeg nen Jehova ed pananisia na saray lingkor to natan?

⁴ Say nipasingawey a transpigurasyon et masnag a pagpaunan panangiparungtal ed si Kristo diad gloria na Panarian. (Mateo 17:1-9) Satan a pasingawey so amabiskeg ed pananisia nen Pedro, Santiago, tan Juan ed panaon sanen dakel so agla tinmumbok ed si Jesus lapud agto ginawa iray agmakasulatan ya iilaloan da. Ontan met, diad sayan panaon na anggaan et papabiskegen nen Jehova so pananisia na saray lingkor to diad lalon pangisisindag to na liwawa nipaakar ed satan a makapakelaw a pasingawey tan ed dakel niran misiglaotan a propesiya. Konsideraen tayo pa natan so pigara ed saratan a makapabiskeg-pananisian espiritual iran peteg lan nagawa.

5. Siopa so apaneknekan a Kabontatala ed agew, tan kapigan tan panon so ‘impelnak’ to?

⁵ Diad impanukoy to ed transpigurasyon, oniay insulat nen apostol Pedro: “Wala met ed sikami so salita na propesiya a lalon maando; et maong no imatleken yo a singa bilang sakey a silewan ya onsisinag ed pasen ya ambilunget, angga ed ipelnak na kabuasan ompelnak ed kapusoan yo.” (2 Pedro 1:19) Satan a piguratibon Kabontatala ed agew, odino “kabontatalan masnag dia ed kabuasan,” et say niglorian Jesu-Kristo. (Apocalipsis 22:16) Sikato so ‘pinmelnak’ nen 1914 sanen niletneg so Panarian na Dios ed tawen, ya ananda ed gapoan na balon panaon. (Apocalipsis 11:15) Diad nipasingawey a transpigurasyon, anengneng si Moises tan Elias a walad abay nen Jesus, a mitotongtong ira ed sikato. Siopa so ililitrato ra?

6, 7. Siopara so inrepresenta nen Moises tan Elias diad transpigurasyon, tan antoran importantin detalye so ipaparungtal na Kasulatan nipaakar ed saramay inrepresenta ra?

⁶ Lapud akaiba nen Kristo ed gloria to si Moises tan Elias, sayan duaran matoor a tasi so mangirepresenta ed saramay miuley ed si Jesus diad Panarian to. Say pakatalos a si Jesus so walaan na saray kaiban manuley so mitunosan ed nipasingawey a pagpaunan panangiparungtal ed nitronon Mesias ya anengneng nen propeta Daniel. Anengneng nen Daniel so “singa sakey ya anak na too” a mangaawat ed “lawas a panuley” manlapud ‘Kadaanan na Saray Agew,’ si Jehova a Dios. Balet imanoen pa no anto so nipanengneng ed si Daniel kayarin tuloy na satan. Oniay insulat to: “Say panarian tan panuley, tan say kabaleg na saray panarian ed leksab na amin a tawen niiter naani ed saray baley na saray sasanto na Sankatagyan.” (Daniel 7:13, 14, 27) On, masulok a limaran siglo sakbay na transpigurasyon, imparungtal la na Dios a walaray “sasanto” a mibiang ed maarin karlangan nen Kristo.

⁷ Siopa iray sasanto diad pasingawey ed si Daniel? Saratan ya indibidual so atukoy sanen oniay inkuan nen apostol Pablo: “Say dilin espiritu so mamatua ed espiritu tayo, ya anak itayo na Dios: Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.” (Roma 8:16, 17) Diad tua, saray sasanto et saray alanaan na espiritu a babangatan nen Jesus. Diad Apocalipsis et oniay imbaga nen Jesus: “Say manalo, iter ko ed sikato a miyurong ed siak dia ed tronok, unong a singa siak met analo ak, tan akiyurong ak ed Amak dia ed trono to.” Sarayan apaolin “mananalo” a manbilang na 144,000, a kaiba nen Jesus, so manuley ed interon dalin.​—Apocalipsis 3:21; 5:9, 10; 14:1, 3, 4; 1 Corinto 15:53.

8. Panon a mipadpara so panlilingkor na saray alanaan a babangatan nen Jesus ed si Moises tan Elias, tan tekep na antoran resulta?

⁸ Balet, akin a saray alanaan a Kristiano et inrepresenta nen Moises tan si Elias? Say rason et saratan a Kristiano, legan a silalaman nira, so manggagawa ed kimey a mipadpara ed ginawa di Moises tan Elias. Alimbawa, manlilingkor ira bilang tasi nen Jehova, anggaman ed panamasegsegang. (Isaias 43:10; Gawa 8:1-8; Apocalipsis 11:2-12) Singa si Moises tan si Elias, sikara so makpel a mangiwawalwal ed palson relihyon legan a papasesegen da iray masimoon a totoo a mangiter ed Dios na nikabkabiig a debosyon. (Exodo 32:19, 20; Deuteronomio 4:22-24; 1 Arari 18:18-40) Kasin amawala na maabig a resulta so kimey da? On! Nilikud ed itutulong da ed pakatipon na amin na saray alanaan, tutulongan da so minilyon ya “arum a karnero” pian mabulos a manpasakop ed si Jesu-Kristo.​—Juan 10:16; Apocalipsis 7:4.

Sumpalen la nen Kristo so Pananalo To

9. Panon so impangilitrato na Apocalipsis 6:2 ed kipapasen la natan nen Jesus?

⁹ Si Jesus so sakey la natan a makapanyarin Ari, ya aliwan sakey labat a too ya akalugan ed sakey ya asno. Sikato so nilitrato ya akalugan ed sakey a kabayo​—a diad Biblia et mangisisimbolo ed pambabakal. (Uliran 21:31) “Nia, so sakey a kabayo ya amputi,” so inkuan na Apocalipsis 6:2, “tan say wala a manyurong ed tapew to wala so sakey a pana to; tan niiter ed sikato so sakey a balanget: tan pinmaway ya analtalo, tan pian manalo.” Niarum ni, oniay insulat nen salmistan David nipaakar ed si Jesus: “Si Jehova ipawit to so kompas na biskeg mo a manlapu ed Sion: Manuley ka ed pegley na saray kakabusol mo.”​—Salmo 110:2.

10. (a) Panon so maglorian inggapo na mananalon impankabayo nen Jesus? (b) Panon a naapektaan so interon mundo ed primeron impanbiktorya nen Kristo?

¹⁰ Say primeron impanbiktoryaan nen Jesus et sumpad saray sankabiskegan a kalaban to​—si Satanas tan saray demonyo. Pinagit to ira ed tawen tan imbasileng to ira diad dalin. Lapud amta ran antikey lay panaon da, impangget na sarayan marelmeng ya espiritu so maramsak a sanok da ed katooan, a nansengegan na pirmin gonigon. Sayan gonigon so nisimbolo ed Apocalipsis dia ed talora nin akakabayo. (Apocalipsis 6:3-8; 12:7-12) Unong a nipasakbay ed propesiya nen Jesus a ‘tanda na isabi to tan say anggaan na mundo,’ say impankabayo ra so nanresulta ed pambabakal, eras, tan makapatey iran salot. (Mateo 24:3, 7; Lucas 21:7-11) Singa say literal a pampapasakit ed pananak, sarayan “gapo na kairapan” so maseguron onloor anggad ‘nasumpal nen Kristo so pananalo to’ diad paneral to ed amin a kabiangan na nanengneng ya organisasyon nen Satanas.a​—Mateo 24:8.

11. Panon a papaneknekan na awaran na Kristianon kongregasyon so maarin autoridad nen Kristo?

¹¹ Apaneknekan met so maarin autoridad nen Jesus diad impamasiansia to ed Kristianon kongregasyon ta pian nasumpal na satan so ganggan ya ipulong so mensahe na Panarian ed sankamundoan. Anggaman ed maruksan isusumpa na Babilonia a Baleg​—say sankamundoan ya empiryo na palson relihyon​—tan say masumpa iran gobierno, say panagpulong a kimey so aglambengat nantultuloy noagta lalon linmaknab itan unong ed awaran na mundo. (Apocalipsis 17:5, 6) Agaylan mapuersan paneknek itan ed inkaari nen Kristo!​—Salmo 110:3.

12. Akin ya ag-atebek na maslak a totoo so agnanengneng a kiwawala nen Kristo?

¹² Balet, makapaermen ta ag-atebek na maslak a totoo, a mangilaktip ed minilyon a mankuan a Kristiano, so agnanengneng iran petepeteg a sengegan na saray makatantandan nagagawa ed dalin. Balbalawen da ni ingen iramay mangiyaabawag ed Panarian na Dios. (2 Pedro 3:3, 4) Akin? Lapud binulag nen Satanas so isip da. (2 Corinto 4:3, 4) Diad tua, nensaman to ni sinakbongan na espiritual a kabilungetan iray mankuan a Kristiano, a sengegan ni ingen na impangipulisay da ed mablin ilalo ed Panarian.

Impulisay Da so Ilalo ed Panarian

13. Anto so nansumpalan na sakbong ya espiritual a kabilungetan?

¹³ Impasakbay nen Jesus a saray apostata, a singa sisanyas a nitanem ed utel na saray trigo, so onloob ed Kristianon kongregasyon tan mangibalang ed dakel. (Mateo 13:24-30, 36-43; Gawa 20:29-31; Judas 4) Sinmabi panaon et sarayan tatawagen a Kristiano so angawat ed saray paganon piesta, ag-agamil, tan bangabangat, ya ipapasen dan “Makristiano.” Alimbawa, say Krismas so nanlapud saray seremonya ed panagdayew ed paganon dirios a si Mithra tan Saturn. Balet anto so anagyat ed saray mankuan a Kristiano a mangawat ed saratan ya agmakristianon selebrasyon? Oniay inkuan na The New Encyclopædia Britannica (1974): “Say Krismas, a piesta na inkianak nen Jesu-Kristo, so niletneg lapud onleletey a pantatalaran ed asingger lan isabi nen Kristo.”

14. Panon a binuragas na saray bangat nen Origen tan si Augustine so katuaan nipaakar ed Panarian?

¹⁴ Konsideraen pa met so impamikewet ed kabaliksan na salitan ‘panarian.’ Onia so inkuan na libron The Kingdom of God in 20th-Century Interpretation: “Inuman nen Origen [sakey a teologo nen inmunan siglo] so panguusar na saray Kristiano ed salitan ‘panarian’ a say kabaliksan na satan et nagmaliw a walad puso so uley na Dios.” Anto so angibasiyan nen Origen ed bangat to? Aliwan diad Kasulatan, noagta diad “inkatibukel na sakey a pilosopiya tan panmoria na mundo a miduman tuloy ed kanonotan nen Jesus tan ed sankaunaan ya iglesia.” Diad insulat ton De Civitate Dei (Say Syudad na Dios), inkuan nen Augustine na Hippo (354-430 K.P.) a say mismon iglesia et say Panarian na Dios. Saratan ya agmakasulatan a panag-isip so angiter ed saray iglesia na saray teolohikon basiyan na Kakristianoan pian mamemben na pakayari ed politika. Tan binembenan da itan a pakayari ed loob na dakel a siglo, a mabetbet et diad maruksan paraan.​—Apocalipsis 17:5, 18.

15. Panon a nasusumpal so Galacia 6:7 ed dakel ed saray relihyon na Kakristianoan?

¹⁵ Balet, natan et aanien la na saray relihyon so intanem da. (Galacia 6:7) Dakel so naaandian lay pakayari tan naaandi met laray membro ra. Ontan so maslak a nagagawa ed Europa. Unong ed dyurnal a Christianity Today, “natan et saray angkakabaleg a simbaan ed Europa so agla [onkakanan] pasen na panagdayewan noagta bilang museo, a pasyaran labat na saray turista.” Ontan met so naiimano ed arum a parte na mundo. Anto so ipapabitar na saya nipaakar ed palson relihyon? Kasin naandi lambengat itan lapud kakulangan lay suporta? Tan panon a naapektoan so tuan panagdayew?

Manparaan Parad Baleg ya Agew na Dios

16. Akin a makabkabaliksan so ompapalalon isusumpa ed Babilonia a Baleg?

¹⁶ No panon a say asewek tan dapol ya ibubuga na datin aliwan aktibo a bolkan so mangipapasakbay ya asingger la itan ya onsabog, say ompapalalon isusumpa ed relihyon ed dakel a pasen na mundo so mangipapabitar ya asingger lay pangangga na palson relihyon. Agmanbayag, pakiwasen nen Jehova iray mapolitikan elemento na mundo pian mankakasakey ira a mangiwalwal tan maneral ed espiritual a balangkantis, salanti, say Babilonia a Baleg. (Apocalipsis 17:15-17; 18:21) Nepeg kasin ontakot iray tuan Kristiano ed satan ya ebento tan ed arum niran nagawa a kabiangan ed “baleg a kairapan”? (Mateo 24:21) Andin balot! Sikara so peteg a walaan na saray rason pian manliket sano onkiwas lay Dios sumpad saray marelmeng. (Apocalipsis 18:20; 19:1, 2) Konsideraen pa so agawa ed Jerusalem tan ed saray Kristiano a nanayam ditan nen inmunan siglo.

17. Akin a matalek iray matoor a lingkor nen Jehova a sikaray makaliktar ed pangangga na sayan sistema?

¹⁷ Sanen kinobkob na saray armada na Roma so Jerusalem nen 66 K.P., ag-atalagnaw nisay tinmakot iray Kristianon alerto ed espiritual. Lapud maseet ira a manaaral na Salitay Dios, amta ra a “say kabagbag to asingger la.” (Lucas 21:20) Amta ra met a say Dios so manggaway paraan pian makaliktar ira. Sanen agawa la itan, akataynan iray Kristiano. (Daniel 9:26; Mateo 24:15-19; Lucas 21:21) Ontan met natan, saramay mikabat ed Dios tan manguunor ed Anak to so matalek a makaliktar ed pangangga na sayan sistema. (2 Tesalonica 1:6-9) Diad tua, sano nagawa la so baleg a kairapan, sikara so maliket ya ‘ontangay, tan mangitangwa ed saray ulo ra, ta say karondon da et asingger la.’​—Lucas 21:28.

18. Anto so pansumpalan na direktan iyataki nen Gog ed saray lingkor nen Jehova?

¹⁸ Sano aderal la so Babilonia a Baleg, si Satanas, bilang Gog na Magog, so direktan mangataki ed saray mareen a Tasi nen Jehova. Diad idagsa ra a ‘singa lurem a manasakbong na dalin,’ saray armada nen Gog so manilalo a mainomay iran manbiktorya. Balet, makapataktakot so manaalagar ed sikara! (Ezequiel 38:14-16, 18-23) Oniay insulat nen apostol Juan: “Anengneng ko so tawen a silulukas; tan nia, so sakey a kabayo ya amputi, tan say akasakay ed sikato, sikato so natatawag a Matoor tan Matua . . . dia ed sangi to ompapaway so sakey a kampilan a makdem pian sikato so panuga’to ed saray nasyones.” Sayan agnatalon “Ari na saray arari” so mangisalba ed saray matoor a mandadayew ed si Jehova tan maneral ed amin a kakabusol da. (Apocalipsis 19:11-21) Agayla a kapantokan na pakasumpal na nipasingawey a transpigurasyon!

19. Panon a naapektaan so matoor iran babangatan nen Kristo ed sigpot lan pambiktorya to, tan anto so nepeg tayon panggunaetan a gawaen natan?

¹⁹ Si Jesus so ‘pankelawan na amin ya anisia diad satan ya agew.’ (2 Tesalonica 1:10) Labay yo kasi so napiiba ed saramay mandinayew ed mananalon Anak na Dios? Itultuloy yo sirin a pabiskegen so pananisia yo tan ‘manparaan kayo, ta dia ed oras ya agyo isisipen, onsabi so Anak na too.’​—Mateo 24:43, 44.

Pansiansiaen Yoy Panaglikas Yo

20. (a) Panon tayon nipatnag so apresasyon tayo ed probisyon na Dios panamegley na “matoor tan makabat ya aripen”? (b) Antoran tepet so nepeg tayon itepet ed inkasikatayo?

²⁰ Say “matoor tan makabat ya aripen” so naynay a mamibilin ed totoo na Dios a mansiansian aliing ed espiritual tan pansiansiaen day panaglikas da. (Mateo 24:45, 46; 1 Tesalonica 5:6) Kasin aapresyaen yo iratan a nipanpanaon a panonot? Kasin ikakana yo iratan pian niletneg yo iray prayuridad yo ed bilay? Akin ta no oniay itepet yo ed inkasikayo: ‘Malinew kasi so espiritual a panmoriak, a natetebek ko a manuuley la ed tawen so Anak na Dios? Kasin sikatoy natetebek ko ya akaparaan lan mangipaakseb ed panangukom na Dios ed Babilonia a Baleg tan ed arum niran kabiangan na sistema nen Satanas?’

21. Akin a binmuragas so espiritual a pakatebek na arum, tan anto so nepeg dan gawaen ya apuraan?

²¹ Inabuloyan na arum a mililimog ed totoo nen Jehova ya omburagas so maespiritual a pakatebek da. Agla ra kasi makaanos odino makapansungdo, a singa agawa ed arum ya inmuunan babangatan nen Jesus? Kasin naapektoan ira ed kapagaan ed bilay, materyalismo, odino panamasegsegang? (Mateo 13:3-8, 18-23; Lucas 21:34-36) Nayarin mairap a natalosan na arum so sakey ya impormasyon ya impalapag na “matoor tan makabat ya aripen.” No sakey ed saratan so nagagawa ed sikayo, pasesegen mi kayo ya aralen yo lamet so Salitay Dios tekep na apasimbalon seseg tan manpikasi ed si Jehova ta pian nawalaan kayo lamet na malet tan maapit a relasyon ed sikato.​—2 Pedro 3:11-15.

22. Panon kayon naapektoan ed impangikonsidera ed nipasingawey a transpigurasyon tan saray misiglaotan a propesiya?

²² Say nipasingawey a transpigurasyon so niiter ed saray babangatan nen Jesus sanen kinaukolan da so panamaseseg. Natan, walaan itayo na mas babaleg nin bengatla a mamapabiskeg ed sikatayo​—say kasumpalan na satan a makapakelaw a pagpaunan panangiparungtal tan dakel niran misiglaotan a propesiya. Diad panmomotektek tayo ed sarayan maglorian petepeteg lan nagagawa tan say kabaliksan na satan ed arapen, komon ta impapuso tayo met ya ibalikas iray imbaga nen apostol Juan: “Amen! Gala, Katawan a Jesus.”​—Apocalipsis 22:20.

[Paimano ed leksab]

Kasin Natandaan Yo?

• Nen dekaday 1870, anto so atalosan na melag a grupo na saray estudyante na Biblia nipaakar ed ipawil nen Kristo?

• Panon a nasusumpal so nipasingawey a transpigurasyon?

• Say mananalon impankabayo nen Jesus so walaan na anton epekto ed mundo tan ed Kristianon kongregasyon?

• Anto so nepeg tayon gawaen ta pian kabiangan itayo ed saramay makaliktar sano sumpalen la nen Jesus so pananalo to?

[Saray litrato ed pahina 16, 17]

Say pagpaunan panangiparungtal so nagmaliw lan petepeteg

[Saray litrato ed pahina 18]

Kasin amta yo so agawa sanen inggapo nen Kristo so pananalo to?