Kasin Papakiwasen Kayo na Pananisia Yo?

KOMBINSIDO so opisyal na armada a say inkaparalitiko na aripen to so napaabig nen Jesus. Balet ta agla pinaonla na opisyal na armada si Jesus diad abung to lapud nayarin liknaen ton sikatoy agmakanepegan odino lapud sikatoy sakey a Gentil. Imbes, say opisyal so angibaki na pigaran mamasiken a Judio pian asinggeran si Jesus tan mangibagay: “Katawan, agak onkana ya onloob ka ed silong na uloy abung ko: noag say bitlaen mo lambengat so salita, et say aripen ko onabig naani.” Sanen atebek nen Jesus a panisiaan na opisyal na armada a Sikatoy makatambal anggaman walad arawi, onia so imbaga to ed ulop ya ontutumbok ed sikato: “Tua kuan ko’d sikayo, agak akaromog na ontan kabaleg a pananisia, andi, anggan dia ed Israel.”​—Mateo 8:5-10; Lucas 7:1-10.

Natulongan itayo na sayan eksperiensya a manimano ed importantin kabiangan na pananisia. Say tuan pananisia so aktibo tan pepekderan itan na gawa. Onia so impangipaliwawa na managsulat na Biblia a si Santiago: ‘Say pananisia, no anggapo so saray gawa to, inatey ed inkasikaton dili.’ (Santiago 2:17) Mas onlinew iyan katuaan no konsideraen tayo so aktual ya alimbawa a mangipanengneng no antoy nagawa sano magmaliw ya inaktibo so pananisia.

Nen1513 K.K.P., akikasakey so nasyon na Israel ed si Jehova a Dios diad panamegley na Ganggan a sipanan. Bilang manamegley na satan a sipanan, impasabi nen Moises so salita na Dios ed saray anak na Israel: ‘No tuloken yo so boses ko a tuatua, tan em-eman yo so sipanan ko, sikayo naani so magmaliw a sakey a masimpit a nasyon’ odino masanto a nasyon. (Exodo 19:3-6) On, akadepende ed katutulok so kasantosan na Israel.

Dakel iran siglo ed saginonor, mas inikday importansia na saray Judio so panaral ed Ganggan nen say pangiyaplika ed saray prinsipyo na satan. Diad libro ton The Life and Times of Jesus the Messiah, oniay insulat nen Alfred Edersheim: “Saray [rabbi], salanti, saray ‘dederlengen a totoo ed mundo’ so abayag lan nandetermina a mas importante so aral nen say gawa.”

Tua, niganggan iray Israelita nensaman a maseet dan aralen iray kakaukolanen na Dios. Imbagan mismo na Dios: “Saraya a salita, ya iganggan ko ed sika ed sayan agew, nepeg da so ontatak ed pusom; tan nepeg mo ya ibangat iraya a sankakulian ed saray anak mo, tan nepeg mo ra a tongtongen kapagno manyurong ka ed abung mo, tan kapagno manaakar ka ed dalan, tan kapagno mandukdukol ka tan kapagno ombangon ka.” (Deuteronomio 6:6, 7) Balet, kasin say labay ya ibaga nen Jehova et mas importante ni so panaral ed Ganggan nen say ikiwas a mitunosan ed satan odino unong ed say tutukoyen na satan? Usisaen tayo pa.

Malaknab a Panagaral

Ompatnag a makatunongan para ed saray Israelita so pangiter na alablabas ya importansia ed panagaral ed Ganggan lapud ta papanisiaan so sakey a Judion tradisyon a say Dios a mismo et inagew-agew a manguusar na taloran oras ed panaaral ed Ganggan. Natalosan sirin no akin a walaray Judio a nayarin mangikatunongan a, ‘No say Dios et regular a manaaral ed Ganggan, agta ontan met so nepeg a gawaen na saray pinalsa to diad dalin?’

Nen inmunan siglo K.P., say alablabas a panag-usisa tan panangipatalos na saray rabbi ed Ganggan so sigpot ya amikewet ed panmoria ra. “Saray eskriba tan saray Fariseo . . . ibaga ra, et agda gawaen,” kuanen Jesus. “Sikara mamerber ira na ambebelat ya awiawit tan makapairap ya awiten, tan sikaray ipasakbat da ed abala na saray totoo; balet sikara lanlamang agda ra labay a galawen ed tamuro ra.” (Mateo 23:2-4) Saraman a relihyoson papangulo so angipasakbat na dakerakel a ganggan tan totontonen ed kabanyakan a totoo, balet ta sikaran mismo so mansimpisimpitan ya amawala na saray pakalusotan a mangipuera ed sikaran mangunor ed saratan lanlamang a ganggan. Nagkalalo ni, saratan a lalaki ya angiyapasakey ed malaknab a panagaral ‘so ag-anumpal ed saray ambelbelat a pamaakaray katunongan salanti, kaalasan, tan panangasi tan pananisia.’​—Mateo 23:16-24.

Agaylan pansumlangan itan ta diad gunaet dan iletneg so dilin inkatunong da, saray eskriba tan Fariseo so sinmumlang ed mismon Ganggan a kuan dan itatandoro ra! Diad amin na saray siglon linmabas a nandedebatian da iray salita tan arum niran agtanto importantin detalye na Ganggan, agmet ira lalon apaapit ed Dios. Say epekto so mipadpara ed samay inkasipa a resulta na tinawag nen apostol Pablo a “saray tongtong,” “saray siblangan,” tan palson “kakabatan.” (1 Timoteo 6:20, 21) Ingen, say sakey nin seryoson problema et say epekto ed sikara na satan ya agmanganggan panagsukimat. Ag-ira awalaan na pananisia ya amakiwas ed sikara a manggaway duga.

Matudio Balet ta Andian na Pananisia

Agaylay pidumaan na panmoria na saraman a Judion relihyoson papangulo ed panmoria na Dios! Antis a linmoob iray Israelita ed Insipan a Dalin, oniay inkuan nen Moises ed sikara: “Ipaslek yo ed puso yo so saray amin a salita a pinatuak ed sikayo ed sayan agew, a sikato so ibilin yo naani [ed] saray anak yo ya unoren dan gawaen, so amin a sasalitaen lanlamang na saya a panangitunongan.” (Deuteronomio 32:46) Malinew, saray totoo na Dios so aglabat nepeg a magmaliw ya iskolar na Ganggan noagta mananumpal met na Ganggan.

Anggaman ontan, say nasyon na Israel so aminpigapigan agnanmatoor ed si Jehova. Imbes a gawaen so duga, saray anak na Israel so ‘ag-anisia ed sikato nisay dinmengel ed boses to.’ (Deuteronomio 9:23; Uko-ukom 2:15, 16; 2 Awaran 24:18, 19; Jeremias 25:4-7) Diad kaunoran, inagamil na saray Judio so sankaugesan a gawa na ag-inkamatoor sanen impulisay da si Jesus bilang say Mesias. (Juan 19:14-16) Bilang resulta, impulisay na Dios a Jehova so Israel tan imbaling toy imano to ed saray Gentil.​—Gawa 13:46.

Peteg a nakaukolan tayo so manalwar pian agtayo napelag ed ontan met a patit diad panisip a sarag tayon dayewen so Dios diad pagmaliw a matudio balet ta andian na pananisia. Diad arum a panangibaga et wala ni so nakaukolan ed panaaral tayo na Biblia, ya aliwa labat a say basta igamor na pikakabat. Nepeg ya onsabi ed puso tayo so suston pikakabat pian nagunggonaan so bilay tayo. Makatunongan ta so panaral na pantanem na pisipising balet ta agbalot mangitanem na antokaman a klase na bukel? On, nayarin nawalaan itayo na daiset a pikakabat ed no panon so pamayubo tan pangasikaso ed sakey a hardin, balet ta anggapon balot so naani tayo! Mipadpara met, nakaukolan ya abuloyan na saray totoon manaaral na saray kakaukolanen na Dios panamegley na panaral day Biblia ya onsabi ed puso ra iray bukel na katuaan pian saratan so ontubo tan napakiwas ira.​—Mateo 13:3-9, 19-23.

“Mananumpal Kayo Komon na Salita”

Inkuan nen apostol Pablo a “say pananisia manlapu ed pandengel.” (Roma 10:17) Sayan natural a panggegendanan na saray kundang manlapud idengel na Salitay Dios anggad pangagamil na pananisia ed Anak to, si Jesu-Kristo so makapangiter ed sikatayo na ilalon andi-anggaan a bilay. On, wala ni nakaukolan nen say basta pangibagan, ‘Manisia ak ed Dios tan ed Kristo.’

Pinaseseg nen Jesus iray papatumbok to a nawalaan na pananisia a mamakiwas ed sikara: “Dia ed saya so kigloriaan nen Amak, say pambunga yo na dakel: tan dia ed ontan sikayo so babangatan ko.” (Juan 15:8) Diad saginonor, say agi ed ina nen Jesus a si Santiago so angisulat: “Mananumpal kayo komon na salita, ya aliwan dumerengel labat.” (Santiago 1:22) Panon tayo sirin a naseguro no antoy nepeg tayon gawaen? Diad salita tan gawa, impatnag nen Jesus so nakaukolan tayon gawaen pian napaliket so Dios.

Legan a wadiad dalin si Jesus, sikatoy impasyan nankimey pian iyalibansa so intereses na Panarian tan igloria so ngaran nen Ama to. (Juan 17:4-8) Diad anton paraan? Nayarin nanonotan na dakel a totoo iray milagro nen Jesus diad impantambal to na saray mansasakit tan saray lupoy. Balet ta impabitar na Ebanghelyo nen Mateo so manunan paraan: “Si Jesus niliberliber to ray amin a syudad tan balbaley, a nambabangat ed saray sinagogas da, tan impupulong toy ebanghelyo na panarian.” Mabitar ya agnilimitaan nen Jesus so ministeryo to diad impormal ya impitongtong labat ed pigaran kakaaro tan kabkabat odino saray kakaabay to. Nanggunaetan ton maong so impangusar ed antokaman a walad sikato pian bisitaen so totoo “ed amin a Galilea.”​—Mateo 4:23, 24; 9:35.

Ingganggan nen Jesus iray papatumbok to a mibiang met ed panaggaway-babangatan a kimey. On, sikatoy angitarya na naspot a panuliranan da. (1 Pedro 2:21) Inkuan nen Jesus ed saray matoor a papatumbok to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo: Ya ibangat yo ran mangunor na amin a bengabengatla ya ingganggan ko ed sikayo.”​—Mateo 28:19, 20.

Tua, say pibiang ed panagpulong a kimey so mangiparungtal na peteg ya angat. Si Jesus a mismo so angikuan: “Nia, ibaki takayo a singa saray karnero ed pegley na saray lobo.” (Lucas 10:3) Sano nipaarap itayo ed isusumpa, natural labat a labayen tayo so onsuko pian napaliisan lay ermen tan kapagaan. Ontan so agawa ed samay labin inerel si Jesus. Tinmaynan iray apostoles lapud ataktakot ira. Diad saginonor na saman a labi, amitlon danay ya imburi nen Pedro a kabat to si Jesus.​—Mateo 26:56, 69-75.

Niarum ni, nayarin mankelaw kayo sano naamtaan yo ya anggan si apostol Pablo a mismo et nankuan a sikatoy nambanikel ed impangipulong to na maong a balita. Sinulat to so kongregasyon na Tesalonica: “Apabayani kami ed Dios tayo a mangisalita ed sikayo na ebanghelyo na Dios ed dakel a sumpaan.”​—1 Tesalonica 2:1, 2.

Atalonaan di Pablo tan saray kapara ton apostol so antokaman a takot diad pangibaga ed arum nipaakar ed Panarian na Dios, kanian nayarian yo met. Panon? Say sankaimportantian a kundang et say panmatalek ed si Jehova. No sigpot tayon agamilen so pananisia ed si Jehova, satan a pananisia so mamakiwas ed sikatayo tan nagawaan tayo so linawa to.​—Gawa 4:17-20; 5:18, 27-29.

Wala So Tumang na Kimey Yo

Kabkabat nen Jehova so pansasagpot tayon manlingkor ed sikato. Singa bilang, amta to no mansasakit tayo odino naksawan tayo. Kabat to iray kapagaan tan dilin-panduaruwa tayo. Sano naiirapan itayo ed pinansyal odino sano say bunigas tan liknaan tayo so ompatnag a manidismaya ed sikatayo, lawas sinononot si Jehova ed kipapasen tayo.​—2 Awaran 16:9; 1 Pedro 3:12.

Seguradon maliket si Jehova sano pakiwasen itayo na pananisia tayo anggaman ed agtayo inkayadyari tan saray kairapan! Say panamabli nen Jehova ed saray matoor a lingkor to so aliwan simplin liknaan labat noagta satan so pepekderan na sakey a sipan. Diad impangipuyan na Dios, oniay insulat nen apostol Pablo: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—Hebreos 6:10.

Napanmatalkan yo so impaneskribe na Biblia ed si Jehova bilang “sakey a Dios a napanmatalkan tan anggapo so kaugsan,” tan bilang say “mananumang ed saray mananap ed sikato.” (Deuteronomio 32:4; Hebreos 11:6) Alimbawa, nanonotan na sakey a bii diad California, E.U.A: “Say amak so nanlingkor bilang sigpot-panaon a ministro ed loob na samploran taon antis a nampamilya. Nanliketan ko so dinmengel ed saray istorya to nipaakar ed impamabiskeg nen Jehova ed sikato diad ministeryo to. Aminpigapiga a say alenleneg lan kuwarta to et insaliw toy gasolina pian makapanpulong. Balet kasempet to manlapud ministeryo, naynay a walay ag-iilaloan a taganon manaalagar ed sikato diad puerta.”

Niarum ni ed materyal a suporta, “say Ama na saray panangasi tan Dios na ami’ ligliwa” so mangiiter met ed sikatayo na emosyonal tan espiritual a tulong. (2 Corinto 1:3) “Say panmatalek ed si Jehova so sakey a makaligliwan liknaan,” so inkuan na sakey a Tasi a nansungdo ed dakel a subok diad inlabas na dakel a taon. “Mangiiter itan na pankanawnawan manmatalek ed si Jehova tan naimatonan no panon to kan tulongan.” Nayarian yo so mapaabeban onasingger ed “Dumerengel na pikakasi,” a makapanseguro kayon imanoen to iray dilin kapagaan yo.​—Salmo 65:2, NW.

Dakel iran bendisyon tan langkap so nagagamoran na saray espiritual ya uma-ani. (Mateo 9:37, 38) Lapud pibibiang na dakel diad mapublikon ministeryo, agunggonaan so bunigas da, tan nayarin ontan met ed sikayo. Balet, say mas importante et say pampulong ed arum so ontulong ed sikatayon napabiskeg so maabig a relasyon tayo ed Dios.​—Santiago 2:23.

Mantultuloy a Manggaway Maabig

Sakey a lingo no isipen na sakey a lingkor na Dios a nadismaya si Jehova lapud sikatoy napupugeran na kaleteyan odino itatakken to a mamasya ed ministeryo to. Lingo met no isipen itan na saramay naaamper na makapuy a bunigas, saray responsabilidad ed pamilya, odino arum niran sirkumstansya.

Nonoten pa a sanen alikna nen apostol Pablo a sikatoy napupugeran na kaleteyan odino babeng, sikato so ‘akikasi ed Katawan ya amitlo, pian naekal komon iman’ ed sikato. Imbes a paabigen si Pablo pian malalaknab ni komon so nagawaan to ed panaglingkor ed si Jehova, oniay inkuan To: “Say grasyak so masarag ed sika; ta say pakayarik agawan ayadyari ed kakapuyan.” (2 Corinto 12:7-10) Kanian, makapanseguro kayo ya anggaman ed antokaman a mairap iran sirkumstansyan susungdoan yo, say mangatatawen ya Ama yo so mangaapresya ed antokaman a nayarian yo pian iyalibansa so intereses to.​—Hebreos 13:15, 16.

Ag-itayo papaskaren na maaron Manamalsa tayo ya iter so agtayo nayarian. Say kakaukolanen to labat et say pakawalaan tayo na pananisia a mamakiwas ed sikatayo.

[Litrato ed pahina 26]

Kasin magenap la so panaral labat ed Ganggan?

[Saray litrato ed pahina 29]

Say pananisia tayo so nakaukolan a pekderan na saray gawa