Tepetepet Manlapud Saray Managbasa
Agkasi inkompromiso nen apostol Pablo so pananisia to bilang Kristiano sanen inkuan to ed arap na Sanhedrin: “Fariseo ak”?
Pian natalosan so balikas nen Pablo a naromog ed Gawa 23:6, nakaukolan tayon usisaen so konteksto.
Kayarin inambon si Pablo na sakey a pangkat na saray Judio diad Jerusalem, sikatoy nansalita ed ulop na totoo. Sinalambit to a sikatoy ‘binangatan ed [Jerusalem], dia ed salian nen Gamaliel, ya impasal unong ed elet na ganggan na saray atateng da.’ Anggaman dinengel ya agano na ulop na totoo so depensa nen Pablo, kasanlilikna et sikaray pirmin sinmanok ed sikato kanian sikatoy impaiyakar na angulop a komandante na militar diad kuartil na saray sundalo. Sanen kuan lan siplatan day Pablo, inkuan to: “Nikatunongan ta kasi ed sikayo so manlewet na sakey a too a taga Roma, et agni naukom?”—Gawa 21:27–22:29.
Diad kaimbuasan, inyarap na komandante si Pablo ed atagey a korte na saray Judio, say Sanhedrin. Ninengneng a maong nen Pablo iray wadman tan naimano ton kabiangan iray Saduceo tan Fariseo ed Sanhedrin. Insan to inkuan: “Agagi, siak Fariseo ak, anak ak na saray Fariseo; atawag ak ed panangukoman nipaakar ed ilalo tan say kioli ed bilay na saray inaatey.” Say resulta et nansasangsangan iray Fariseo tan Saduceo, “ta saray Saduceos; kuan da ya anggapo so kioli ed bilay, et anggapo met so anghel, odino espiritu; balet saray Fariseo sisiaen da so sarayan duan bengatla.” Arum ed saray Fariseo so akisiblangan a nankuan: “Anggapo so mauges a naalmo mi ed saya a too.”—Gawa 23:6-10.
Lapud kabkabat si Pablo bilang maseseg a tuloy a Kristiano, agnayarin ipasen a kokombinsien to so Sanhedrin a sikatoy aktibon Fariseo. Tan seguradon ag-awaten na saramay wadman a Fariseo so sakey ya agmanisia ed amin a bangat da. Kanian samay imbalikas nen Pablo nipaakar ed inka-Fariseo to et walaan labat lay limitadon kabaliksan, tan seguradon ontan so impakatalos na saramay wadman a Fariseo ed sasalitaen nen Pablo.
Diad impangibaga ton sikatoy uukomen lapud ilalon kioli ed bilay na saray inaatey, malinew a say labay ya ibaga nen Pablo et diad sayan pamaakaran a sikatoy mipara ed saray Fariseo. Diad antokaman a kontrobersia ed kikioli, si Pablo so nayarin nibilang a kaiba na saray Fariseo imbes a diad saray Saduceo ya agmanisia ed satan.
Say sisisiaen nen Pablo bilang Kristiano so ag-onkontra ed sisisiaen na saray Fariseo no nipaakar ed saray pamaakaran a singa say kikioli, angheles, tan pigaran punto ed Ganggan. (Filipos 3:5) Kanian diad saraya lambengat a getar a nayarian nen Pablo ya isiglaot so inkasikato ed saray Fariseo, tan diad sayan alimitaan a kabaliksan ya atalosan na saramay wadman ed Sanhedrin so sasalitaen to. Inusar to sirin so abenegan to pian arapen so panaglabi na korte suprema na saray Judio.
Bangbalet, say sankabalgan ya ebidensya ya ag-inkompromiso nen Pablo so pananisia to et say nantultuloy ya impangabobon nen Jehova ed sikato. Diad samay labi kayarin sinalita nen Pablo iray balikas a lilinewan, oniay inkuan nen Jesus: “Manpakpel ka; ta no panon so impamatuam na nipaakar ed siak ed Jerusalem, ontan met a nakaukolan so pamatuam ed Roma.” Lapud panangabobon na Dios ed si Pablo, nibaga tayo ya ag-inkompromiso nen Pablo so pananisia to bilang Kristiano.—Gawa 23:11.