Diad Dayat na Galilea

IBABAGA na salaysay diad Marcos 4:35-41 a linmugan ed paraw odino baloto si Jesus tan saray babangatan to pian ombeltang ed Dayat na Galilea. Oniay nabasa tayo: “Et inmalagey so sakey a baleg a bagyo na dagem, tan saray daluyon onsasabuyag ira ed paraw, ed ontan la a saray paraw napapano la. Et sikato [si Jesus] met so wala ed dapit olin, a naugip ed tapew na tandakan.”

Diad saya lambengat a bersikulo na Biblia so pakabasaan ed salitan Griego parad “tandakan.” Kanian ag-amta na saray iskolar so eksakton kabaliksan na salita ya inusar dia. Maslak a Biblia so angipatalos ed satan bilang “tandakan” odino “danganan.” Ingen, anton klase na danganan itan? Diad orihinal a lenguahe, say impanukoy nen Marcos ed tandakan et mangisusuheri a kabiangan itan na kagawaan ed baloto. Say baloto ya adiskobre diad asingger ed Dayat na Galilea nen 1986 so akatulong pian natalosan iyan Griegon salita ya inusar nen Marcos.

Nalmoan diad impansukimat a say 8 metro karukey a baloto et papaandaren na layag tan saray begsay. Inusar itan ed panagsigay tan walaan na silongan ed banda’d beneg, a pangikakargaan na baleg tan ambelat ya iket a panagsigay. Sayan baloto so panisiaan ya inusar ed baetan na 100 K.K.P. tan 70 K.P. tan nayarin ontan imay klase na baloto ya inusar nen Jesus tan saray babangatan to. Si Shelley Wachsmann, a kaiban akadiskobre ed baloto, so nansulat na libron The Sea of Galilee Boat​—An Extraordinary 2000 Year Old Discovery. Insuheri to a say “tandakan” a dinanganan nen Jesus et sakey a sako a nankargay buer ya uusaren bilang pabelat. Sakey a beteranon managsigay a taga-Jaffa, a marundunong ed panangusar na iket a pansigay, so angikuan: “Sanen kakkaksilan ko ni, saray baloto ya inusar ko diad Mediteraneo so lanang a nankarga na sakey odino duaran sakon buer. . . . Naynay ya ilulugan iratan a sako pian walay usaren a pabelat na baloto. Balet sano ag-iratan uusaren, iiyan mi iratan diad silongan a walad banda’d beneg na baloto. Insan, no walay naksawan, sikatoy onsilong ditan, insan danganan to so sako a nankargay buer, tan onugip.”

Panisiaan na dakel ya iskolar a say kabaliksan na deskripsion nen Marcos et si Jesus so dinmanganan ed sakey a sakon pabelat a walad silongan ed banda’d beneg na baloto, say manunan nasasalimbengan a parte na satan legan na bagyo. Antokaman itan a tandakan, say mas importante et say agawa kayari na satan. Diad tulong tan pakapanyari na Dios, pinareen nen Jesus so bagyo ed dayat. Anggan saray babangatan nen Jesus et nantepet: “Siopa sirin so saya, ya anggan say dagem tan say dayat ununor ira ed sikato?”