“Mantultuloy a Manbantay” Lapud Sinmabi la so Oras na Panangukom!
Say impormasyon ed sayan aaralen ya artikulo so imbase ed brosyur a Mantultuloy a Manbantay! ya impaway ed saray distriton kombension diad interon mundo legan na taon 2004 tan 2005.
“Mantultuloy a manbantay . . . lapud agyo amta no anton agew so isabi na Katawan yo.”—MATEO 24:42, NW.
1, 2. Anto so matukoy ya angiyalilingan nen Jesus ed isasabi to?
ANTO so gawaen yo no naamtaan yon walay managtakew, ya onloloob ed kaabungan diad lugar yo? Pian naprotektaan iray inaro yo ed bilay tan kaykayarian yo, mansiansia kayon alerto tan akabantay. Ontan so gawaen yo lapud say matakew et agman-abiso no kapigan so isabi to. Diad pisunian et sikato so onsabi ya agnaliklikas tan ag-ilaloan.
2 Aminpigan inusar nen Jesus iray paraan na matakew bilang ilustrasyon. (Lucas 10:30; Juan 10:10) Nipaakar ed saray ebento a nagawa legan na panaon na anggaan tan ed saray ebenton nagawa sakbay na isabi to pian mangukom, inter nen Jesus iyan pasakbay: “Manpuyat kayo sirin; ta agyo amta no anton agew so isabi Katawan yo. Balet amtaen yo so saya, a no say makan-abung akabatan to no anton oras ed panagbantay so isabi matakew, sikato komoy nampuyat, tan agto komon inabuloyan a nabungawan so abung to.” (Mateo 24:42, 43) Kanian inyaliling nen Jesus so isasabi to ed isabi na sakey a matakew—ag-ilaloan.
3, 4. (a) Anto so nalalanor ed italineng ed pasakbay nen Jesus nipaakar ed isasabi to? (b) Antoran tepet so onlesa?
3 Matukotukoy so ilustrasyon, lapud ag-amta so eksakton petsa na isasabi nen Jesus. Akadkauna ni, diad mipadpara met a propesiya et oniay inkuan nen Jesus: “Satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat.” (Mateo 24:36) Onia sirin so impaseseg nen Jesus ed saray ondedengel ed sikato: “Manparaan kayo met.” (Mateo 24:44) Saramay ontatalineng ed pasakbay nen Jesus et akaparaan tan manepeg so panugali ra, anggan kapigan so isabi ton mangipaakseb ed panangukom nen Jehova.
4 Walay pigaran importantin tepet ya onlesa: Kasin say impasakbay nen Jesus et para labat ed saray totoo ed mundo, odino nakaukolan met a “mantultuloy a manbantay” iray tuan Kristiano? Akin ya inkaganatan so ‘pantultuloy a pambantay,’ tan anto so lalanoren na satan?
Parad Siopa so Pasakbay?
5. Panon tayon naseguro ya onaplika ed saray tuan Kristiano so pasakbay a “mantultuloy a manbantay”?
5 Tua, say isasabi na Katawan et singa matakew parad totoo ed mundo, ya angibaliwala ed pasakbay nipaakar ed manasingger a desyang. (2 Pedro 3:3-7) Balet, komusta met iray tuan Kristiano? Sinulat nen apostol Pablo iray kapananisiaan to: “Sikayon dili amta yon maong a say agew na Katawan onsabin singa matakew ed labi.” (1 Tesalonica 5:2) Anggapoy panduaruwa tayo ya ‘onsabi so agew na Katawan.’ Balet kasin pansengegan itan pian agtayo la tanton mantultuloy a manbantay? Imanoen pa a say angibagaan nen Jesus et diad saray babangatan to: “Dia ed oras ya agyo isisipen onsabi’ Anak na too.” (Mateo 24:44) Diad akadkauna ni, sanen pinaseseg nen Jesus iray babangatan to a mantultuloy dan anapen so Panarian, oniay impasakbay to: “Maparaan kayo met: ta dia ed oras ya agyo isisipen onsabi so Anak na too.” (Lucas 12:31, 40) Agta mabitar a say walad kanonotan nen Jesus et saray patumbok to sanen oniay impasakbay to: “Mantultuloy a manbantay”?
6. Akin a nakaukolan itayon “mantultuloy a manbantay”?
6 Akin a nakaukolan tayoy “mantultuloy a manbantay” tan ‘manparaan’? Oniay impaliwawa nen Jesus: “Saman la wala ra naani duaran lalaki ed uma; say sakey naala, et say sakey natilak. Wala ra naani duaran bibii a mangigiling ed gilingan, say sakey naala, et say sakey natilak.” (Mateo 24:40, 41) Saramay mismon manpaparaan so “naala,” odino niliktar, sano naderal la so agmaridios a mundo. Arum so “natilak” ed kadederal lapud say gegegemtanen da et say dilin pankaabigan da. Saratan so maseguron mangilaktip ed saray indibidual ya aliwawaan la nensaman balet ta ag-ira nantultuloy a nambantay.
7. Lapud agtayo amta no kapigan so isabi na anggaan, anto so nagawaan tayo ni?
7 Lapud agtayo amta so eksakton agew na anggaan na sayan sistema, pankanawnawa tayon ipatnag a malinis so motibo tayo ed panlilingkor ed Dios. Akin a nibaga tayon ontan? Nayarin ompatnag a mabayag nin onsabi so anggaan. Makapaermen ta say arum a Kristiano a walaan na ontan a panmoria so tinmayer ed panaglingkor ed si Jehova. Ingen, diad dedikasyon tayo et mabulbulos tayon inyapay so inkasikatayo pian panlingkoran si Jehova. Amta na saramay mikabat ed si Jehova a sikato so agnasagyat ed kalimbuatan a panangipatnag na seseg. Nabasa to so walad puso.—1 Samuel 16:7.
8. Panon itayon napakiwas na aro ed si Jehova pian mantultuloy a manbantay?
8 Lapud peteg tayon aaroen si Jehova, panlikliketan tayon gawaen so linawa to. (Salmo 40:8; Mateo 26:39) Tan labay tayon panlingkoran si Jehova diad ando lan ando. Satan ya ilalo so mablin tuloy anggaman singano mas mabayag ni so panalagar tayo nen say iilaloan tayo. Importante ed amin, mantultuloy itayon manbantay lapud pitalaran tayo so importantin nagawa ed agew nen Jehova bilang kasumpalan na gagala to. Lapud masimoon a pilalek tayon napaliket so Dios, napakiwas itayon mangiyaplika ed simbawa na Salita to tan iyuna ed bilay tayo so Panarian to. (Mateo 6:33; 1 Juan 5:3) Ikonsidera tayo natan no panon a say pantultuloy a pambantay et mangimpluensya ed saray desisyon a gawaen tayo tan ed kabibilay tayo ed kada agew.
Iner so Direksion na Bilay Yo?
9. Akin a kakkaukolan a natalosan na totoo ed mundo so kabaliksan na panaon tayo?
9 Naiimano na dakel a totoo natan a kaslakan la iray seryoson problema tan makapakigtot a nagagawa, tan nayarin ag-ira naliliketan ed direksion na bilay da. Balet, kasin amta ra so peteg a kabaliksan na saray kipapasen na mundo? Namomoria da kasi a manbibilay itayo la ed “kasampotan na sistema na bengabengatla”? (Mateo 24:3, NW) Kasin natetebek da a say ikakasmak na masiblet, maramsak, tan agmaridios iran awawey so pakabidbiran a sarayan panaon et ‘kaunoran iran agew’? (2 Timoteo 3:1-5) Kakkaukolan a natalosan da so kabaliksan na amin na saya tan motekteken da so direksion na bilay da.
10. Anto so nepeg tayon gawaen pian naseguro a mantutultuloy itayon manbabantay?
10 Komusta itayo balet? Inagew-agew itayon nipapaarap ed saray desisyon a mangilalanor ed trabaho, bunigas, pamilya, tan panagdayew tayo. Amta tayo no anto so ibabaga na Biblia, tan panggugunaetan tayon iyaplika itan. Nepeg tayo sirin a tepetan so inkasikatayo: ‘Aabuloyan ko kasi iray kapagaan ed bilay a mangikasipa ed siak? Aabuloyan ko kasi iray pilosopiya tan kaisipan na mundo a mangimpluensya ed saray desisyon ko?’ (Lucas 21:34-36; Colosas 2:8) Nakaukolan a mantultuloy tayon ipatnag so panagmatalek tayo ed si Jehova diad interon puso tayo tan ag-itayo mandedependi ed dilin pakatalos tayo. (Uliran 3:5) Diad ontan a paraan, mantultuloy tayon ‘nabembenan so bilay a peteg,’ salanti, say magnayon a bilay diad balon mundo na Dios.—1 Timoteo 6:12, 19.
11-13. Anto so naaralan tayo ed saray alimbawa ya agawa (a) diad panaon nen Noe? (b) diad panaon nen Lot?
11 Lugan na Biblia so dakel a panamasakbay pian makapantultuloy itayon manbantay. Nodnonoten pa so agawa ed panaon nen Noe. Antis ni na delap et sineguro la na Dios a nipasabi so pasakbay. Balet ta agnanimano iray totoo, nilikud labat ed si Noe tan say sankaabungan to. (2 Pedro 2:5) Nipaakar ed saya, oniay inkuan nen Jesus: “Unong ed saray agew nen Noe, ontan naani so isabi na Anak na too. Ta singa diad saraman ya agew ed arapen na delap nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong. Tan agda akabkabatan angga ed sinmabi’ delap, et inyanor to ra ya amin; ontan naani so isabi Anak na too.” (Mateo 24:37-39) Anto so naaralan tayo ed satan? No wala ed sikatayo so mangiyaabuloy ed saray kapagaan ed mundo—pati ed inagew-agew a kimey ed bilay—ya onsalat ed saray maespiritual a kimey ya ipapaseseg na Dios ya unaen tayo, nakaukolan a motekteken tayon maong so kipapasen tayo.—Roma 14:17.
12 Isipen pa met so panaon nen Lot. Say syudad na Sodoma, a nanayaman nen Lot tan say pamilya to, so maaligwas ed materyal balet ta abebbeba ed moral. Imbaki nen Jehova iray anghel to pian deralen da so syudad. Si Lot tan say pamilya to so dinagdag na saray anghel ya ontaynan ed Sodoma tan ag-onlilingaw. Lapud panamaseseg na saray anghel, sikara so tinmaynan ed syudad. Balet, say asawa nen Lot et mapatnag a nampilalek ni ed ayaman to ed Sodoma. Sikato so matungangan linmingaw, kanian abalang to so bilay to. (Genesis 19:15-26) Oniay mapropetikon impasakbay nen Jesus: “Nodnonoten yo so asawa nen Lot.” Kasin onkikiwas itayo unong ed satan a pasakbay?—Lucas 17:32.
13 Niliktar iramay tinmalineng ed saray pasakbay na Dios. Ontan so agawa ed si Noe tan ed pamilya to pati ed si Lot tan saray anak ton bibii. (2 Pedro 2:9) No dalepdepen tayo so pasakbay ed sarayan alimbawa, napaseseg itayo met ed mensahe na saratan nipaakar ed kiliktar na saray mangaaro ed inkatunong. Diad kapusoan tayo et segurado so paniilalo tayo ed kasumpalan na sipan na Dios nipaakar ed “saray tawen a balo tan dalin a balo” a ditan so “panayaman na katunongan.”—2 Pedro 3:13.
‘Sinmabi la so Oras na Panangukom’!
14, 15. (a) Anto so lalanoren na “oras” na panangukom? (b) Anto so lalanoren na ‘itakot ed Dios tan pangiter ed sikato na gloria’?
14 Diad pantutultuloy tayon manbabantay, anto so nailaloan tayo? Indatak na libro na Apocalipsis so mantutumbokan a kasumpalan na gagala na Dios. Importante so ikiwas unong ed ibabaga na satan ta pian napaneknekan tayo ya akaparaan itayo. Malinew a dedeskribien na propesiya iray ebenton nagawa ed “agew na Katawan,” a ginmapo sanen nitrono si Kristo ed tawen nen 1914. (Apocalipsis 1:10) Ipapaimano ed sikatayo na Apocalipsis so anghel ya angimatalekan ed ‘andi-anggaan a maabig a balita ya ipulong to.’ Oniay maksil ya inyabawag to: “Takotan yo so Dios, tan iter yo ed sikato so gloria: ta say oras na pangukom to sinmabi la.” (Apocalipsis 14:6, 7) Satan ya “oras” na panangukom et antikey a panat na panaon; lalanoren na satan so panangiyabawag tan panangipaakseb ed saray panangukom ya adeskribe ed satan a propesiya. Manbibilay itayo la natan ed satan a panaon.
15 Natan, sakbay a manampot so oras na panangukom, sikatayo so napapaseseg a: ‘Takotan so Dios, tan iter ed sikato so gloria.’ Anto so lalanoren na satan? Say manepeg a takot ed Dios so kaukolan a mamakiwas ed sikatayon ompaliis ed kaugsan. (Uliran 8:13) No igagalang tayo so Dios, sikato so dengelen tayo tekep na aralem a respeto. Ag-itayo magmaliw ya okupado ed arum ya aktibidades, a napaulyanan tayo lay regular a panagbasa ed Salita to, say Biblia. Agtayo leglemewen so simbawa to ya onatendi ed saray pantitipon na Kristiano. (Hebreos 10:24, 25) Pablien tayo so pribilehyon mangiyabawag ed maong a balita na Mesianikon Panarian na Dios tan maseseg tayon gawaen itan. Manmatalek itayo ed si Jehova ed amin a panaon tan diad interon puso tayo. (Salmo 62:8) Lapud bibidbiren tayon si Jehova so Soberano ed Uniberso, sikato so igagalang tayo diad mabulos a pampapasakop tayo ed pananguley to diad bilay tayo. Talaga kasin tatakotan yo so Dios tan iiter yo ed sikato so gloria ed amin a paraan?
16. Akin a nibaga tayon nasusumpal la so panangukom ed Babilonia a Baleg a nidatak ed Apocalipsis 14:8?
16 Intuloy a deneskribe na Apocalipsis kapitulo 14 so arum niran ebento a nagawa ed oras na panangukom. Inmunan asalambit so Babilonia a Baleg, say sankamundoan ya empiryo na palson relihyon: “Sananey a komadua ya anghel so tinmumbok ed sikato, a nankuan, Naplag, naplag so Babilonia saman so baleg.” (Apocalipsis 14:8) On, diad punto de bista na Dios et naplag la so Babilonia a Baleg. Nen 1919 et nibulos iray alanaan a lingkor nen Jehova manlapud panangaripen na saray doktrina tan agamil na Babilonia, ya angontrol ed totoo tan nasyones diad loob na pigan libo a taon. (Apocalipsis 17:1, 15) Diad ontan et nitalaga ra so inkasikara diad pangiyalibansa ed tuan panagdayew. Manlapud saman et nagagawa la ed sankamundoan so panangipulong ed maong a balita na Panarian na Dios.—Mateo 24:14.
17. Anto so lalanoren na ipaway ed Babilonia a Baleg?
17 Wala niray kaaruman a kabiangan na panangukom na Dios ed Babilonia a Baleg. Magano lan onsabi so sigpot a kaderal to. (Apocalipsis 18:21) Lapud maabig a rason, oniay ipapaseseg na Biblia ed totoo a walad nanduruman pasen: “Ompaway kayo ed [Babilonia a Baleg], . . . pian agkayo nalanor ed saray kasalanan to.” (Apocalipsis 18:4, 5) Panon itayon ompaway ed Babilonia a Baleg? Aliwa lambengat a say itundan pilimog ed palson relihyon so lalanoren na satan. Napatnagan so impluensya na Babilonia ed dakel iran bantog a selebrasyon tan kustombre, diad maabuloy ya awawey na mundo nipaakar ed sekso, diad pangiyaalibansa ed saray panliliket a misiglaotan ed espiritismo, tan arum nira. Pian makapantultuloy itayon akabantay, importantin napatnagan ed kiwas tayo tan ed pilalek na puso tayo a talagan sinmian tayo la ed Babilonia a Baleg diad amin a paraan.
18. Nipaakar ed dedeskribien na Apocalipsis 14:9, 10, anto so maalwar a paliisan na saray alerton Kristiano?
18 Diad Apocalipsis 14:9, 10 et wala ni so adeskribe ya aspekto na ‘oras na panangukom.’ Oniay ikuan na sakey nin anghel: “No wala so siopaman a mangigalang ed ayep tan say talintao to, tan alaen to so tanda to ed moling to, o dia ed lima to, Sikato oninum met ed alak na sanok na Dios.” Akin? Say ‘ayep tan talintao na satan’ so mangisisimbolo ed uley na too, ya agmamibidbir ed inkasoberano nen Jehova. Saray alerton Kristiano so maalwar ya agpaimpluensyaan odino patatakan, balanglan diad awawey odino kiwas da, a pakapatnagan na pananuporta ed saramay agmangawat ed supremon inkasoberano na tuan Dios, si Jehova. Amta na saray Kristiano a say Panarian na Dios et niletneg la ed tawen, a panganggaen na satan so amin ya uley na too, tan mansiansia itan ed andi-anggaan.—Daniel 2:44.
Agyo Aabuloyan a Naandi so Inkaganatan Yo!
19, 20. (a) Legan na panasingger tayo ed anggaan na kaunoran iran agew, anto so naseguro tayon gawaen nen Satanas? (b) Anto so determinado tayon gawaen?
19 Diad panasingger tayo ed kasampotan na saray kaunoran ya agew, lalon onloor iray desdes tan tukso. Lapud manbibilay itayo ni ed sayan daan a sistema tan apektado itayo na ag-inkayadyari, naapektoan itayo na makapuy a bunigas, itatakken, ipatey na saray inaro ed bilay, pakasasakitan ed liknaan, pakadismaya lapud agpananginenen ed pangipupulong tayo na Salitay Dios, tan dakel nira. Agbalot lilingwanan ya aanamoten nen Satanas iray pakadedesdesan tayo pian onsuko itayo, salanti, pian ontunda itayon mangipulong ed maong a balita odino agla manbilay unong ed saray estandarte na Dios. (Efeso 6:11-13) Aliwa la iyan panaon pian naandi so inkaganatan tayo nipaakar ed saray panaon a pambibilayan tayo!
20 Amta nen Jesus a nadesdes itayon maong pian onsuko, kanian oniay insimbawa to ed sikatayo: “Mantultuloy a manbantay . . . lapud agyo amta no anton agew so isabi na Katawan.” (Mateo 24:42, NW) Mantultuloy itayo sirin ya alerto ed no anto la so panaon a pambibilayan tayo. Manalwar itayo sumpad saray patit nen Satanas a pansengegan na itayer odino itunda tayo. Ag-itayo ontutundan mangipulong ed maong a balita na Panarian na Dios tekep na nagkalalon seseg tan determinasyon. On, pansiansiaen tayo so inkaganatan tayo legan tayon tatalinengen so pasakbay nen Jesus a: “Mantultuloy a manbantay.” No gagawaen tayo itan, nigalang tayo si Jehova tan magmaliw itayon kabiangan ed saramay makagamor na magnayon iran bendisyon to.
Panon Yon Ebatan?
• Panon tayon naseguro ya onaplika ed saray tuan Kristiano so pasakbay nen Jesus nipaakar ed ‘pantultuloy a pambantay’?
• Antoran panamasakbay ed Biblia so makatulong ed sikatayo pian ‘makapantultuloy a manbantay’?
• Anto so oras na panangukom, tan anto so nipaseseg a gawaen tayo sakbay a manampot itan?
[Litrato ed pahina 23]
Inyaliling nen Jesus so isasabi to ed isabi na sakey a matakew
[Litrato ed pahina 24]
Asingger la so kaderal na Babilonia a Baleg
[Saray litrato ed pahina 25]
Ag-itayo ontutundan manpulong tekep na nagkalalon seseg tan determinasyon