‘Say Tulong Ko et Manlalapu ed si Jehova’

Nagamoran so Bendisyon nen Jehova Lapud Dilin-Panagsakripisyo

SAKEY a laki so manbibisikleta diad pegley na katakelan ed Cameroon. Pigay oras ton bibisikletaen iray adelap a karsada tan ondadalan ed pitek, ya aarapen toy kapeligroan ta pian pabiskegen so arum. Pian nibangat so sakey a grupon walad niyarawin pasen, duaran agagin lalaki so manaakar na 15 kilometro ya ondadalan ed saray ilog, ya aagtoen da iray aysing tan sapatos da pian ag-iratan nabasa. Diad sananey met a pasen, sakey a bii so ombabangon na alas-kuatro ed kabuasan pian bisitaen tan ibangat so sakey a nars, a diad palbangon labat so panaon to a makapanaral na Biblia.

Anto so pampadparaan na saratan a maseeseet a totoo? Amin da so sigpot-panaon a ministro na saray Tasi nen Jehova a mibibiang ed panangibangat ed katuaan na Biblia. Kaiba ed saratan iray regular tan espisyal payunir, misionaryo, ombiabiahen manangasikaso, tan nilibo iran boluntaryo diad ayaman a Bethel ed interon mundo. Tan manunan napapatnagan ed sikara so dilin panagsakripisyo.a

Dugan Motibo

Saray Tasi nen Jehova so manguunor ed simbawa nen apostol Pablo ed si Timoteo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) Balet anto so mamapakiwas ed nilasus nilibo iran Tasi pian manlingkor bilang sigpot-panaon a ministros?

Sano tepetan iray sigpot-panaon a ministro no akin ya isesekar day inkasikara ed panaglingkor ed si Jehova, say ebat da et lapud panangaro ed Dios tan ed kapara ran totoo. (Mateo 22:37-39) Matukotukoy itan, ta no aliwan aro so motibo ra, magmaliw a maapa so pansasagpot da anggan panon lay inkaseet da.​—1 Corinto 13:1-3.

Panaglingkor ya Atekepan na Dilin-Panagsakripisyo

Amin a dedikadon Kristiano so angawat ed imbitasyon nen Jesus: “No say siopaman a too et labay toy ontumbok ed siak benegan toy dili ya inkasikato, et alaen toy krus [“panamairapan a kiew,” NW] to, tan tumboken to ak.” (Mateo 16:24) Say pangitalirak ed inkasikatayon dili et mankabaliksan na mabulos a panagpasakop pian nakayarian tan nidirehi nen Jehova a Dios tan si Jesu-Kristo. Satan so mamapakiwas ed dakel pian manlingkor a sigpot-panaon ed ministeryo tekep na dilin-panagsakripisyo.

Dakel a Tasi so pirmin mansasagpot pian palaknaben so panaglingkor da ed si Jehova. Konsideraen pa so 56-años a si Júlia, sakey a regular payunir diad São Paulo, Brazil. “Tinmawag ed siak so sakey ya agin Tsino diad telepono no labay koy manaral na salitan Chinese,” so nanonotan to. “Lapu ed edad ko, agko la inisip so manaral ni na sananey a lenguahe. Balet kayari na pigaran agew, inawat ko itan a mairap a kimey. Natan et nayarian ko lay mangipresenta na Kasulatan diad salitan Chinese.”

Oniay report na sangan opisina na saray Tasi nen Jehova diad Peru: “Diad agano niran taon, nilasus a regular payunir so inmalis diad saray teritoryan agni napupulongan tan impatnag da so espiritu na inkakpel tan dilin-panagsakripisyo. Sikaray inmalis ed niarawi iran baley a mair-irap so kipapasen tan daiset so napantrabahoan. Sarayan agagin lalaki tan bibii so mabulos a mansasakripisyo pian makapansiansia ira ed saray asainmin da. Balet say sankaimportantian, say kimey da diad ministeryo so walaan na maabig a resulta diad dakel a lugar. Inreport na saray ombiabiahen manangasikaso a walaray balon grupo ya aporma diad tulong na sarayan masakripisyon regular payunir.”

Arum a Kristiano so angirisga ed bilay da ta pian natulongan iray kapananisiaan da. (Roma 16:3, 4) Oniay inreport na sakey a manangasikaso na sirkito diad sakey a lugar ed Aprika ya atabek lay bakal: “Sakbay kamin makasabi diad sampot lan karsada ya abarikadaan, a walad baetan na saray teritoryan inokupaan na saray rebelde tan samay kontrolado na gobierno, sikamin sanasawa so pinaliberan na apatiran komander na saray rebelden militar a kaiba iray bataan da tan tinepet da no siopa kami. Legan dan nenengnengen iray ID mi, naimano ra a nanlapu kami ed lugar a kontrolado na gobierno, kanian naninap ira. Siak so inakusaan dan sakey ya espiya. Diad ontan et denesidi ra ya ipelag da ak ed abot. Impaliwawak no siopa kami, tan diad kaunoran et imbulos da kami.” Agaylan misalsalamat iray kongregasyon lapud sikaray abisita na sayan masakripisyon sanasawa!

Anggaman ed kairapan a naeeksperiensya ra, ondarakel nin siansia iray manlilingkor a sigpot-panaon diad sankamundoan. (Isaias 6:8) Papablien na sarayan makukulin komikimey so pribilehyo ra ed panlilingkor ed si Jehova. Natan et minilyon nin totoo so mangidadayew ed si Jehova lapud walaan met ira na ontan a dilin-panagsakripisyo. Bilang resulta et sikaray bebendisyonan to na daakan. (Uliran 10:22) Lapud matalek ira ed tuloytuloy a panamendisyon tan pananuporta na Dios, ipapatnag na saratan a makukulin komikimey so awawey na salmista ya angikanta: ‘Say tulong ko et manlalapu ed si Jehova.’​—Salmo 121:2.

[Paimano ed leksab]

[Blurb ed pahina 9]

“Say katooan mo ‘yapay da so inkasikara a mabulbulos dia ed agew na pakayarim.”​—SALMO 110:3

[Kahon ed pahina 8]

PAPABLIEN NEN JEHOVA IRAY MASESEG A LINGKOR TO

“Mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.”​—1 Corinto 15:58.

“Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to.”​—Hebreos 6:10.