‘Onla Kayo tan Manggawa Kayo na Saray Babangatan, a Binyagan yo Ra’
“Onla kayo sirin, tan manggawa kayo na saray babangatan ed amin a nasyones, a binyagan yo ra . . . ya ibangat yo ran mangunor na amin a bengabengatla ya ingganggan ko ed sikayo.”—MATEO 28:19, 20.
1. Anto so desisyon a ginawa na nasyon na Israel diad leksab na Palandey Sinai?
MANGA 3,500 taon lay apalabas, sakey a bansa so nansamba ed arap na Dios. Oniay mapublikon inyabawag na saray Israelita sanen nandaragup ira ed leksab na Palandey Sinai: “Amin a sinalita nen Jehova gawaen mi.” Manlapu la’d saman a manpatuloy, say bansan Israel so nagmaliw a dedikado ed Dios, bilang say “pabpablien a pinagka-kayamanan” to. (Exodo 19:5, 8; 24:3) Pitamitam da so pananalimbeng to tan say magnayon a panayam da ed dalin a ‘manag-agus so gatas tan dilo.’—Levitico 20:24.
2. Anton relasyon ed Dios so napanggayagaan natan na totoo?
2 Balet, unong a binidbir nen salmistan Asaf, saray Israelita et agda tinoor odino “inyatol so sipanan na Dios, tan agda ginabay so nanakar ed loob na pananguksoy to.” (Salmo 78:10) Agda tinoor so insamba na saray laklaki ra ed si Jehova. Diad saginonor, satan a nikaduman relasyon ed Dios so abalang na nasyon. (Eclesiastes 5:4; Mateo 23:37, 38) Kanian, say Dios et ‘angala na totoo ed saray Gentiles nipaakar ed ngaran to.’ (Gawa 15:14) Tan diad sarayan kaunoran ya agew, titiponen to so “sakey a baleg ya ulop, [ya] agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita,” ya oniay maliket dan bibidbiren: “Say inkilaban ed Dios tayo a wala a manyurong ed trono, tan dia ed Kordero.”—Apocalipsis 7:9, 10.
3. Antoran kundang so nepeg tayon gawaen pian napanggayagaan tayo so personal a relasyon ed Dios?
3 Pian nakaiba ed saramay manggagayaga ed satan a mablin relasyon ed Dios, nepeg ya idedika na sakey so inkasikato ed si Jehova tan satan so mapubliko ton isimbolo diad bautismo ed danum. Satan so katutulok ed direktan ganggan nen Jesus ed saray babangatan to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo: ya ibangat yo ran mangunor na amin a bengabengatla ya ingganggan ko ed sikayo.” (Mateo 28:19, 20) Saray Israelita so dinmengel sanen binasa so ‘libro na sipanan.’ (Exodo 24:3, 7, 8) Lapud satan, atalosan da iray obligasyon da ed si Jehova. Ontan met natan, say suston pikakabat ed linawa na Dios a naromog ed Salita to, say Biblia, so makanakana sakbay a manpabautismo so sakey.
4. Anto so nepeg a gawaen na sakey pian onkualipika ed bautismo? (Ilaktip so kahon ed tagey.)
4 Malinew, getma nen Jesus a saray babangatan to et nawalaan na putel a pundasyon na pananisia ra sakbay ira a nabautismoan. Binilin to iray patumbok to ya ag-ira lambengat onla tan manggawa na babangatan noagta ibangat da met so ‘pangunor ed amin a bengatla ya ingganggan to.’ (Mateo 7:24, 25; Efeso 3:17-19) Kanian diad kaslakan et saramay kualipikado parad bautismo so nanaral la na Biblia diad loob na pigaran bulan odino sakey odino duaran taon ni ingen, ta pian say desisyon da et aliwan inapura odino kulang na pikakabat. Diad mismon panaon na bautismo, ebatan na saray kandidato so duaran importantin tepet. Lapud indanet nen Jesus a say ‘On tayo et On, say Andi et Andi,’ makatulong ed sikatayon amin so detalyadon panrepaso ed kaimportantian na sarayan duaran tepet ed bautismo.—Mateo 5:37.
Panagbabawi tan Dedikasyon
5. Anton duaran manunan kundang so idadanet na primeron tepet ed bautismo?
5 Say primeron tepet ed kandidato sakbay a manpabautismo et no nagbabawian to la so datin kabibilay to tan no indedika to lay bilay to ed si Jehova pian gawaen so linawa to. Idadanet na sayan tepet so duaran importantin kundang a nepeg nin gawaen sakbay a manpabautismo, salanti, say panagbabawi tan dedikasyon.
6, 7. (a) Akin a nakaukolan so panagbabawi parad amin a kandidato ed bautismo? (b) Antoran pananguman so nepeg a gawaen na sakey kayarin sikatoy nagbabawi?
6 Akin a nepeg a magbabawi so sakey a too sakbay a manpabautismo? Oniay impalinew nen apostol Pablo: “Sikatayo met ya amin nensaman a panaon nambilay itayo ed saray kaalakan na laman tayo.” (Efeso 2:3) Sakbay tayon agamoran so suston pikakabat ed linawa na Dios, nambilay itayo unong ed paraan na mundo, unong ed saray prinsipyo tan estandarte na satan. Say kurang na kabibilay tayo nensaman so walad panangontrol na dios na sayan sistema, si Satanas. (2 Corinto 4:4) Balet, sanen naamtaan tayo la so linawa na Dios, determinado itayon manbilay ya “aleg ed gawa na lawan na katooan, noag dia ed linaway Dios.”—1 Pedro 4:2.
7 Sayan balon kabibilay so mangitatarok na dakel a tumang. Manuna ed amin, say sakey et nawalaan na mablin relasyon ed si Jehova, ya inyaliling nen David ed imbitasyon ya onloob ed “tabernakulo” tan say “masanto a pukdol” na Dios—talagan sakey ya alay abig a pribilehyo. (Salmo 15:1) Makatunongan labat ya ag-imbitaan nen Jehova so anggan siopa noagta saraman lambengat so “manakar a mapmaptek, tan manggawa na matunong, tan mansalita na matua ed puso [da].” (Salmo 15:2) Lapud nanduruman sirkumstansya tayo sakbay a naaralan so katuaan, nakaukolan tayon gawaen so pigaran pananguman ed kondukta tan personalidad pian nakapet iratan a kakaukolanen. (1 Corinto 6:9-11; Colosas 3:5-10) Say mamakiwas ed sikatayo pian gawaen iratan a pananguman et say panagbabawi—say pangunyayeng lapud datin kabibilay tayo tan say mabiskeg a determinasyon a paliketen si Jehova. Saya so mangitonton ed sigpot a pananguman—say pangitalirak ed sinisiblet tan minumundon dalan na kabibilay tan say pangegemtan ed sakey a kurang a makapaliket ed Dios. —Gawa 3:19.
8. Panon tayon gawaen so dedikasyon tayo, tan anto so pisiglaotan na satan ed bautismo?
8 Say komaduan parte na primeron tepet ed bautismo et no kasin indedika la na saray kandidato so inkasikara ed si Jehova pian gawaen so linawa to. Say dedikasyon et importantin kundang a gawaen sakbay na bautismo. Satan so gawaen diad pikakasi, a no iner et ibalikas tayo so pilalek tayon mangitalaga na bilay tayo ed si Jehova diad panamegley nen Kristo. (Roma 14:7, 8; 2 Corinto 5:15) Si Jehova sirin so magmaliw a Katawan tayo tan Makankayarian ed sikatayo, tan singa si Jesus et panliketan tayon gawaen so linawa na Dios. (Salmo 40:8; Efeso 6:6) Sayan masimoon a sipan ed si Jehova et maminsan lambengat a gawaen. Balet, lapud diad pribadon paraan so panggawa tayo ed dedikasyon tayo, say mapublikon panangiyabawag diad agew na bautismo so mangipaamta ed balang sakey a ginawa tayo iyan masimoon a dedikasyon ed mangatatawen ya Ama tayo.—Roma 10:10.
9, 10. (a) Anto so lalanoren na panggawa ed linawa na Dios? (b) Anto so binidbir na saray opisyal na Nazi nipaakar ed dedikasyon tayo?
9 Anto so lalanoren na itumbok ed alimbawa nen Jesus diad panggawa ed linawa na Dios? Oniay imbaga nen Jesus ed saray babangatan to: “No say siopaman a too et labay toy ontumbok ed siak benegan toy dili ya inkasikato, et alaen toy krus to, tan tumboken to ak.” (Mateo 16:24) Dia et indatak to so taloran bengatla a nepeg tayon gawaen. Unona, “benegan” tayoy dili tayo. Diad arum a salita, italirak tayo so sinisiblet tan ag-ayadyari iran tendensia tayo tan unoren tayo so simbawa tan panangidirehi na Dios. Komadua, sakbaten odino ‘alaen tayoy krus’ odino panamairapan a kiew tayo. Diad panaon nen Jesus, say panamairapan a kiew so simbolo na kabandayan tan kairapan. Bilang Kristiano, bibidbiren tayo a manirap itayo nisesengeg ed maong a balita. (2 Timoteo 1:8) Anggaman say mundo et nayarin manludlurey odino mamabaing ed sikatayo, singa si Kristo et ‘ibantak tayo so baing,’ a maliket itayo ed pakaamtan napapaliket tayo so Dios. (Hebreos 12:2) Diad kaunoran, mantultuloy tayon tumboken si Jesus.—Salmo 73:26; 119:44; 145:2.
10 Makapainteres ta bibidbiren na anggan saray arum ya onsusumpa a say dedikasyon na saray Tasi nen Jehova diad Dios et say nikabkabiig a panlingkor da ed sikato. Alimbawa, diad Buchenwald a panangipangawan a kampo na Nazi Alemanya, saray Tasi ya agmangitalirak ed pananisia ra so kinaukolan a manpirma ed onggendan ya inimprintan balikas: “Siak so siansia nin debosyonadon Estudyante na Biblia tan agkon balot buyaken so sinambaan ko ed si Jehova.” Maseguron saya so malinew a mangibabalikas ed awawey na amin a dedikado tan matoor a lingkor na Dios!—Gawa 5:32.
Bibidbiren Bilang Sakey ed Saray Tasi nen Jehova
11. Anton pribilehyo so nagamoran na sakey a manpabautismo?
11 Say komaduan itetepet ed kandidato et manuna, no kasin natatalosan ton say bautismo to so mangipabidbir ed sikato bilang Tasi nen Jehova. Kayari ton nabautismoan, sikato so magmaliw ya ordinadon ministro a mangaakbibit ed ngaran nen Jehova. Parehon saya so baleg a pribilehyo tan seryoson responsabilidad. Say abautismoan so nawalaan met na ilalo ya andi-anggaan a kilalaban, daput no sikato so mansiansian matoor ed si Jehova.—Mateo 24:13.
12. Anton obligasyon so katekep ed pribilehyon pangakbibit ed ngaran nen Jehova?
12 Maseguron nikadkaduman pribilehyo so pangakbibit ed ngaran na makapanyarin-amin a Dios, si Jehova. Oniay inkuan nen propeta Miqueas: “Saray amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” (Miqueas 4:5) Anggaman kuan, wala so obligasyon tayo ya akatekep ed sayan pribilehyo. Nepeg tayon pambanikelan ya itunos so bilay tayo pian nigalang so ngaran ya aakbibiten tayo. Unong ya impanonot la nen Pablo ed saray Kristiano diad Roma, no say gagawaen na sakey et sumlang ed ipupulong to, say ngaran na Dios so “naayew,” odino napabanday.—Roma 2:21-24.
13. Akin a saray dedikadon lingkor nen Jehova et walaan na responsabilidad a mantasi nipaakar ed Dios da?
13 Sano say sakey a too et magmaliw a Tasi nen Jehova, sikato met so mangawat ed responsabilidad a mantasi nipaakar ed Dios. Inimbitaan nen Jehova so dedikadon nasyon na Israel pian magmaliw iran tasi to a mamekder ed andi-anggaan ya inka-Dios to. (Isaias 43:10-12, 21) Balet ag-agawaan na nasyon so responsabilidad da, kanian diad kaunoran et sigpot lan naandi so panangabobon nen Jehova ed sikara. Natan, saray tuan Kristiano so apribilehyoan a mantasi nipaakar ed si Jehova. Gagawaen tayo itan lapud sikato so inaro tayo tan pampipirawatan tayon napasantos so ngaran to. Agtayo kasi ibaga ed arum so naamtaan tayon katuaan nipaakar ed mangatatawen ya Ama tayo tan ed gagala to? Nalikna tayo met so alikna nen apostol Pablo sanen inkuan ton: ‘Kapilitan so amasoot ed siak. Abagey ak la no agko ipulong so ebanghelyo!’—1 Corinto 9:16.
14, 15. (a) Anto so betang na organisasyon nen Jehova diad ibubulaslas tayo ed espiritual? (b) Antoran probisyon so walan makatulong ed sikatayo nipaakar ed espiritual?
14 Say komaduan tepet so mangipapanonot met ed kandidato nipaakar ed responsabilidad ton mikoopera ed organisasyon ya ididirehi na espiritu nen Jehova. Agtayo nagawaan a bukor so panlingkor ed Dios, tan nakaukolan tayo so tulong, suporta, tan panamaseseg na “interon ulopan na agagi.” (1 Pedro 2:17, NW; 1 Corinto 12:12, 13) Importante so betang na organisasyon na Dios diad espiritual ya ibubulaslas tayo. Itatarya na satan so daakan iran publikasyon na Biblia ya ontulong ed sikatayon ombulaslas ed suston pikakabat, onkiwas a makabat sano nipaarap itayo ed saray problema, tan mamaelet ed relasyon tayo ed Dios. Singa sakey ya ina a seguroen ton say anak to et nasustuni tan naasikason maong, say “matoor tan makabat ya aripen” so mangitatarya na daakan tan nipanpanaon ya espiritual a tagano pian onaligwas itayo ed espiritual.—Mateo 24:45-47; 1 Tesalonica 2:7, 8.
15 Diad sinimba iran pantitipon, nagagamoran na saray totoo nen Jehova so nakaukolan a panangipasal tan panamaseseg pian magmaliw iran matoor a Tasi nen Jehova. (Hebreos 10:24, 25) Ibabangat itayo na Teokratikon Eskuelaan Parad Ministeryo a manpaliwawa ed publiko, tan ipapasal itayo na Pantitipon Parad Panagserbi a magmaliw ya epektibo ed pangipasabi ed mensahe tayo. Diad saray pantitipon tayo tan ed personal a panagaral tayo na saray publikasyon na Biblia, nanengneng tayo so ikukurang na espiritu nen Jehova, a mangididirehi ed organisasyon to. Diad panamegley na sarayan regular a probisyon, papasakbayan itayo na Dios nipaakar ed saray kapeligroan, nipapasal itayon magmaliw ya epektibo iran ministro, tan natutulongan itayon mansiansian aliing ed espiritual.—Salmo 19:7, 8, 11; 1 Tesalonica 5:6, 11; 1 Timoteo 4:13.
Say Motibo ed Pampabautismo
16. Anto so mamakiwas ed sikatayon mangidedika na inkasikatayo ed si Jehova?
16 Say duaran tepet ed bautismo so mangipapanonot sirin ed saray kandidato nipaakar ed kabaliksan na bautismo ed danum tan saray responsabilidad a katekep na satan. Anto sirin so nepeg a mamakiwas ed sikara pian manpabautismo? Sikatayo so magmaliw a bautismadon babangatan, aliwan lapud walay amilit ed sikatayo, noagta lapud ‘inyasingger’ itayo nen Jehova. (Juan 6:44) Lapud say ‘Dios et aro,’ uuleyan to so uniberso tekep na aro, aliwan puersaan. (1 Juan 4:8) Napapaapit itayo ed si Jehova lapud maong iran kalidad to tan diad paraan na pidedeneng to ed sikatayo. Inter nen Jehova ed sikatayo so bogbogtong ya Anak to, tan iyoopresi to ed sikatayo so sankaabigan ya arapen. (Juan 3:16) Bilang resulta, sikatayo so napakiwas a mangiter—mangidedika—na bilay tayo ed sikato.—Uliran 3:9; 2 Corinto 5:14, 15.
17. Anto so agtayo angidedikaan na inkasikatayo?
17 Idedika tayo so inkasikatayo, aliwan lapud sakey a prinsipyo odino sakey a kimey, noagta lapud si Jehova a mismo. Say kimey a pagagawa na Dios ed totoo to so manguman, balet say dedikasyon da ed sikato et agmanguman. Alimbawa, say impagawa to ed si Abraham so midumaan a tuloy ed impagawa to ed si Jeremias. (Genesis 13:17, 18; Jeremias 1:6, 7) Ingen ta sinumpal dan dua so espisipikon kimey ya impagawa na Dios ed sikara lapud inaro ra si Jehova tan pilalek dan gawaen so linawa to tekep na katooran. Legan na sayan panaon na anggaan, amin a bautismadon patumbok nen Kristo so manggugunaet a manumpal ed ganggan nen Kristo ya ipulong so maong a balita na Panarian tan panggawa na babangatan. (Mateo 24:14; 28:19, 20) Say interon-puso a pananumpal ed satan a kimey so maabig a paraan pian nipatnag tayon inaro tayo so mangatatawen ya Ama tayo tan napaneknekan tayon sigpot itayon dedikado ed sikato.—1 Juan 5:3.
18, 19. (a) Anto so mapublikon ibabalikas tayo diad pampabautismo tayo? (b) Anto so konsideraen tayo ed ontumbok ya artikulo?
18 Maseguron dakel a bendisyon so nagamoran lapud impanpabautismo, balet ag-itan nepeg a leglemewen. (Lucas 14:26-33) Ipapabitar na satan so determinasyon tayo a nepeg nin iyuna itan nen say antokaman nin responsabilidad. (Lucas 9:62) Diad tua et onia so mapublikon ibabalikas tayo sano manpabautismo itayo: “Saya a Dios sikato so Dios tayo ed ando lan ando: sikato so manangibasbas tayo angga ed ipatey.”—Salmo 48:14.
19 Usisaen ed ontumbok ya artikulo so kaaruman niran tepet a nayarin onlesa nipaakar ed bautismo ed danum. Wala kasi iray makatunongan a rason no akin a masuyat a manpabautismo so sakey a too? Say makasengeg kasi et say edad? Panon a makatulong so amin ya onatendi nipaakar ed dignidad na bautismo?
Kasin Nipaliwawa Yo?
• Akin a nakaukolan a magbabawi ni so balang Kristiano sakbay a manpabautismo?
• Anto so lalanoren na dedikasyon ed Dios?
• Antoray responsabilidad a katekep ed pribilehyon pangakbibit ed ngaran nen Jehova?
• Anto so nepeg a mamakiwas ed sikatayon mandesisyon a manpabautismo?
[Kahon/Litrato ed pahina 22]
Say Duaran Tepet ed Bautismo
Base ed bagat nen Jesu-Kristo, kasin nagbabawian yo laray kasalanan yo tan indedika yo lay inkasikayo ed si Jehova pian gawaen so linawa to?
Kasin natatalosan yo a say dedikasyon tan bautismo yo so mangipabidbir ed sikayo bilang sakey ed saray Tasi nen Jehova a kabiangan na organisasyon ya iwawanwan na espiritu na Dios?
[Litrato ed pahina 23]
Say dedikasyon et sakey a masimoon a sipan ed si Jehova panamegley na pikakasi
[Litrato ed pahina 25]
Say panagpulong a kimey tayo so mangipapatnag ed dedikasyon tayo ed Dios