Kasin Nanonotan Yo?

Agunggonaan kayo kasi ed impanbasa na agano niran paway na Say Panag-Bantayan? Salien yo pan ebatan so onggendan a tepetepet:

• Antoray pigaran rason no akin a pirmi so kaugsan natan?

Sakey a sengegan na mauges iran gawa et say tendensia na too a manggawa na kaugsan. (Genesis 8:21) Sananey nin sengegan et dakel a totoo so andian na suston kakabatan nipaakar ed linawa na Dios. Niarum ni, si Satanas, say angigapo na kaugsan, so tuloy-tuloy a mibabali ed saray pakurang na katooan.​—1/1, pahina 4-6.

• Antoray positibon epekto na maabig a salita ya imbalikas ed dugan panaon? (Uliran 15:23)

Satan so mamabiskeg ed dilin-kompiyansa na say pangibabagaan, mamaseseg tan mamakiwas ed sikato, tan mangipalikna a sikatoy kabiangan ed muyongan. Ontan met, say panggunaet tayon mangomenda so ontulong met ed sikatayon nanengneng so kamaongan na arum.​—1/1, pahina 16-17.

• Anto so karga na kaban na sipanan?

Karga na satan so duaran tapyas a bato na Ganggan ontan met ed daiset a mana. Kayarin nanrebelde si Kora, inyan met ed Kaban so tayukor nen Aaron pian onkana a panandaan odino pantasi sumpad satan a kailalakan. (Hebreos 9:4) Say tayukor tan mana so nayarin inekal la ed Kaban sakbay na impangidedika ed templo nen Solomon.​—1/15, pahina 31.

• Akin a saray Judio ed panaon nen Nehemias so kinaukolan a manawit na kiew diad templo?

Ag-ingganggan na Mosaikon Ganggan so pangiyapay na kiew. Balet diad panaon nen Nehemias et kinaukolan so tuloytuloy a pangisuplay na kiew pian napoolan iray bagat ed altar.​—2/1, pahina 11.

• Anto so Muratorian Fragment?

Satan so kabiangan na sakey a manuskriton Latin. Atibukel so orihinal a teksto diad salitan Griego diad pansampot na komaduan siglo K.P. Karga na satan so sankadaanan a listaan na saray libro na Kristianon Griegon Kasulatan ya ipapasen a napanmatalkan, pati saray komento nipaakar ed saratan a libro tan saray nansulat ed saratan.​—2/15, pahina 13-14.

• Akin ya aminpigan ag-akiarap ed ari si Reyna Vasti na Persia? (Ester 1:10-12)

Ag-ibabaga na Biblia so motibo to. Isusuheri na arum ya iskolar ya agtinmulok so reyna lapud agto labay so napabanday diad imaton na saray abuanges lan sankaili na ari. Odino nayari a sayan magangganan reyna et talagan agmapasakop, ya angipanengneng sirin na makapuy ya alimbawa ed arum nin kaasawaan a bibii diad Empiryo na Persia.​—3/1, pahina 9.

• Panon a say dondon et mangitatarya na kililiktar?

Nayarian itayon iliktar na bagat nen Jesus manlapud atawir a kasalanan tan nibulos itayo na satan manlapud makapatey iran epekto na kasalanan. (Roma 6:23) Sayan bagat so mangibulos ed saray tuan Kristiano manlapud nagogonigon a konsiensia. Tan diad pangagamil na pananisia ed dondon, ag-itayo makalikna na takot nipaakar ed talindeg tayo ed Dios. (1 Juan 2:1)​—3/15, pahina 8.

• Anto so naaralan tayo ed pananebel na Ganggan ya ag-ilalambong so kilaw a kanding ed gatas na ina to? (Exodo 23:19)

Say ontan a panaglambong so nayarin sakey a paganon ritual a gagawaen pian napawalay uran. (Levitico 20:23) Intarya na Dios so gatas na ina a panagano ed kilaw pian ombaleg. Say pangilambong ed kilaw ed satan a gatas so panangipatnag na panmudmora ed inletneg na Dios a relasyon na ina tan kilaw. Say ganggan a mangisesebel ed satan so mangipatnag ed maaron panangabagey na Dios.​—4/1, pahina 31.