Istorya na Bilay

Tinumangan A Maong nen Jehova so Pilalek Kon Magmaliw A Misionaryo

Unong ya insalaysay nen Sheila Winfield da Conceição

Aminsan et inistorya ed sikami na ombibisitan misionaryo ed Aprika ya amin a totoo diad teritorya to so mamapaloob ed sikato tan madengedengel ira ed maong a balita na Panarian na Dios. ‘Agaylan pampirawatan ko so manpulong ed ontan met a teritorya!’ so ninonot ko. Saman a tongtongan so anagyat ed siak pian pilaleken koy magmaliw a misionaryo, bangta 13 años ko ni labat ed saman.

ANGGAMAN ontan, diad mas asasakbay ni so inggapo na pamilya mi a manaral nipaakar ed si Jehova. Sakey a kabuasan nen 1939, walay duaran malangwer a lalaki a malinlinis so sulong da a dinmalaw ed abung mi diad Hemel Hempstead, a kapaway labat na Greater London, Inglatera. Sikaray Tasi nen Jehova. Saksakey taon ko ni labat ed saman, kanian agko nanonotan iman ya imbisita ra. Ta pian onalis la ra, imbaga ed sikara nen Nanay a nayarin interesadoy Tatay balet manga alas-9 ni ed labi so isempet to. Asurprisan maong si Nanay sanen pinmawil ira ed saman a mismon labi! Kayari ran impalinew so talindeg da ed mapolitika tan nasyonalistiko iran isyu, pinaloob ira nen tatay ko a si Henry Winfield tan sikatoy impaiyaralan ed Biblia. Mapmaples so inyaligwas to anggad abautismoan. Pigaran taon ed saginonor et nanaral met lay nanay ko a si Kathleen. Sikatoy abautismoan nen 1946.

Nen 1948, ginapoan koy mibiang a maparanay diad panangipulong ed maong a balita na Panarian na Dios. Inisip ko a nakaukolan koy relo pian suston nireport ko so oras ko diad ministeryo. No sikamin sanaagi et mandeen, naikdan kami na sakey a sixpence (sinsilyo a sais sentimos so balor to) a balonen mi kapagno Sabado. Tinipon ko so sixpence ko ed loob na ngalngalin duay taon pian makasaliw ak na sankamuraan lan relo diad saman a panaon. Balet, si Ray, a mas yugtan ed duaran agagik a lalaki, so naynay ya onkekerew ed si Tatay na sanderwa a threepence (walaan na balor a tres sentimos), tan agbalot kinmerew na tibukel a sixpence. Sakey ya agew et sikatoy mapilpilit a nawalaan na duaran sinsilyo kanian apasnokan si Tatay. Manakis si Ray tan inkuan ton nakaukolan to so duaran threepence ta walay sekreto dan dua nen Jehova. Impalinew itan a siansia nen Ray: “Say sakey a threepence et ipelag ko ed kahon parad kontribusyon, tan samay sakey et parad siak.” Si Nanay so akalua ed liket to, si Tatay so tampol a nampasalat na sinsilyo, tan siak so akaaral ed kaimportantian na panuporta ed kimey nipaakar ed Panarian diad pinansyal a paraan.

Diad saman et implano nen Tatay so onalis ed lugar a babaleg so pankaukolan parad saray manangipalapag na Panarian. Nen 1949, inlako to so daralusan to tan say buntonan to na buer tan graba insan ginmapon nanlingkor bilang payunir, odino sigpot-panaon a ministro na saray Tasi nen Jehova. Abautismoan ak nen Setyembre 24, 1950, bilang simbolo na dedikasyon ko ed si Jehova. Manlapu la’d saman, legan a bakasyon na eskuela diad panaon na tiagew, nampalista ak bilang vacation pioneer (natan et auxiliary), a manguusar na 100 ya oras ed kada bulan diad ministeryo. Balet gapoan ni labat iman. Ag-abayag et tinmubo so pirmin pampilalek ko a paaligwasen ni so kimey ko pian suportaan so puron panagdayew.

Say Pilalek Kon Magmaliw a Misionaryo

Nen 1951, si Tatay so niasain ed Bideford, Amianen a Devon. Agnambayag kasabi mi diman, walay misionaryon manlilingkor ed Aprika a binmisita ed kongregasyon mi, unong ya asalambit ko la diad gapo. Kayari na satan, amin a desisyon ko so iimpluensyaan la na pilalek kon magmaliw a misionaryo. Sayan kalat ko so amta na saray managbangat ed eskuelaan kanian ginawa ran amin so nayarian da pian dismayaen ak, ya iilaloan dan gegemtanen ko so sekular a karera. Anggaman ontan, diad sampot lan agew ko ed eskuelaan, sanen linmoob ak ed kuarto na saray managbangat pian pisalamatan ira tan manpatanir ak la, oniay inkuan na sakey ed sikara: “Maliket kami parad sika! Sika labat so estudyante a peteg a walaan na kalat ed bilay. Iilaloan min nadampot mo so kalat mo.”

Agak la nampirdi na panaon, nananap ak na part-time a trabaho, tan nen Disyembre 1, 1955 et nagmaliw ak a regular payunir. Diad saginonor, si Nanay tan saray agagik so nagmaliw met lan payunir. Kanian diad loob na pigaran taon, amin mi a sankapamilyaan so walad sigpot-panaon a serbisyo.

Diad Irlandya

Sakey taon ed saginonor, akaawat ak na imbitasyon a manlingkor diad Irlandya. Saya la so gapoan na pakadampot ko ed kalat ko a magmaliw a misionaryo. Nen Pebrero 1957, siak tan say kaibak a duara nin malangwer a payunir a si June Napier tan Beryl Barker, so sinmabi ed Cork, abalaten ya Irlandya.

Mairap so panagpulong diad Irlandya. Dakel so onsusumpa a kabiangan na Iglesia Katolika Romana. Sinegurado mi a walay napawayan mi ed kaliberliber na apartment odino diad saray atalunton a kaabungan ed subdibisyon, no bilang ta bigla da kamin patakyasen. Iyaamot mi nensaman iray bisikleta mi diad arawi, balet mabetbet a walay makaromog ed saratan tan bubutawen to iray dalig odino pakekepesen to.

Aminsan, legan a dadalawen mi nen Beryl iray residente diad sakey a maawang a subdibisyon, sikami so binalawbalaw na sakey a grupo na ugugaw tan tinutupak da kami. Kanian linmoob kami ed sakey a kabiangan na sakey ya abung a panlalakoay gatas. Saramay onuusil so nanmumungkog diad paway. Anggaman labalabay nen Beryl so gatas, sandaraiset ton ininum so duara odino taloran baso, legan ton aalagaren a manbubuyak la iramay onuusil ed sikami. Balet aliwan onman so agawa. Kabekta, walay malangwer nin pari a linmoob ed lakoan. Lapud abaloan ton bisita kami, inkuan to a labay to kamin ipasyar ed kaliberliber. Balet, antis na satan et pinaloob to kami ni diad sananey a silir na saman ya abung, tan legan kamin akayurong a marendeen, indauloan to so unor a dasal parad sakey a manpapanabos lan masiken. Insan kami la tinmaynan ed saman ya abung a kaiba so pari. Sanen anengneng na saramay onuusil a katongtong mi so pari, sikara la so nambubuyak.

Diad Gilead

Nen 1958 et niyuksoy so kagawa na Divine Will ya Internasyonal ya Asamblea diad New York. Onatendi ed saman si Tatay, tan labay ko met so onla, balet anggapoy kuartak. Kabekta et agmi inilaloan ya inatey so baik tan intilakan to ak na 100 pound ($280, U.S.). Say pasahe a pawil-patubo ed asamblea et 96 pound, kanian nampareserba ak a tampol na tiket ed eroplano.

Kayarin tuloy na satan, binmisita ed sikami so manangilaman na sangan opisina na saray Tasi nen Jehova ed Britanya tan inimbitaan to so amin ya espisyal payunir ya onatendi ed asamblea a man-aplay parad panangipasal ed misionaryo diad Watchtower Bible School of Gilead. Agak makapanisia ed nadngel ko! Insan, balang sakey so inikdan to na saray aplikasyon nilikud ed siak, lapud uga-ugaw ak ni. Akikasi ak ya ikdan to ak met tan impaliwawak ya asalik lay tinmaynan ed bansa mi tan singa ak met la manlilingkor bilang misionaryo. Sanen atebek ton determinado ak, inikdan to ak na aplikasyon. Impikasik a maong a naawat ak komon! Aganggano a sinmabi so ebat, tan siak so naabuloyan a manaral ed Gilead.

Malikeliket ak lapud nibilang ak ed koma-33 a klase na Gilead, a kaibay 81 ya arum nin payunir a nanlapud 14 a daldalin. Aganggano a linmabas so limay bulan a kurso mi. Sanen manampot la so klase mi, si Brother Nathan H. Knorr so angiter ed sikami na makapaseseg a paliwawa ed loob na apatiran oras. Pinaseseg to iramay walad kasuloan a mansiansian ontan no sarag da. (1 Corinto 7:37, 38) Balet parad saramay malabay a mangasawa o miasawa diad arapen, insuheri to a manggawa kami na listaan na personal iran kakaukolanen parad sakey a matukoy a kapareha. Diad ontan, no walay onsingger a prospektibon kapareha, nausisa mi so personalidad to unong ed saraman a kakaukolanen.

Niraya so kabiangan ed personal a listaan na saray kakaukolanen ko parad prospektibon asawan laki: Kaukolan a sikatoy kaparak a misionaryo tan mangaaro ed si Jehova, mas dakel so amta to nen siak nipaakar ed katuaan na Biblia, mabulos ya agnawalaan na anak sakbay na Armagedon ta pian makapantultuloy kami ed sigpot-panaon a serbisyo, marunong a mansalitay Ingles, tan matakken nen siak. Sayan listaan so akatulong a maong ed siak bilang marikit a 20 años ya akaparaan lan mangawat na asainmin diad arawin dalin.

Diad Brazil

Diad Simba, Agosto 2, 1959, sikami so nangraduar tan nipaamta ed sikami iray asainmin mi. Sikara di Vehanouch Yazedjian, Sarah Greco, Ray tan Inger Hatfield, Sonia Springate, Doreen Hines so kakaibak a niasain ed Brazil. Sikami so malikeliket. Nononoten ko iray katakelan, saray uleg, saray rubber tree, tan saray native ya Indian. Balet, asurprisa ak a maong kasabik! Imbes a katakelan na Amazon a napnoy kakiewan, say nakar ko et diad sakey a maliwawa tan modernon syudad na Rio de Janeiro, a kabisera na bansa diad saman a panaon.

Say akasubokan min tampol et say panaral na Portuges. Diad primeron bulan, sikami so 11 oras a manaaral ed kada agew. Kayari min nampulong diad Rio de Janeiro tan nanayam ya agano diad sangan opisina na saray Tasi nen Jehova diman, nibaki ak diad ayaman na misionaryo ed Piracicaba, diad São Paulo State, tan diad saginonor et niyalis ak ed ayaman na misionaryo ed Porto Alegre, diad Rio Grande do Sul State.

Insan, diad asasakbay na 1963, siak so atawag a mankimey ed Translation Department diad sangan opisina. Si Floriano Ignez da Conceição, ya angibangat ed sikami na Portuges sanen kasabisabi mi, so manangasikaso ed sayan departamento. Naaralan to so katuaan nen 1944, sanen 300 ni labat so Tasi ed Brazil, tan nanaral ed koma-22 a klase na Gilead. Sakey ya agew, kalabas na pigaran bulan, kinerew nen Brother Conceição ya ontilak ak ni antis na panangugto, lapud labay to ak a katongtongen. Diad gapo et aburido ak. Wala tay ginawak a lingo? Sanen tinmanol la so banting parad panangugto, tinepet ko’d sikato no antoy ibaga to ed siak. Bilang ebat, oniay intepet to, “Labay mo ta so miasawa ed siak?” Agak akasel ed saman. Imbagak a nonoten ko ni tan nanapura ak ya inmepas parad panangugto.

Aliwan si Floriano so primeron agi ya angibalikas na panggusto to’d siak. Balet, anggad saman a bekta et anggapo ni so akakapet ed personal iran kakaukolanen ko parad matukoy a kapareha. Panisiaan kon akatulong ed siak imay listaan ko pian agak nalingo ed desisyon ko. Balet natan et duma. Akapet nen Floriano so amin a kakaukolanen ko! Kanian sikami so nankasal nen Mayo 15, 1965.

Say Impangarap Mi ed Makapasubok a Sakit

Malikeliket so panamaley mi nen Floriano, anggaman ed saray angat ya aarapen mi. Sakey ed saratan et say sakit nen Floriano, a ginmapo sakbay a tuloy na impankasal mi. Diad imbebeneg a taon et kinmapuy so kawigin bala to, tan saray epekto na satan et paniirapan ton maong natan. Bilang resulta, pinmaway kami ed Bethel tan niasain kami bilang espisyal payunir diad syudad na Teresópolis, diad kapalandeyan a rehyon na Rio de Janeiro State. Inilaloan mi a makatulong so klima diman diad iyabig to.

Ontan met, nen Disyembre 1965, nipakabat ed siak a walay graben kanser nen nanay ko. Mabetbet kamin mansusulatan a dua, balet pitoy taon la ya agko ni anengneng si Nanay. Kanian, impilitian to ak a paonla’d Inglatera pian nanengneng ko. Sikato so inoperaan, balet agnakal na saray doktor so kanser. Anggaman agla makabangon tan graben maong so sakit to, pinilalek to nin siansia so mibiang ed kimey a panagpulong. Walay makinilya ed abay na dukolan to ta pian nidikta to iray sulat a labay ton paimakinilya. Sikatoy makapampupulong met a magano ed saray ombibisita ed sikato. Nen Nobyembre 27, 1966, sikato so inatey. Diad satan a bulan et sikatoy akapangireport na samploran oras ed lawak na serbisyo! Si Tatay met so nantultuloy a matoor ed serbisyo bilang payunir anggad impatey to nen 1979.

Kayari na impatey nen Nanay, pinmawil kami nen Floriano ed Brazil, diad Rio de Janeiro State, a diman so dati lan nanlingkoran mi. Diad gapo et niasain kami ed kimey ed sirkito diad kabisera na luyag, balet aganggano iyan impanliket mi lapud linmoor lamet so sakit nen Floriano. Diad ontan et pinmawil kami ed Teresópolis bilang espisyal payunir.

Nen 1974, kayari na makapaot-ot a panagtambal, saray doktor so angekal a siansia ed kawigin bala nen Floriano. Agto la nayarian ed saman so manlingkor bilang mangidadaulon manangasikaso odino bilang espisyal payunir, balet ayarian to ni so mangiyaral na Biblia legan na oras na ibibisita diad ospital—a sakey ed saratan et diad Ingles a si Bob, sakey a masiken lan Amerikano. Inawat nen Bob so katuaan tan diad saginonor et abautismoan. Kalkalnan inmabig si Floriano tan manlapud saman et sikatoy nanlingkor la bilang regular payunir.

Benendisyonan nen Jehova so Ministeryok

Diad inlabas na saray taon, akapantultuloy ak a nanlingkor bilang espisyal payunir, tan benendisyonan nen Jehova so ministeryok. Diad Teresópolis et awalaan ak na alay abig a pribilehyon ontulong ed masulok a 60 a totoo pian idedikay bilay da ed si Jehova. Sakey ed saraya si Jupira, a sikatoy binangatan ko met a manbasa. Asabi panaon et inyaralan ko met so waloran angkakabaleg lan ananak to. Bilang resulta, si Jupira tan say masulok a 20 a kapamilyaan tan kakanayon to so aktibon manlilingkor natan ed si Jehova. Sakey so manlilingkor bilang matatken, talora so ministeryal a lingkor, tan duara so payunir.

Naaralan kon pansiansiaen so positibon awawey nipaakar ed posibilidad a naaralan na totoo so katuaan. Aminsan, siak so mangiyaaral na Biblia ed sakey a malangwer a biin manngaran na Alzemira sanen siak so pinagyaw na asawa ton si Antônio ya ipakalat to ak ed duaran angkakabaleg ya aso no agak ontaynan a tampol ed abung da. Kayari na saman et mataltalag kami lan makapannengneng nen Alzemira ya anggad linmabas so pitoran taon, sanen apaesel koy Antônio ya abuloyan ton iyaralan ko lamet so asawa to. Siansia ni et sinebelan to ak a mitongtong ed sikato nipaakar ed Biblia. Balet sakey ya agew legan ya onuuran, inimbitaan koy Antônio a mibiang ed panagaral. Naamtaan ko ed saman a say problema to manaya et agto amtay manbasa. Manlapud saman et sikato lay inyaralan nen Floriano tan saray arum tan imbangat da met a manbasa. Natan et abautismoan lay Alzemira tan si Antônio. Baleg a katulongan ed kongregasyon si Antônio, a mangiiba ed dakel a kalangweran diad ministeryo.

Saraya so pigara labat ed saray naeksperiensya mi legan na masulok a 20 a taon ya impanlingkor mi ed Teresópolis. Diad kasakbayan na 1988, akaawat kami na balon asainmin mi—diad syudad na Niterói, a ditan so nanlingkoran mi ed tinmumbok a limay taon sakbay kamin inmalis ed Santo Aleixo. Insan niyalis kami ed Kongregasyon na Japuíba diad sentro na luyag tan apribilehyoan kamin mangigapo ed Kongregasyon na Ribeira.

Simplin Bilay Balet Makapatumang

Diad inlabas na saray taon, sikami nen Floriano so awalaan na pribilehyon ontulong ed masulok a 300 a totoo a mangidedika na bilay da ed si Jehova. Arum ed sikara natan so manlilingkor diad sanga, tan saray arum et payunir, mamatatken, tan ministeryal a lingkor. Agaylan misalsalamat ak lapud uusaren kami na Dios diad panamegley na masanton espiritu to pian ontulong ed dakerakel a totoo!—Marcos 10:29, 30.

Tua a kaukolan nen Floriano ya anosan so graben sakit to. Anggan ontan so kipapasen to, sikatoy nansiansian matoor, maliket, tan matalek ed si Jehova. Oniay mabetbet ton ibabaga: “Say liket natan et agmanlapu ed pambilay ya andiay problema. Manlapu itan ed pakagamor na tulong nen Jehova pian naarap iray problema.”—Salmo 34:19.

Nen 2003 et akanser so kawigin matak. Siak so inoperaan, tan sinalatan na artipisyal so matak, a kaukolan a maminpigan linisan ed kada agew. Anggan oniay kipapasen ko, siak so iikdan nen Jehova na biskeg pian makapantultuloy ak a manlingkor ed sikato bilang espisyal payunir.

No nipaakar ed materyal iran bengatla, simpli lambengat so panagbilay ko. Ingen, tinumangan ak nen Jehova ed asainmin ko tan siak so pinayaman to ed espiritual. Samay komento na misionaryon agin bii nipaakar ed panagpulong ed Aprika so matukotukoy a maneskribe ed asainmin mi diad Brazil. Talagan tinumangan a maong nen Jehova so pilalek ko a magmaliw a misionaryo!

[Litrato ed pahina 9]

Kaiba so pamilyak nen 1953

[Litrato ed pahina 9]

Panagpulong diad Irlandya nen 1957

[Litrato ed pahina 10]

Diad Brazil nen 1959 a kaibak iray kaparan misionaryo. Manlapud kawigi a manpakawanan: Siak, si Inger Hatfield, si Doreen Hines, tan si Sonia Springate

[Litrato ed pahina 10]

Kaibak so asawak