Idayew Komon na Kongregasyon so Dios a Jehova
“Ipakabat ko so ngaran mo ed saray agagik, dia ed pegley na iglesia [“kongregasyon,” NW] igalang ta ka.”—HEBREOS 2:12.
1, 2. Akin a makagunggonan tuloy so kongregasyon, tan anto so manunan gagala na saya?
DIAD interon awaran, naroromog na totoo so maapit ya ulopan tan kaligenan diad loob na pamilya. Balet, ipapabitar na Biblia a wala ni so sakey a grupo odino muyongan a ditan et panggagayagaan met na dakel a totoo ed sankamundoan so nikaduman ulopan tan kaligenan. Sayan grupo et say Kristianon kongregasyon. Balanglan kabiangan kayo odino andi ed sakey a maapit tan mantutulongan a pamilya, naapresya yo no anto so itatarya na Dios diad panamegley na uksoyan na kongregasyon. Siempre, no mililimog kayo la ed sakey a kongregasyon na saray Tasi nen Jehova, maseguron napaneknekan yon walay maapit a panlilimog tan kaligenan ditan.
2 Say kongregasyon et aliwa labat a grupon manduroypo parad maliket a gagala. Aliwa itan ya asosasyon ed komunidad a mantitipon iray totoon walaan na pareparehon kipapasen na panagbilay odino interes ed sakey ya isport odino panligliwaan. Imbes, say manunan gagala na uksoyan na kongregasyon et say pangidayew ed si Jehova a Dios. Ontan so abayag lan gagala na kongregasyon unong ya idadanet na libro na Salmos. Oniay nabasa tayo ed Salmo 35:18: “Ikdan ta ka na pisasalamat ed loob na baleg a muyongan: idayew ta ka ed utel na saray dakel a totoo.” Mipadpara ed satan, oniay ipapaseseg ed sikatayo na Salmo 107:31, 32: “O komon no saray totoo et idayew da si Jehova lapu ed abig na linawa to, tan lapu ed makapakelkelaw ira a gawa to ed saray anak na totoo! Sikato so itandoro ra met ed pantitiponan na katooan, tan sikato so dayewen da ed pandaragupan na saray mamatatken a pangulo.”
3. Unong ed si Pablo, anto so inkigagalaan na kongregasyon?
3 Impabitar na Kristianon apostol a si Pablo so sakey nin makagunggonan gagala na kongregasyon sanen tinukoy to so “abung na Dios, a sikato so iglesia na Dios a mabilay, a lusek tan sakurong na katuaan.” (1 Timoteo 3:15) Dinan ya iglesia odino kongregasyon so tutukoyen nen Pablo? Diad antoran paraan so inkausar na salitan “kongregasyon” diad Biblia? Tan anto so epekto na saya ed bilay tan ilalo tayo? Pian naamtaan tayo iray ebat ed saya, usisaen tayo nin unona so inkausaran na salitan “kongregasyon” diad Salitay Dios.
4. Diad anton pantalos so mabetbet ya inkausaran na salitan “kongregasyon” ed Hebreon Kasulatan?
4 Say Hebreon salita a mabetbet a nipapatalos a “kongregasyon” so imbase ed kabaliksan a “dagup” odino “tipon.” (Deuteronomio 4:10; 9:10) Inusar met na salmista so “duypo” nipaakar ed saray anghel ed tawen tan nausar met itan pian mangideskribe ed grupo na saray mauges a totoo. (Salmo 26:5; 89:5-7) Balet, saya so mabetbet ya iyaaplika na Hebreon Kasulatan ed saray Israelita. Impabitar na Dios a si Jacob so magmaliw a kongregasyon odino ‘ulop na totoo,’ tan ontan so agawa. (Genesis 28:3; 35:11; 48:4) Saray Israelita so atawag, odino apili, a magmaliw a “duypo nen Jehova,” say “duypo na tuan Dios.”—Numeros 20:4; Nehemias 13:1, NW; Josue 8:35; 1 Samuel 17:47; Miqueas 2:5.
5. Anton Griegon salita so mabetbet a nipapatalos a “kongregasyon,” tan panon ya onaplika iyan salita?
5 Say kapetekan a Griegon salita et ek·kle·siʹa, a nanlapud duaran Griegon salita a mankabaliksan na “paway” tan “tawag.” Onaplika iya ed sakey a sekular a grupo, a singa say ‘tipon’ ya inlagyat nen Demetrio sumpad si Pablo diad Efeso. (Gawa 19:32, 39, 41) Balet, kaslakan ya uusaren itan na Biblia parad Kristianon kongregasyon. Arum so angipatalos ed sayan salita bilang “simbaan,” balet inkuan na The Imperial Bible-Dictionary a satan so “agbalot . . . mankabaliksan na aktual a bilding a pantitiponan na saray Kristiano parad mapublikon panagdayew.” Ingen, makapainteres ta diad Kristianon Griegon Kasulatan et naromog tayo so salitan “kongregasyon” ya onaplika ed apatiran nanduruman paraan.
Say Alanaan a Kongregasyon na Dios
6. Anto so ginawa nen David tan si Jesus diad loob na kongregasyon?
6 Oniay insulat nen apostol Pablo sanen inyaplika to ed si Jesus iray salita nen David ed Salmo 22:22: “Ipakabat ko so ngaran mo ed saray agagik, Dia ed pegley na iglesia [odino, kongregasyon] igalang ta ka. Kanian manepeg ed amin a [si Jesus et] mipara ed saray agagi to, pian sikato komon so mapangasi tan matoor ya atagey a saserdote dia ed saray bengatla a nipaakar ed Dios.” (Hebreos 2:12, 17) Indayew nen David so Dios diad pegley na kongregasyon na Israel nensaman. (Salmo 40:9) Balet, anto so tutukoyen nen Pablo sanen imbaga ton indayew nen Jesus so Dios “diad pegley na iglesia” odino kongregasyon? Dinan itan a kongregasyon?
7. Diad anton manunan pantalos so akausaran na salitan “kongregasyon” diad Kristianon Griegon Kasulatan?
7 Importante so nabasa tayo ed Hebreos 2:12, 17. Ipapabitar na satan a si Kristo so kabiangan ed sakey a kongregasyon a ditan so angiyabawagan toy ngaran na Dios ed saray agagi to. Siopa irayan agagi to? Saramay manugyop ed “bini nen Abraham,” saray alanaan-na-espiritu ya agagi nen Kristo, a “minanabang ed inkatawag a mangatatawen.” (Hebreos 2:16–3:1; Mateo 25:40) On, say manunan kabaliksan na “kongregasyon” diad Kristianon Griegon Kasulatan et say interon grupo na saray alanaan-na-espiritun papatumbok nen Kristo. Sayan 144,000 ya alanaan so manugyop ed “saray panguloan ya anak a wala ran nisulat diman ed tawen.”—Hebreos 12:23.
8. Panon ya impabitar nen Jesus so nipaakar ed kiletneg na Kristianon kongregasyon?
8 Impabitar nen Jesus so kiletneg na sayan Kristianon “kongregasyon.” Manga sakey a taon antis na impatey to, oniay imbaga nen Jesus ed sakey ya apostol to: “Sika, Pedro ka, et dia ed tapew na sayan baton-dampay ipaalagey ko naani so iglesiak; et saray pinto na Hades ag-ontalona naani ed sikato.” (Mateo 16:18) Susto so impakatalos nen Pedro tan si Pablo a say nipasakbay a baton dampay et si Jesus a mismo. Insulat nen Pedro a saramay niletneg ed tapew na baton-dampay, a si Kristo, bilang ‘saray mabilay a bato’ ed espiritual ya abung et “sakey a baley na Dios a dilin kayarian to, a mangibelyaw na karlangan” na Samay anawag ed sikara.—1 Pedro 2:4-9; Salmo 118:22; Isaias 8:14; 1 Corinto 10:1-4.
9. Kapigan so inkiletneg na kongregasyon na Dios?
9 Kapigan so impagmaliw na sayan ‘baley a dilin kayarian’ nen Jehova bilang Kristianon kongregasyon? Agawa itan nen Pentecostes 33 C.E. sanen inyibung na Dios so masanton espiritu ed saray babangatan a nandaragup diad Jerusalem. Diad saman met ya agew, si Pedro so mapuersan nampaliwawa ed sakey a grupo na saray Judio tan proselita. Atikna so puso na dakel ed sikara lapud impatey nen Jesus kanian sikara so nagbabawi tan nampabautismo. Nabasa tayo ed salaysay na Biblia a talonlibo so abautismoan, tan nagmaliw ira a kabiangan ed balo tan ombubulaslas a kongregasyon na Dios. (Gawa 2:1-4, 14, 37-47) Saya so binmulaslas lapud lalon dinmakel iray Judio tan proselita ya angawat ed katuaan a say nasyon na Israel et aliwa lan kongregasyon na Dios. Say nagmaliw a tuan kongregasyon na Dios et saray alanaan a Kristiano a manibukel ed “Israel na Dios.”—Galacia 6:16; Gawa 20:28.
10. Anto so pisiglaotan nen Jesus ed kongregasyon na Dios?
10 Diad Biblia, mabetbet a nipapanengneng so pambiigan nen Jesus tan saray alanaan, a singa diad saray salitan “nipaakar ed Kristo tan dia ed iglesia.” Si Jesus so Ulo na sayan kongregasyon na saray alanaan a Kristiano. Insulat nen Pablo a say Dios et “inyan to ya ulo [si Jesus] ed saray lapag a bengatla a nipaakar ed iglesia, saya sikato so laman to.” (Efeso 1:22, 23; 5:23, 32; Colosas 1:18, 24) Natan, dagdaiset la so nakdaan na saray alanaan a membro na sayan kongregasyon. Balet, makapanseguro itayo ya aaroen ira na Ulo ra, si Jesu-Kristo. Adeskribe ed Efeso 5:25 so liknaan to ed sikara: “Si Kristo [et] inaro to so iglesia, tan insaklang to so inkasikato nisengeg ed sikato.” Aaroen to ira lapud okupado ira a mangiyaapay ed Dios na “bagat a panangidayew, salanti, say bunga na saray bibil a mangiwakawak na ngaran to,” a singa ed samay ginawa nen Jesus sanen wadiad dalin.—Hebreos 13:15.
Arum Iran Inkausaran na Salitan “Kongregasyon”
11. Diad anton komaduan pantalos a nausar so “kongregasyon” diad Kristianon Griegon Kasulatan?
11 No maminsan et uusaren na Biblia so salitan “kongregasyon” diad mas limitado odino nikabiig a pantalos, ya ag-itan onaaplika ed interon grupo na 144,000 ya alanaan a manugyop ed “kongregasyon na Dios.” Singa bilang, oniay insulat nen Pablo ed sakey a grupo na saray Kristiano: “Agkayo mangiiter na sengeg na katiroran, anggan dia ed saray Judio, anggan dia ed saray Griego, anggan dia ed iglesia [“kongregasyon,” NW] na Dios.” (1 Corinto 10:32) Mapatnag, no walay agmanepeg a ginawa na sakey a Kristiano ed Corinto nensaman, satan so nayarin pakagapolan na arum. Balet, posible kasi a satan ya agmanepeg a gawa et akagapol ed amin a Griego, Judio, odino saray alanaan manlapud saman a panaon anggad natan? Andi. Ompatnag sirin a diad sayan bersikulo et onaplika so “kongregasyon na Dios” ed saray Kristiano a nambilay ed sakey a panaon. Unong ed saya, nibaga tayo a say Dios so mangigigiya, manusuporta, odino mamebendisyon ed kongregasyon, a manutukoy ed amin a Kristiano a nambilay ed sakey a panaon, anggan iner so kawalaan da. Odino nibaga tayo met a walay liket tan deen ed limog na kongregasyon na Dios natan, salanti, diad limog na interon Kristianon impanaagi.
12. Diad anton komatlon pantalos so akausaran na salitan “kongregasyon” diad Biblia?
12 Say komatlon paraan a panguusaran na Biblia ed “kongregasyon” so onaplika ed amin a Kristiano ed sakey a pasen. Oniay nabasa tayo: “Say kongregasyon ed interon Judea tan Galilea tan Samaria so awalaan na sakey a peryodo na kareenan, a napapabiskeg.” (Gawa 9:31, NW) Wala so masulok a sakey nin grupo na saray Kristiano diad satan a maaw-awang a pasen, balet amin da a walad Judea, Galilea, tan Samaria so atawag a “say kongregasyon.” Lapu ed bilang na abautismoan nen Pentecostes 33 C.E. tan kayarin tuloy na satan, nayarin wala ni ingen so masulok a sakey a grupo a naynay a nantitipon diad interon Jerusalem. (Gawa 2:41, 46, 47; 4:4; 6:1, 7) Si Herodes Agripa I so nanuley diad Judea anggad impatey to nen 44 C.E., tan malinew so ibabaga na 1 Tesalonica 2:14 ya antis na 50 C.E. et wala so pigaran kongregasyon diad Judea. Kanian, sano nabasa tayo a si Herodes so ‘anuksa ed pigaran kabiangan na iglesia,’ say nayarin tutukoyen na saya et masulok a sakey a grupo a nantitipon diad Jerusalem.—Gawa 12:1.
13. Anto so komapat tan kaslakan a paraan a panguusar na Biblia ed salitan “kongregasyon”?
13 Komapat, wala ni so mas limitado tan kaslakan ya usar na terminon “kongregasyon” a manutukoy ed saray Kristiano a manugyop ed sakey a lokal a kongregasyon, a singa diad abung. Sinalambit nen Pablo ‘iray kongregasyon na Galacia.’ Wala so pigaran kongregasyon diad satan a baleg a probinsya na Roma. Amiduan inusar nen Pablo so salitan “saray kongregasyon” nipaakar ed Galacia, a mangilaktip ed saramay walad Antioquia, Derbe, Listra, tan Iconio. Saray kualipikadon mamasiken, odino manangasikaso, so aturo ed sarayan lokal a kongregasyon. (1 Corinto 16:1, NW; Galacia 1:2; Gawa 14:19-23) Diad Kasulatan, amin na saratan et “kongregasyon na Dios.”—1 Corinto 11:16, NW; 2 Tesalonica 1:4.
14. Anto so nibaga tayo ed inkausaran na salitan “kongregasyon” diad pigaran teksto?
14 Diad arum iran kipapasen, melag labat iray grupo ed saray Kristianon pantitipon, ya onduga ed sakey a pribadon ayaman. Anggaman kuan, say balikas a “kongregasyon” so onaplika met ed onia iran melag a grupo. Saramay amta tayo la et saray kongregasyon a walad abung nen Aquila tan Prisca, Nimfa, tan Filemon. (Roma 16:3-5; Colosas 4:15; Filemon 2) Saya so makapaseseg ed saray angkelag a kongregasyon natan tan anggan ed saramay regular a mantitipon diad sakey a pribadon abung. Inabobonan nen Jehova so ontan iran angkelag a kongregasyon nen inmunan siglo, tan maseguron ontan met natan, a bebendisyonan to iratan panamegley na espiritu to.
Saray Kongregasyon so Mangidadayew ed si Jehova
15. Panon ya apatnagan so inkurang na masanton espiritu ed arum iran kongregasyon nensaman?
15 Asalambit la ed gapo a say Dios so indayew nen Jesus diad pegley na kongregasyon, bilang kasumpalan na Salmo 22:22. (Hebreos 2:12) Ontan met so nepeg a gawaen na saray matoor a patumbok to. Nen inmunan siglo sanen alanaan na masanton espiritu iray tuan Kristiano tan nagmaliw ira ya ananak na Dios tan agagi nen Kristo, niwala ed sikara so espiritu diad nikaduma nin paraan. Akaawat ira na mamilagro iran langkap na espiritu. Saratan a langkap so apatnagan diad nikaduman panangiyabawag na kakabatan odino pikakabat, say pakayarin mamaabig odino manpropesiya, odino say pakayari ni ingen a mansalita na nanduruman lenguahe ya agda amta.—1 Corinto 12:4-11.
16. Anto so sakey a gagala na mamilagro iran langkap na espiritu?
16 Nipaakar ed panagsalita na sakey a lenguahe, oniay imbaga nen Pablo: “Mikanta ak a tekep na espiritu, tan mikanta ak a tekep na pakatalos ko met.” (1 Corinto 14:15) Amoria ton importante a natalosan na arum a totoo iray salita to ta pian nabangatan ira. Say gagala nen Pablo et say pangidayew ed si Jehova diad kongregasyon. Onia so impaseseg to ed arum ya akaawat na saray langkap na espiritu: “Seetan yo ya ondaak ed sikayo so ibiskeg na iglesia,” salanti, say lokal a kongregasyon ya angipatnagan da ed naawat dan langkap. (1 Corinto 14:4, 5, 12, 23) Malinew, interesado si Pablo ed saray lokal a kongregasyon, lapud amta ton diad kada sakey ed saratan et saray Kristiano so walaan na saray pankanawnawan mangidayew ed Dios.
17. Nipaakar ed saray lokal a kongregasyon natan, anto so naseguro tayo?
17 Mantutultuloy ya uusaren tan susuportaan nen Jehova so kongregasyon to. Bebendisyonan to so interon grupo na saray alanaan a Kristiano ed dalin natan. Napatnagan iya ed daakan a suplay na espiritual a tagano a panggagayagaan na totoo na Dios. (Lucas 12:42) Bebendisyonan to so sankamundoan ya impanaagi. Tan bebendisyonan to so lokal iran kongregasyon, a ditan so pangidadayewan tayo ed Manamalsa tayo panamegley na saray kiwas tan saray komento tayon makapabiskeg na pananisia. Ditan itayo nibabangat tan nipapasal ta pian nidayew tayo so Dios diad arum iran kipapasen, sano ag-itayo mismo makakar ed lokal a kongregasyon.
18, 19. Anto so labay a gawaen na saray matoor a Kristiano a kabiangan na kongregasyon?
18 Tandaan a pinaseseg nen apostol Pablo iray Kristiano ed kongregasyon diad Filipos, Macedonia: “Saya so kerewen ko . . . a napano kayo na saray bungabunga na kaptekan, a sikara so nagamoran ed kakanaan nen Jesu-Kristo, ya onkanan gloria tan dayew na Dios.” Kalaktip ed saya so pitongtong da ed arum, salanti, diad saramay agkabiangan na kongregasyon, nipaakar ed pananisia ra ed si Jesus tan say alay abig ya ilalo ra. (Filipos 1:9-11; 3:8-11) Unong ed satan, pinaseseg nen Pablo iray kapara ton Kristiano: “Lapu ed [si Jesus] sirin mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.”—Hebreos 13:15.
19 Singa si Jesus, kasin panliliketan yo so pangidayew ed Dios diad “pegley na kongregasyon,” tan say pangusar yo ed saray bibil yo pian idayew si Jehova diad imaton na saramay agni akapikabat tan agni mandadayew ed sikato? (Hebreos 2:12; Roma 15:9-11) Say personal ya ebat tayo ed satan so akadepende ed no anto so panmoria tayo ed betang na lokal a kongregasyon diad gagala na Dios. Diad ontumbok ya artikulo, konsideraen tayo no panon ya ididirehi tan uusaren nen Jehova so kongregasyon tayo tan no anto so betang na satan ed bilay tayo.
Kasin Natandaan Yo?
• Panon a niletneg so “kongregasyon na Dios,” a tugyopen na saray alanaan a Kristiano?
• Anto ni so taloran paraan ya inkausaran na salitan “kongregasyon” diad Biblia?
• Nipaakar ed kongregasyon, anto so ginawa nen David, Jesus, tan saray Kristiano nen inmunan siglo, tan anto so epekto na saya ed sikatayo?
[Litrato ed pahina 21]
Si Jesus so pundasyon na anton kongregasyon?
[Litrato ed pahina 23]
Saray grupo na saray Kristiano so nantitipon bilang ‘saray kongregasyon na Dios’
[Litrato ed pahina 24]
Singa saray Kristiano ed Benin, nidayew tayo si Jehova diad limog na saray nandaragup a totoo