Sikayoran Kalangweran—Naapektoan Yoy Kapusoan na Atateng Yo
“ANGGAPO so babaleg a liket ko nen say saya, salanti say pakadngel ko a saray ana’ko manaakar ira ed katuaan,” so insulat nen masiken lan apostol Juan. (3 Juan 4) Anggaman say natutukoy ya ananak ed sayan bersikulo ed Biblia et saray Kristianon babangatan, sayan liknaan ya imbalikas nen Juan et mipadpara met ed nalilikna na ateng ya ontatakot ed Dios. No panon a baleg so impluensya na atateng ed bilay na ananak da, baleg met so nagawaan na saray anak ed bilay na atateng da.
Kabat nen Solomon ya ari na Israel a naapektoan a maong na ananak so atateng da. Oniay insulat to: “Say makabat ya anak panliketen to so ama; balet say maatiw ya anak sikato so makapabelat ed ina to.” (Uliran 10:1) Kanian nepeg a sinononot so amin ya ananak, anggan saramay wala la’d edad, ed magmaliw ya epekto na saray kiwas da ed ama odino ina ra. Akin a nepeg ya ontan?
Nodnonoten pa labat so pirmin sagpot na saray matakot ed Dios ya atateng mo ed impamabaleg da ed sika! Inginginew ka ni labat et sinononot la ra ed pankaabigan mo tan ipipikasi da ka ni. Kapangiyanak ed sika, nanliketan na atateng mo so pakaapit ed sika tan maseguron misalsalamat ira ed Dios ed alay abig, balet ta seryoson pribilehyo tan responsibilidad a pamabaleg ed sika. Nipudir la natan ed panangasikaso ra so sakey a melmelag tan agmakayarin ugaw, tan bilang managdayew ed si Jehova et seryoson gagawaen da iya.
Lapud saray atateng mo et tuan Kristiano, sikaray ontutupleg ed Biblia tan saray literaturan nibase ed Biblia ontan met ed saramay akapabaleg lay ananak da parad napanmatalkan iran panangiwanwan. Panamegley na pikakasi et itutultuloy da met ya ibabalikas ed Dios iray kapagaan da. (Uko-ukom 13:8) Diad ibabaleg mo, amta na saray atateng mo iray kaksilan mo balet ta aliwa iran bulag ed saray kakapuyan mo. (Job 1:5) No tinedyer ka la et onsabi iray balon problema. No maminsan, nayarin masugnar ka, kanian laloy pampipikasi na atateng mo, pambabasa ra, tan paniisip da no panon da kan natulongan a mantultuloy a mandayew ed mangatatawen ya Amam, si Jehova.
Agnaandi ed si amam tan inam so liknaan da bilang atateng mo. Anggan sano baleg ka la, siansia nin pampapagaan day pankaabiganan na laman, nonot, emosyon tan espiritualidad mo. Balet, diad amin na saratan, amta na atateng mo a bulos kan manpili na labay mon kabibilay tan anggapoy makaseguro no antoy pansumpalan na bilay mo. Diad kaunoran, sika lanlamang so mandesisyon parad inkasika no antoy pilien mo.
Agta makatunongan sirin a no panon ya ‘anggapo lay babaleg a liket’ na atateng nen say pakaimano ra a saray anak da so ‘manaakar ed katuaan,’ et ontan met so ermen da no say kasunian so nagawa? On, panermenan a maong na atateng no makulangkulang ya onkiwas so ananak da. Inkuan nen Solomon: “Say maatiw ya anak sikato so ermen ed ama to, tan kapaitan ed angiyanak ed sikato.” (Uliran 17:25) Ansaki-sakit a talaga ed atateng no ibeneg na anak da so panagdayew ed tuan Dios!
Malinew sirin a baleg so impluensyam ed pamilyam tan ed arum ni. Mangapektan maong ed puso na atateng mo so ugalim. No ibeneg mo so Dios tan saray prinsipyo to, manermen a maong iray ateng mo. Balet no mansiansia kan matoor tan matulok ed si Jehova, manliket ira. Gawam sirin a determinasyon so pamaliket ed puso na atateng mo! Wala ta ni mas mablin regalo a niiter mo ed saramay mamapabaleg, manasalimbeng, tan mangaaro ed sika?