Panaanap ed Espiritualidad

DIAD bantog a Sermon nen Jesus ed Palandey, onia so inkuan to: “Maliket iray mamibidbir na pankaukolan da’d maespiritu ran bengatla.” (Mateo 5:3, Maung a Balita) Anganko et mipakna kayo ed satan ya imbaga to. Bibidbiren na totoo ed anggan iner a pasen a nakaukolan da iray maespiritun bengatla tan panisiaan da a magmaliw a maliket so bilay da no wala itan ed sikara. Anto ta so kabaliksan na salitan “espiritualidad”?

Inkuan na sakey a diksionaryo a say espiritualidad et “pakamoria a kaukolan iray sisisiaen na relihyon odino panamabli ed saratan” tan “pagmaliw a maespiritual.” Kanian, saray terminon “espiritualidad,” “maespiritual,” odino “manonot ed espiritual” et ipapasen a nampapara. Diad arum a panangibaga, say too a mamapablin maong ed espiritual odino relihyoson bengabengatla so natatawag a maespiritual.

Balet, panon itayon nawalaan na tuan espiritualidad? Anggaman ibabaga na amin lawarin relihyon ya amta ra no panon dan napenek so espiritual a pankaukolan da, saray instruksion ya iiter da et singa la kinarakel na saray relihyon a mismo. Singa bilang, wadtan so Protestanti a mangibabagan baleg so nitulong na revival meeting ed sikato. Wadtan met so Katoliko a manpepeleng a mankomunyon ed Dios diad Misa ra. Parad Buddhista, panggugunaetan to so naikday malinew a pakatalos diad pandalepdep. Tan pansasagpotan na Hindu so pakalukpos ed sikulo na maminpiga-pigan kianak panamegley na pansisiblet to ed dilin laman to. Kasin nibaga tayo ya amin da odino pigara ed saraya so walaan na tuan espiritualidad?

Parad karaklan, say ebat ed satan a tepet et andi. Ibabaga ra a say kabaliksan na espiritualidad et “say panisia balet agpimembro,” salanti, say panisia ed dios balet agmimembro ed sakey a relihyon. Ipapasen na arum a say espiritualidad et manutukoy ed pampilalek a nawalaan na kareenan ed puso tan makabaliksan a bilay, aliwan say iloob ed sakey a relihyon. Ipipilit da a saramay malabay a magmaliw a maespiritual et agla kuno mankaukolan na relihyon, noagta say imanoen da labat et no antoy walad dalem da, salanti say nalilikna ra. Oniay inkuan na sakey a managsulat: “Say tuan espiritualidad et bengatlan naromog ed utel na sakey. Satan et say pangaarom, pidedeneng mo ed mundo tan ed totoo. Ag-itan naromog ed relihyon odino diad panigsisia ed pigaran bangat da.”

Malinew, balbaleg so panduruma na ideya na totoo nipaakar ed espiritualidad. Ibabaga na nilibon libro a nipanengneng day dalan a mamaarap ed maespiritual a bilay, balet maslak ed saray manbabasa ed saratan et agnapepenek tan nawewetwet laingen. Anggaman ontan, walay sakey a libro a talagan napanmatalkan iray bilin to nipaakar ed espiritual. Pruepruebaan na satan a libro a pinuyanan odino nanlapu ed Dios itan. (2 Timoteo 3:16) Nengnengen tayo no anto so ibabaga na satan a libro, salanti say Biblia, nipaakar ed kabaliksan na espiritualidad tan no anto so kakanaan na satan.

[Picture Credit Line ed pahina 2]

COVER: Background: © Mark Hamblin/age fotostock