Armagedon​—Say Guerra na Dios a Mamatunda ed Amin a Guerra

“Ipapasen da a graben kaugsan so pamatey ed kaparan too; kanian parad sikara, say guerra et agbalot natalosan tan kabkabusol, sirin et anggapoy ontan a salita ed lenguahe ra.”​—IMPANGIBAGA NA MANAGDISKOBRIN NORWEGO A SI FRIDTJOF NANSEN NEN 1888 ED SAKEY A GRUPO NA TOTOO ED GREENLAND.

SIOPA so agmaliket a manayam ed sakey a lugar a say guerra et “agbalot natalosan tan kabkabusol”? Siopa so agmalabay ed mundo ya anggan say salitan guerra et anggapo’d lenguahe ra lapud agda amta itan? Singa mairap a panisiaan a walay ontan a pasen, nagkalalo la no say ilaloan tayon makapangiter ed satan et saray totoo.

Balet diad propesiya nen Isaias, insipan a mismo na Dios a gawaen ton ontan so mundo: “Pitpiten da naani so saray kampilan da a pagmaliwen da a dingding na lukoy, tan saray gayang da a komkompay; say nasyon agnaani mangitagey na kampilan a sumpa ed nasyon, ag-ira met la manaral na bakal ed anggan kapigan.”​—Isaias 2:4.

Pian nagawa iyan sipan, malinew a baleg so umanen na sayan mundo, a walaay 20 milyon ya aktibon sundalo tan manga 20 a guerra ed kaplesan. Kanian agtayo la pankelawan a say makapanyarin-amin a Dios, si Jehova, so onsalet ed gagawaen na totoo. Sayan isalet nen Jehova so mansumpal ed tatawagen na Biblia ya Armagedon.​—Apocalipsis 16:14, 16.

Anggaman say pakatalos ed salitan “Armagedon” diad apalabas iran taon et nuklear a pamasabog ed interon mundo, onia so impaliwawa na sakey a diksionaryo nipaakar ed manunan kabaliksan na sayan salita: “Say pakagawaan na baleg tan unor a panlaban na puersay maong tan mauges.” Onsabi kasi panaon a natalo na maong so mauges, odino kugkugip labat itan?

Makapaliket ya imanoen so aminpigan imbaga na Biblia a panampot na kaugsan. Impasakbay na saya: “Naupot so saray managkasalanan ed dalin. Tan onandi komon so saray bagel.” (Salmo 104:35) Onia met so nabasa ed libron Uliran: “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.”​—Uliran 2:21, 22.

Impalinew met na Biblia ya agboluntaryon isuko na mauges so pakayari ra; kanian kaukolan a walay unor a guerra a mangekal ed kaugsan, kaiba lay kaugsan na guerra. (Salmo 2:2) Talagan importante so inngaran na Biblia ed sayan nikadkaduman panlalaban, say Armagedon.

Apalabas Iran Guerra Diad Asingger ed Megido

Say salitan “Armagedon” et mankabaliksan na “Palandey Megido.” Diad syudad nensaman a Megido, kaiba lay akapaliber a Patar na Jezreel, et aminpiga lan agawa iray agnalinglingwanan iran guerra. Insulat na historyador a si Eric H. Cline ed libron The Battles of Armageddon: “Diad apalabas, agawa iray guerra ed Megido tan diad Lawak na Jezreel, a pakaamtaan no antoy nagawa ed saray bansa.”

Unong ed imbaga nen Cline, baleg so epekto na saray impanlalaban diad asingger ed Megido. Alimbawa, diad Lawak na Jezreel so sankaunaan ya impakatalo na saray armada na Mongol, ya anakop ed baleg a parte na Asia nen koma-13 siglo. Diad asingger ed Megido, saray Turko so tinalo na puersay Britanya ya indaulo nen Heneral Edmund Allenby legan na Guerra Mundial I. Imbaga na sakey a historyador ed militar a say impanalo nen Allenby so “sakey ed saray sankaganoan a kampanya tan sankakompletoan ya impanaltalo ed anggan kapigan.”

Nabasa met ed Biblia iray importantin impanlalaban diad asingger ed Megido. Ditan et tinalo nen Ukom Barak so puersa na Canaanita ya indaulo nen Sisera. (Uko-ukom 4:14-16; 5:19-21) Ontan met, asingger ditan et tinalo nen Gideon tan say melag a pangkat ton 300 a sundalo so baleg ya armada na Midianita. (Uko-ukom 7:19-22) Sakey ni, si Arin Saul tan say anak ton si Jonatan so inatey ed asingger a Palandey Gilboa sanen atalo na puersay Filisteo so armada na Israelita.​—1 Samuel 31:1-7.

Lapud say kawalaan na Megido tan saray kakaabay ton patar et dugaruga parad militar ya estratehiya, dakel so nanlalaban ditan diad apalabas ya 4,000 a taon. Aliwa labat lan 34 a guerra so abilang na sakey a historyador!

Saray agawa ed Megido tan say dugarugan kawalaan na satan et seguradon mikonektaan ed simbolikon usar na salitan “Armagedon.” Anggano aminsan labat ya asalambit itan ed Biblia, malinew ed saray akapaliber a bersikulo ed libron Apocalipsis a naapektoan na Armagedon so bilay na amin ed dalin.

Say Armagedon Unong ed Biblia

Anggaman baleg so epekto na saray impanlalaban diad asingger ed Megido, anggapo nin balot so akaekal ed kaugsan. Makatunongan labat a say ontan a klase na guerra et manlapud Dios. Unong ya imbaga nen Jesus, “anggapo so maong, nilikud so sakey, salanti say Dios.” (Lucas 18:19) Niarum ni, espisipikon tinukoy na Biblia so Armagedon bilang guerra na Dios.

Diad Biblia, imbaga na libron Apocalipsis a ‘saray ari na mundo so tiponen ya iparaan ed bakal na baleg ya agew na Dios, a Makapanyarin-amin.’ (Apocalipsis 16:14) Inyarum ni na propesiya: “Tan tinipon to ran pankakasakeyen ed pasen a dia ed Hebreo manngaran na Armagedon.”a (Apocalipsis 16:16) Diad saginonor, impaliwawa na Apocalipsis a ‘saray ari ed dalin, tan saray ejercitos da so tiponen pian bakalen da so akayurong ed kabayo, tan say ejercito to.’ (Apocalipsis 19:19) Sayan akakabayo et anggapoy arum noag si Jesu-Kristo.​—1 Timoteo 6:14, 15; Apocalipsis 19:11, 12, 16.

Anto so nibaga tayo ed sarayan teksto? Nibagan say Armagedon et panlaban na Dios tan saray puersa na bangar a totoo. Akin kasi et milaban si Jehova tan say Anak to, si Jesu-Kristo? Say sakey a rason et deralen odino “bagbagen” ed Armagedon ‘iray mamabagbag ed dalin.’ (Apocalipsis 11:18) Niarum ni, pagmaliwen na satan a mareen so mundo, ya “unong ed sipan to [Dios] alagden tayo so saray tawen a balo tan dalin a balo, a sikara so panaayaman na katunongan.”​—2 Pedro 3:13.

Akin a Nakaukolan so Armagedon?

Kasin pankelawan mo no akin a si Jehova, say “Dios na aro,” et iganggan toy Anak to, say “Prinsipe na Kareenan,” a milaban? (2 Corinto 13:11; Isaias 9:6) Pian natalosan moy rason da, makatulong so pakaamtam ed motibo ra. Deneskribe si Jesus ed libron Salmo bilang akakabayo pian milaban. Akin kasi? Ipapaliwawa na nansulat ed Salmo a si Kristo et akakabayo “nisengeg ed katuaan tan kauyamoan tan inkatunong.” Sikatoy milaban lapud inaro to so inkatunong tan kabusol toy kaugsan.​—Salmo 45:4, 7.

Ontan met, ipapaliwawa na Biblia so reaksion nen Jehova ed saray nagagawan ag-inkahustisya ed sayan mundo. Oniay insulat nen propeta Isaias: “Anengneng iya na Katawan, et naermenan lapud inkaandi na inkatunong. Isulong ton singa kawes a metal ed pagew to so inkatunong, tan singa helmet so pakayarin mangilaban. Kawesan toy sikaton dili na ontan lan pampilalek a mametek ed saray pikewet tan say panusa tan pamales ed saray mauges a paniirapan na saray totoo.”​—Isaias 59:15, 17, Maung a Balita.

Anggad manuuley ni ray mauges, anggapoy kareenan tan ligen na saray maptek. (Uliran 29:2; Eclesiastes 8:9) Diad tua et agtayo naekal so panagsaol tan kaugsan ed saramay totoon manggagawa ed saratan. Kanian, magmaliw labat a permanente so kareenan tan hustisya sano naandi la ray mauges. Insulat nen Solomon: “Say marelmeng sikato so dondon nipaakar ed maptek.”​—Uliran 21:18.

Lapud say Dios so Ukom, segurado itayon diad amin a kaso et maptek so pangukom to ed mauges. “Agta gawaen na Ukom na amin a dalin so maalas [odino maptek]?” so intepet nen Abraham. Say ebat, unong ed naaralan nen Abraham, et si Jehova so lawas duga! (Genesis 18:25) Niarum ni, ipapaseguro ed sikatayo na Biblia ya agpanliketan nen Jehova so paneral ed mauges; gawaen to labat itan sano anggapo lay arum a pampilian.​—Ezequiel 18:32; 2 Pedro 3:9.

Seryosoen so Armagedon

Siopa kasi pilaan tayo ed sayan nikadkaduman panlaban? Ipapasen na maslak ed sikatayo a pipilaan tayo so puersa na maong. Balet panon tayon makaseguro? Onia so ipapaseseg na propetan si Sofonias: “Anapen yo so inkatunong, anapen yo so kauyamoan.” (Sofonias 2:3) Linawa na Dios ya “amin a totoo nilaban ira komon, tan ondago ra ed pakapikabat ed katuaan,” kuan nen apostol Pablo.​—1 Timoteo 2:4.

Pian niliktar itayo, say unonan gawaen tayo et aralen so katuaan nipaakar ed si Jehova tan say gagala ton ekalen so kaugsan ed mundo. Say komadua et say panggawa tayo na inkatunong pian abobonan tan protektaan itayo na Dios.

Sano gawaen tayo irayan importantin paraan, talagan pitalaran tayo so isabi Armagedon, say guerra a mamatunda ed panlalaban na totoo. Kayari na Armagedon, ipasen na amin a totoo a say guerra et agnatalosan tan kabkabusol. “Ag-ira met la manaral na bakal ed anggan kapigan.”​—Isaias 2:4.

[Paimano ed leksab]

[Blurb ed pahina 5]

Say isalet na Dios ed gagawaen na totoo et tatawagen ya Armagedon

[Litrato ed pahina 6]

Megido

[Litrato ed pahina 6]

Analo si Gideon tan saray sundalo to ed sakey ya importantin guerra diad asingger ed Megido

[Litrato ed pahina 6, 7]

Kayari na Armagedon, ipasen na amin a totoo a say guerra et agnatalosan tan kabkabusol

[Litrato ed pahina 8]

Say panaral na katuaan nipaakar ed si Jehova tan say gagala to so unonan gawaen pian niliktar