Onaligwas ed Suston Pikakabat Tekep na “Sipaparaan a Nonot”
AMIN tayon lingkor nen Jehova et manpirawat ed panangabobon to. Lapud satan, manggugunaet itayon paaligwasen so kalidad na pananisia tayo tan maseet a manggawa na sagradon serbisyo. Ingen, impaimano nen apostol Pablo so posiblin peligro a naeksperiensya na arum a Judio nen panaon to: “Wala so seseg da ed Dios, bangbalet aliwa ya unong ed [“suston,” NW] kakabatan.” (Roma 10:2) Malinew sirin a say pananisia tayo tan say panagdayew tayo ed si Jehova et nepeg ya ag-akabase ed emosyon lambengat. Noagta, nakaukolan tayo so suston kakabatan ed Manamalsa tayo tan ed linawa to.
Diad arum ni ran sulat nen Pablo, insiglaot to so konduktan aabobonan na Dios ed pampirawat tayo a mangasol na kakabatan. Impikasi to a saray papatumbok nen Kristo et ‘napano komon na suston pikakabat’ ed linawa na Dios “pian makapanakar a makana ed si Jehova diad ontan et sikatoy nagnap a napaliket” leleg a “mantutultuloy [iran] manbubunga ed balang maong a gawa tan onaaligwas ed suston pikakabat ed Dios.” (Col. 1:9, 10, NW) Akin a kakkaukolan tayo so “suston pikakabat”? Tan akin et nepeg tayon paaligwasen itan a pikakabat?
Pian Ombiskeg so Pananisia
Say basiyan na pananisia tayo et say suston pikakabat ed Dios tan ed linawa to unong a niparungtal ed Biblia. No anggapoy ontan a napanmatalkan a pikakabat, say pananisia tayo ed si Jehova et singa abung-abung a gawa’d baraha a no nasiplogan labat na anggan makalnan dagem et nakusbo la. Papasesegen itayo nen Pablo ya iter so sagradon serbisyo ed Dios tekep na “abilidad a mankatunongan” tan nepeg tayon ‘umanen so panagnonot tayo.’ (Roma 12:1, 2, NW) Say regular a panagaral na Biblia so makatulong ed sayan pamaakaran.
Oniay inaksobi na sakey a regular payunir a taga Poland a manngaran na Ewa: “No agak regular a makapanaral na Salita na Dios, ontunday ibubulaslas ko ed suston pikakabat ed si Jehova. Maganggano lan omburarog so pakabidbiran ed siak bilang sakey a Kristiano, tan say pananisiak ed Dios so onkapuy, a manresulta ni ingen ed pakabalang na sankablian a kayamanan ko—say relasyon ko’d si Jehova.” Komon ta agbalot itan nagawa ed sikatayo! Imanoen pay ehemplo na sakey a lakin amaaligwas ed suston pikakabat to ed si Jehova tan nanresulta itan ed panangabobon To.
“O Agayla so Panangarok ed Ganggan Mo!”
Say maanlong a kansion diad Salmo 119 et mangipapatnag ed liknaan na salmista nipaakar ed saray ley, panonot, bilibilin, ganggan, tan hudisyal a desisyon nen Jehova. Insulat na salmista: “Mantaliwa ak a dili ed saray panangitontonan mo. . . Saray panamintuan mo sikara so kalikliket ko.” Inyarum to ni: “O agayla so panangarok ed ganggan mo! Sikato so dalepdep ko ed amin ya agew.”—Sal. 119:16, 24, 47, 48, 77, 97.
Saray balikas a “mantaliwa” tan “dalepdep” et mangipapanengneng a labalabay na salmista a dalepdepen so Salita na Dios. Ontan met, ipapabitar na saratan a balikas a kalkaliktan na salmistan aralen so ganggan na Dios. Satan a pankaliktan to et aliwa labat lan manleppuan emosyon na salmista. Noagta, walay masimoon a pilalek ton ‘umamengen’ so ganggan, pian makagamor na pakatalos ed saray salita nen Jehova. Nanengneng tayo ed awawey to a labay ton susto so pakapikabat to ed Dios tan ed linawa to.
Malinew sirin a say panangaro na salmista ed Salita na Dios et nanlapud utel na puso to. Nayari tayon itepet ed inkasikatayo so onia: ‘Ontan ak met kasi? Kasin panliliketan kon basaen tan morekdeken so sakey a kabiangan na Biblia kada agew? Panseseetan ko kasin basaen so Salita na Dios tan ontutupleg ak kasi ed si Jehova diad pikakasi antis kon gawaen itan?’ No on so ebat tayo ed sarayan tepet, seguradon ‘onaaligwas itayo ed suston pikakabat ed Dios.’
Oniay komento nen Ewa: “Tuloytuloy kon papaaligwasen so kalidad na personal a panagaral ko. Nanlapula’d impakaawat ko ed brosyur a ‘See the Good Land,’ no manaral ak et mabetbet kon uusaren itan. Lalok a panseseetay onkonsulta ed saray reperensya a singa say Insight on the Scriptures tan arum ni ra no nakaukolan.”
Ikonsidera met so alimbawa na sanasawan si Wojciech tan Małgorzata, a walaan na dakel a responsabilidad ed pamilya. Panon dan niganaay panaon so personal a panagaral na Biblia? “Ipapanaon mi so panagaral ed Salita na Dios bilang indibidual basta sarag mi. Insan, diad panagaral mi bilang pamilya tan ed pantotongtong mi kada agew, inanabang mi iray punton makapainteres tan makapabiskeg.” Say malaknab a personal a panagaral so talagan mamapaliket ed sikara tan ontutulong ed sikaran ‘onaligwas ed suston pikakabat.’
Manaral Tekep na Maawat a Kanonotan
Bilang Kristiano, amta tayo a labay na Dios ya “amin a totoo nilaban ira komon, tan ondago ra ed pakapikabat [“suston pikakabat,” NW] ed katuaan.” (1 Tim. 2:3, 4) Idadanet na saya so kablian na panagbasay Biblia tan panggunaet a ‘talosan itan.’ (Mat. 15:10) Say sakey a makatulong ed sayan pamaakaran et say panagaral a walaay kanonotan a mabulos a mangawat. Onia so awawey ya impatnag na saray taga Berea sanen innabang nen Pablo ed sikara so maong a balita: “Inako ra so salita ed sipaparaan a nonot; inagew-agew ya inusisa ra so sulat, no peteg so sarayan bengatla.”—Gawa 17:11.
Aaligen mo met kasi so ehemplo na saray taga Berea ed pakawalaay sipaparaan a nonot tan paliisan iray pakadisturboan legan na panagaral moy Biblia? Sarag na sakey a Kristiano ya aligen iray taga Berea, anggaman dati et agto ipapasen a makapaliket so panagaral. Sakey ni, no maminsan walaray totoo a no ontatatken la ra et ondaraiset lay panaon da ed panagbasa tan panagaral, balet ag-iyaabuloy na saray Kristiano so ontan a tendensia. Antokaman so edad na sakey, nayarian ton paliisan iray bengatlan makadisturbo. Tan sano manbabasa ka, panggunaetan ya imanoen iray impormasyon a sarag mon inabang ed arum. Singa bilang, sano kaistoryaan moy asawam odino sakey a kaagian a kaarom, sarag mo kasin inabang iray abasam odino naamtaan mo legan na saratan a panagaral? No gawaen mo itan, nipaslep a maong ed kanonotan tan pusom iratan a punto, sakey ni, maabig so epekto na satan ed arum.
Diad panagaral mo, aligen so alimbawa nen Esdras, say lingkor nen Jehova nensaman ya “inpasen [odino imparaan] to so puso to a mananap na tunong nen Jehova.” (Esd. 7:10) Panon mo met a nagawaan itan? Maabig no mananap ka na mareen tan matukoy a pasen a panaralan. Insan, onyurong tan manpikasi ed si Jehova parad panangiwanwan tan kakabatan. (Sant. 1:5) Tepetan moy inkasika, ‘Antoy iilaloan kon naaralan?’ Legan kan manbabasa, imanom iray manunan ideya. Maabig no isulat iraya tan gulisan iray kabiangan a labalabay mon tandaan. Nonoten no panon mon nausar iraya diad panagpulong, sano mandedesisyon, odino sano mamapaseseg ed saray agagi. Diad pansamposampot na panagaral, antikey a repasoen iray inaral mo. Satan so makatulong pian nipaslep iratan ed nonot mo.
Oniay inkuan nen Ewa a gagawaen to: “Sano manbabasa ak na Biblia, uusaren ko iray cross-reference, say Watch Tower Publications Index, tan say Watchtower Library a walad CD-ROM. Isusulat ko ray punto a sarag kon usaren ed ministeryo.”
Pigapigay taon lan panggagayagaan na arum so malaknab a panagaral, a niyapasakey da lay imano ra’d saray espiritual a pamaakaran. (Uli. 2:1-5) Anggaman ontan, dakel pa met so responsabilidad da tan naiirapan iran mangipanaon ed personal a panagaral. No onia met so situasyon mo, antoran pananguman so nagawaan mo ed eskedyul mo?
Panon Kon Nipanaon so Panagaral?
Nayarin miabobon kan agmairap so pangiganay panaon ed saray bengatlan panliliketan mon gawaen. Nalmoan na dakel a pian napanggayagaay personal a panagaral et makatulong so panggawa na realistikon kalat, a singa say pambasa ed interon Biblia. Tua met a no maminsan et walay kairapan na pambasa ed andurukey a listaan na saray kapolian, saray detalyadon deskripsion ed templo nensaman, odino saray komplikadon propesiya a singa agmet la onkana ed inagew-agew a panagbilay. Salien so manggawa na praktikal iran kundang pian nadampot so kalat mo. Alimbawa, antis ya aralen so kabiangan na Biblia a medyo mairap, maabig no basaen ni ray kipapasen nensaman sanen isusulat itan odino say praktikal ya aplikasyon na satan. Saratan ya impormasyon et naromog ed publikasyon ya “Amin a Sulat” et Napanmatalkan tan Makagunggona, a wala ed ngalngalin 50 a lenguahe.
Marakep no usaren so imahinasyon mo sano babasaen so Biblia. Ontulong iya pian mabilabilay ed nonot mo iray karakter tan agawgawa. No iyaplikam irayan pigara a suhestion, maseguron magmaliw a makapaliket tan makagunggona so panagaral mo. Diad ontan et lalom a panggunaetan ya ipanaon itan, tan magmainomay mo met lan pansiansiaen so niyugalim lan panagbasa na Biblia kada agew.
No saratan a suhestion et makatulong ed sikatayo bilang indibidual, anto balet so nagawaan na saray okupadon pamilya? Agta maabig no pantongtongan yon sankapamilyaan so nipaakar ed saray bentaha na panagaral na Biblia bilang pamilya? Nayarin diad pantotongtong yo et makanonot kayo na praktikal iran ideya, a singa say ibangon na masasakbay kada agew odino ed espisipiko iran agew ya apili yo pian singbaten so sakey a kabiangan na Biblia. Odino ompan kaukolan yo manayan umanen so eskedyul na pamilya yo. Singa bilang, walaray pamilya a nalmoan dan praktikal so paningbat ed inagew-agew a teksto odino pambasa na Biblia kayari panangan. Antis na panagsinop odino antis a gapoan iray arum nin kimey, mangigagana ira na 10 odino 15 minuto pian pantongtongan so Kasulatan odino basaen so aka-eskedyul a babasaen ed Biblia. Diad gapo et walay irap-irap to iya, balet agmanbayag, napasal met lay pamilya tan makapalikliket la itan.
Imbaga nen Wojciech tan Małgorzata no antoy akatulong ed pamilya ra: “Diad apalabas, say panaon mi et nauupot ed agmet tanto importante iran aktibidad. Denesidi min bawasan so panaon mi ed panag-e-mail tan panagrelaks. Insan kami amili na agew tan oras parad malaknab a panagaral.” Peteg ya agnagbabawian na sayan pamilya iratan a ginawa ran pananguman, tan nagawaan met itan na pamilya yo.
Makagunggona so Pamaaligwas ed Suston Pikakabat!
Say malaknab a panagaral ed Salita na Dios et ‘mamabunga na balang maong a gawa.’ (Col. 1:10, NW) Sano nagagawa la itan ed bilay mo, say iyaaligwas mo et sankaimano na amin. Magmaliw kan maespiritual a too a walaan na malaknab a pakatalos ed saray katuaan ed Biblia. Saray desisyon mo et magmaliw a mas balanse tan mas akaparaan kan ontulong ed arum, ontan met, say kakikiwas tan panagsalitam et aliwan alablabas, aliwan singa saramay makulang ed kakabatan. Manuna ed amin, mas napaapit ka ed si Aman Jehova. Onaralem so panamablim ed saray kalidad to, tan napatnagan iya sano ipapakabat mo ed arum so nipaakar ed sikato.—1 Tim. 4:15; Sant. 4:8.
Antokaman so edad odino eksperiensyam, pansagpotan mon itultuloy a panggayagaan so panagbasa tan malaknab a panagaral ed Salita na Dios tekep na maawat a kanonotan. Napapaseguroan ka ya agnalingwanan nen Jehova iray sagpot mo. (Heb. 6:10) On, ipagamor to ed sika so daakan a panamendisyon.
[Litrato ed pahina 13]
SANO ‘ONALIGWAS ITAYO ED SUSTON PIKAKABAT’. . .
Napabiskeg so pananisia tayo ed Dios tan makapanakar a makana ed si Jehova.—Col. 1:9, 10, NW
Makagamor itayo na aralem a pakatalos, sarag tayon usaren so pakatebek tayo tan makapanggawa na makabat iran desisyon.—Sal. 119:99
Lalo itayon magmaliw a maliket ed panutulong tayo’d arum ya onapit ed si Jehova.—Mat. 28:19, 20
[Saray litrato ed pahina 14]
Walay kairapay mananap na mareen tan matukoy a pasen a panaralan, balet makagunggona itan
[Litrato ed pahina 15]
Saray arum a pamilya et manbabasa na Biblia kayari panangan