Panaglingkor ed Dios Tekep na ‘Saksakey a Puso tan Kamarerwa’
AKIDAGUP iray Judio tan proselita ed saray babangatan nen Jesu-Kristo. Piesta na Pentecostes ed saman, tan sarayan bisita a linma ed Jerusalem et nanlalapud ararawin lugar, a singa say Roma diad sagur tan Partia ed bukig. Nanduruman lenguahe so uusaren na sarayan nandaragup. Ingen, saray babangatan nen Jesus a mitotongtong ed sikara et taga Galilea. Kanian arum ed saray bisitan nikelawan et nantepet: “Balet akin a say narerengel na kada sakey ed sikatayo et say dili ton lenguahe ya abangonan tayo?”—Gawa 2:8, NW.
Inmalagey si apostol Pedro tan impaliwawa to so makasengeg na milagron naiimatonan da. Tampol dan sinisia iya, tan nilibo ed saray balo ni so abautismoan! (Gawa 2:41) Anggaman maples so inyaligwas na kongregasyon, nansiansia so pankakasakey da. “Saksakey so puso tan kamarerwa na lapag ya anisia,” so inkuan na managsulat a si Lucas.—Gawa 4:32.
Nilibo ed saramay abautismoan nen Pentecostes 33 C.E. so nansiansia ni’d Jerusalem na medyo andukey a panaon pian naaral nin maong so balon pananisia ra. Balet anggapo so plano ran manbayag ditan. Kanian, kinaukolan so temporaryon panagkolektay donasyon parad saray pankaukolan da. Walaray mananisia a boluntaryon angilako na kaykayarian da tan inawit da so nanlakoan ed saray apostol pian ibunog ed saray mankaukolan. (Gawa 2:42-47) Talagan alay abig iyan panangipatnag na espirituy panangaro tan inkamabunlok!
Saray tuan Kristiano et lawas lan walaan na ontan a panangaro tan inkamabunlok. Diad sayan panaon, say Kristianon kongregasyon so mantutultuloy a manlilingkor ed si Jehova tekep na ‘saksakey a puso tan kamarerwa.’ Balang Kristiano et manginanagnag na panaon, biskeg, tan materyal a kaykayarian da pian nipulong so maong a balita tan niyalibansa so intereses na Panarian na Dios.—Nengnengen so kahon ya atituloan na “Saray Paraan a Pinili na Arum Pian Mangiter.”
[Kahon ed pahina 6, 7]
SARAY PARAAN A PINILI NA ARUM PIAN MANGITER
KONTRIBUSYON PARAD SANKAMUNDOAN A KIMEY
Dakel so mangigagana, odino mangigegetar, na kantidad ya ipelag da ed saray kahon na kontribusyon ya atatakan na “Worldwide Work.”
Binulan ya ipapawit na saray kongregasyon irayan kantidad diad sangan opisina na saray Tasi nen Jehova a manlilingkor ed mismon bansa ra. Saray boluntaryon donasyon a kuarta et nayari met a direktan ipawit ed Watch Tower Bible and Tract Society of the Philippines, Inc., P.O. Box 2044, 1060 Manila, odino diad sangan opisina na saray Tasi nen Jehova a manlilingkor ed bansan kawalaan yo. Saray tseke ya ipawit ed address ed tagey so kaukolan ya ingaran ed “Watch Tower Society.” Nayari met ya idonasyon iray alahas odino arum ni ran ankablin bengatla. Nepeg ya itekep ed sarayan donasyon so sakey ya antikey a sulat a mangibabagan sakey iratan a direktan langkap.
UKSOYAN A KONDISYONAL A DONASYON
Nayari met ya imatalek ed Watch Tower Society so kuarta pian nausar ed sankamundoan a kimey. Bangbalet, satan so ipawil sano kerewen la na angimatalek. Parad kaaruman ya impormasyon, ipangasin mitalosan ed Treasurer’s Office diad address ya asalambit la.
NIPLANON PANANULONG
Likud ni ed saray direktan langkap a kuarta, walaray arum nin paraan na panangiter parad sankamundoan a serbisyo ed Panarian. Kabiangan ed saratan so:
Insurance: Say Watch Tower Society et nayarin iyan bilang benepisyaryo na life insurance policy odino retirement/pension plan.
Saray Deposito ed Bangko: Saray deposito ed bangko, kaletan nipaakar ed deposito, odino indibidual a deposito ed panretiro so nayarin imatalek odino ingaran ed Watch Tower Society, diad ipatey, unong ed saray kakaukolanen na lokal a bangko.
Saray Stock tan Bond: Saray stock tan bond so nayarin idonasyon ed Watch Tower Society, bilang direktan langkap.
Lote tan Abung: Say lote tan abung a nilako so nayarin iter balanglan direktan langkap odino no abung et ireserba itan a panayaman na angidonar, a makapantultuloy a manayam ditan legan a mabilay. Mitalosan ed sangan opisina diad bansan kawalaan yo sakbay ya iyalis so titulo na antokaman a lote tan abung.
Gift Annuity: Say gift annuity et sakey a reglamento a niyalis na sakey so kuarta odino saray seguridad diad aturon korporasyon ya uusaren na saray Tasi nen Jehova. Bilang kasalat, say angidonar, odino siopaman a pangipiyaan to, so makaawat na pihon bayar ya annuity a tinaon legay bilay. Say angidonar so makaawat na income-tax deduction diad samay taon a niyareglo so gift annuity.
Testamento tan Inmatalek: Saray kayarian odino kuarta so nayarin ipatawir ed Watch Tower Society diad panamegley na sakey a legal a testamento, odino nayarin iyan so Watch Tower Society bilang benepisyaryo na paknaan a pangimatalek. Say inmatalek a parad sakey a relihyoson organisasyon so nayarin mamawala na pigaran bentaha ed panag-buis.
Unong ya ipapatnag na terminon “niplanon pananulong,” sarayan nengneng na donasyon so kaslakan a mankakaukolan na panagplano ed biang na mangidonar. Pian natulongan iray indibidual a malabay ya ontulong ed sankamundoan a kimey na saray Tasi nen Jehova panamegley na pigaran nengneng na niplanon pananulong, niparaan so sakey a brosyur diad Ingles tan Español ya atituloan na Charitable Planning to Benefit Kingdom Service Worldwide. Sayan brosyur so inimprinta pian mangitarya na impormasyon nipaakar ed nanduruman paraan na nayarin pangiter ed saray langkap balanglan natan odino ipatawir diad ipatey. Kayari ran abasa so brosyur tan tinmupleg ed saray legal a managkonseho ra ed panag-buis, dakel la so makakatulong pian nasuportaan so sankamundoan a relihyoson kimey tan pananulong ed kaparan too na saray Tasi nen Jehova, tan nagagamoran da met so dakel a benepisyo ed buis legan a gagawaen da itan. Makala kayo na sayan brosyur panamegley na ikerew na kopya manlapud mismon Charitable Planning Office.
Parad kaaruman ya impormasyon, nayarian yoy mitalosan diad Charitable Planning Office, balanglan diad pansulat odino itawag ed telepono, diad address a nilista ed leksab, odino nayarin tawagan yo so sangan opisina na Saray Tasi nen Jehova a manlilingkor ed bansan kawalaan yo.
Charitable Planning Office
Watch Tower Bible and Tract Society of the Philippines, Inc.
186 Roosevelt Avenue, San Francisco del Monte
1105 Quezon City
Telepono: (02) 411-6090