Panon Kan Makapansungdo ed Ministeryo?

ASALIM ta la imay liknaan a singa labay mo lay ontunda ed kimey a panagpulong lapud pinasyan kesaw tan inkadismaya? Say graben isusumpa, kapagaan, problema’d bunigas, desdes na saray kaulop, odino kaandiay interes na saray pupulongan et nayarin manubok ed panagsungdo tayo. Balet, nonoten pay ehemplo nen Jesus. Asungdoan toy sankairapan iran subok “lapud gayaga a niyan ed arap to.” (Heb. 12:2) Amta to a no napaneknekan ton palso iray akusasyon ed Dios, napaliket toy puso nen Jehova.​—Uli. 27:11.

Diad pansusungdom ed ministeryo, napapaliket mo met so puso nen Jehova. Balet, panon to no walaray babeng a singa mangeekal lay ligsam ed ministeryo? Oniay inaksobi nen Krystyna, sakey a maedad la tan makapuy ni bunigas to: “Aliwa lan balo ed siak so makaliknay kesaw tan pinasyan pakadismaya. Saray problemak a tarok na itatatken, a singa say makapuy a bunigas tan kapagaan ed inagew-agew a panagbilay et mamabawas na seseg ko sagpaminsan.” Panon kan makapantultuloy ed ministeryo anggaman walaray ontan a babeng?

Aligen Iray Propeta

Pian makapantultuloy ed panagpulong a kimey, maabig no panggunaetan na saray matoor a manangipalapag na Panarian ya aligen so disposisyon na nonot na saray propeta. Imanoen pay alimbawa nen Jeremias. Sanen niganggan a manlingkor bilang propeta, sikatoy masuyat ni’d inmuna. Balet, diad masulok a 40 taon et asungdoan toy mairap ya asainmin to, lapud naaralan toy sigpot a manmatalek ed Dios.​—Jer. 1:6; 20:7-11.

Si Henryk et apaseseg ed ehemplo nen Jeremias. Inkuan to: “Diad masulok a 70 taon na ministeryok, asalik met so adismaya lapud reaksion na totoo, isusumpa ra, tan agda pangim-imano. Diad saratan a bekta, nononoten koy ehemplo nen Jeremias. Lapud panangaro to’d si Jehova tan mabiskeg ya espiritualidad to, sikatoy akapantultuloy ed kimey to bilang propeta.” (Jer. 1:17) Apabiskeg met si Rafał ed ehemplo nen Jeremias. Inkuan to: “Imbes a piimano toy inkasikaton dili tan say liknaan to, nanmatalek si Jeremias ed Dios. Sikatoy makpel a nantultuloy anggaman binusol na amin lawarin totoo. Ontan so iseseksek ko’d nonot ko.”

Say sananey nin propeta a say ehemplo to et akatulong ed dakel a makapansungdo et si Isaias. Impasakbay na Dios ed sikato ya ag-ondengel iray kanasyonan to. “Gawaen mo so puso na saya a baley a mataba, tan gawaen mo so saray layag da ya ambelat,” so inkuan nen Jehova. Labay kasin ibaga na saya ya anggapo lay kana na pansagpot nen Isaias? Andi, no diad panmoria nen Jehova! Sanen sikatoy tinuron magmaliw a propeta, inkuan to: “Wadia ak! Ibaki mo ak.” (Isa. 6:8-10) Nansiansiay Isaias ed asainmin to. Ontan met kasi ikiwas mo ed ganggan a manpulong?

Pian makapantultuloy tayo ed ministeryo anggaman ed kaandiay interes, a singa si Isaias, paliisan tayon iteen so imano tayo ed saray nasasagmak tayon negatibon reaksion na totoo. Oniay gagawaen nen Rafał pian natalonaan so pakakadismaya to: “Papaliisan kon isentroy imanok ed saray makapuy a komento na totoo. Antokamay reaksion na totoo ed teritorya, kanepegan da itan.” Inyarum nen Anna: “Agko aabuloyan a manbayag ed nonot ko so antokaman a bengatlan negatibo tan makapadismaya. Say akatulong ed siak et say panagpikasi tan panagteksto antis ak ya ompaway. Diad ontan et tampol a nanaekal iray negatibon kanonotan ko.”

Si propetan Ezequiel et nanlingkor ed limog na saray matewer ya akautibon Judio ed Babilonia. (Eze. 2:6) No ag-ipasabi na propeta so mensahe na Dios ed totoo tan paulyan to labat lan ompatey so marelmeng ya ag-apasakbayan, walay eebatan nen Ezequiel ed satan. Inkuan nen Jehova ed sikato: “Say dala to anapen ko ed limam.”​—Eze. 3:17, 18.

Panggugunaetan met nen Henryk ya aligen so awawey nen Ezequiel. Inkuan to: “Agko labay so mankasalanan ed dala na siopaman a too. Mablin bilay na totoo so nalalanor.” (Gawa 20:26, 27) Ontan met so liknaan nen Zbigniew: “Nakaukolan nen Ezequiel so mantultuloy antokamay isipen na arum. Akatulong iya ed siak pian moriaey panagpulong a singa ed panmoria na Manamalsa.”

Agmo Bukbukor

Tandaan mon agmo bukbukor sano mibibiang ka ed panagpulong a kimey. Singa si apostol Pablo, nibaga tayo met: “Sikami kakimeyan na Dios.” (1 Cor. 3:9) Si Krystyna, ya angaksobin no maminsan et nadidismaya, so angikuan na onia: “Satan so makasengeg no akin a naynay ak a mikakasi ed si Jehova ya ikdan to ak komon na biskeg. Et agto ak balot pinaulyanan.” On, kaukolan tayoy espiritu na Dios pian napabiskeg itayo ed ministeryo!​—Zac. 4:6.

Sano manpupulong itayo, ontulong met so masanton espiritu pian nipatnag tayo iray kalidad a kabiangan na “bunga na espiritu.” (Gal. 5:22, 23) Tan satan so ontulong ed sikatayon makapantultuloy ed kimey a panagpulong, antokaman so nagawa. Oniay naimano nen Henryk: “Makakatulong ed siak so panagpulong pian napaaligwas koy personalidad ko. Naaralan koy magmaliw a maanos tan makonsidera tan agtamtampol onsuko.” Say pansungdo ed ministeryo anggaman walaray nanduruman babeng et makatulong ed sikan nabayuboan tan nipatnag a nagkalalo so bunga na espiritu.

Iwawanwan nen Jehova iyan nikadkaduman kimey panamegley na saray anghel. (Apo. 14:6) Ibabaga na Biblia a walay “samplon libo ya samplon libo tan libolibo na libolibo” ya anghel. (Apo. 5:11) Diad panamegley na panangidirihe nen Jesus, susuportaan na saray anghel so totoo na Dios diad dalin. Ontan kasi sankanonot mo sano wala ka’d pulongan?

“Say pannodnonot ed katuaan a kaiba tayo iray anghel ed ministeryo et makapaseseg ed siak. Papablien koy pananulong da ya idadauloan nen Jehova tan si Jesus,” so inkuan nen Anna. Agaylan pribilehyo so pakapikimey ed saray matoor ya anghel!

Panon met a makatulong so pikimeyan ed arum a manangipalapag? Bendisyon a baleg so pakapilimog ed dakerakel a matoor iran Tasi nen Jehova. Andi-duaruwan apaneknekan mo lan tua iyan ibabagay Biblia: “Say balatyang utokan to so balatyang; ontan say too utokan to so lupa na kaaro to.”​—Uli. 27:17.

Say pikimey ed arum diad ministeryo et mangiiter ed sikatayo na alay abig a pankanawnawa a naobserbaan iray epektibon metodo a nayarin balo ni’d sikatayo. Oniay inkuan nen Elżbieta: “Say pipiulop ed nanduruman manangipalapag et mangiiter ed siak na saray pankanawnawan nipatnag so panangaro’d saray agagi ontan met ed saray totoon nakakatongtong tayo’d pulongan.” Kanian salim so mikimey ed nanduruman manangipalapag pian magmaliw a makapalikliket so ministeryom.

Asikasom so Sarilim

Pian napansiansiay ligsa tayo’d ministeryo, nakaukolan tayoy maong a panagplano, maabig a rotina ed personal a panag-aral, tan supisientin painawa odino ugip. Diad arum a panangibaga, nepeg tayon asikasoen so inkasikatayo diad espiritual tan pisikal.

Oniay ibabaga na Biblia: “Saray [“plano,” NW] na saray makuli arap ira lambengat ed inkadaakan.” (Uli. 21:5) Si Zygmunt, a natan et manedad lay 88 so nankuan: “Say maabig ya eskedyul so akatulong ed siak pian magmaliw a mabunga ed ministeryo. Iyoorganisak a maong so eskedyul ko pian dakel so nausar kon panaon ed ministeryo.”

Say malaknab a pikakabat ed Kasulatan so mamabiskeg tan mangiparaan ed sikatayo ed ministeryo. No panon a nakaukolan tayoy natagano ed pisikal pian makapantultuloy a makapankimey, nakaukolan tayo met so natagano ed espiritual pian makapantultuloy ed kimey a panagpulong. Say inagew-agew a panagbasa ed Salita na Dios tan pangan na “tagano ed panaon a kinepeg to” et mamakasil ed sikatayo diad ministeryo.​—Mat. 24:45-47.

Si Elżbieta et nanggawa na saray pananguman ed estiloy kabibilay to pian napaaligwas so ministeryo to. Inkuan to: “Talagan binawasan koy panagbantay na telebisyon pian mas dakel so panaon kon manparaan parad ministeryo. Kada labi, sano babasaen koy Biblia, nononoten ko iramay akatongtong ko ed teritorya. Manaanap ak na saray teksto tan artikulo a makatulong ed sikara.”

Makatulong so magenap a painawa pian agka mikekesaw tan niiter moy sankaabigan mo ed ministeryo. Diad biek a dapag, say alabas a panagligliwaan et walaay negatibon epekto ed kalidad na kimey mo. Oniay inkomento nen Andrzej, sakey a maseseg a manangipalapag: “No kulang so ugip, main-inomay so nabanalan, tan main-inomay la’d satan so pakaliknay dismaya. Gagawaen koy anggaay nayarian ko pian napaliisan itan.”​—Ecl. 4:6.

Anggaman mansasagpot tayon maong, karaklan ed napupulongan tayo et agmangawat ed maong a balita. Ingen, agbalot lingwanan nen Jehova so sagpot tayo. (Heb. 6:10) Anggaman dakel so agmalabay a mitongtong ed sikatayo, nayarin no kaalis tayo et pantongtongan day imbisita tayo. Say epekto na satan et nayarin singa ed samay nabasa tayo nipaakar ed si Ezequiel: Saray totoo et “amta ra naani a wala nensaman so propeta ed sikara.” (Eze. 2:5) Tua ya aliwan mainomay so ministeryo tayo, balet nagugunggonaan itayo ed satan, pati saray totoon ondedengel.

“Say pibibiang ed ministeryo et ontulong ed sikatayon nisulong so balon personalidad tan nipanengneng so panangaro ed Dios tan ed kaparan totoo,” so inkomento nen Zygmunt. Inyarum ni nen Andrzej: “Pribilehyon baleg so pakapibiang ed sayan manangisalbay bilay a kimey. Aglan balot naulit itan ed onian kalaknab odino ed oniaran kipapasen.” Diad pantultuloy mo ed ministeryo natan, makapan-ani ka met na daakan a bendisyon.​—2 Cor. 4:1, 2.

[Saray litrato ed pahina 31]

Say pangasikaso ed espiritual tan pisikal a pankaukolan tayo et makatulong ed sikatayon makapansungdo ed ministeryo