Tepetepet na Saray Manbabasa

No say lukon et inatey, nailaloan kasin paolien ni ed bilay?

Parad saramay agdan balot asali itan, nayarin agda amtay nalilikna na saramay akaeksperiensyay ontan. Wala ray ateng a pinasyay ermen da lapud satan. Sakey ya ina so aminliman inateyan na lukon. Balet asabi panaon, sikatoy awalaan na maligligsan duaran anak a lalaki. Ingen ta sankanonot to nin siansia iramay inatey a lukon to. Kabisado to no pigay taon la iramay inlukon to, no komon ta abilay ira. Nailaloan kasi na saray Kristiano a paolien iratan ya ugugaw?

Say simplin ebat ed satan a tepet et, agtayo amta. Anggapoy direktan ebat na Biblia nipaakar ed kioli na lukon a nakal odino ugaw ya inatey la nen inyanak. Anggaman ontan, walaray prinsipyo ed Salita na Dios a mikonektaan ed satan a tepet tan nayarin makapangiter na ligliwa.

Imanoen tayo pay duaran misiglaotan a tepet. Unona, diad panmoria nen Jehova, kapigan so igapo na bilay na too​—diad kianak odino diad bektan pertilisado lay iknol na bii? Komadua, panoy pangipapasen nen Jehova ed lukon​—kasin parad sikato et too la itan a walaay dilin personalidad, odino selula tan laman labat itan ya atugtugyop ed panag-anakan na bii? Saray prinsipyo na Biblia et mangiiter na malinew ya ebat ed saratan.

Malinew ya ipaparungtal na Mosaikon Ganggan a say igapo na bilay et aliwan diad kianak, noagta sakbay ni na satan. Panon tayon amta? Ipapanengneng na Mosaikon Ganggan a say toon akapatey na sakey a lukon et nayarin napapatey. Imanoen pa iyan ganggan: “Paiter so bilay ya ombayar ed bilay.”a (Exo. 21:22, 23) Kanian, say agni nianak ya ugaw et mabilay tan sakey lan too. Say impakaamta ed satan a katuaan so tinmulong ed saray minilyon a Kristiano ya ipulisay so panagpaekal, lapud amta ran seryoson kasalanan itan ed Dios.

On, say agni nianak ya ugaw et ipapasen lan mabilay, balet panon kaimportante ed si Jehova itan a bilay? Kakaukolanen na ganggan ya asalambit nen niman a napapatey so toon sengegay impatey na lukon. Malinew sirin a mabmabli ed Dios so bilay na agni nianak ya ugaw. Sakey ni, dakel so teksto ed Biblia a mangipapanengneng a parad si Jehova, say agni nianak ya ugaw et sakey lan too a walaan na dilin personalidad. Alimbawa, pinuyanan si Arin David a mangibaga ed si Jehova: “Sika sinakbongan mo ak ed eges nen inak. . . . Saray matam anengneng da so laman ko ya aliwa ni a nagnap; tan dia ed librom akasulat ya amin iraya, anggan saray agew na nigeter a nipaakar ed siak.”​—Sal. 139:13-16; Job 31:14, 15.

Nanenengneng met nen Jehova so ugali tan potensyal na agni nianak ya ugaw. Singa bilang, sanen manlalaban so lason a lukon nen Rebeca ya asawa nen Isaac, walay impropesiya nen Jehova nipaakar ed saratan ya ugugaw, a mangipapanengneng a natetebek To lay ugali ra a walaan na baleg ya epekto angga ni’d arapen.​—Gen. 25:22, 23; Roma 9:10-13.

Makapainteres met so nipaakar ed si Juan a Managbautismo. Oniay inkuan na Ebanghelyo: “Sanen nadngel nen Elizabet so impangibano nen Maria, ginmalaw so ugaw ed eges to; et si Elizabet napno na espiritu santo.” (Luc. 1:41) Sanen deneskribe na doktor a si Lucas iyan inkagawa, sikatoy angusar na Griegon salita a nayarin ontukoy ed balanglan lukon odino kapangiyanak. Satan met lanlamang a salita so inusar to sanen tinukoy toy ugaw nin Jesus a walad atotong.​—Luc. 2:12, 16; 18:15.

Natan ta naamtaan tayo la irayan amin, diad Biblia kasi et walay pandumaan na lukon tan kapangiyanak? Mapatnag ya anggapo. Tan mipakna itan ed saray adiskobre na modernon siensia. Alimbawa, naamtaan na saray researcher a makalikas la manayay lukon tan wala met lay reaksion to ed saray narerengel ton nagagawa. Agpankelawan sirin a say malukon et maap-apit lay liknaan to ed ugaw ya ombabaleg ed eges to.

Ontan met, nayarin nandurumay kabayag na pangilukon ed ugaw. Nengnengen tayo pa iyan alimbawa: Walay sakey ya inan inyanak toy lukon to a kulang ni na bulan. Kalabas na pigaran agew, inatey so ugaw. Sakey met ya ina so siam bulan ya angilukon ed anak to, balet ta inatey so ugaw antis nin nianak. Nailaloan kasi na samay inmunan ina a paolien so anak to lapud pinmaway itan a mabilay anggaman kulang ed bulan, bangta samay komaduan ina et anggapoy ontan a nailaloan to?

Bilang sumaryo, malinlinew sirin ya ibabangat na Biblia a say bilay et onggapo diad bektan pertilisado lay iknol na bii, tan papablien nen Jehova so agni nianak ya ugaw. Ipapasen to itan bilang sakey lan too a walaan na dilin personalidad. Nayarin moriaen na arum ya agmitunosan ed saray apantongtongan tayon katuaan ed Biblia so panisian anggapoy ilalon kioli na lukon ya inatey la’d eges. Sakey ni, say ontan a panmoria et nayarin ipasen dan panagleglemew ed tutumboken tayon prinsipyo na Biblia ya agnayari so aborsion. Satan a talindeg tayo et manunan akabase ed saratan a katuaan.

Nensaman, walaray tepet ed sayan magasin a singa papapawayen ton imposible so kioli na ugugaw ya inatey la’d eges. Alimbawa, no onsabi Paraiso, ipawil kasi na Dios ed panag-anakan na bii imay nakal a lukon to ya agano ni labat ya innginew? Lapud nagkalalon panag-aral, panagdalepdep, tan panagpikasi na Mananguley ya Ulop, amoria ran ag-akadepende ed saratan a bengatla so ilalon kioli. Inkuan nen Jesus: “Amin a bengabengatla nayarian ira na Dios.” (Mar. 10:27) Ipapanengneng na samay mismon agawa ed si Jesus a talagan tua itan ya imbaga to. Say bilay to ed tawen et inyalis ed panag-anakan na marikit, a diad panmoria na too et talagan imposiblin nagawa.

Kasin say kabaliksan na amin na saraya et ibabangat na Biblia a napaoli iray ugugaw ya inatey antis ya inyanak? Labay min idanet ya agdirektan eebatan na Biblia itan a tepet, kanian anggapoy basiyan tayon mangipilit ed opinyon tayo. Diad tua’y tua, dakerakel ni so nayarin itepet ed sayan pamaakaran. Balet mas maong no paliisan tayo lay nambabangil ya espikulasyon. Nia so segurado: Say akauley ed saya et si Jehova a Dios, a daakan ed maaron-kaabigan tan panangasi. (Sal. 86:15) Andi-duaruwan masimoon ton pipilaleken ya ekalen so ipapatey panamegley na kikioli. (Job 14:14,15) Makapanmatalek itayo a lawas ton gagawaen so duga. Paabigen toy amin ya ot-ot tayo ed emosyon a naeksperiensya tayo’d sayan marelmeng a sistema na bengabengatla, diad maaron pangiwanwan to ed Anak to a “maneral na saray gawa na Diablo.”​—1 Juan 3:8.

[Saray paimano ed leksab]

[Litrato ed pahina 13]

Paabigen nen Jehova so amin ya ot-ot ed emosyon